27
1 ဒီးစီၤဒၤဝံးစံးလၢအသးကံၢ်ပူၤ, ယသးကလၢာ်လၢ မုၢ်တနံၤနံၤလၢစီၤစီလူးအစုပူၤလီၤ. တၢ်ဂ့ၤလၢယဂီၢ် အိၣ်ထဲယဃ့ၢ်ပူၤဖျဲးတၢ်ချ့ချ့, ဆူပှၤဖလ့ၡသးဖိအကီၢ် ပူၤလီၤ. ဒီးစီၤစီလူးတကွၢ်လၢ်လၢၤဘၣ်ယကျဲဘၣ်,ဒီး တဃုလၢၤဘၣ်ယၤလၢ အံၣ်စရ့လးအကီၢ်ဃၢၤတဖၣ် ဘၣ်, ဒီးယကပူၤဖျဲးဒီးအစုပူၤလီၤ.
2 ဒီးစီၤဒၤဝံးဂဲၤဆၢထၢၣ်, ဒီးလဲၤခီဂာ်တၢ်ဒီးပှၤကညီ ဃုကယၤလၢအအိၣ်ဒီးအီၤဆူ ကၤသးအစီၤပၤစီၤမၤ ဧိးအဖိခွါစီၤအၤကံၣ်အအိၣ်လီၤ.
3 ဒီးစီၤဒၤဝံးအိၣ်ဝဲဆိးဝဲ ဒီးစီၤအၤကံၣ်လၢကၤသးအ ပူၤ,အဝဲဒၣ်ဒီးအပှၤကညီတဖၣ်, တဂၤဒီးအပှၤဟံၣ်ဖိ, တဂၤဒီးအပှၤဟံၣ်ဖိလီၤ. စီၤဒၤဝံးအိၣ်ဒီးအမါခံဂၤ,ပှၤ ယံးစရ့လးဖိနီၢ်အဃံနိၣ်, ဒီးပှၤကၢ်မ့ၤလးဖိနီၢ်အဘံၤ ကါယံးလး, စီၤနၤဘလးအမါန့ၣ်လီၤ.
4 ဒီးပှၤစံးဘၣ်စီၤစီလူးလၢ စီၤဒၤဝံးဃ့ၢ်ဆူကၤသးအ ပူၤ, ဒီးတဃုလၢၤဘၣ်အီၤဘၣ်.
5 ဒီးစီၤဒၤဝံးစံးဘၣ်စီၤအၤကံၣ်, ယမ့ၢ်ဘၣ်တၢ်ဘျုးတၢ် ဖှိၣ်လၢနမဲာ်ညါဒီး, ဟ့ၣ်လီၤယလီၢ်လၢတဝီတပူၤပူၤ လၢပှၢ်လၢ်ကျါ, ဒ်သိးယကအိၣ်ဖဲန့ၣ်တက့ၢ်.အဂ့ၢ်ဒ် အံၤ, နခ့နပှၤကအိၣ်ဒီးနၤ လၢစီၤပၤအဝ့ၢ်ပူၤန့ၣ်မ့ၢ် အဘၣ်မနုၤလဲၣ်.
6 ဒီးစီၤအၤကံၣ်ဟ့ၣ်လီၤအီၤလၢ စံကလးလၢမုၢ်တနံၤ န့ၣ်လီၤ. မၤသးဒ်န့ၣ်ဒီးစံကလးဘၣ်ဃးဒီး ယူဒၤအ စီၤပၤတဖၣ်တုၤမုၢ်မဆါတနံၤအံၤလီၤ.
7 ဒီးမုၢ်နံၤတဖၣ်လၢ စီၤဒၤဝံးအိၣ်ဝဲဆိးဝဲလၢပှၤဖလ့ ၡသးဖိအကီၢ်ပူၤန့ၣ် အိၣ်ဝဲတနံၣ်ဒီးလွံၢ်လါလီၤ.
8 ဒီးစီၤဒၤဝံးဒီးအပှၤကညီ လဲၤနုာ်လၢပှၤကရှူၢ်ဖိအ ကျါ, ဒီးပှၤက့စ့ၢ်ဖိအကျါ, ဒီးလၢပှၤဧမၤလ့းဖိအကျါ လီၤ. အဂ့ၢ်ဒ်အံၤ,လၢပျၢၤအဝဲသ့ၣ်မ့ၢ်ပှၤကီၢ်ဖိဖဲနလဲၤ တၢ်ဆူရှူၢ်,ဒီးဆူကီၢ်အဲၤကူပတူးလီၤ.
9 ဒီးစီၤဒၤဝံးကျီကွံာ်ပှၤကီၢ်ဖိန့ၣ်, ဒီးတပာ်လီၤတဲာ် ဘၣ်ပိာ်မုၣ်ဂ့ၤ, ပိာ်ခွါဂ့ၤ,လၢအမူဝဲဘၣ်.ဒီးဟဲစိာ်ကွံာ် သိ,ဒီးမဲာ်တဲးလဲး,ဒီးဂီၤဖံး, ဒီးကသ့ၣ်ယီၤ,ဒီးကီၤလၤ အူး, ဒီးတၢ်အကူအသိးသ့ၣ်တဖၣ်, ဒီးဟဲက့ၤကဒါ က့ၤဒီးဟဲဝဲဆူစီၤအၤကံၣ်အအိၣ်လီၤ.
10 ဒီးစီၤအၤကံၣ်စံးဝဲဒၣ်, သုမၤဘၢၣ်ဖျိတၢ်လၢမုၢ်မဆါ တနံၤအံၤဖဲလဲၣ်ခီလဲၣ်. ဒီးစီၤဒၤဝံးစံးဝဲဒၣ်,လၢယူဒၤ ကလံၤထံးတခီ, ဒီးလၢပှၤယရၤဃမအ့လးဖိ အက လံၤထံးတခီ, ဒီးလၢပှၤက့ၣ်ဖိအကလံၤထံးတခီလီၤ.
11 ဒီးပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ,စီၤဒၤဝံးတဒုးမူဘၣ် အီၤ ဒ်သိးအကဟဲဆူကၤသးဘၣ်. စံးဝဲဒၣ်, ကဒုး နဲၣ်ဘၣ်ဖုးတၢ်လၢပဂ့ၢ်ပကျိၤ,ဒီးစံး, စီၤဒၤဝံးမၤဒ်န့ၣ် လီၤ. ဒီးအလုၢ်အလၢ်အိၣ်ဝဲဒ်န့ၣ်ထီဘိ ဖဲအအိၣ်ဝဲ လၢပှၤဖလ့ၡသးဖိအကီၢ်ပူၤလီၤ.
12 ဒီးစီၤအၤကံၣ်န့ၣ် နာ်စီၤဒၤဝံး, ဒီးစံးဝဲဒၣ်,မ့ၢ်အမၢ အံၣ်စရ့လးအပှၤတကလုာ်ဒၣ်ဝဲ သးဘၣ်အၢအီၤသ ပှၢ်တၢၢ်လီၤ. မၤသးဒ်န့ၣ်ဒီးကကဲထီၣ်ဝဲလၢယခ့ယ ပှၤလီၤထူလီၤယိာ်လီၤ.