31
1 ဒီးတုၤတၢ်ခဲလၢာ်န့ၣ်ဝံၤဝဲဒီး, အံၣ်စရ့လးလၢအအိၣ် ဝဲခဲလၢာ်ဟးထီၣ်ဝဲဆူယူဒၤအဝ့ၢ်တဖၣ်အပူၤ, ဒီးမၤကၢ် လီၤကလဲတၢ်ဂီၤတဖၣ်, ဒီးကူာ်လီၤကွံာ်အရှ့ရၤတဖၣ်, ဒီးမၤလီၤပှီၢ်ကွံာ် တၢ်အလီၢ်ထီၣ်ထီတဖၣ်, ဒီးတၢ်လုၢ် လီၢ်တဖၣ်လၢယူဒၤဒီးဘံၣ်ယၤမံၣ်ခဲလၢာ်အပူၤ, ဒီးလၢ အ့ဖရဲၣ်ဒီးမနၤရှ့ၤအပူၤ, တုၤအမၤဟးဂီၤကွံာ်အီၤစီဖ့က လ့ၤခဲလၢာ်န့ၣ်လီၤ. ဒီးပှၤအံၣ်စရ့လးဖိက့ၤက့ၤတဂၤဆူ အတၢ်ဟံးဃာ်ဒၣ်ဝဲ, တဂၤဆူအတၢ်ဟံးဃာ်ဒၣ်ဝဲ စုာ် စုာ်, ဆူအဝ့ၢ်ဒၣ်ဝဲအပူၤလီၤ.
2 ဒီးစီၤဃံးစကံယၤ ပာ်လီၤပှၤလုၢ်တၢ်အဒိၣ်ဒီးပှၤလ့ၤ ဝံဖိတတီၤတတီၤ ဒ်အတီၤအသိး, တဂၤဒ်အတၢ်မၤအ သိးကိးဂၤဒဲး, ပှၤလုၢ်တၢ်အဒိၣ်, ဒီးပှၤလ့ၤဝံဖိလၢလုၢ် တၢ်လုၢ်မ့ၣ်အူအဂီၢ်, ဒီးလၢလုၢ်တၢ်လုၢ်မၤဃူမၤဖိး အ ဂီၢ်, ဒ်သိးအကမၤတၢ်အခ့အပှၤအတၢ်, ဒီးစံးထီၣ်ပ တြၢၤတၢ်, ဒီးသးဝံၣ်တၢ်လၢယွၤအဒဲတဖၣ် အတြဲၤပူၤ လီၤ.
3 ဒီးလၢစီၤပၤ အတၢ်ဖိတၢ်လံၤဒၣ်ဝဲအပူၤန့ၣ်, ပာ်လီၤ စီၤပၤအဂီၢ်လၢတၢ်လုၢ်မ့ၣ်အူအဂီၢ်, လၢဂီၤဒီးလၢဟါအ တၢ်လုၢ်မ့ၣ်အူအဂီၢ်, ဒီးတၢ်လုၢ်မ့ၣ်အူလၢအိၣ်ဘှံးနံၤအ ဂီၢ်, ဒီးလၢလါထီၣ်သီအနံၤအဂီၢ်, ဒီးလၢမၤဘူၣ်နံၤအ ဂီၢ်, ဒ်တၢ်ကွဲးအသးလၢယွၤအတၢ်သိၣ်တၢ်သီအပူၤအ သိးန့ၣ်လီၤ.
4 ဒီးမၤလိာ်ပှၤဂီၢ်မုၢ်လၢအအိၣ်ဝဲဆိးဝဲလၢ ယရူၤၡလ့ၣ် အပူၤဒ်သိးအကဟ့ၣ်ပှၤလုၢ်တၢ်အဒိၣ်, ဒီးပှၤလ့ၤဝံဖိလၢ အဂီၢ်လၢအသးကဆူၣ်ထီၣ်လၢ ယွၤအတၢ်သိၣ်တၢ်သီ အပူၤလီၤ.
5 ဒီးတုၤတၢ်မၤလိာ်ဟူထီသါလီၤဒီး, ပှၤအံၣ်စရ့လးဖိ ဟဲစိာ်တၤသၣ်ဆိဘၣ်ဃးဒီးဘုဧိၤဟုဧိၤ, စပံးထံ, ဒီးသိ, ဒီးကနဲစီ, ဒီးဟီၣ်ခိၣ်အကဝီၤအတၢ်အါထီၣ်တဖၣ်အါ အါကလဲာ်, ဒီးတၢ်ခဲလၢာ်အဆံဆဲၣ်ပူတပူ ဟဲစိာ်ဝဲအါ အါကလဲာ်လီၤ.
6 ဒီးပှၤအံၣ်စရ့လးဖိဒီး ပှၤယူဒၤဖိလၢအအိၣ်ဝဲလၢ ယူ ဒၤအဝ့ၢ်တဖၣ်အပူၤန့ၣ် ဟဲစိာ်စ့ၢ်ကီးဝဲလၢဂီၤဖံး, ဒီးသိ ဆံဆဲၣ်ဒုတဒု, ဒီးတၢ်စီဆှံလၢ တၢ်ပာ်စီဆှံလၢယွၤအ ဂီၢ်ဆံဆဲၣ်ပူတပူဒီးပာ်ဖှိၣ်ဝဲလၢတပူတပူလီၤ.
7 လၢလါသၢလါတလါန့ၣ် ပာ်ဖှိၣ်သီတၢ်အပူတဖၣ်အ ခီၣ်ထံး, ဒီးမၤဝံၤဝဲလၢလါနွံလါတလါလီၤ.
8 ဒီးတုၤစီၤဃံးစကံယၤ, ဒီးပဒိၣ်ဖးဒိၣ်တဖၣ်ဟဲဝဲ, ဒီး ထံၣ်ဘၣ်တၢ်ပူတဖၣ်ဒီး, ဒီးစံးထီၣ်ပတြၢၤယွၤ, ဒီးအပှၤ ဂီၢ်မုၢ်အံၣ်စရ့လးလီၤ.
9 ဒီးစီၤဃံးစကံယၤ သံကွၢ်ပှၤလုၢ်တၢ်အဒိၣ်, ဒီးပှၤလ့ၤ ဝံဖိလၢတၢ်ပူတဖၣ်အဂ့ၢ်အကျိၤလီၤ.
10 ဒီးစီၤစၤဒိးအပှၤဟံၣ်ဖိ ပှၤလုၢ်တၢ်အဒိၣ်အခိၣ် စီၤဧ စၤရယၤ စံးဆၢတၢ်ဒီးစံးဝဲဒၣ်, လၢပှၤဟဲစိာ်သီတၢ်မၤ ဘူၣ်ဆူယွၤအဟံၣ်ပူၤလံၤလံၤန့ၣ်ပတၢ်အီၣ်အါလံ, ဒီးပ ပာ်လီၤတဲာ်တၢ်လၢအအါလီၤ. အဂ့ၢ်ဒ်အံၤ, ယွၤဆိၣ်ဂ့ၤ လံအပှၤဂီၢ်မုၢ်လံ, ဒီးတၢ်လၢအအိၣ်လီၤတဲာ်တဖၣ်န့ၣ် မ့ၢ်တၢ်ဖိတၢ်လံၤဂီၢ်မုၢ်အံၤလီၤ.
11 ဒီးစီၤဃံးစကံယၤ မၤလိာ်ဝဲဒ်သိးပှၤကကတဲာ်ကတီၤ ဒၢးတဖၣ်လၢယွၤအဟံၣ်ပူၤ,ဒီးတၢ်ကတဲာ်ကတီၤဝဲလီၤ.
12 ဒီးပှၤဟဲစိာ်ဝဲတီတီ, လၢတၢ်မၤဘူၣ်တဖၣ်, ဒီးတၢ်ဆံ ဆဲၣ်ပူတပူတဖၣ်, ဒီးတၢ်ပာ်စီဆှံအသးတဖၣ်, ဒီးပှၤ လ့ၤဝံဖိစီၤကနၤနယၤမ့ၢ်ပှၤအခိၣ်လၢအဖီခိၣ်, ဒီးအဒီပုၢ် ဝဲၢ်စီၤၡံမံၤမ့ၢ်ပှၤခံဂၤတဂၤလီၤ.
13 ဒီးစီၤယဃံအ့လး, ဒီးစီၤဧၤစါစယၤ, ဒီးစီၤနၤဃး, ဒီး စီၤဧၤစၤအ့လး, ဒီးစီၤယရံမိး, ဒီးစီၤယိစဘး, ဒီးစီၤအလံၤ အ့လး, ဒီးစီၤယံးစမၤကယၤ, ဒီးစီၤမၤဃး, ဒီးစီၤဘနါ ယၤသ့ၣ်တဖၣ်မ့ၢ်ပှၤကွၢ်တၢ်ဖိတၢ်လံၤလၢစီၤကနၤနယၤ, ဒီးအဒီပုၢ်ဝဲၢ်စီၤၡံမံၤအစုအဖီလာ်, လၢစီၤပၤဃံးစကံယၤ, ဒီးယွၤအဟံၣ်အခိၣ်စီၤဧစၤရယၤ အတၢ်မၤလိာ်လီၤ.
14 ဒီးပှၤလ့ၤဝံဖိစီၤယံးမနၤအဖိခွါစီၤကိၤရ့, ပှၤပၢၤပဲတ ရီလၢမုၢ်ထီၣ်တခီတဂၤအိၣ်ဝဲလၢ တၢ်မၤဘူၣ်ဒၣ်ယွၤတ ဖၣ်အဖီခိၣ်ဒ်သိး အကနီၤဖးဟ့ၣ်တၢ်မၤဘူၣ်ယွၤတဖၣ်, ဒီးတၢ်စီဆှံကတၢၢ်တဖၣ်န့ၣ်လီၤ.
15 ဒီးလၢအဝဲဒၣ်အဖီလာ်န့ၣ် အိၣ်ဝဲလၢစီၤဧ့ၤဒ့ၣ်, ဒီးစီၤမံးနယၤမံၣ်, ဒီးစီၤယ့ၤရှူ, ဒီးစီၤၡမါယၤ, ဒီးစီၤအမၤရယၤ, ဒီးစီၤၡကါနယၤသ့ၣ်တဖၣ်လၢပှၤလုၢ်တၢ်အဒိၣ်အဝ့ၢ်ပူၤ, လၢအလီၢ်လၢတၢ်ပာ်အီၤဒ်သိးအကနီၤဖးဟ့ၣ်တၢ်လၢအဒီပုၢ်ဝဲၢ်တတီၤတတီၤ, အဒိၣ်ဒီးအဆံးလီၤ.-
16 လၢအဝဲသ့ၣ်အဖိခွါတဖၣ် အထူအထံးအမဲာ်ညါန့ၣ်, ပှၤလၢအသးပှၢ်သၢနံၣ်ဒီးအါန့ၢ်အန့ၣ်တက့ၢ်, ကယဲၢ် ပှၤလၢအဟဲနုာ်လၢ ယွၤအဟံၣ်ပူၤတဂၤလၢ်လၢ်န့ၣ်ဟ့ၣ် ဝဲအဂီၢ်တနံၤအဂီၢ်တနံၤအဂီၢ် လၢအမၤတၢ်လၢအတၢ် ကွၢ်အဃိဒ်အတီၤတတီၤတတီၤအသိးန့ၣ်လီၤ.
17 ဒီးဟ့ၣ် ဝဲလၢပှၤလၢပှၤလုၢ်တၢ်အဒိၣ်အကျါအထူအထံး, ဒ်အ ပၢ်အဟံၣ်အသိး, ဒီးပှၤလ့ၤဝံဖိလၢအသးပှၢ်အနံၣ်ခံဆံ ဒီးအါန့ၢ်အန့ၣ်တက့ၢ်လၢအတၢ်ကွၢ်အပူၤ ဒ်အတီၤတ တီၤတတီၤအသိးန့ၣ်လီၤ.
18 ဒီးလၢဖိဒံဖိသၣ်ခဲလၢာ်,အဖိအမါ, ဒီးအဖိခွါ, ဒီးအဖိမုၣ်သ့ၣ်တဖၣ်အထူအထံး လၢတၢ်အိၣ်ဖှိၣ်ခဲလၢာ်အကျါန့ၣ်လီၤ. အဂ့ၢ်ဒ်အံၤ, မၤ စီဆှံအသးလၢတၢ်စီဆှံအပူၤ လၢအလီၢ်လၢတၢ်ပာ်အီၤ လၢအပူၤလီၤ.
19 ဒီးပှၤလၢ စီၤအၤဟရိၣ်အဖိခွါအကျါ, ပှၤလုၢ်တၢ်အ ဒိၣ်တဖၣ်အိၣ်ဝဲလၢဟီၣ်ခိၣ်အကဝီၤတဖၣ်, လၢအဝ့ၢ်အ တၢ်အီၣ်ဆၣ်အလီၢ်, လၢဝ့ၢ်ကိးဖျၢၣ်ဒဲးအပူၤန့ၣ်, ပှၤလၢ ပစံးတ့ၢ်အမံၤသ့ၣ်တဖၣ်န့ၣ် ဟ့ၣ်ဝဲလၢအဂီၢ်လၢပှၤပိာ် ခွါခဲလၢာ်လၢပှၤလုၢ်တၢ်အဒိၣ်အကျါ, ဒီးလၢကယဲၢ်ပှၤ လၢတၢ်ဂံၢ်အထူအထံးလၢပှၤလ့ၤဝံဖိအကျါခဲလၢာ်လီၤ.
20 ဒီးစီၤဃံးစကံယၤ မၤတၢ်န့ၣ်လၢ ယူဒၤဖိခဲလၢာ်အ ကျါ, ဒီးမၤတၢ်လၢအဂ့ၤအဝါ, ဒီးအတီအလိၤ, ဒီးအ မ့ၢ်အတီလၢယွၤအကစၢ်အမဲာ်ညါလီၤ.
21 ဒီးကယဲၢ်တၢ်မၤလၢအမၤထီၣ်သီ လၢယွၤအဟံၣ်အ တၢ်မၤအပူၤ, ဒီးလၢတၢ်သိၣ်တၢ်သီအပူၤ, ဒီးလၢတၢ် မၤလိာ်အပူၤ, ဒ်သိးအကဃုအကစၢ်တမံၤလၢ်လၢ်န့ၣ် မၤဝဲလၢအသးဒီဖျၢၣ်ညါ, ဒီးဘီၣ်ထီၣ်ညီထီၣ်ဝဲလီၤ.