89
ပှၤအ့စရၤဃးဖိစီၤအ့သၣ်အသိၣ်တၢ်.
1 ယကသးဝံၣ်ထီၣ် ယွၤအဘျုးအဖှိၣ်လီၤထူလီၤယိာ်, ယကဘိးဘၣ်သ့ၣ်ညါ နတၢ်မ့ၢ်တၢ်တီလၢယထးခိၣ် လၢပှၤတစိၤဘၣ်တစိၤ တစိၤဘၣ်တစိၤလီၤ.
2 အဂ့ၢ် ဒ်အံၤ, ယစံးတ့ၢ်တၢ်ဘျုးတၢ်ဖှိၣ်ကအိၣ်ဂၢၢ်ဆိးကျၢၤ အစိၤစိၤအဃၣ်ဃၣ်လီၤ. လၢမူခိၣ်န့ၣ် နတၢ်မ့ၢ်တၢ် တီအိၣ်ဂၢၢ်ဆိးကျၢၤလၢအပူၤလီၤ.
3 ယအၢၣ်လီၤအီလီၤတၢ်ဒီး ယပှၤဃုထၢဖိတဂၤ, ယ ဆိၣ်တၢ်ဒီးယခ့ယပှၤစီၤဒၤဝံး,
4 ယကဒုးအိၣ်ဂၢၢ်ဆိး ကျၢၤနချံနသၣ်လီၤထူလီၤယိာ်, ဒီးဒုးအိၣ်နလီၢ်ပစိာ် အစိၤစိၤအဃၣ်ဃၣ်လီၤ. စ့လၤ.
5 ဒီးမူခိၣ်စံးထီၣ်ပတြၢၤနတၢ်လီၤလး, ယွၤဧၢ, နတၢ် မ့ၢ်တၢ်တီစ့ၢ်ကီးလၢပှၤစီဆှံအတၢ်အိၣ်ဖှိၣ်အပူၤလီၤ.
6 အဂ့ၢ်ဒ်အံၤ, မ့ၢ်မတၤအိၣ်လၢ မူခိၣ်ထဲသိး ဒီးယွၤ လဲၣ်, မ့ၢ်မတၤလီၤဂာ်ယွၤလၢ တၢ်အစိအကမီၤဖိအ ကျါန့ၣ်လဲၣ်.
7 ယွၤမ့ၢ်တၢ်ပျံၤအလီၢ်ဖးဒိၣ်လၢပှၤစီဆှံအတၢ်အိၣ်ဖှိၣ် အပူၤ, ဒီးတၢ်ပျံၤတၢ်ဖုးအလီၢ်လၢ ကယဲၢ်ပှၤလၢအ အိၣ်ဝးတရံးအီၤအဖီခိၣ်လီၤ.
8 ယွၤ, တၢ်သုးမုၢ်ဂီၢ်မုၢ်အကစၢ်ဧၢ, မ့ၢ်မတၤအိၣ်ဒီး အစိအကမီၤ, ဒ်နၤအသိးတဂၤလဲၣ်, ယွၤဧၢ, ဒီးန တၢ်မ့ၢ်တၢ်တီအိၣ်ဝးတရံးနၤလီၤ.
9 နပၢပီၣ်လဲၣ်အတၢထီၣ်တၢလီၤန့ၣ်လီၤ. တုၤအလ ပီထီၣ်ဒီးနဒုးအိၣ်ဂၢၢ်အီၤလီၤ.
10 နမၤလီၤကလဲရၤဃး ဒ်ပှၤလၢအဘၣ်တၢ်မၤသံအီၤအသိးန့ၣ်, နမၤလီၤပြံ လီၤပြါနဒုၣ်နဒါလၢနစုဆူၣ်လီၤ.
11 မူခိၣ်မ့ၢ်နတၢ်, ဟီၣ်ခိၣ်မ့ၢ်စ့ၢ်ကီးနတၢ်, လၢာ်ခိၣ်ဒီး တၢ်လၢအမၤပှဲၤအီၤန့ၣ် နပာ်လီၤအခီၣ်ထံးလီၤ.
12 တၢ် လၢကလံၤစိး, ဒီးတၢ်လၢကလံၤထံးန့ၣ် နတ့လီၤ အီၤလီၤ. တၤဘိၢ်ဒီးဃ့ရမိၣ်နၣ် သူၣ်ဖှံသးညီလၢန မံၤအပူၤလီၤ.
13 နစုဒုၣ်အိၣ်ဒီးအဂံၢ်ဆူၣ်ဘါဆူၣ်, နစုဆူၣ်, နစုထွဲ အိၣ်ထီၣ်ထီလီၤ.
14 နလီၢ်ပစိာ်အိၣ်ဝဲဆိးဝဲလၢတၢ်တီ တၢ်လိၤ, ဒီးတၢ်စံၣ်ညီၣ်အပူၤလီၤ. တၢ်ဘျုးတၢ်ဖှိၣ် ဒီးတၢ်မ့ၢ်တၢ်တီလဲၤလၢနမဲာ်ညါလီၤ.
15 ပှၤဂီၢ်မုၢ်လၢ အသ့ၣ်ညါတၢ်သးခုအသီၣ်န့ၣ် ဘၣ် ဆိၣ်ဂ့ၤဝဲလီၤ. အဝဲသ့ၣ်ကလဲၤ, ယွၤဧၢ, လၢနမဲာ် အတၢ်ကပီၤအပူၤလီၤ.
16 သူၣ်ဖှံသးညီလၢနမံၤအပူၤ ဒီနံၤညါ, ဒီးကထီၣ်ဘးလၢတၢ်ထီၣ်ထီလၢ နတၢ် တီတၢ်လိၤန့ၣ်လီၤ.
17 အဂ့ၢ်ဒ်အံၤ, နဲဒၣ်အံၤ နမ့ၢ် အဂံၢ်အဘါန့ၣ်အလၤကပီၤလီၤ. ဒီးမ့ၢ်လၢတၢ်ဘၣ်န သးအဃိဒီး, ပနၢၤပနၢ်ကထီၣ်ထီဝဲလီၤ.
18 အဂ့ၢ်ဒ် အံၤ, ပကတီၤတဘ့ၣ်န့ၣ်မ့ၢ်ယွၤ, ဒီးပစီၤပၤန့ၣ်မ့ၢ် အံၣ်စရ့လးအတၢ်စီဆှံတဂၤန့ၣ်လီၤ.
19 တုၤနုၤတစုနကတိၤတၢ်ဒီး နပှၤစီဆှံလၢတၢ်ထံၣ် လၢညါခီ, ဒီးနစံး, ယပာ်တၢ်မၤစၢၤလၢပှၤအဂံၢ်ဆူၣ် အဘါဆူၣ်တဂၤအလိၤလံ. ယပာ်ထီၣ်ထီပှၤဘၣ်တၢ် ဃုထၢအီၤလၢပှၤဂီၢ်မုၢ်အကျါလံ.
20 ယထံၣ်န့ၢ်ယခ့ ယပှၤစီၤဒၤဝံး, ယဖှူအီၤလၢယသိစီဆှံလံ.
21 ယစုက အိၣ်ဂၢၢ်ဆိးကျၢၤဒီးအဝဲဒၣ်လီၤ. ယစုဒုၣ်ကဒုးဆူၣ် ထီၣ်အီၤစ့ၢ်ကီးလီၤ.
22 တၢ်အဒုၣ်အဒါတဟးန့ၢ်ဘၣ် တၢ်လၢအီၤဘၣ်. ဒီးပှၤအၢပှၤသီဖိတမၤနးမၤဖှီၣ်ဘၣ် အီၤဘၣ်.
23 ဒီးယကတီၢ်လီၤဃံၤအဒုၣ်အဒါလၢအမဲာ် ညါ, ဒီးယကတီၢ်ပှၤလၢအသးဟ့အီၤလၢတၢ်နးတၢ် ဖှီၣ်လီၤ.
24 ဒီးယတၢ်မ့ၢ်တၢ်တီ, ဒီးယတၢ်ဘျုးတၢ်ဖှိၣ်ကအိၣ် ဒီးအီၤလီၤ. ဒီးအနၢၤကထီၣ်ထီလၢယမံၤလီၤ.
25 ဒီး ယကပာ်အစုလၢပီၣ်လဲၣ်အဖီခိၣ်, ဒီးအစုထွဲလၢထံ မိၢ်ပှၢ်တဖၣ်အဖီခိၣ်လီၤ.
26 အဝဲဒၣ်ကကိးထီၣ်ဆူယအိၣ်, နဲဒၣ်အံၤ, နမ့ၢ်ယ ပၢ်, ယကစၢ်, ဒီးတၢ်အုၣ်က့ၤခီၣ်က့ၤယၤအလၢၢ်လီၤ.
27 ယကပာ်အီၤလၢယဖိဝဲၢ်ကိစ့ၢ်ကီးလီၤ. ထီၣ်ထီန့ၢ် ဟီၣ်ခိၣ်အစီၤပၤတဖၣ်တက့ၢ်လီၤ.
28 ယဘျုးယဖှိၣ်န့ၣ် ယကပာ်လၢအဂီၢ် အစိၤစိၤအဃၣ်ဃၣ်, ဒီးယတၢ် အၢၣ်လီၤအီလီၤန့ၣ်ကအိၣ်ဂၢၢ်ဆိးကျၢၤဒီးအီၤန့ၣ်လီၤ.
29 ဒီးယကပာ်လီၤအချံအသၣ်လီၤထူလီၤယိာ်, ဒီးအ လီၢ်ပစိာ်န့ၣ် ဒ်မူခိၣ်အမုၢ်နံၤတဖၣ်အသိးန့ၣ်လီၤ.
30 အ ဖိတဖၣ်မ့ၢ်လဲၤသဒၣ်ယတၢ်သိၣ်တၢ်သီ, ဒီးတလဲၤ ဘၣ်လၢ ယတၢ်စံၣ်ညီၣ်အပူၤဘၣ်ဒီး,
31 မ့ၢ်လုၣ်သ့ၣ် ခါပတာ်ယကလုၢ်ကထါ, ဒီးမ့ၢ်တတိၢ်န့ၢ်ယတၢ်မၤ လိာ်ဘၣ်ဒီး
32 ယကအိၣ်သကိး အတၢ်ကမၣ်လၢနီၢ် တီၢ်, ဒီးအတၢ်အၢန့ၣ်လၢတၢ်တီၢ်အလီၢ်န့ၣ်လီၤ.
33 ဘၣ်ဆၣ်ဒီးယတဟံးန့ၢ်က့ၤဘၣ် ယဘျုးယဖှိၣ်လၢ အီၤတုၤအလၢာ်ဘၣ်. ဒီးယတပျဲဟးဂီၤယတၢ်မ့ၢ်တၢ် တီဘၣ်.
34 ယတမၤဟးဂီၤဘၣ်ယတၢ်အၢၣ်လီၤအီလီၤ ဘၣ်. ဒီးယတလဲက့ၤဘၣ် တၢ်လၢအထီၣ်ဖျဲးလၢယ ပျုၤပူၤဘၣ်.
35 ယဆိၣ်တၢ်တမံၤလၢယတၢ်စီဆှံအပူၤန့ၣ်, ယတက တိၤဘၣ်တၢ်ကဘျံးကဘျၣ်လၢစီၤဒၤဝံးဘၣ်.
36 အချံ အသၣ်ကအိၣ်လီၤထူလီၤယိာ်, ဒီးအလီၢ်ပစိာ်ဒ်မုၢ်အ သိးလၢယမဲာ်ညါလီၤ.
37 ဒ်လါအသိးန့ၣ်ကအိၣ်ဂၢၢ် ဆိးကျၢၤလီၤထူလီၤယိာ်, ဒီးဒ်တၢ်အုၣ်အသးအတီ လၢမူခိၣ်အသိးန့ၣ်လီၤ. စ့လၤ.
38 ဘၣ်ဆၣ်ဒီးနညိကွံာ်လံ, ဒီးသးဘၣ်အၢလံ, နသး ထီၣ်ဘၣ်နပှၤလၢနဖှူအီၤ,
39 နမၤဟးဂီၤနခ့နပှၤအတၢ် အၢၣ်လီၤအီလီၤ, နမၤဘၣ်အၢအခိၣ်သလုးပၢၢ်လၢ ဟီၣ်ခိၣ်,
40 နမၤဟးဂီၤအကရၢခဲလၢာ်, နမၤအိၣ်သ ယုၢ်လံအတိာ်ဧိၤတာ်ဧိၤလံ.
41 ကယဲၢ်ပှၤလၢအလဲၤပူၤကွံာ် တၢ်ခဲလၢာ်န့ၣ်ဂုာ်န့ၢ်အ တၢ်လီၤ. ကဲထီၣ်ဝဲလၢတၢ်ဒုၣ်ဒွဲၣ်အလီၢ်လၢပှၤအိၣ်ဝဲ ဆိးဝဲလၢအဃၢၤအဂီၢ်လီၤ.
42 နပာ်ထီၣ်ထီပှၤထီဒါ အီၤအစုထွဲ, နဒုးသးခုအဒုၣ်အဒါခဲလၢာ်လီၤ.
43 နဒုး ကၢၤစ့ၢ်ကီးအနးအကနၣ်,ဒီးနတဒုးအိၣ်ဂၢၢ်ဆိးကျၢၤ ဘၣ်အီၤလၢတၢ်ဒုးသုးအပူၤဘၣ်.
44 နမၤဟါမၢ်အက ယဲၢ်ကယူာ်, ဒီးမၤလီၤဃံၤအလီၢ်ပစိာ်ပၢၢ်လၢဟီၣ်ခိၣ် လီၤ.
45 နမၤစှၤလီၤအဖိၣ်သၣ်ခွါအမုၢ်နံၤတဖၣ်, နဒုး လုၣ်ဘၢအီၤလၢတၢ်မဲာ်ဆှးလီၤ. စ့လၤ.
46 ဆံးယံာ်လဲၣ်, ယွၤဧၢ, နကပာ်တဒၢနသးလီၤထူ လီၤယိာ်စ့ၢ်ကီးဧါ, နသးထီၣ်ကအီၣ်တၢ်ဒ်မ့ၣ်အူအ သိးန့ၣ်ဧါ.
47 ယဆၢယကတီၢ်ဖုၣ်ဆံးဒိၣ်လဲၣ်န့ၣ်သ့ၣ် နီၣ်ထီၣ်က့ၤတက့ၢ်. နတ့လီၤပှၤကညီဖိကလီကလီ န့ၣ်မ့ၢ်အဘၣ်မနုၤလဲၣ်.
48 ပှၤလၢအမူဝဲဒီး တထံၣ်ဘၣ်တၢ်သံဒ်သိး အကမၤ ပူၤမၤဖျဲးအသးသမူလၢပျုၤပူၤအစုမ့ၢ်မတၤတဂၤလဲၣ်.စ့လၤ.
49 ယွၤဧၢ, နတၢ်ဘျုးတၢ်ဖှိၣ် လၢအခီၣ်ထံးလၢနဆိၣ် တၢ်လၢအဂ့ၢ်အကျိၤဒီးစီၤဒၤဝံးလၢနတၢ်မ့ၢ်တၢ်တီန့ၣ် မ့ၢ်အအိၣ်ဖဲလဲၣ်.
50 သ့ၣ်နီၣ်ထီၣ်က့ၤတၢ်ဒုၣ်ဒွဲၣ် လၢအဘၣ်နခ့နပှၤတ ဖၣ်တက့ၢ်, ယွၤဧၢ. ယစိာ်ပှၤအါကလုာ်အတၢ်ဒုၣ် ဒွဲၣ်လၢယသးနါပှၢ်,
51 နဒုၣ်နဒါတဖၣ်အတၢ်ဒုၣ်ဒွဲၣ်, ယွၤဧၢ, လၢအဒုၣ်ဒွဲၣ်နပှၤဒိးဖှူအသးအခီၣ်အထွဲတၢ် န့ၣ်လီၤ.
52 မ်ယွၤဘၣ်တၢ်စံးထီၣ်ပတြၢၤလီၤထူလီၤယိာ်တက့ၢ်. အၤမ့ၣ်, ဒီးအၤမ့ၣ်.