86
စီၤဒၤဝံးအတၢ်ထုကဖၣ်.
1 ဒိးနနၢ်ယွၤဧၢ, ကနၣ်ယကလုၢ်တက့ၢ်. အဂ့ၢ်ဒ် အံၤ, ယဘၣ်နးဘၣ်ဖှီၣ်, ယဖှီၣ်န့ၢ်ယာ်ကဲလီၤ.
2 အံးလီၤကွၢ်လီၤယသးတက့ၢ်. အဂ့ၢ်ဒ်အံၤ, ယမ့ၢ်ပှၤလၢအယူးယီၣ်ယွၤလီၤ. ယကစၢ်နၤဧၢ, အုၣ်က့ၤ ခီၣ်က့ၤနခ့နပှၤလၢ အသန့ၤအသးလၢနၤတက့ၢ်.
3 သူၣ်ကညီၤသးကညီၤယၤတက့ၢ်, ကစၢ်ဧၢ, အဂ့ၢ်ဒ် အံၤ, ယကိးထီၣ်နၤကိးမုၢ်နံၤမုၢ်နၤဒဲးလီၤ.
4 မၤခုနခ့ နပှၤအသးတက့ၢ်. အဂ့ၢ်ဒ်အံၤ, ကစၢ်ဧၢ, ယစိာ် ထီၣ်ယသးဆူနၤလီၤ.
5 အဂ့ၢ်ဒ်အံၤ, ယွၤဧၢ, နဲဒၣ် အံၤနမ့ၢ်တၢ်ဂ့ၤ, ဒီးနပျၢ်ကွံာ်တၢ်ညီ, ဒီးနဘျုးနဖှိၣ် အါဝဲလၢကယဲၢ်ပှၤလၢအကိးထီၣ်နၤခဲလၢာ်အဂီၢ်လီၤ.
6 ယွၤဧၢ, ကနၣ်ယတၢ်ထုကဖၣ်, ဒီးဒိကနၣ်ယဃ့ ကညးတၢ်တက့ၢ်.
7 လၢယဘၣ်တၢ်ကိၢ်တၢ်ဂီၤအမုၢ် တနံၤန့ၣ် ယကကိးထီၣ်နၤလီၤ. အဂ့ၢ်ဒ်အံၤ, နက စံးဆၢယၤလီၤ.
8 ကစၢ်ဧၢ, လၢကစၢ်တဖၣ်အကျါန့ၣ်ပှၤဒ်နၤအသိးတ အိၣ်ဘၣ်, ဒီးဒ်နမၤတၢ်အသိးန့ၣ်တအိၣ်နီတမံၤဘၣ်.
9 ကယဲၢ်ပှၤကလုာ်တဖၣ် လၢနတ့အီၤခဲလၢာ်ကဟဲ, ဒီးဘူၣ်ထီၣ်ဘါထီၣ်လၢနမဲာ်ညါလီၤ, ကစၢ်ဧၢ, ဒီး ကမၤလၤကပီၤနမံၤလီၤ.
10 အဂ့ၢ်ဒ်အံၤ, နမ့ၢ်တၢ်အ ဒိၣ်, ဒီးမၤတၢ်လီၤလးလီၤ. နမ့ၢ်ယွၤတဂၤဃီလီၤ.
11 နဲၣ်လိယၤလၢနကျဲတက့ၢ်, ယွၤဧၢ, ယကလဲၤတၢ် လၢနတၢ်မ့ၢ်တၢ်တီအပူၤလီၤ. ဘိးထီၣ်ယသးလၢယ ကပျံၤနမံၤတက့ၢ်.
12 ယွၤယကစၢ်ဧၢ, ယစံးထီၣ်ပတြၢၤနမံၤလၢယသးဒီ ဖျၢၣ်ညါ, ဒီးယကမၤလၤကပီၤနမံၤလီၤထူလီၤယိာ် လီၤ.
13 အဂ့ၢ်ဒ်အံၤ, နမၤဘျုးမၤဖှိၣ်ယၤဒိၣ်မး, ဒီးန မၤပူၤမၤဖျဲးယၤလၢပျုၤယိာ်အပူၤလီၤ.
14 ယွၤဧၢ, ပှၤပာ်အသးထီၣ်ထီတဖၣ် ဂဲၤဆၢထၢၣ် ထီဒါယၤ, ဒီးပှၤမၤပျံၤမၤဖုးတၢ်အတၢ်အိၣ်ဖှိၣ်န့ၣ်ဃု ယသး, ဒီးတပာ်ဘၣ်နၤလၢအမဲာ်ညါဘၣ်.
15 ဘၣ် ဆၣ်ဒီးနဲဒၣ်, ယွၤဧၢ. နမ့ၢ်ကစၢ်တဂၤလၢအသးအိၣ် တၢ်, ဒီးသးကညီၤတၢ်, သးထီၣ်ကီ, ဒီးအိၣ်ဒီးတၢ် ဘျုးတၢ်ဖှိၣ်တၢ်မ့ၢ်တၢ်တီလၢအဒိၣ်အအါလီၤ.
16 ဃၣ်နသးဆူယအိၣ်, ဒီးသးကညီၤယၤတက့ၢ်.ဟ့ၣ် လီၤနဂံၢ်နဘါလၢနခ့နပှၤ, ဒီးအုၣ်က့ၤခီၣ်က့ၤနခ့နပှၤ ပိာ်မုၣ်အဖိခွါတက့ၢ်.
17 ပာ်တၢ်ပနီၣ်လၢတၢ်ဂ့ၤအဂီၢ် ဒီးယၤတက့ၢ်. ဒီးပှၤလၢအသးဟ့ယၤတဖၣ်န့ၣ် က ထံၣ်ဘၣ်, ဒီးမဲာ်ဆှးလီၤ. အဂ့ၢ်ဒ်အံၤ, နဲဒၣ်အံၤ, ယွၤဧၢ, နမၤစၢၤယၤ, ဒီးမၤမုာ်ထီၣ်က့ၤယၤလီၤ.