2
1 ဒီးစီၤၡလိၤမိၤစံးလၢ အကသူၣ်ဟံၣ်လၢယွၤအမံၤအ ဂီၢ်ဒီးအဟံၣ်လၢအဘီအမုၢ်အဂီၢ်လီၤ.
2 ဒီးစီၤၡလိၤမိၤဂံၢ်ဝဲလၢ ပှၤဝံတၢ်ယိးတၢ်ဖိနွံကလးလၢ အကဝံတၢ်ယိးတၢ်, ဒီးပှၤလၢအကကူာ်တၢ်လၢ အက စၢၢ်ကလိန့ၣ်ဃိးကလး, ဒီးပဒိၣ်တဖၣ်အိၣ်ဝဲလၢ အဖီ ခိၣ်သၢကထိဃုကယၤလီၤ.
3 ဒီးစီၤၡလိၤမိၤမၢလီၤတၢ်ဆူ စိၢ်အစီၤပၤဃူရၣ်, ဒီးစံး ဝဲဒၣ်, ဒ်နမၤတၢ်ဒီးယပၢ်စီၤဒၤဝံး, ဒီးဟ့ၣ်ယုၢ်အီၤလၢ သ့ၣ်ဆှိအ့ရ့း, ဒ်သိးအကသူၣ်ဟံၣ်လၢအကအိၣ်ကဆိး လၢအပူၤအသိးန့ၣ်မၤဒီးယၤတက့ၢ်.
4 ကွၢ်ကွၢ်ယသူၣ် ဟံၣ်လၢ ယွၤယကစၢ်အမံၤအဂီၢ်, ဒ်သိးယကပာ်စီဆှံ အီၤလၢအဂီၢ်, ဒ်သိးပှၤကဆိၣ်ကဲၤတၢ်နၢမူလၢအမဲာ်ညါ ဒီးလၢတၢ်ဂ့ၢ်အကိၣ်တထံၣ်ဃီအဂီၢ်, ဒီးလၢအကလုၢ် တၢ်လုၢ်မ့ၣ်အူလၢဂီၤလၢဟါ, လၢမုၢ်အိၣ်ဘှံးနံၤ, လၢ လါထီၣ်သီအနံၤ, ဒီးလၢယွၤပကစၢ် အတၢ်မၤဘူၣ်အ ဆၢအကတီၢ်တဖၣ်လီၤ. အဝဲန့ၣ်အိၣ်ဝဲဒီးအံၣ်စရ့လး လီၤထူလီၤယိာ်လီၤ.
5 ဒီးဟံၣ်လၢယသူၣ်န့ၣ်မ့ၢ်အဒိၣ်လီၤ. အဂ့ၢ်ဒ်အံၤယွၤ ပကစၢ်ဒိၣ်ဝဲလၢကစၢ်ခဲလၢာ်အဖီခိၣ်လီၤ.
6 ဒီးမ့ၢ်မတၤသူၣ်ဟံၣ်လၢအဂီၢ်သ့တဂၤလဲၣ်. အဂ့ၢ်ဒ် အံၤ, မူခိၣ်, ဒီးမူခိၣ်အထီကတၢၢ်တတြီၢ်ဘၣ်အီၤဘၣ်. မ့တမ့ၢ်ဘၣ်လၢ ပကဆိၣ်ကဲၤတၢ်နၢမူလၢအဂီၢ်ဘၣ်ဒီး ယဲဒၣ်အံၤ ယမ့ၢ်မတၤလၢယကသူၣ်န့ၢ်အီၤလၢဟံၣ်တ ဂၤလဲၣ်.
7 ဒီးခဲကနံၣ်အံၤမၢလီၤ ပှၤဆူယအိၣ်တဂၤ လၢအကူၣ် တၢ်သ့ဒ်သိးအကမၤတၢ်လၢထူ, ဒီးလၢစ့, ဒီးလၢတိၢ်, ဒီးလၢထး, ဒီးလၢတၢ်လုးတကုာ်, ဒီးလၢတၢ်ဂီၤ, ဒီး လၢတၢ်လါ, ဒီးကွဲးတၢ်ကွဲးသ့ဒ်သိးအကအိၣ်ဒီးပှၤကူၣ် တၢ်သ့တဖၣ်လၢအအိၣ်ဒီးယၤလၢယူဒၤအပူၤ, ဒီးလၢ ယရူၤၡလ့ၣ်အပူၤ လၢယပၢ်စီၤဒၤဝံးကတဲာ်ကတီၤဝဲန့ၣ် တက့ၢ်.
8 ဒီးဟ့ၣ်ယုၢ်ယၤလၢ သ့ၣ်ဆှိအ့ရ့းတဖၣ်, သ့ၣ်ဆှိတ ဖၣ်, ဒီးသ့ၣ်အလၤမူးလၢလဘၤနိၣ်အပူၤတက့ၢ်. (အဂ့ၢ် ဒ်အံၤ, ယသ့ၣ်ညါလၢ နခ့နပှၤကူာ်လီၤသ့ၣ်သ့လၢလ ဘၤနိၣ်အလိၤလီၤ.) ဒီးကွၢ်ကွၢ်, ယခ့ယပှၤကအိၣ်ဒီး နခ့နပှၤ,
9 ဒ်သိးအကကတဲာ်ကတီၤသ့ၣ်လၢယဂီၢ်အါ အါကလဲာ်လီၤ. အဂ့ၢ်ဒ်အံၤ, ဟံၣ်လၢယသူၣ်အီၤန့ၣ် ဒိၣ်ဝဲ, ဒီးလီၤလးဝဲလီၤ.
10 ဒီးကွၢ်ကွၢ်, ယကဟ့ၣ်လီၤနခ့နပှၤ, ပှၤကူာ်တၢ်ဖိ, ပှၤလၢအကူာ်သ့ၣ်တဖၣ်လၢဘုကၠူၣ်တိၢ်အသး အကိၢ် ခံကလး, ဒီးဘုမုယီၤအကိၢ်ခံကလး, ဒီးစပံးထံအဘၤ သးခံကလး, ဒီးသိအဘၤသးခံကလးလီၤ.
11 ဒီးစိၢ်အစီၤပၤစီၤဃူရၣ် စံးဆၢလၢလံာ်ပူၤလၢအဟ့ၣ် ယုၢ်စီၤၡလိၤမိၤ, မ့ၢ်ယွၤအဲၣ်အပှၤဂီၢ်မုၢ်ဒီး, ပာ်နၤလၢစီၤ ပၤလၢအဖီခိၣ်လီၤ.
12 ဒီးစီၤဃူရၣ်စံးဝဲဒၣ်, ယွၤအံၣ်စရ့ လးအကစၢ်လၢအတ့မူခိၣ်, ဒီးဟီၣ်ခိၣ်, လၢအဟ့ၣ်လီၤ စီၤပၤဒၤဝံးအဖိခွါလၢအကူၣ်တၢ်သ့, လၢအအိၣ်ဒီးအ သူၣ်ဆးဒီးအသးဆး, ဒီးနၢ်ပၢၢ်တၢ်ဒ်သိးအကသူၣ်ဟံၣ် လၢယွၤအဂီၢ်, ဒီးဟံၣ်လၢအဘီအမုၢ်အဂီၢ်တဂၤန့ၣ်မ်အ ဘၣ်တၢ်စံးထီၣ်ပတြၢၤအီၤတက့ၢ်.
13 ဒီးခဲကနံၣ်အံၤယမၢ လီၤပှၤကူၣ်တၢ်သ့, ဒီးနၢ်ပၢၢ်တၢ်စီၤဃူရၣ်အဘံ,
14 ပိာ် မုၣ်လၢဒၣ်အဖိမုၣ်တဖၣ်အကျါတဂၤအဖိခွါ, ဒီးအပၢ် မ့ၢ်ပှၤစိၢ်ဖိတဂၤ, မၤတၢ်သ့လၢထူ, ဒီးလၢစ့, လၢတိၢ်, လၢထး, လၢလၢၢ်, လၢသ့ၣ်, လၢတၢ်လုးတကုာ်, လၢ တၢ်လါ, ဒီးလၢတၢ်ဖှီဝါကဆှၣ်, ဒီးလၢတၢ်ဂီၤ, ဒီးလၢ အကကွဲးကယဲၢ်တၢ်ကွဲးဒီး ကူၣ်ထီၣ်ကယဲၢ်တၢ်ကူၣ်ဒ် သိးတၢ်ကဟ့ၣ်လီၤအီၤလၢအကအိၣ်ဒီး နပှၤကူၣ်တၢ်သ့ ဒီးနပၢ်ယကစၢ်စီၤဒၤဝံး အပှၤကူၣ်တၢ်သ့တဖၣ်န့ၣ်လီၤ.-
15 ဒီးခဲကနံၣ်အံၤဘုကၠူၣ်, ဒီးဘုမုယီၤ, ဒီးသိ, ဒီးစပံးထံလၢ ယကစၢ်ကတိၤလၢအဂ့ၢ်အကျိၤန့ၣ် မ်အဟ့ၣ်ယုၢ်အခ့ အပှၤတက့ၢ်.
16 ဒီးပကကူာ်လီၤသ့ၣ်လၢလဘၤနိၣ်အလိၤ ဖဲဒၣ်အဘၣ်နသး, ဒီးပကဟဲစိာ်လၢထိလၢပီၣ်လဲၣ်ပူၤ ဆူယၤဖိၤဆူနအိၣ်, ဒီးနကစိာ်ထီၣ်ဆူယရူၤၡလ့ၣ်လီၤ.
17 ဒီးစီၤၡလိၤမိၤဂံၢ် ကယဲၢ်ပှၤတခီဘီမုၢ်ဖိလၢအအိၣ်ဝဲလၢ ကီၢ်အံၣ်စရ့လးအပူၤ, ဒ်တၢ်ဂံၢ်လၢအပၢ်စီၤဒၤဝံးဂံၢ်ဝဲအ သိးန့ၣ်, ဒီးအိၣ်ဝဲတကလီၤ, ယဲၢ်ကလး, သၢကထိ, ဃုကယၤလီၤ.
18 ဒီးပာ်ပှၤနွံကလး, လၢအကဝံတၢ်ယိးတၢ်, ဒီးပှၤဃိး ကလးလၢအကူာ်တၢ်လၢ ကစၢၢ်ကလိ, ဒီးပဒိၣ်သၢက ထိဃုကယၤလၢအကမၢပှၤဂီၢ်မုၢ်မၤတၢ်လီၤ.