7
1 ဒီးတုၤစီၤၡလိၤမိၤ ဘါထုကဖၣ်တၢ်ဝံၤဒီး, မ့ၣ်အူဟဲ လီၤလၢမူခိၣ်, ဒီးအီၣ်ကွံာ်တၢ်လုၢ်မ့ၣ်အူ, ဒီးတၢ်လုၢ် တဖၣ်, ဒီးယွၤအလၤကပီၤပှဲၤဟံၣ်န့ၣ်လီၤ.
2 ဒီးပှၤလုၢ်တၢ်အဒိၣ်လဲၤနုာ်လၢ ယွၤအဟံၣ်ပူၤတသ့ ဘၣ်. အဂ့ၢ်ဒ်အံၤ, ယွၤအလၤကပီၤပှဲၤယွၤအဟံၣ်လီၤ.
3 ဒီးတုၤပှၤအံၣ်စရ့လးဖိခဲလၢာ် ထံၣ်ဘၣ်ဝဲလၢမ့ၣ်အူ ဟဲလီၤ, ဒီးယွၤအလၤအကပီၤအိၣ်ဝဲလၢဟံၣ်အဖီခိၣ်ဒီး, ဆုးလီၤအခိၣ်ဒီးပိာ်လီၤအမဲာ်လၢ တၢ်ဒါလၢၢ်အဖီခိၣ်, ဒီးဘူၣ်ထီၣ်ဘါထီၣ်, ဒီးစံးထီၣ်ပတြၢၤယွၤလီၤ. အဂ့ၢ် ဒ်အံၤ, မ့ၢ်အဂ့ၤဝဲလီၤ. မ့ၢ်အဘျုးအဖှိၣ်အိၣ်ဝဲလီၤထူလီၤ ယိာ်အဂ့ၢ်လီၤ.
4 ဒီးစီၤပၤ, ဒီးပှၤဂီၢ်မုၢ်ခဲလၢာ်လုၢ်တၢ်လုၢ်လၢယွၤအမဲာ် ညါလီၤ.
5 ဒီးစီၤၡလိၤမိၤလုၢ်တၢ်လုၢ်ဂီၤဖံး ခံကလးခံ ကထိ, ဒီးသိတကလီၤခံကလးလီၤ. ဒီးစီၤပၤ, ဒီးပှၤ အံၣ်စရ့လးဖိခဲလၢာ်ပာ်စီဆှံယွၤအဟံၣ်လီၤ.
6 ဒီးပှၤလုၢ်တၢ်အဒိၣ်တဖၣ် ခိးဝဲလၢ အတၢ်မၤအလီၢ်, ဒီးပှၤလ့ၤဝံဖိအိၣ်ဒီး ယွၤအဒံၣ်ဒၢပီၤဒွါလၢစီၤပၤဒၤဝံးတ့ ဝဲဒ်သိးအကစံးထီၣ်ပတြၢၤယွၤ, (အဂ့ၢ်ဒ်အံၤ, အဘျုး အဖှိၣ်အိၣ်ဝဲ လီၤထူလီၤယိာ်လီၤ), ဖဲစီၤဒၤဝံးစံးထီၣ်ပ တြၢၤတၢ်လၢအမၤတၢ်, ဒီးပှၤလုၢ်တၢ်အဒိၣ်တဖၣ်အူကွဲၤ လၢအမဲာ်ညါ, ဒီးအံၣ်စရ့လးခဲလၢာ်ဆၢထၢၣ်ဝဲလီၤ.
7 ဒီးတၢ်လၢမုၢ်တနံၤန့ၣ် စီၤၡလိၤမိၤပာ်စီဆှံဂၢၤလၢအ သးကံၢ်ပူၤလၢအအိၣ်ဝဲလၢ ယွၤအဟံၣ်အမဲာ်ညါလီၤ. အဂ့ၢ်ဒ်အံၤ, လုၢ်တၢ်လုၢ်မ့ၣ်အူ, ဒီးတၢ်လုၢ်မၤဃူမၤဖိး အသိဖဲန့ၣ်လီၤ. အဂ့ၢ်ဒ်အံၤ, တၢ်လုၢ်လီၢ်တိၢ်လၢစီၤၡ လိၤမိၤတ့ဝဲတဖျၢၣ်န့ၣ် တတြီၢ်ဘၣ်တၢ်လုၢ်မ့ၣ်အူ, ဒီး တၢ်မၤဘူၣ်ကိၣ်, ဒီးတၢ်အသိသ့ၣ်တဖၣ်ဘၣ်.
8 အကတီၢ်ဖဲန့ၣ် စီၤၡလိၤမိၤမၤဘူၣ်နွံနံၤ, ဒီးအံၣ်စရ့ လးခဲလၢာ်အိၣ်ဒီးအီၤ, တၢ်အိၣ်ဖှိၣ်ဖးဒိၣ်လၢတၢ်ဟဲနုာ် လၢဃမါသးပၢၢ်လၢအဲၤကူပတူးအထံကျိလီၤ.
9 ဒီးဃိးနံၤတနံၤန့ၣ် ဒုးအိၣ်ဖှိၣ်တၢ်အိၣ်ဖှိၣ်လီၤ. အဂ့ၢ် ဒ်အံၤ, မၤတၢ်ပာ်စီဆှံတၢ်လုၢ်လီၢ်န့ၣ်နွံနံၤ, ဒီးမၤတၢ် မၤဘူၣ်နွံနံၤန့ၣ်လီၤ.
10 ဒီးလါနွံလါတလါ, ဒီးခံဆံသၢနံၤတနံၤန့ၣ် ပျၢ်ပှၤဂီၢ် မုၢ်ဆူအဒဲပူၤလၢအသူၣ်ခုအသးခု, ဒီးလၢအသူၣ်မုာ်အ သးမုာ်လၢကယဲၢ်တၢ်ဂ့ၤလၢ ယွၤမၤအခ့အပှၤစီၤဒၤဝံး, ဒီးစီၤၡလိၤမိၤ, ဒီးအပှၤဂီၢ်မုၢ်အံၣ်စရ့လးအဃိန့ၣ်လီၤ.
11 ဒီးစီၤၡလိၤမိၤမၤယွၤအဟံၣ်ဝံၤ, ဒီးစီၤပၤအဟံၣ်, ဒီး ကယဲၢ်တၢ်လၢအဟဲထီၣ်လၢစီၤၡလိၤမိၤအသး လၢအ ကမၤဝဲလၢယွၤအဟံၣ်ပူၤ, ဒီးလၢအဟံၣ်ဒၣ်ဝဲအပူၤန့ၣ် မၤဝဲ, ဒီးဘီၣ်ထီၣ်ညီထီၣ်ဝဲလီၤ.
12 ဒီးယွၤလီၣ်ဖျါထီၣ်အသးလၢ စီၤၡလိၤမိၤအမဲာ်ညါ လၢမုၢ်နၤ, ဒီးစံးဘၣ်အီၤ, နဘါထုကဖၣ်တၢ်န့ၣ်ယနၢ် ဟူလံ. ဒီးတၢ်အလီၢ်အံၤယဃုထၢလံလၢတၢ်လုၢ်အဟံၣ် လၢယဂီၢ်ဒၣ်ယဲလံ.
13 ယမ့ၢ်ကးတံာ်ဃာ် မူခိၣ်ဒ်သိးတၢ်သုတဟဲစူၤတဂ့ၤ, ယမ့ၢ်မၤလိာ်ဒွဲၣ်ဃၤကာ်ဒ်သိး အကအီၣ်ကွံာ်ထံဧိၤကီၢ် ဧိၤ, ဒီးယမ့ၢ်မၢလီၤတၢ်သံသတြိာ်လၢယပှၤဂီၢ်မုၢ်အကျါ ဒီး,
14 ယပှၤဂီၢ်မုၢ်လၢတၢ်ကိးအီၤလၢယမံၤန့ၣ်မ့ၢ်ဆီၣ်လီၤ အသး, ဒီးဘါထုကဖၣ်တၢ်, ဒီးဃုယမဲာ်, ဒီးဃၣ်ကဒါ က့ၤအသးလၢအကျဲအၢအအိၣ်ဒီး, ယကဒိကနၣ်လၢမူ ခိၣ်, ဒီးပျၢ်အတၢ်ဒဲးဘး, ဒီးမၤဘျါက့ၤအထံအကီၢ်လီၤ.
15 ခဲကနံၣ်အံၤယမဲာ်ကအိၣ်အိးထီၣ်အသး, ဒီးယနၢ်က ဒိကနၣ်တၢ်ထုကဖၣ်လၢတၢ်လီၢ်အံၤအပူၤလီၤ.
16 ဒီးခဲကနံၣ်အံၤယဃုထၢလံ, ဒီးယမၤစီဆှံလံဟံၣ်တ ဖျၢၣ်အံၤ, ဒ်သိးယမံၤကအိၣ်ဖဲအံၤလီၤထူလီၤယိာ်, ဒီး ယမဲာ်, ဒီးယသးကအိၣ်ဖဲန့ၣ်ကိးမုၢ်နံၤမုၢ်နၤဒဲးလီၤ.
17 ဒီးနမ့ၢ်လဲၤတၢ်လၢယမဲာ်ညါ, ဒ်နပၢ်စီၤဒၤဝံၤလဲၤတၢ် အသိး, ဒီးမၤကယဲၢ်တၢ်လၢယမၤလိာ်နၤ, ဒီးတိၢ်န့ၢ် ယတၢ်သိၣ်တၢ်သီ, ဒီးယတၢ်စံၣ်ညီၣ်တဖၣ်န့ၣ်ဒီး,
18 ယ ကဒုးအိၣ်ဂၢၢ်ဆိးကျၢၤနဘီနမုၢ်အလီၢ်ပစိာ် ဒ်ယအၢၣ် လီၤအီလီၤတၢ်ဒီးနပၢ်စီၤဒၤဝံးအသိး, ဒီးယစံး, ပှၤလၢ အဘၣ်ဃးဒီးနၤလၢ အံၣ်စရ့လးအလီၢ်ပစိာ်အဖီခိၣ်တ လၢာ်ဘၣ်ဘၣ်.
19 မ့မ့ၢ်သုမ့ၢ် ဃၣ်ကဒါက့ၤ, ဒီးလဲၤသဒၣ်ယတၢ်သိၣ် တၢ်သီ, ဒီးယတၢ်မၤလိာ်လၢယပာ်လီၤလၢသုမဲာ်ညါ, ဒီးလဲၤမၤကစၢ်အဂၤတဖၣ်အတၢ်, ဒီးဘူၣ်ထီၣ်ဘါထီၣ် ဝဲဒီး,
20 ယကထဲးထီၣ်အီၤလၢယကီၢ်ပူၤလၢယဟ့ၣ်လီၤ အီၤ, ဒီးဟံၣ်လၢယမၤစီဆှံအီၤလၢယမံၤအဃိတဖျၢၣ် အံၤ, ယကညိကွံာ်လၢယမဲာ်ညါ, ဒီးယကဒုးကဲထီၣ် အီၤလၢတၢ်ကတိၤဒိအလီၢ်, ဒီးတၢ်ဒုၣ်ဒွဲၣ်အလီၢ်လၢပှၤ ကိးကလုာ်ဒဲးအကျါလီၤ.
21 ဒီးဟံၣ်လၢအထီတဖျၢၣ်အံၤ ကယဲၢ်ပှၤလၢအလဲၤပူၤ ကွံာ်အီၤကပာ်အသးကမၢကမၣ်, ဒီးကစံး, ယွၤမၤတၢ် ဒ်အံၤလၢကီၢ်တဘ့ၣ်အံၤ, ဒီးလၢဟံၣ်တဖျၢၣ်အံၤမ့ၢ်အ ဘၣ်မနုၤလဲၣ်.
22 ဒီးပှၤကစံးဆၢဝဲ, မ့ၢ်အလဲၤသဒၣ်ယွၤအပၢ်တဖၣ်အ ကစၢ်လၢအဟဲစိာ်အီၤလၢ အဲၤကူပတူးအပူၤ, ဒီးဟံး န့ၢ်အကစၢ်အဂၤဒီးဘါထီၣ်ဝဲ, ဒီးမၤအတၢ်အဃိလီၤ. မၤသးဒ်န့ၣ်ဒီး ဒုးဟဲဘၣ်အီၤလၢကယဲၢ်တၢ်အၢအံၤ ခဲ လၢာ်လီၤ.