5
1 ဒိကနၣ်, ကီၢ်အံၣ်စရ့လးအပှၤဂီၢ်မုၢ်ဧၢ, ယသးဝံၣ်တၢ်ဘၣ်မိၣ်ဘၣ်မးအထါအံၤလၢသုဂီၢ်လီၤ.
2 ကီၢ်အံၣ်စရ့လးအပှၤမုၣ်လိၤဘိလီၤဃံၤလံ.
တဂဲၤဆၢထၢၣ်လၢၤနီတစုဘၣ်.
ဘၣ်တၢ်ညိကွံာ်တ့ၢ်အီၤလၢအကီၢ်ဒၣ်ဝဲအပူၤ
ဒီးပှၤဝံၣ်ဆၢထၢၣ်အီၤတအိၣ်ဘၣ်နီတဂၤဘၣ်.
3 တၢ်စိတၢ်ကမီၤခဲလၢာ်အယွၤစံးဝဲဒၣ်, ဝ့ၢ်တဝ့ၢ်လၢကီၢ်အံၣ်စရ့လးအပူၤ, ဆှၢထီၣ်အပှၤသုးဖိတကထိ, ဘၣ်ဆၣ်ဟဲက့ၤဒၣ်ထဲတကယၤဧိၤ, ဝ့ၢ်အဂၤတဝ့ၢ်ဆှၢထီၣ်ပှၤတကယၤ, ဘၣ်ဆၣ်ဟဲက့ၤဒၣ်ထဲအဂၤတဆံဧိၤန့ၣ်လီၤ.
4 ယွၤစံးဘၣ်ကီၢ်အံၣ်စရ့လးအပှၤဂီၢ်မုၢ်, ဃုယၤတက့ၢ်, ဒီးသုကမူလီၤ.
5 လဲၤဆူဝ့ၢ်ဘ့ၢ်ၡဘၤလၢတၢ်ဘူၣ်ထီၣ်ဘါထီၣ်အဂီၢ်တဂ့ၤ. ဂုာ်ကျဲးစၢးထံၣ်ယၤလၢဝ့ၢ်ဘ့ၤသ့လးတဂ့ၤ. ဝ့ၢ်ဘ့ၤသ့လးကကဲထီၣ်တၢ်ကလီကလီလီၤ. လဲၤဆူဝ့ၢ်ကံးလကၤလးတဂ့ၤ. အပှၤကလုာ်တဖၣ်ကဘၣ်တၢ်စံၣ်ညီၣ်ဃၣ်ကွံာ်ဆူတၢ်စိာ်မၢကဲကုၢ်အပူၤ န့ၣ်လီၤ.
6 ဃုယွၤတက့ၢ်ဒီးသုကမူလီၤ. သုမ့ၢ်တဃုအီၤဘၣ်ဒီးအဝဲကမၤပျီကွံာ်သုဒ်မ့ၣ်အူအီၣ်ကွံာ်ကီၢ် အံၣ်စရ့လးအပှၤဂီၢ်မုၢ်အသိးန့ၣ်လီၤ. မ့ၣ်အူကအီၣ်ကွံာ်ဝ့ၢ် ဘ့ၤသ့လးအပှၤဂီၢ်မုၢ်, ဒီးပှၤလၢကမၤလီၤပံာ်ကွံာ်အီၤတအိၣ်နီတဂၤဘၣ်.
7 သုဝဲလၢအဘိးကဒါကွံာ်တၢ်တီတၢ်လိၤဆူတၢ်အခၣ်ဒီးတၢၤကွံာ် တၢ်မ့ၢ်တၢ်တီဆူဟီၣ်ခိၣ်လိၤသ့ၣ်ဧၢ, သုဘၣ်တၢ်စံၣ်ညီၣ်ဃၣ်သုလီၤ.
8 ယွၤတ့လီၤဆၣ်တဖၣ်,
ဆၣ်ဒၢမုၢ်ဒီးဆၣ်ယိးမါလီၤ.
လဲလိာ်ကွံာ်ဝဲတၢ်ခံးတၢ်နၤဆူမုၢ်နံၤအတၢ်ကပီၤ
ဒီးမုၢ်နံၤဆူမုၢ်နၤန့ၣ်လီၤ.
အဝဲကိးန့ၢ်ပီၣ်လဲၣ်အထံဒီးလူလီၤအီၤလၢ ဟီၣ်ခိၣ်အဖီခိၣ်လီၤ.
အမံၤမ့ၢ်ယွၤလီၤ.
9 အဝဲဒုးလီၤဘၣ်တၢ်ဟးဂီၤလၢပှၤအဂံၢ်ဆူၣ်ဘါဆူၣ်ဒီးအတိာ်ဧိၤ တာ်ဧိၤတဖၣ်အဖီခိၣ်လီၤ.
10 သုဝဲသ့ၣ်အံၤ, သုသးဟ့ကယဲၢ်ပှၤလၢအတၤတၢ်တတီတလိၤဒီးကတိၤ တၢ်မ့ၢ်တၢ်တီလၢကွီၢ်ဘျီၣ်ပူၤန့ၣ်လီၤ.
11 သုမၤအၢမၤနးတ့ၢ်လံပှၤဖှီၣ်ဖိယာ်ဖိဒီးဂုာ် ဆူၣ်ပျီဆူၣ်အဘုဧိၤဟုဧိၤလီၤ. မၤသးဒ်န့ၣ်ဒီး, သုတအိၣ်ဘၣ်လၢဟံၣ်တဖၣ်လၢသုမၤအီၤလၢလၢၢ်ဂ့ၤ မ့ၢ်ဂ့ၤ, သုတအီဘၣ်စပံးထံဟဲလၢစပံးလီၢ်အဃံအလၤလၢသုသူၣ်လီၤဖျး လီၤမ့ၢ်ဂ့ၤန့ၣ်ဘၣ်.
12 ယသ့ၣ်ညါသုတၢ်ဒဲးဘးတဖၣ်အၢဝဲသီ ဝဲဆံးဒိၣ်လဲၣ်ဒီးသုမၤတ့ၢ်တၢ်သရူးကမၣ်တဖၣ်ဆံးအါလဲၣ်န့ၣ် လီၤ. သုမၤအၢမၤနးပှၤတီပှၤလိၤ, ဟံးန့ၢ်ခိၣ်ဖးလာ်ဆှိးတဖၣ်ဒီး တြီပှၤဖှီၣ်ဖိယာ်ဖိလၢအကဒိးန့ၢ်တၢ်စံၣ်ညီၣ်တီလၢကွီၢ် ဘျီၣ်တဖၣ်အပူၤန့ၣ်လီၤ.
13 မၤသးဒ်န့ၣ်ဒီး, ပှၤလၢအကူၣ်တၢ်သ့န့ၣ်ကအိၣ်ဃိကလာ်လၢတၢ် အကတီၢ်ဒ်သိးအံၤအပူၤန့ၣ်လီၤ. အဂ့ၢ်ဒ်အံၤ, မ့ၢ်တၢ်အကတီၢ်လၢအအၢလီၤ.
14 ဒ်သိးသုကမူဒီးဃုတၢ်ဂ့ၤတက့ၢ်. ဃုတၢ်အၢတဂ့ၤ. မၤသးဒ်န့ၣ်ဒီး, ယွၤ, တၢ်သုးမုၢ်ဂီၢ်မုၢ်အကစၢ်ယွၤကအိၣ်ဒီးသု, ဒ်သုစံးတ့ၢ်အသိးန့ၣ်လီၤ.
15 သးဟ့တၢ်အၢဒီးအဲၣ်တၢ်ဂ့ၤ, ဒီးဒုးအိၣ်ဂၢၢ်ဆိးကျၢၤတၢ်စံၣ် ညီၣ်တီလၢကွီၢ်ဘျီၣ်တဖၣ်အပူၤတက့ၢ်. ဘၣ်တဘၣ်ယွၤတၢ်သုးမုၢ်ဂီၢ်မုၢ်အကစၢ်ကသးကညီၤအပှၤဂီၢ်မုၢ် တဖၣ်လၢအအိၣ်မူတ့ၢ်ဒံးအပူၤန့ၣ်လီၤ.
16 မၤသးဒ်န့ၣ်ဒီး, တၢ်စိတၢ်ကမီၤခဲလၢာ်အယွၤ, သ့တၢ်လၢာ်ကစၢ်စံးဝဲဒၣ်, တၢ်ဟီၣ်တၢ်ယၢၤဒီးတၢ်သူၣ်အုးသးအုးအတၢ်ကိးပသူတဖၣ်ကအိၣ်လၢ ဝ့ၢ်အကျဲတဖၣ်အပူၤလီၤ. ပှၤထူစံာ်ဖိတဖၣ်ဒၣ်လဲာ်ကဘၣ်တၢ်ကိးအီၤဒ်သိးကအုၣ်တၢ်သံအထါ ဃုာ်ဒီးပှၤဘၣ်တၢ်ဟ့ၣ်ဘူးဟ့ၣ်လဲအီၤလၢကအုၣ်တၢ်တဖၣ်လီၤ.
17 လၢကယဲၢ်စပံးလီၢ်ခဲလၢာ်အပူၤန့ၣ်တၢ်ဟီၣ်ပသူကအိၣ်ဝဲလီၤ. တၢ်ခဲလၢာ်အံၤကမၤအသးမ့ၢ်လၢယဟဲဒ်သိးယကဟဲစံၣ်ညီၣ်သု အဃိန့ၣ်လီၤ. ယွၤစံးတ့ၢ်ဝဲဒၣ်လီၤ.
18 ပှၤလၢအဆၢန့ၢ်ဘၣ်ယွၤအမုၢ်တနံၤန့ၣ်သ့ၣ်ဧၢ, သုဘၣ်အဖှီၣ်လီၤ. မုၢ်တနံၤန့ၣ်ကမၤဂ့ၤသုမနုၤလဲၣ်. အဝဲန့ၣ်ကမ့ၢ်တၢ်ခံးတၢ်နၤလၢသုဂီၢ်လီၤ. တမ့ၢ်ဘၣ်တၢ်ကပီၤဘၣ်.
19 ကမၤအသးဒ်ပှၤတဂၤဃ့ၢ်ကွံာ်လၢခ့ယုၢ်တဒုအအိၣ်, ဒီးဘၣ်သဂၢၢ်လိာ်အသးဒီးတၤသူတဒုအသိး, မ့တမ့ၢ်ဘၣ်ဒီးဒ်ပှၤတဂၤက့ၤနုာ်လၢဟံၣ်ပူၤ, ဒီးပာ်ထီၣ်အစုလၢတၢ်ဒူၣ် အလိၤအသိးလၢဂုၢ်တဘိကဖျးအီၤအဂီၢ်ဧိၤန့ၣ်လီၤ.
20 ယွၤအမုၢ်တနံၤကဟဲစိာ်တၢ်ခံးတၢ်နၤဒီးတမ့ၢ်ဘၣ်တၢ်ကပီၤဘၣ်. ကမ့ၢ်ဝဲတၢ်ခံးသူအမုၢ်တနံၤလၢတၢ်တကပီၤဘၣ်လ့ၤတက့ၤန့ၣ်လီၤ.
21 ယွၤစံးဝဲဒၣ်, ယသးဟ့သုတၢ်ဘူၣ်တၢ်ဘါအမူးတဖၣ်ဒီးယသးဘၣ် အၢအီၤလီၤ. ယသးစူၤအီၤတကဲဘၣ်.
22 တုၤသုဟဲစိာ်န့ၢ်ယၤတၢ်လုၢ်မ့ၣ်အူတဖၣ်ဒီးတၢ်လုၢ်ဘုဧိၤဟုဧိၤ တဖၣ်န့ၣ်ယတတူၢ်လိာ်ဘၣ်အီၤဘၣ်. ဒီးဆၣ်ဖိကီၢ်ဖိတဖၣ်လၢသုမၤဘီၣ်ထီၣ်တ့ၢ်အီၤလၢသုကဟဲစိာ် ဆူယအိၣ်ဒ်တၢ်မၤဘူၣ်တဖၣ်န့ၣ်, ယတတူၢ်လိာ်ဘၣ်အီၤဘၣ်.
23 ဆိကတီၢ်ကွံာ်သုတၢ်သးဝံၣ်ကံာ်နူၤကံာ်နၢ်တဖၣ်တက့ၢ်. ယတအဲၣ်ဒိးကနၣ်သုတနၢ်အသီၣ်ဘၣ်.
24 မ့မ့ၢ်, ပျဲတၢ်တီတၢ်လိၤယွၤလီၤဒ်ထံကျိဖိအသိးဒီးတၢ်မ့ၢ် တၢ်တီဒ်ထံမိၢ်ပှၢ်လၢအလီၤသံးတသ့ဘၣ်အသိးတက့ၢ်.
25 ကီၢ်အံၣ်စရ့လးအပှၤဂီၢ်မုၢ်ဧၢ, ယတဃ့သုလၢတၢ်လုၢ်တၢ်ပာ် တဖၣ်ဒီးတၢ်မၤဘူၣ်တဖၣ်, ဖဲယဆှၢတ့ၢ်သုခီဖျိပှၢ်မုၢ်ကနၢလၢအနံၣ်လွံၢ်ဆံအတီၢ်ပူၤ န့ၣ်ဘၣ်.
26 မ့မ့ၢ်ခဲကနံၣ်, မ့ၢ်လၢသုဘါထီၣ်တ့ၢ်တၢ်ဂီၤတၢ်ဖီၣ်တဖၣ်လၢအမ့ၢ်စၤကူး, သုစီၤပၤကစၢ်, ဒီးကံၣ်ယူၣ်, သုဆၣ်ဧိၤဖီဧိၤကစၢ်အဃိ, သုကဘၣ်လဲၤစိာ်တၢ်ဂီၤတၢ်ဖီၣ်တဖၣ်အံၤ,
27 ဖဲယကဆှၢလီၤသုဆူတၢ်စိာ်မၢကဲကုၢ်အလီၢ်ဆူကီၢ်အယံၤတဘ့ၣ်လၢ ဝ့ၢ်ဒၤမ့ၤစ့းအဘးခီန့ၣ်လီၤ. ယွၤ, လၢအမံၤမ့ၢ်သ့တၢ်လၢာ်ကစၢ်ယွၤစံးဝဲဒၣ်လီၤ.