13
1 ဒီးလၢမုၢ်တနံၤန့ၣ်, ယ့ၣ်ရှူးဟးထီၣ်ကွံာ်လၢဟံၣ်ပူၤ, ဒီးဆ့ၣ်နီၤဝဲလၢပီၣ်လဲၣ်နံၤလီၤ.
2 ဒီးမ့ၢ်ပှၤဂီၢ်မုၢ်အါဂၤ ဟဲအိၣ်ဖှိၣ်ဆူအအိၣ်သတးဒီး, အဝဲဒၣ်လဲၤထီၣ်ဆ့ၣ် နီၤလၢ ကဘီတဘ့ၣ်အပူၤ, ဒီးပှၤဂီၢ်မုၢ်ဆၢထၢၣ်လၢ ပီၣ်လဲၣ်အနံၤခဲလၢာ်လီၤ.
3 ဒီးအဝဲဒၣ်ကတိၤတၢ်အါမံၤ ဒီးအီၤလၢတၢ်ကတိၤဒိ, ဒီးစံးဝဲဒၣ်, ကွၢ်ကွၢ်, ပှၤလၢ အဖှံတၢ်တဂၤ, လဲၤဖှံတၢ်လီၤ.
4 ဒီးလၢအဖှံတၢ်န့ၣ် တနီၤနီၤလီၤဘၣ်လၢကျဲအသရ့ၤ, ဒီးထိၣ်ဖိလံၣ်ဖိဟဲ အီၣ်ကွံာ်အီၤလီၤ.
5 ဒီးအဂၤတနီၤနီၤလီၤဘၣ်လၢလၢၢ်ကျါဖဲဟီၣ်ခိၣ်အိၣ် တအါဘၣ်. ဒီးမ့ၢ်ဟီၣ်ခိၣ်တယိာ်ဘၣ်ဒီး, မဲထီၣ်ဝဲ တကီၢ်ခါလီၤ.
6 ဒီးတုၤမုၢ်ဟဲထီၣ်, ဒီးဆါဆဲးဘၣ်အီၤ ဒီး, မ့ၢ်အဂံၢ်တအိၣ်ဘၣ်ဒီး, ဃ့ထီကွံာ်ဝဲလီၤ.
7 ဒီးအ ဂၤ တနီၤနီၤလီၤဘၣ်လၢတၤဆှုၣ်တၤမဲအကျါ, ဒီးတၤဆှုၣ် တၤမဲန့ၣ်မဲထီၣ်ဝဲဒီးခဲ ဘၢကွံာ်အီၤလီၤ.
8 ဒီးအဂၤ တနီၤနီၤလီၤဘၣ်လၢဟီၣ်ခိၣ်ဂ့ၤ, ဒီးသၣ်ထီၣ်ဝဲတနီၤ နီၤအါန့ၢ်အလီၢ်တကယၤ, တနီၤနီၤဃုဆံ, တနီၤနီၤ သၢဆံလီၤ.
9 ပှၤအိၣ်ဒီးအနၢ်လၢ အနၢ်ဟူတၢ်န့ၣ်, မ် အနၢ်ဟူတၢ်တက့ၢ်.
10 ဒီးအပျဲၢ်အဘီၣ်တဖၣ်ဟဲဆူအအိၣ်ဒီးစံးဘၣ်အီၤ, န ကတိၤတၢ်ဒီးပှၤတဖၣ်န့ၣ် လၢတၢ်ကတိၤဒိမ့ၢ်အဘၣ် မနုၤလဲၣ်.
11 ဒီးအဝဲဒၣ်စံးဆၢတၢ်ဒီးစံးဘၣ်အီၤ, အဂ့ၢ် ဒ်အံၤ, မူခိၣ်အဘီအမုၢ်အတၢ်အိၣ်ခူသူၣ်န့ၣ်, တၢ်ဟ့ၣ်သ့ၣ်ညါသုလီၤ. မ့မ့ၢ်အဝဲသ့ၣ်တဖၣ်န့ၣ်, တၢ် တဟ့ၣ်သ့ၣ်ညါဘၣ်ဝဲဘၣ်.
12 အဂ့ၢ်ဒ်အံၤ, ဖဲဒၣ်ပှၤလၢ အတၢ်အိၣ်ဝဲတဂၤဂၤန့ၣ်, တၢ်ကဟ့ၣ်တၢ်လၢအီၤ, ဒီး အတၢ်ကအါလုၣ်ကိလီၤ. မ့မ့ၢ်ဖဲဒၣ်ပှၤလၢအတၢ်တအိၣ်ဘၣ် ဝဲတဂၤဂၤန့ၣ်, တၢ်ကဟံးန့ၢ်က့ၤတၢ်လၢအအိၣ်ဒီးအီၤဒၣ်လဲာ်လီၤ.
13 မၤသးဒ်န့ၣ်ဒီးယကတိၤတၢ်ဒိီးအီၤလၢ တၢ်ကတိၤဒိလီၤ. အဂ့ၢ်ဒ်အံၤ, ထံၣ်ဒီးတထံၣ်ဘၣ်တၢ် ဘၣ်, နၢ်ဟူဒီးတနၢ်ဟူဘၣ်တၢ်ဒီးအနၢ် တပၢၢ်ဘၣ်တၢ်ဘၣ်လီၤ.
14 ဒီးဝံယရှါယၤအကလုၢ်လၢ ထီၣ်ပှဲၤထီၣ်ဝဲ လၢအပူၤလီၤ, စံးဝဲဒၣ်, နၢ်ဟူတၢ်, ဒီးသုကနၢ်ဟူ, ဒီးသုနၢ်တပၢၢ်ဘၣ်တၢ် ဘၣ်.ကွၢ်တၢ်, ဒီးသုကကွၢ်တၢ်, ဒီးသုတထံၣ်တၢ်ဘၣ်.
15 အဂ့ၢ်ဒ်အံၤ, ပှၤတကလုာ်အံၤအသးဘီၣ်ထီၣ်, ဒီးအနူၤဃၢအနၢ်ဃၢ, ဒီးအဝဲသ့ၣ်ဘံၣ်ဃာ်ဒၣ်အမဲာ်, ဒ်သိးအသုတထံၣ်တၢ်လၢအမဲာ်, ဒီးနၢ်ဟူတၢ်လၢအနၢ်ဒီးနၢ်ပၢၢ်တၢ်လၢအသး, ဒီးဃၣ်အသးဒီးယကမၤဘျါက့ၤအီၤတဂ့ၤန့ၣ်လီၤ.Ref 13.15 ရှါ.၆း၉, ၁၀
16 မ့မ့ၢ်သုမဲာ်အံၤဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, မ့ၢ် အထံၣ်တၢ်လီၤ. ဒီးသုနၢ်အံၤဘၣ်ဆိၣ်ဂ့ၤဝဲလီၤ.အဂ့ၢ် ဒ်အံၤ, မ့ၢ်အနၢ်ဟူတၢ်လီၤ.
17 အဂ့ၢ်ဒ်အံၤ, ယစံးဘၣ် တဲဘၣ်သုတီတီအံၤ, တၢ်လၢသုထံၣ်ဘၣ်န့ၣ်, ဝံဒီးပှၤ အတီအလိၤအါဂၤ, တၢ်မိၣ်ထံၣ်ဘၣ်အသးဒီးတထံၣ် ဘၣ်ဝဲဘၣ်. ဒီးတၢ်လၢသုနၢ်ဟူဘၣ်န့ၣ်, တၢ်မိၣ်နၢ် ဟူဘၣ်အသး, ဒီးတနၢ်ဟူဘၣ်ဝဲဘၣ်.
18 မၤသးဒ်န့ၣ်ဒီး တၢ်ကတိၤဒိလၢပှၤဖှံတၢ်န့ၣ်, ဒိက နၣ်တက့ၢ်.
19 ကယဲၢ်ပှၤလၢအနၢ်ဟူ ဘီမုၢ်အကလုၢ် အကထါ, ဒီးအနၢ်တပၢၢ်ဘၣ်ဝဲတဖၣ်န့ၣ်, တၢ်အၢ တဂၤဟဲဂုာ်န့ၢ်ကွံာ်တၢ်ဖှံအသးလၢ အသးကံၢ်ပူၤလီၤ. အဝဲန့ၣ်မ့ၢ်တၢ်ဖှံအသးလၢကျဲသရ့ၤလီၤ.
20 ဒီးတၢ်ဖှံအသးလၢလၢၢ်ကျါန့ၣ်, မ့ၢ်ပှၤလၢအနၢ်ဟူ တၢ်ကလုၢ်, ဒီးဒိးန့ၢ်ဝဲတကီၢ်ခါလၢအသူၣ်ခုအသးခု လီၤ.
21 ဒီးအဂံၢ်တအိၣ်ဘၣ်လၢ အကစၢ်ဒၣ်ဝဲအပူၤ ဘၣ်ဆၣ်ဒီး, အိၣ်ဝဲတစိၢ်တလီၢ်လီၤ. မ့မ့ၢ်တုၤတၢ်နး တၢ်ဖှီၣ်မ့ၢ်ဂ့ၤ, တၢ်မၤအၢမၤနးမ့ၢ်ဂ့ၤ, အိၣ်ထီၣ်လၢ တၢ်အကလုၢ်အကထါန့ၣ် အဃိဒီး, အသူၣ်ဟးဂူာ် အသးဟးဂီၤတကီၢ်ခါလီၤ.
22 ဒီးတၢ်ဖှံအသးလၢတၤဆှုၣ်တၤမဲအကျါန့ၣ်, မ့ၢ်ပှၤ လၢအနၢ်ဟူတၢ်အကလုၢ်, ဒီးတၢ်ဘၣ်ယိၣ်ဘၣ်ဃး ဒီးအအံၤတဃၣ်, ဒီးတၢ်လီတၢ်ဝ့ၤဘၣ်ဃးဒီးတၢ်ထူး တၢ်တီၤတဖၣ်န့ၣ်, ခဲဘၢကွံာ်တၢ်အကလုၢ်န့ၣ်, ဒီး တသၣ်ထီၣ်ဘၣ်ဝဲဘၣ်.
23 ဒီးတၢ်ဖှံအသးလၢဟီၣ်ခိၣ်ဂ့ၤန့ၣ်, မ့ၢ်ပှၤလၢအနၢ်ဟူ တၢ်အကလုၢ်, ဒီးနၢ်ပၢၢ်ဝဲ, ဒီးသၣ်ထီၣ်မး, တနီၤနီၤအါ န့ၢ်အလီၢ်တကယၤ, တနီၤနီၤဃုဆံ,တနီၤနီၤသၢ ဆံလီၤ.
24 ပာ်လီၤတၢ်ကတိၤဒိအဂၤတမံၤလၢအမဲာ်ညါ, ဒီးစံးဝဲ ဒၣ်, တၢ်လၢမူခိၣ်အဘီအမုၢ်အံၤ, မၤသးဒ်ပှၤဖှံတၢ်ချံ ဂ့ၤလၢအစံာ်ပူၤတဂၤအသိးလီၤ.
25 ဒီးဖဲပှၤမံသပ့ၤအဖၢ မုၢ်ဒီး, အဒုၣ်အဒါတဂၤဟဲဖှံ နီၣ်စံစၣ်လၢဘုကျါ, ဒီးက့ၤက့ၤဝဲလီၤ.
26 ဒီးတုၤတၢ်မဲထီၣ်ဒီးအသၣ်ပျိာ်ထီၣ်ဒီး, နီၣ် စံစၣ် အိၣ်ဖျါထီၣ်စ့ၢ်ကီးလီၤ.
27 ဒီးဟံၣ်ကစၢ်အကုၢ် အပှၤဟဲဆူအအိၣ်, ဒီးစံးဘၣ်အီၤ, ကစၢ်ဧၢ, နဖှံ တၢ်ချံဂ့ၤလၢနစံာ်ပူၤ, တမ့ၢ်ဘၣ်ဧါ. မၤသးဒ်န့ၣ် ဒိီးအိၣ်ဒီးနီၣ်စံစၣ်ဒ်လဲၣ်.
28 ဒီးအဝဲဒၣ်စံးဘၣ်အီၤ, မ့ၢ် တၢ်အဒုၣ်အဒါတဂၤမၤတၢ်အံၤလီၤ. ဒီးအကုၢ်အပှၤ စံးဘၣ်အီၤ, ပလဲၤထၢဖှိၣ်အီၤန့ၣ်, နသးအိၣ်စ့ၢ်ကီး ဧါ.
29 ဒီးအဝဲဒၣ်စံးဘၣ်အီၤ, တမ့ၢ်ဘၣ်. သုထၢဖှိၣ် နီၣ်စံစၣ်အဖၢမုၢ်ဒီး, သုကထဲးထီၣ်ကွံာ်ဘုဒီးအီၤဘၣ် ဖုးလီၤ.
30 ကဒိၣ်ထီၣ်ဃုာ်ဒၣ်ဝဲခံမံၤလၢာ်, တုၤကူးဘု အကတီၢ်ဘၣ်န့ၣ်တက့ၢ်. ဒီးတုၤကူးဘုအကတီၢ်ဘၣ် ဒီး, ယကစံးဘၣ်ပှၤကူးဘုဖိတဖၣ်, ထၢဖှိၣ်ဆိနီၣ်စံစၣ်န့ၣ်, ဒီးဃ့ကဒိၣ်ဃာ်အီၤလၢ အကဘၣ်ဆူး ထီၣ်ကွံာ်လၢမ့ၣ်အူအပူၤတက့ၢ်. မ့့မ့ၢ်ဘုဧိၤဟုဧိၤန့ၣ်, ဂၢ်ဖှိၣ်လၢယဖီပူၤတက့ၢ်.
31 ပာ်လီၤဝဲတၢ်ကတိၤဒိ အဂၤတမံၤလၢအမဲာ်ညါ, ဒီးစံးဝဲဒၣ်, တၢ်လၢမူခိၣ်အဘီအမုၢ်အံၤ, မၤအသးဒ် သဘၣ်အချံလၢပှၤဖှံလၢအကရၢပူၤအသိးန့ၣ်လီၤ.
32 အ ဝဲန့ၣ်ပြံန့ၢ်တၢ်ဂၤအချံခဲလၢာ်ဘၣ်ဆၣ်ဒီး, တုၤအမဲ ထီၣ်ဒီး, မ့ၢ်အဒိိၣ်န့ၢ်နီၣ်ဧိၤမံၤဧိၤ, ဒီးကဲထီၣ်သ့ၣ်တ ထံးလၢ ထိၣ်ဖိလံၣ်ဖိလၢတၢ်ဖးဖဖီ တဖၣ်ဟဲအိၣ်ဝဲ လၢ အဒ့ခံဒ့လိၤလီၤ.
33 စံးဘၣ်တဲဘၣ်အီၤလၢ တၢ်ကတိၤဒိအဂၤတမံၤ, ဒီး စံးဝဲဒၣ်, တၢ်လၢမူခိၣ်အဘီအမုၢ်အံၤ, မၤသးဒ်ကိၣ်မံၣ် လၢ ပိာ်မုၣ်တဂၤဟံးန့ၣ်ဒီးပာ်ခူသူူၣ်လၢ ကိၣ်ကမူၣ် သၢစ့အၤအပူၤ, တုၤအဖးထီၣ်ဝဲခဲလၢာ်အသိးန့ၣ်လီၤ.
34 တၢ်န့ၣ်တဖၣ်ခဲလၢာ်ယ့ၣ်ရှူးစံးဘၣ် တဲဘၣ်ပှၤဂီၢ် မုၢ်တဖၣ်လၢတၢ်ကတိၤဒိ, ဒီးတၢ်ကတိၤဒိ တအိၣ် ဘၣ်ဒီးတကတိၤဘၣ်တၢ်လၢအီၤဘၣ်.
35 မၤသးဒ်န့ၣ်ဒီး ဝံအကလုၢ်လၢထီၣ်ပှဲၤထီၣ်ဝဲလီၤ.စံးဝဲဒၣ်, ယကအဲးထီၣ်ယထးခိၣ်လၢတၢ်ကတိၤဒိလီၤ. တၢ် လၢအအိၣ်ခူသူၣ်လၢဟီၣ်ခိၣ်အခီၣ်ထံးလံၤလံၤန့ၣ်, ယကစံၣ်တဲၤတဲလီၤလီၤRef 13.35 စံး.၇၈း၂.
36 တုၤနုၤတဘျီယ့ၣ်ရှူးပျၢ်ကွံာ်ပှၤဂီၢ်မုၢ်တဖၣ်န့ၣ်, ဒီး လဲၤနုာ်ဆူဟံၣ်ပူၤလီၤ. ဒိီးအပျဲၢ်အဘီၣ်ဟဲဆူအအိၣ်, ဒီးစံးဝဲဒၣ်, တၢ်ကတိၤဒိလၢနီၣ်စံစၣ်အိၣ်လၢစံာ်ပူၤန့ၣ်, စံးဘၣ်တဲဘၣ်ပှၤတက့ၢ်.
37 ဒီးအဝဲဒၣ်စံးဆၢတၢ်ဒီးစံး ဘၣ်အီၤ , ပှၤလၢအဖှံတၢ်ချံဂ့ၤန့ၣ်မ့ၢ်ပှၤကညီဖိခွါအံၤ,
38 ဒီးစံာ် ဧိၤပှဲၤဧိၤန့ၣ်, မ့ၢ်ဟီၣ်ခိၣ်, ဒီးတၢ်ချံဂ့ၤန့ၣ် မ့ၢ်ဘီမုၢ်ဖိ, ဒီးနီၣ်စံစၣ်န့ၣ်, မ့ၢ်ပှၤအၢတဂၤအဖိ,
39 ဒီးတၢ်အဒုၣ်အဒါ လၢအဖှံအီၤတဂၤန့ၣ်, မ့ၢ်မုၣ်ကီၤလံၢ်, ဒီးကူးဘု အကတီၢ်န့ၣ်မ့ၢ် ဟီၣ်ခိၣ်အစိၤကတၢၢ်, ဒိီးပှှၤကူး ဘုန့ၣ်, မ့ၢ်ကလူးတဖၣ်လီၤ.
40 မၤသးဒ်န့ၣ်ဒီး, ဒ်ပှၤ ထၢဖှိၣ်နီၣ်စံစၣ်, ဒီးဆူးကွံာ်အီၤလၢမ့ၣ်အူအသိးန့ၣ်, တၢ်ကမၤအသးလၢ ဟီၣ်ခိၣ်အစိၤကတၢၢ်ဒ်န့ၣ်အသိး လီၤ.
41 ပှၤကညီဖိခွါအံၤကမၢလီၤအကလူးတဖၣ်, ဒီး အဝဲသ့ၣ်ကထၢဖှိၣ်ကယဲၢ်တၢ်လီၤဃံၤ အလီၢ်ခဲလၢာ်, ဒိီးပှၤလၢအမၤတၢ်တတီတလိၤဘၣ်လၢ အဘီအမုၢ် အပူၤ,
42 ဒီးကဘျုးလီၤကွံာ်အီၤဆူ မ့ၣ်အူအဖၣ်ကပူၤ လီၤ. တၢ်ဘၣ်ဟီၣ်တၢ်ဘၣ်ယၢၤ, ဒီးတၢ်မဲအ့ၣ်စဃံး ကအိၣ်ဝဲဖဲန့ၣ်လီၤ.
43 တုၤနုၤတစုပှၤအတီ အလိၤတ ဖၣ်န့ၣ် ကကပီၤထီၣ်လၢ အပၢ်အဘီအမုၢ်အပူၤ, ဒ်မုၢ် အသိးလီၤ. ပှၤအိၣ်ဒိီးအနၢ်လၢအနၢ်ဟူတၢ်န့ၣ် မ်အ နၢ်ဟူတၢ်တက့ၢ်.
44 မၤကဒီးတစု, တၢ်လၢမူခိၣ်အဘီအမုၢ်န့ၣ်, မၤသး ဒ်တၢ်လုၢ်ဒိၣ်ပှ့ၤဒိၣ်အိၣ်ခူသူၣ်လၢ ပျီပူၤတပူၤအသိး န့ၣ်လီၤ. ပှၤလၢအထံၣ်န့ၢ်အဝဲတဂၤန့ၣ်, မၤဘံးမၤ ဘၢအီၤဝံၤဒီးလဲၤဆါလီၤကွံာ် ဖဲဒၣ် တၢ်အိၣ်ဒီးအီၤခဲ လၢာ်လၢအသးခုအဃိ, ဒီးပှ့ၤန့ၢ်တၢ်ပျီပူၤတပူၤ န့ၣ် လီၤ.
45 မၤကဒီးတစု, တၢ်လၢမူခိၣ်အဘီအမုၢ်န့ၣ်, မၤအ သးဒ်ပှၤကၤတၢ်ဖိတဂၤ, လၢအဃု တၢ်မျၢ်ပလဲလၢ အဂ့ၤအသိးန့ၣ်လီၤ.
46 အဝဲဒၣ်တုၤအထံၣ်န့ၣ် တၢ်မျၢ် ပလဲလၢအလုၢ်ဒိၣ်ပှ့ၤဒိၣ်တဖျၢၣ်ဒီး, လဲၤဆါ လီၤကွံာ်ဖဲဒၣ် အတၢ်အိၣ်ဒီးအီၤခဲလၢာ်, ဒီးပှ့ၤန့ၢ်အီၤ လီၤ.
47 မၤကဒီးတစု, တၢ်လၢမူခိၣ်အဘီအမုၢ်န့ၣ်, မၤသး ဒ်စၤတဘ့ၣ်လၢပှၤတ့ၢ်လီၤလၢ ပီၣ်လဲၣ်ပူၤဒီးဘၣ်န့ၢ် တၢ်အကလုာ်ကလုာ် အသိးန့ၣ်လီၤ.
48 တုၤစၤန့ၣ်ပှဲၤ ထီၣ်ဒီး, ပှၤတွံၢ်ထီိၣ်ဝဲဆူခိ, ဒီးဆ့ၣ်နီၤဝဲ, ဒီးထၢဖှိၣ် တၢ်အဂ့ၤတဖၣ်လၢ တၢ်ပူၤတၢ်လီၢ်, ဒီးညိကွံာ်တၢ် အအၢတဖၣ်လီၤ.
49 တၢ်ကမၤအသးလၢ ဟီၣ်ခိၣ်အစိၤ ကတၢၢ်ဒ်န့ၣ် အသိးလီၤ. ကလူးတဖၣ်န့ၣ် ကဟဲလီၤဒီးမၤလီၤဖး ကွံာ်ပှၤအအၢလၢပှၤအတီအလိၤအကျါ,
50 ဒီးကတ့ၢ် လီၤကွံာ်အီၤဆူမ့ၣ်အူအဖၣ်ကပူၤ အပူၤန့ၣ်လီၤ. တၢ် ဘၣ်ဟီၣ်တၢ်ဘၣ်ယၢၤ, ဒီးတၢ်မဲအ့ၣ်စဃံး ကအိၣ်ဝဲ ဖဲန့ၣ်လီၤ.
51 ဒီးယ့ၣ်ရှူးစံးဘၣ်အဝဲသ့ၣ်, တၢ်န့ၣ်တဖၣ်ခဲလၢာ်, မ့ၢ် သုနၢ်ပၢၢ်လံဧါ.
52 ဒီးအဝဲသ့ၣ်စံးဘၣ်အီၤ, နၢ်ပၢၢ်လံ, ကစၢ်ဧၢ. ဒီးအဝဲဒၣ်စံးဘၣ်အီၤ, မၤသးဒ်န့ၣ်ဒီးက ယဲၢ်ပှၤကွဲးလံာ်လၢအသ့ မူခိၣ်အဘီအမုၢ်အဂ့ၢ်အကျိၤ ကိးဂၤဒဲးန့ၣ်, မၤသးဒ်ဟံၣ်ကစၢ်လၢ အဟံးထီၣ်ဆံ ထီၣ်တၢ်အလီၢ်လံၤဒီးတၢ်အသီလၢ အပာ်ဖှိၣ်တၢ်အ လီၢ်ပူၤအသိးန့ၣ်လီၤ.
53 ဒီးတုၤယ့ၣ်ရှူးကတိၤ တၢ်ကတိၤဒိတဖၣ်အံၤဝံၤဒီး, တၢ်မၤအသးလၢအဟးထီၣ်ကွံာ်ဝဲဖဲန့ၣ်လီၤ.
54 ဒီးဟဲဆူ အကီၢ်ဒၣ်ဝဲ, ဒီးသိၣ်က့ၤသီက့ၤတၢ်လၢ ဘူၣ်ဘျီၣ်ပူၤ တုၤဒၣ်လဲာ်ပှၤပာ်အသး ကမၢကမၣ်ဒီးစံးဝဲဒၣ်, အဝဲ တဂၤအံၤအတၢ်ကူၣ်ဘၣ်ကူၣ်သ့ဒီးအစိကမီၤအံၤ, မ့ၢ် အန့ၢ်ဘၣ်ဖဲလဲၣ်.
55 အဝဲဒၣ်အံၤ, မ့ၢ်ပှၤစုသ့အဖိခွါ, တမ့ၢ်ဘၣ်ဧါ.အမိၢ်န့ၣ်တၢ်ကိးအမံၤလၢနီိၢ်မၤရံ, တမ့ၢ် ဘၣ်ဧါ. ဒိီးအဒီပုၢ်ဝဲၢ်ခွါမ့ၢ်စီၤယၤကိာ်, ဒီးစီၤယိၤစ့, ဒီး စီၤရှံမိၣ်, ဒီးစီၤယူဒၤ, တမ့ၢ်ဘၣ်ဧါ.
56 ဒီးအဒီပုၢ်ဝဲၢ် မုၣ်တဖၣ်ခဲလၢာ်, အိၣ်ဒီးပှၤ, တမ့ၢ်ဘၣ်ဧါ. မၤသးဒ် န့ၣ်ဒီး, မ့ၢ်အန့ၢ်ဘၣ်တၢ်ခဲလၢာ်အံၤ, ဖဲလဲၣ်ပူၤလဲၣ်.-
57 ဒီးအသးဆါထီၣ်လၢအဃိလီၤ. ဒီးယ့ၣ်ရှူးစံးဘၣ်အီၤ, တၢ်လၢဝံံဧိၤမီၣ်ဧိၤန့ၣ်, တမ့ၢ်ဘၣ်အလၤအကပီၤ တ အိၣ်ဘၣ်န့ၣ်ဘၣ်. အလၤအကပီၤတအိၣ်ဘၣ်န့ၣ်ထဲ လၢအကီၢ်ဒၣ်ဝဲဒီး အဟံၣ်ဒၣ်ဝဲအပူၤဧိၤလီၤ.
58 ဒီးတမၤဘၣ်တၢ်လီၤလးလၢအအါဖဲန့ၣ်, လၢပှၤတ နာ်ဘၣ်တၢ်အဃိလီၤ.