23
1 ဒီးစီၤပၤမၢလီၤတၢ်, ဒီးပှၤဒုးအိၣ်ဖှိၣ်ယူဒၤအပှၤသူၣ် က့သးပှၢ်, ဒီးယရူၤၡလ့ၣ်အပှၤသူၣ်က့သးပှၢ်ခဲလၢာ် ဆူအအိၣ်လီၤ.
2 ဒီးစီၤပၤလဲၤထီၣ်ဆူယွၤအဟံၣ်ပူၤ, ဒီးယူဒၤအပှၤက ညီခဲလၢာ်, ဒီးပှၤအိၣ်ဝဲဆိးဝဲလၢ ယရူၤၡလ့ၣ်အပူၤခဲ လၢာ်အိၣ်ဝဲဒီးအီၤ, ဒီးပှၤလုၢ်တၢ်အဒိၣ်, ဒီးဝံတဖၣ်, ဒီးပှၤဂီၢ်မုၢ်ခဲလၢာ်ဒီးဒိၣ်ဒီးဆံး, ဒီးဖးဝဲလၢအနၢ်ပူၤ, လၢ ကယဲၢ်တၢ်ကတိၤလၢ လံာ်တၢ်အၢၣ်လီၤအီလီၤလၢပှၤ ထံၣ်န့ၢ်ဝဲလၢယွၤအဟံၣ်ပူၤန့ၣ်လီၤ.
3 ဒီးစီၤပၤဆၢထၢၣ်လၢတၢ်ဆၢထၢၣ်အလီၢ်, ဒီးအၢၣ် လီၤအီလီၤတၢ်လၢယွၤအမဲာ်ညါလၢ အကလဲၤတၢ်လၢ ယွၤအမဲာ်ညါ, ဒီးတိၢ်န့ၢ်အတၢ်သိၣ်တၢ်သီ, ဒီးအတၢ် အုၣ်အသး, ဒီးအတၢ်မၤလိာ်တဖၣ်, လၢအသးဒီဖျၢၣ် ညါ, ဒီးလၢအသးလၢအဆိကမိၣ်တၢ်တုၤအလၢာ်ဒ်သိး အကမၤတၢ်အၢၣ်လီၤအီလီၤအတၢ်ကတိၤအံၤ လၢအ ကွဲးအသးလၢလံာ်အံၤအပူၤ, ဒီးပှၤဂီၢ်မုၢ်ခဲလၢာ်အၢၣ် လီၤအီလီၤတၢ်အၢၣ်လီၤအီလီၤန့ၣ်လီၤ.
4 ဒီးစီၤပၤမၤလိာ်ပှၤလုၢ်တၢ်အခိၣ် စီၤဃံးလကံယၤ, ဒီးပှၤလုၢ်တၢ်အဒိၣ်ခံတီၤတတီၤ, ဒီးပှၤပၢၤတြဲၤတဖၣ် ဒ်သိးအကဟဲစိာ်ထီၣ်ကွံာ် ကယဲၢ်လီခီလၢပှၤတ့ဝဲလၢ ဘဧၤလးအဂီၢ်, ဒီးလၢအရှ့ရၤအဂီၢ်, ဒီးလၢမူခိၣ်အသုး မုၢ်ခဲလၢာ်အဂီၢ်သ့ၣ်တဖၣ်လၢယွၤအနူၢ်ပူၤလီၤ. ဒီးအဝဲ ဒၣ်ဆူးထီၣ်ကွံာ်အီၤလၢယရူၤၡလ့ၣ်လၢခိ, လၢကံဒြိၣ် အတၢ်ပျီပူၤ, ဒီးစိာ်ကွံာ်အဖၣ်ဆါဆူဘ့ၤသ့လးလီၤ.
5 ဒီးဒုးဆိတ့ၢ်ပှၤဘါတၢ်ဂီၤ အပှၤလုၢ်တၢ်အဒိၣ်တဖၣ် လၢယူဒၤအစီၤပၤတဖၣ်ပာ်ဝဲ, ဒ်သိးအကဆိၣ်ကဲၤတၢ် နၢမူလၢအလီၢ်ထီၣ်ထီတဖၣ်အဖီခိၣ်, လၢယူဒၤအဝ့ၢ် ပူၤ, ဒီးလၢတၢ်အိၣ်ဝးတရံးယရူၤၡလ့ၣ်, ဒီးပှၤလၢအ ဆိၣ်ကဲၤတၢ်နၢမူလၢဘဧၤလးအဂီၢ်, လၢမုၢ်အဂီၢ်, ဒီး လၢလါအဂီၢ်, ဒီးလၢနံးခးအဆၣ်ဧိၤဖီဧိၤအဂီၢ်, ဒီးလၢ မူခိၣ်အသုးမုၢ်ဂီၢ်မုၢ်ခဲလၢာ်အဂီၢ်လီၤ.
6 ဒီးဟဲစိာ်ထီၣ်ကွံာ်အရှ့ရၤ လၢယွၤအဟံၣ်ပူၤဆူယရူၤ ၡလ့ၣ်လၢခိ, ဆူထံကျိကံဒြိၣ်, ဒီးဆူးထီၣ်ကွံာ်အီၤလၢ ထံကျိကံဒြိၣ်အနံၤ, ဒီးယီၢ်လီၤကလဲအီၤတုၤအကဲထီၣ် တၢ်ကမူၣ်, ဒီးကွံာ်တ့ၢ်ကွံာ်အတၢ်ကမူၣ်လၢပှၤဂီၢ်မုၢ် အဖိတဖၣ်အသွၣ်ခိၣ်လိၤန့ၣ်လီၤ.
7 ဒီးမၤလီၤပှီၢ်ကွံာ်ပှၤအဲၣ်ပကၢၤ အဟံၣ်တဖၣ်လၢအအိၣ်ဝဲလၢယွၤအဟံၣ်ဃၢၤ, ဖဲပိာ်မုၣ်ထါဟံၣ်တဖၣ်လၢ အရှ့ရၤအဂီၢ်န့ၣ်လီၤ.
8 ဒီးဟဲစိာ်ပှၤလုၢ်တၢ်အဒိၣ်ခဲလၢာ် လၢယူဒၤအဝ့ၢ်တ ဖၣ်အပူၤ, ဒီးမၤဘၣ်အၢတၢ်အလီၢ်ထီၣ်ထီတဖၣ်ဖဲပှၤ လုၢ်တၢ်အဒိၣ်တဖၣ်ဆိၣ်ကဲၤတၢ်နၢမူလၢ က့ဘၤပၢၢ် လၢဘ့ၢ်ၡဘၤ, ဒီးမၤလီၤပှီၢ်ကွံာ်ပဲတရီအတၢ်လီၢ်ထီၣ် ထီတဖၣ်လၢအအိၣ်ဝဲလၢ တၢ်လဲၤနုာ်ဝ့ၢ်အခိၣ်စီၤယိၤ ရှူတဂၤအပဲတရီအဃၢၤ, လၢအအိၣ်ဝဲလၢဝ့ၢ်အပဲတရီ လၢစုစ့ၣ်တခီန့ၣ်လီၤ.
9 ဘၣ်ဆၣ်ဒီးတၢ်အလီၢ်ထီၣ်ထီတဖၣ် အပှၤလုၢ်တၢ် အဒိၣ်တဟဲထီၣ်ဘၣ်ဆူ ယွၤအတၢ်လုၢ်လီၢ်လၢယရူၤ ၡလ့ၣ်အပူၤဘၣ်. မ့မ့ၢ်အီၣ်ကိၣ်တဃါဃုာ်ဘၣ်ဒီးကိၣ် မံၣ်လၢအဒီပုၢ်ဝဲၢ်အကျါလီၤ.
10 ဒီးမၤဘၣ်အၢတိဖ့း လၢအအိၣ်ဝဲလၢပှၤဃံနိၣ်ဖိအ ကစၢၢ်ကဆူးအပူၤ, ဒ်သိးပှၤအသုတဒုးခီဂာ်အဖိခွါ, ဒီးအဖိမုၣ်လၢမ့ၣ်အူလၢမိလးအဂီၢ်နီတဂၤတဂ့ၤလီၤ.
11 ဒီးစိာ်ထီၣ်ကွံာ်ကသ့ၣ်တဖၣ် လၢယူဒၤအစီၤပၤတ ဖၣ်ဟ့ၣ်လီၤဝဲလၢမုၢ်ဧိၤလါဧိၤအဂီၢ်, ဖဲတၢ်လဲၤနုာ်လၢ ယွၤအဟံၣ်ပူၤလၢ ပှၤဒ့ဒံၣ်စီၤနၤသၣ်မ့လ့း အဒၢးအ ဃၢၤလၢအအိၣ်ဝဲလၢခိ, ဒီးဆူးထီၣ်ကွံာ်မုၢ်အလ့ၣ်က ဟၣ်လၢမ့ၣ်အူလီၤ.
12 ဒီးတၢ်လုၢ်လီၢ်တဖၣ် လၢအအိၣ်ဝဲလၢစီၤအၤဃးအ ဒၢးလၢထးခီတတီၤအဖီခိၣ်, လၢယူဒၤအစီၤပၤတဖၣ် မၤဝဲ, ဒီးတၢ်လုၢ်လီၢ်တဖၣ်လၢစီၤမနၤရှ့ၤမၤဝဲလၢယွၤ အဟံၣ်အဂၢၤခံပူၤအပူၤန့ၣ်စီၤပၤမၤလီၤပှီၢ်ကွံာ်, ဒီးမၤ လီၤကလဲကွံာ်အီၤဖဲန့ၣ်, ဒီးကွံာ်တ့ၢ်ကွံာ်အကမူၣ်ဆူ ထံကျိကံဒြိၣ်အပူၤန့ၣ်လီၤ.
13 ဒီးတၢ်အလီၢ်ထီၣ်ထီတဖၣ် လၢအအိၣ်ဝဲလၢယရူၤ ၡလ့ၣ်အမဲာ်ညါ လၢကစၢၢ်မၤဟးဂီၤတၢ်အစုထွဲတခီ, လၢအံၣ်စရ့လးအစီၤပၤၡလိၤမိၤမၤဝဲလၢ ပှၤစံဒိၣ်ဖိအ တၢ်သးဘၣ်အၢ, ဧၤၡတြိးအဂီၢ်, ဒီးလၢဧၣ်မိၣ်ဖိအတၢ် သးဘၣ်အၢ, မိလးအဂီၢ်န့ၣ်စီၤပၤမၤဘၣ်အၢအီၤလီၤ.
14 ဒီးမၤလီၤကလဲတၢ်ဂီၤတဖၣ်, ဒီးကူာ်လီၤကွံာ်အရှ့ရၤ တဖၣ်, ဒီးမၤပှဲၤအလီၢ်ဒီးပှၤကညီအဃံအကွဲလီၤ.
15 ဒီးတၢ်လုၢ်လီၢ်အိၣ်ဝဲလၢ ဘ့ၤသ့လးစ့ၢ်ကီး, ဒီးတၢ် အလီၢ်ထီၣ်ထီလၢစီၤနဘးအဖိခွါ စီၤယၤရၤဘၣ်လၢအ ဒုးမၤအံၣ်စရ့လးလၢ တၢ်ဒဲးဘးတဂၤမၤဝဲန့ၣ်မၤလီၤပှီၢ် ကွံာ်တၢ်လုၢ်လီၢ်ဒီးတၢ်အလီၢ်ထီၣ်ထီ, ဒီးဆူးထီၣ်ကွံာ် တၢ်အလီၢ်ထီၣ်ထီ, ဒီးယီၢ်လီၤကလဲကွံာ်ဝဲ, ဒီးဆူး ထီၣ်ကွံာ်အရှ့ရၤန့ၣ်လီၤ.
16 ဒီးစီၤယိၤၡံယၤ ဃၣ်ဃီၤအသးဒီးထံၣ် တၢ်သွၣ်ခိၣ် ဖဲကစၢၢ်လိၤ, ဒီးမၢလီၤတၢ်, ဒီးဟံးထီၣ်ပှၤအဃံလၢတၢ် သွၣ်ခိၣ်အပူၤ, ဒီးဆူးထီၣ်ကွံာ်အီၤလၢတၢ်လုၢ်လီၢ်အဖီ ခိၣ်, ဒီးမၤဘၣ်အၢအီၤ, ဒ်ယွၤအကလုၢ်ကထါ, လၢ ယွၤအပှၤကညီကိးထီၣ်, လၢအကိးထီၣ်တၢ်ကတိၤတ ဖၣ်န့ၣ်အသိးလီၤ.
17 ဒီးစံးဝဲဒၣ်, တၢ်အပနီၣ်တဖျၢၣ်လၢယထံၣ်ဘၣ်န့ၣ် မ့ၢ်မနုၤလဲၣ်. ဒီးဝ့ၢ်အပှၤကညီစံးဘၣ်အီၤ, မ့ၢ်ယွၤအ ပှၤကညီလၢအဟဲဝဲလၢယူဒၤ, ဒီးကိးထီၣ်တၢ်တဖၣ် လၢနမၤလၢ တၢ်လုၢ်လီၢ်ဘ့ၤသ့လးအဖီခိၣ်တဂၤ အ တၢ်သွၣ်ခိၣ်လီၤ.
18 ဒီးစံးဝဲဒၣ်ကအိၣ်ဒၣ်ဝဲတက့ၢ်. မ်ပှၤသုတသုးအဃံ အကွဲနီတဂၤတဂ့ၤ, ဒီးအဃံအကွဲန့ၣ်ပူၤဖျဲးအိၣ်ဒီးဝံ လၢအဟဲထီၣ်လၢၡၤမရံတဂၤအဃံအကွဲလီၤ.
19 ဒီးတၢ်အလီၢ်ထီၣ်ထီတဖၣ် အဟံၣ်စ့ၢ်ကီး လၢအ အိၣ်ဝဲလၢၡၤမရံအဝ့ၢ်တဖၣ်အပူၤ, လၢအံၣ်စရ့လးအ စီၤပၤတဖၣ်မၤဝဲ ဒ်သိးအကဒုးသးထီၣ်ယွၤန့ၣ်စီၤယိၤ ၡံယၤဟံးထီၣ်ကွံာ်ဒီး မၤအီၤဒ်ကယဲၢ်တၢ်မၤလၢအမၤ လၢဘ့ၤသ့လးအပူၤလီၤ.
20 ဒီးမၤသံတၢ်အလီၢ်ထီၣ်ထီ အပှၤလုၢ်တၢ်အဒိၣ်တ ဖၣ်လၢတၢ်လုၢ်လီၢ်အဖီခိၣ်, ဒီးဆူးထီၣ်ကွံာ်ပှၤကညီ အဃံအကွဲလၢအဖီခိၣ်, ဒီးက့ၤကဒါက့ၤဆူယရူၤၡလ့ၣ် လီၤ.
21 ဒီးမၤလိာ်ပှၤဂီၢ်မုၢ်ခဲလၢာ်ဒီးစံးဝဲဒၣ်, တိၢ်န့ၢ်ဘူၣ်လဲၤ ကပာ်လၢယွၤသုကစၢ်အဂီၢ်, ဒ်တၢ်ကွဲးအသးလၢလံာ် တၢ်အၢၣ်လီၤအီလီၤအံၤအပူၤန့ၣ်တက့ၢ်.
22 မ့ၢ်မးပှၤတမၤဘူၣ်လဲၤကပာ် ဒ်န့ၣ်အသိးလၢပှၤစံၣ် ညီၣ်ကွီၢ်လၢအစံၣ်ညီၣ်အံၣ်စရ့လးအမုၢ်နံၤတဖၣ် လံၤ လံၤ, ဒီးလၢအံၣ်စရ့လးအစီၤပၤ, ဒီးလၢယူဒၤအစီၤပၤ အမုၢ်နံၤခဲလၢာ်န့ၣ်ဘၣ်.
23 ဒီးလၢစီၤယိၤၡံယၤအနံၣ်ပှဲၤ ထီၣ်တဆံဃိးနံၣ်တနံၣ်အပူၤန့ၣ် ပှၤမၤဘူၣ်လဲၤကပာ် တဘျီအံၤလၢယရူၤၡလ့ၣ်အပူၤန့ၣ်လီၤ.
24 ဒီးပှၤအိၣ်ဒီးပှၤသံအကလၤစ့ၢ်ကီး, ဒီးပှၤမဲာ်ထံၣ်ဝံ, ဒီးတၢ်ဂီၤတရၤဖး, ဒီးတၢ်ဂီၤတၢ်ဖီၣ်, ဒီးကယဲၢ်တၢ် သးဘၣ်အၢလၢအထံၣ်န့ၢ်ဝဲလၢကီၢ်ယူဒၤအပူၤ, ဒီးလၢ ယရူၤၡလ့ၣ်အပူၤခဲလၢာ်န့ၣ် စီၤယိၤၡံယၤသုးကွံာ်ဝဲဒ် သိးအကတိၢ်န့ၢ် လံာ်တၢ်သိၣ်တၢ်သီအကလုၢ်ကထါ လၢအကွဲးအသးလၢ လံာ်လၢပှၤလုၢ်တၢ်အဒိၣ်စီၤဃံး လကံယၤထံၣ်န့ၢ်ဝဲ, လၢယွၤအဟံၣ်ပူၤလီၤ.
25 ဒီးစီၤပၤလၢအဃၣ်ဃီၤအသးဆူယွၤအအိၣ် လၢအသး ဒီဖျၢၣ်ညါ, ဒီးလၢအသးလၢအဆိကမိၣ်တၢ်တုၤအလၢာ် ဒီးလၢအဂံၢ်အဘါခဲလၢာ်, ဒ်စီၤမိၤရှ့အတၢ်သိၣ်တၢ်သီခဲ လၢာ်အသိးန့ၣ်ဒ်သိးဒီးအီၤလၢအမဲာ်ညါတအိၣ်ဘၣ်, ဒီး တဂဲၤဆၢထၢၣ်လၢအလီၢ်ခံဒ်အဝဲဒၣ်အသိးနီတဂၤဘၣ်.
26 ဘၣ်ဆၣ်ဒီးယွၤတဃၣ်ဘၣ်အသးလၢ အတၢ်သးဒိၣ် ဆူၣ်ဆူၣ်ကလဲာ်လၢအကဲၤထီၣ်ဘၣ်ယူဒၤ လၢတၢ်သး ထီၣ်အလီၢ်လၢစီၤမနၤရှ့ၤဒုးသးထီၣ်အီၤန့ၣ်ဘၣ်.
27 ဒီးယွၤစံးဝဲဒၣ်, ယကသုးကွံာ်ယူဒၤစ့ၢ်ကီးလၢယမဲာ် ညါ, ဒ်ယသုးကွံာ်အံၣ်စရ့လးအသိးန့ၣ်, ဒီးယကညိ ကွံာ်ဝ့ၢ်ယရူၤၡလ့ၣ်တဖျၢၣ်အံၤ လၢယဃုထၢအီၤ, ဒီး ဟံၣ်လၢယစံးလၢအဂ့ၢ်, ယမံၤကအိၣ်ဖဲန့ၣ်လီၤ.
28 ဒီးတၢ်အိၣ်လီၤတဲာ်ဘၣ်ဃးဒီး စီၤယိၤၡံယၤ, ဒီးက ယဲၢ်တၢ်လၢအမၤဝဲခဲလၢာ်န့ၣ် ကွဲးအသးလၢယူဒၤအ စီၤပၤအလံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.
29 လၢအမုၢ်နံၤတဖၣ်န့ၣ်အဲၤကူပတူးအစီၤပၤ ဖၤရိၤန ကိၤလဲၤထီဒါအၤရှူၢ်အစီၤပၤဆူ ထံမိၢ်ပှၢ်ဖရၤသး, ဒီး စီၤပၤစီၤယိၤၡံယၤလဲၤထီဒါအီၤလီၤ. ဒီးတုၤအထံၣ်ဘၣ် အီၤဒီး, မၤသံအီၤဖဲမကံးဒိၤအပူၤလီၤ.
30 ဒီးအခ့အပှၤစိာ်ထီၣ်အီၤသံဝဲလၢ လ့ၣ်ကဟၣ်အပူၤ လၢမကံးဒိၤ, ဒီးဟဲစိာ်အီၤဆူယရူၤၡလ့ၣ်, ဒီးခူၣ်လီၤ ကွံာ်အီၤလၢအသွၣ်ခိၣ်ဒၣ်ဝဲအပူၤလီၤ. ဒီးထံဧိၤကီၢ်ဧိၤ အပှၤဂီၢ်မုၢ်ဟံးန့ၢ် စီၤယိၤၡံယၤအဖိခွါစီၤယဟိအါဃး, ဒီးဖှူအီၤ, ဒီးပာ်အီၤလၢစီၤပၤလၢအပၢ်အလီၢ်န့ၣ်လီၤ.
31 ဒီးလၢစီၤယဟိအါဃးကဲသီစီၤပၤန့ၣ် အသးပှၢ်ခံဆံ သၢနံၣ်, ဒီးကဲစီၤပၤသၢလါလၢယရူၤၡလ့ၣ်အပူၤလီၤ. ဒီးအမိၢ်အမံၤမ့ၢ်နီၢ်ဃမူတလး, စီၤယံးရမံယၤလၢလံး ဘနၤတဂၤအဖိမုၣ်လီၤ.
32 ဒီးမၤတၢ်အၢလၢယွၤအမဲာ် ဒ်ကယဲၢ်တၢ်လၢအပၢ် တဖၣ်မၤဝဲအသိးန့ၣ်လီၤ.
33 ဒီးတုၤအကဲစီၤပၤလၢယရူၤၡလ့ၣ်အပူၤဒီး, ဖၤရိၤန ကိၤစၢဃာ်အီၤလၢ ရံးဘလၤအပူၤ လၢကီၢ်ဃမါသး အပူၤ, ဒီးဒုးလိးပှၤကီၢ်ဖိလၢစ့အကံကၢ်တကယၤဒီးထူ တကံကၢ်လီၤ.
34 ဒီးဖၤရိၤနကိၤပာ် စီၤယိၤၡံယၤအဖိခွါစီၤအ့ၤလယါ ကံၣ်လၢစီၤပၤလၢအပၢ်စီၤယိၤၡံယၤအလီၢ်, ဒီးယုၢ်ဝဲ အမံၤလၢစီၤယဟိၤယါကံၣ်, ဒီးစိာ်ထီၣ်ကွံာ်စီၤယဟိ အါဃးလီၤ. ဒီးဟဲဝဲဆူအဲၤကူပတူး, ဒီးသံဝဲဖဲန့ၣ်လီၤ.
35 ဒီးစီၤယဟိၤယါကံၣ်ဟ့ၣ် ကျိၣ်ဧိၤစ့ဧိၤ, ဒီးထူဧိၤလွဲ ဧိၤလၢဖၤရိၤဘၣ်ဆၣ်ဒီး, ဃ့သွဲလၢပှၤကီၢ်ဖိဒ်သိးအက ဟ့ၣ်စ့ဒ်ဖၤရိၤအတၢ်မၤလိာ်အသိးန့ၣ်, ဒီးဒုးလိးထံဧိၤ ကီၢ်ဧိၤအပှၤဂီၢ်မုၢ်လၢကျိၣ်ဧိၤစ့ဧိၤ, ဒီးထူဧိၤလွဲဧိၤ, တ ဂၤဒ်အဟ့ၣ်သွဲအသိး, တဂၤဒ်အဟ့ၣ်သွဲအသိး, ဒ်သိး အကဟ့ၣ်ဝဲလၢဖၤရိၤနကိၤလီၤ.
36 လၢစီၤယဟိၤယါကံၣ်ကဲသီစီၤပၤန့ၣ် အသးပှၢ်ခံဆံ ယဲၢ်နံၣ်, ဒီးကဲထီၣ်စီၤပၤတဆံတနံၣ်လၢယရူၤၡလ့ၣ် အပူၤ, ဒီးအမိၢ်အမံၤမ့ၢ်နီၢ်စဘူဒၤ, စီၤပဒါယၤအဖိမုၣ် လၢရူမၤလီၤ.
37 ဒီးမၤတၢ်အၢလၢယွၤအမဲာ် ဒ်ကယဲၢ်တၢ်လၢအပၢ် တဖၣ်မၤဝဲအသိးန့ၣ်လီၤ.