26
1 စီၤပၤအကြံးပၤစံးဘၣ်စီၤပီလူး, “နအိၣ်ဒီးတၢ်ပျဲလၢနကစံးကတိၤတၢ်လၢနဂီၢ်ဒၣ်နဲလီၤ.” စီၤပီလူးယူာ်ထီၣ်အစုဒီးကတိၤဒီဒၣ်အသးဒ်လၢလာ်အသိး လီၤ.
2 “စီၤပၤအကြံးပၤဧၢ, မုၢ်တနံၤညါအံၤယကဘၣ်ကတိၤဒီဒၣ်ယသး လၢနမဲာ်ညါထီဒါတၢ်ကမၣ်ခဲလၢာ်လၢပှၤယူဒၤဖိပာ်ဝဲလၢယလိၤ အဃိ, ယထံၣ်လီၤယသးလၢယမ့ၢ်ပှၤဘၣ်ဆိၣ်ဂ့ၤတဂၤလီၤ.
3 ယဘၣ်ဆိၣ်ဂ့ၤယဲလီၤဆီဒၣ်တၢ် မ့ၢ်လၢနသ့ၣ်ညါနဲပှၤယူဒၤ ဖိအလုၢ်အလၢ်ဒီးအတၢ်ဂ့ၢ်တၢ်ကျိၤအကီအခဲတဖၣ်ခဲလၢာ် ဂ့ၤဂ့ၤဘၣ်ဘၣ်အဃိလီၤ. လၢတၢ်န့ၣ်အဃိ, ယဃ့ကညးနၤဒ်သိးနကဒိကနၣ်ယတၢ်စံးတၢ်ကတိၤ လၢတၢ်သူၣ်စူၤသးစူၤအပူၤန့ၣ်လီၤ.
4 လၢယသးစၢ်လံၤလံၤယအိၣ်မူယဲဒ်လဲၣ်န့ၣ်, ပှၤယူဒၤဖိကိးဂၤဒဲး သ့ၣ်ညါဝဲလီၤ. အဝဲသ့ၣ် သ့ၣ်ညါဝဲယတၢ်အိၣ်မူဒီကတီၢ်ညါ စးထီၣ်လၢယအိၣ်မူဖဲယထံယကီၢ်ဒၣ်ယဲဒီးလၢခံက့ၤဖဲဝ့ၢ် ယရူၤၡလ့ၣ်န့ၣ်လီၤ.
5 အဝဲသ့ၣ်မ့ၢ်သးဆူၣ်လၢအကအုၣ်အသးလၢယဂ့ၢ်န့ၣ်, အဝဲသ့ၣ် သ့ၣ်ညါတ့ၢ်ဝဲယံာ်တ့ၢ်မးလၢယဘၣ်ဃးဒီးပှၤဖၤရံၤၡဲတဖၣ်, ပှၤလၢအဟံးဃာ်တၢ်ဘူၣ်တၢ်ဘါအတၢ်သိၣ်တၢ်သီအဃံး ကတၢၢ်တဖုန့ၣ်လီၤ.
6 မ့ၢ်လၢယအိၣ်ဒီးတၢ်မုၢ်လၢ်လၢတၢ်စံးပာ်လၢကစၢ်ယွၤဟ့ၣ် လီၤတ့ၢ်ပမိၢ်ပၢ်ဖံဖုလၢပျၢၤတဖၣ်အဃိ, ခဲကနံၣ်အံၤယဆၢထၢၣ်ယဲဖဲအံၤလၢတၢ်သမံသမိးယၤအဂီၢ်လီၤ.
7 မ့ၢ်တၢ်စံးပာ်တမံၤဃီလၢပပှၤကလုာ်တဆံခံဒူၣ်လၢာ်, လၢအဘူၣ်ထီၣ်ဘါထီၣ်ကစၢ်ယွၤလၢမုၢ်ဆါဒီးမုၢ်နၤ, မုၢ်လၢ်ဝဲန့ၣ်လီၤ. ကစၢ်စီၤပၤဧၢ, ပှၤယူဒၤဖိတဖၣ်ပာ် တၢ်ကမၣ်လၢယလိၤန့ၣ်, မ့ၢ်ဒၣ်လၢတၢ်မုၢ်လၢ်တမံၤအံၤအဃိလီၤ.
8 ဘၣ်မနုၤအဃိသုဝဲသုတနာ်လၢကစၢ်ယွၤဒုးဂဲၤဆၢထၢၣ် သမူထီၣ်က့ၤပှၤသံန့ၣ်လဲၣ်.
9 ယနီၢ်ကစၢ်ဒၣ်ယဲယဆိကမိၣ်တ့ၢ်လၢယကဘၣ်ဂုာ်ကျဲးစၢးထီဒါ ပှၤနစၤရ့းဖိယ့ၣ်ၡူးအမံၤဖဲတၢ်သ့အိၣ်ဒီးယၤန့ၣ်လီၤ.
10 အဝဲအံၤမ့ၢ်တၢ်လၢယမၤတ့ၢ်ယဲဖဲဝ့ၢ်ယရူၤၡလ့ၣ်န့ၣ်လီၤ. ယဒိးန့ၢ်ဘၣ်တၢ်စိတၢ်ကမီၤလၢပှၤလုၢ်တၢ်အခိၣ်အဒိၣ်တဖၣ် အအိၣ်, ဒီးဒၢနုာ်ကစၢ်ယွၤအပှၤစီဆှံအါဂၤဆူဃိာ်ပူၤလီၤ. ဒီးဖဲအဝဲသ့ၣ်ဘၣ်တၢ်စံၣ်ညီၣ်သံအီၤန့ၣ်, ယပာ်ဖျါယတၢ်ဘၣ် ယသးစ့ၢ်ကီးန့ၣ်လီၤ.
11 အဆၢကတီၢ်အိၣ်ဝဲအါဘျီဖဲယဒုးဘၣ်အဝဲသ့ၣ်တၢ်စံၣ်ညီၣ် လၢဘူၣ်ဘျီၣ်တဖၣ်အပူၤဒီးဂုာ်ကျဲးစၢးမၤယဲဒ်သိးအဝဲသ့ၣ် ကညိကွံာ်အတၢ်စူၢ်တၢ်နာ်န့ၣ်လီၤ. ယသးထီၣ်ဘၣ်အဝဲသ့ၣ်တုၤဒၣ်လဲာ်ယလဲၤဆူဝ့ၢ်အဂၤတဖၣ် ဒ်သိးယကမၤအၢမၤနးအဝဲသ့ၣ်န့ၣ်လီၤ.
(မၤတၢ်.၉:၁-၁၉; ၂၂:၆-၁၆)
12 လၢယကမၤတၢ်တမံၤအံၤအဂီၢ်န့ၣ်, ယလဲၤယဲဆူဝ့ၢ်ဒၤမ့ၤစ့းအိၣ်ဃုာ်ဒီးပှၤလုၢ်တၢ်အခိၣ် အဒိၣ်တဖၣ်အတၢ်ဟ့ၣ်စိဟ့ၣ်ကမီၤဒီးအတၢ်မၢလီၤယၤန့ၣ်လီၤ.
13 လၢကျဲဖဲမုၢ်ထူၣ်အကတီၢ်န့ၣ်, ကစၢ်စီၤပၤဧၢ, ယထံၣ်တၢ်ကပီၤလၢအကပီၤဒိၣ်န့ၢ်မုၢ်တဖျၢၣ်ဟဲကပီၤလီၤလၢမူခိၣ် ဝးတရံးယၤဒီးပှၤလၢအလဲၤတၢ်ဒီးယၤတဖၣ်လီၤ.
14 ပဝဲကိးဂၤဒဲးပလီၤတဲာ်လၢဟီၣ်ခိၣ်လိၤဒီးယနၢ်ဟူတၢ် အကလုၢ်ကတိၤတၢ်ဒီးယၤလၢဧ့ၤဘြံၤအကျိာ်, ‘စီၤစီလူးဧၢ, စီၤစီလူးဧၢ, နမၤအၢမၤနးယၤဘၣ်မနုၤအဃိလဲၣ်. နမၤဘၣ်ဒိလီၤက့ၤနသးခီဖျိနမၤဆၢက့ၤတၢ်ဒ်ကျီၢ်တဒုထူဆၢကဒါက့ၤ အကစၢ်အသိးန့ၣ်လီၤ.’
15 ယသံကွၢ်ယဲ, ‘ကစၢ်ဧၢ, နမ့ၢ်မတၤလဲၣ်.’ ဒီးကစၢ်န့ၣ်စံးဘၣ်ယၤ, ‘ယမ့ၢ်ယ့ၣ်ၡူးလၢနမၤအၢမၤနးအီၤတဂၤလီၤ.
16 ဘၣ်ဆၣ်ဒီးဂဲၤဆၢထၢၣ်တက့ၢ်. ယလီၣ်ဖျါထီၣ်ယသးလၢနမဲာ်ညါဒ်သိးယကဃုထၢထီၣ်နၤဒ်ယခ့ ယပှၤအသိးန့ၣ်လီၤ. နကဘၣ်စံးဘၣ်တဲဘၣ်ပှၤအဂၤတဖၣ်တၢ်လၢနထံၣ် ဘၣ်လၢယၤတနံၤအံၤဒ်လဲၣ်အဂ့ၢ်ဒီးတၢ်လၢယကဒုးနဲၣ်နၤလၢခံ န့ၣ်လီၤ.
17 ယကမၤထူၣ်ဖျဲးထီၣ်နၤလၢပှၤအံၣ်စရ့လးဖိအစုပူၤဒီး လၢပှၤကလုာ်ဂၤလၢယကဆှၢနၤဆူအအိၣ်တဖၣ်အစုပူၤ န့ၣ်လီၤ.
18 နကဘၣ်အိးထီၣ်အဝဲသ့ၣ်အမဲာ်ချံဒီးဃၣ်ကွံာ်အဝဲသ့ၣ် လၢတၢ်ခံးတၢ်နၤဆူတၢ်ကပီၤ, ဒီးလၢမုၣ်ကီၤလံၢ်အစိကမီၤ ဆူကစၢ်ယွၤအစိကမီၤ, ဒ်သိးခီဖျိအဝဲသ့ၣ်တဖၣ်အတၢ်စူၢ် တၢ်နာ်လၢယပူၤန့ၣ်, အဝဲသ့ၣ်အတၢ်ကမၣ်ကဘၣ်တၢ်ပျၢ် ကွံာ်အီၤ, ဒီးကဒိးန့ၢ်ဘၣ်အလီၢ်လၢယွၤအပှၤဃုထၢဖိတဖၣ် အကျါန့ၣ်လီၤ.’
19 ဒီးလၢတၢ်န့ၣ်အဃိ, စီၤပၤအကြံးပၤဧၢ, ယတိၢ်န့ၢ်ဒီးမၤထွဲတၢ်အကလုၢ်လၢယနၢ်ဟူဘၣ်ယဲခီဖျိတၢ်ထံၣ် တၢ်လၢညါခီလၢအဟဲလီၤလၢမူခိၣ်န့ၣ်လီၤ.
20 ယစံၣ်တဲၤတဲလီၤတၢ်အဆိကတၢၢ်လၢဝ့ၢ်ဒၤမ့ၤစ့းအပူၤဒီး လၢဝ့ၢ်ယရူၤၡလ့ၣ်အပူၤ, အန့ၣ်ဝံၤအလီၢ်ခံလၢကီၢ်ယူဒၤဒီဘ့ၣ်ညါဒီးလၢပှၤကလုာ်ဂၤ တဖၣ်အသိးအကျါ, ဒီးသဆၣ်ထီၣ်အဝဲသ့ၣ်အခံဒ်သိးအကပီၢ်ယၢ်လီၤက့ၤအသးလၢ အတၢ်ဒဲးဘးတဖၣ်, ဒီးဃၣ်လိၤက့ၤအသးဆူကစၢ်ယွၤအအိၣ်ဒီးမၤတၢ်သ့ၣ်တဖၣ် လၢအကအုၣ်အသးလၢအဝဲသ့ၣ်ပီၢ်ယၢ်လီၤတ့ၢ်လံအသး အဂ့ၢ်န့ၣ်လီၤ.
21 မ့ၢ်လၢတၢ်ဂ့ၢ်အံၤအဃိ, ပှၤယူဒၤဖိတဖၣ်ဖီၣ်ဃာ်ယၤဖဲယအိၣ်လၢတၢ်လုၢ်ဟံၣ်အပူၤ, ဒီးဂုာ်ကျဲးစၢးမၤသံယၤန့ၣ်လီၤ.
22 ဘၣ်ဆၣ်ဒီးတုၤလၢမုၢ်တနံၤညါအံၤကစၢ်ယွၤမၤစၢၤတ့ၢ်ယၤ, ဒီးလၢတၢ်န့ၣ်အဃိယဆၢထၢၣ်ဖဲအံၤဒီးဟ့ၣ်ယတၢ်အုၣ် ယသးဆူပှၤကိးဂၤဒဲး, ဒိၣ်မ့ၢ်ဂ့ၤ, ဆံးမ့ၢ်ဂ့ၤန့ၣ်လီၤ. တၢ်လၢယစံးကတိၤယဲလၢအဂ့ၢ်န့ၣ်, မ့ၢ်တၢ်တမံၤဃီလၢဝံတဖၣ်ဒီးစီၤမိၤၡ့စံးတ့ၢ်ဝဲလၢအကမၤ အသး,
23 လၢခရံာ်ကဘၣ်တူၢ်တၢ်ဒီးကဲထီၣ်ပှၤအဆိကတၢၢ်တဂၤလၢ အကဂဲၤဆၢထၢၣ်သမူထီၣ်က့ၤ, ပှၤလၢအကဘိးဘၣ်သ့ၣ်ညါပှၤယူဒၤဖိဒီးပှၤကလုာ်ဂၤ တဖၣ်လၢတၢ်ကပီၤဘၣ်ဃးဒီးတၢ်အုၣ်က့ၤခီၣ်က့ၤအဂ့ၢ်န့ၣ်လီၤ.”
24 ဖဲစီၤပီလူးကတိၤဒီဒၣ်အသးဒ်အံၤအဖၢမုၢ်န့ၣ်, စီၤဖ့စတူးကိးဃါအီၤလၢအကလုၢ်ဖးဒိၣ်, “စီၤပီလူးဧၢ, နပျုၢ်လီၤ. နတၢ်မၤလိမၤဒိးအဒိၣ်အထီဒုးပျုၢ်နၤလံ.”
25 စီၤပီလူးစံးဆၢဝဲ, “ယတပျုၢ်ဘၣ်. တၢ်ဒိၣ်ကစၢ်စီၤဖ့စတူးဧၢ, တၢ်ကတိၤလၢယကတိၤယဲတဖၣ်အံၤမ့ၢ်တၢ်မ့ၢ်တၢ်တီသပှၢ် ကတၢၢ်န့ၣ်လီၤ.
26 စီၤပၤအကြံးပၤဧၢ, ယကတိၤတၢ်ဒီးနၤလၢတၢ်သူၣ်ဒူသးဒူ အပူၤသ့ဝဲလီၤ. အဂ့ၢ်ဒ်အံၤ, နသ့ၣ်ညါဘၣ်ဃးတၢ်ဂ့ၢ်သ့ၣ်တဖၣ် အံၤန့ၣ်လီၤ. ယနာ်သပှၢ်ကတၢၢ်လၢနပာ်သူၣ်ပာ်သးတ့ၢ်နဲလၢ တၢ်ဂ့ၢ်တဖၣ်အံၤကိးမံၤဒဲးလီၤ. အဂ့ၢ်ဒ်အံၤ, တၢ်ဂ့ၢ်လၢအမၤအသးအံၤတမၤအသးလၢတၢ်သနၢၣ်န့ၣ်ဘၣ်.
27 စီၤပၤအကြံးပၤဧၢ, မ့ၢ်နနာ်ဝံတဖၣ်စ့ၢ်ကီးဧါ. ယသ့ၣ်ညါလၢ နနာ်လီၤ.”
28 စီၤအကြံးပၤစံးဘၣ်စီၤပီလူး, “လၢတၢ်ဆၢကတီၢ်ဖုၣ်ကိာ်ဖိအပူၤ အံၤန့ၣ်, မ့ၢ်နဆိကမိၣ်လၢနကဒုးကဲထီၣ်ယၤပှၤခရံာ်ဖိတဂၤန့ၣ်ဧါ.”
29 စီၤပီလူးစံးဆၢဝဲ, “လၢအဆၢကတီၢ်ဖုၣ်ကိာ်ဖိအပူၤမ့ၢ်ဂ့ၤ, လၢဆၢကတီၢ်ဖးယံာ်အပူၤမ့ၢ်ဂ့ၤ, မ့တမ့ၢ်ဘၣ်လၢထးပျံၤအတၢ်စၢဃာ်အံၤဘၣ်ဒီးယတၢ်ထု ကဖၣ်ကစၢ်ယွၤမ့ၢ်ဒ်သိးနၤဒီးပှၤဂၤလၢအနၢ်ဟူယတၢ်စံး တၢ်ကတိၤလၢမုၢ်မဆါတနံၤအံၤခဲလၢာ်, ကကဲထီၣ်ဒ်ယၤ အသိးန့ၣ်လီၤ.”
30 တုၤနုၤတစုစီၤပၤ, ပဒိၣ်ဖးဒိၣ်, နီၢ်ဘ့ၢ်နံက့ၤဒီးပှၤအဂၤခဲလၢာ်ဂဲၤ ဆၢထၢၣ်,
31 ဒီးဖဲအဝဲသ့ၣ်ဟးထီၣ်ဝံၤအလီၢ်ခံန့ၣ်, စံးလိာ်အသးတဂၤဒီးတဂၤ, “ပှၤတဂၤအံၤတမၤတ့ၢ်တၢ်လၢအကြၢး ဒီးတၢ်သံမ့ၢ်ဂ့ၤ, တၢ်ဒၢနုာ်အီၤလၢဃိာ်ပူၤမ့ၢ်ဂ့ၤနီတမံၤဘၣ်.”
32 ဒီးစီၤအကြံးပၤစံးဘၣ်စီၤဖ့စတူး, “ပှၤတဂၤအံၤ, မ့တမ့ၢ်လၢအပတံထီၣ်တ့ၢ်တၢ်ဒ်သိးစီၤပၤဖးဒိၣ်ကစံၣ်ညီၣ်န့ၢ် အတၢ်ဂ့ၢ်ဘၣ်ဒီး, တၢ်ပျၢ်ဖျဲးကွံာ်အီၤကသ့တ့ၢ်ဝဲလံလီၤ.”