10
1 ဒီးတုၤယရူၤၡလ့ၣ် အစီၤပၤအဒိၤနံၤစ့ဒ့း နၢ်ဟူဝဲ လၢ စီၤယိၤရှူမၤန့ၢ်ဂဲဒီး မၤဟးဂီၤကွံာ်အီၤ, ဒ်အမၤ ယရံၤဃိဒီးအစီၤပၤအသိး မၤဂဲဒီးအစီၤပၤဒ်န့ၣ်အသိး, ဒီးလၢပှၤကံးဘိၣ်ဖိ မၤဃူမၤဖိးဒီးပှၤအံၣ်စရ့လးဖိ, ဒီး အိၣ်ဝဲလၢအကျါန့ၣ်ဒီး,
2 တၢ်မၤအသးလၢအပျံၤဝဲဖုးဝဲ ဒိၣ်မးလီၤ. အဂ့ၢ်ဒ်အံၤ, ကံးဘိၣ်မ့ၢ်ဝ့ၢ်ဖးဒိၣ်တဖျၢၣ်, ဒ်စီၤပၤအဝ့ၢ်တဝ့ၢ်အသိး, ဒီးဒိၣ်န့ၢ်ဂဲတက့ၢ်, ဒီးအ ပှၤကညီခဲလၢာ်န့ၣ် မ့ၢ်ပှၤအဆူၣ်လီၤ.
3 ဒီးယရူၤၡလ့ၣ်အစီၤပၤအဒိၤနံၤစ့ဒ့း မၢလီၤတၢ်ဆူဃ့ ဘြိၣ်အစီၤပၤဟိဟၣ်, ဒီးယၢ်မူသး အစီၤပၤပံးရၣ်ဒီး လၤကံၣ်အစီၤပၤယၤဖံ, ဒီးဧ့းကလိၣ် အစီၤပၤဒဘံၢ်, ဒီးစံးဝဲဒၣ်,
4 ဟဲဆူယအိၣ်, ဒီးမၤစၢၤယၤ ဒ်သိးပ ကကျီကွံာ်ကံးဘိၣ်န့ၣ်တက့ၢ်, အဂ့ၢ်ဒ်အံၤ, မၤဃူမၤ ဖိးဒီး စီၤယိၤရှူ,ဒီးပှၤအံၣ်စရ့လးဖိလီၤ.
5 ဒီးပှၤအမိၢ်ဖိအစီၤပၤယဲၢ်ဂၤ, ယရူၤၡလ့ၣ် အစီၤပၤ တဂၤ, ဃ့ဘြိၣ်အစီၤပၤတဂၤ, ယၢ်မူသးအစီၤပၤတ ဂၤ, လၤကံၣ်အစီၤပၤတဂၤ, ဧ့းကလိၣ်အစီၤပၤတဂၤ, အိၣ်ဖှိၣ်ရိဖှိၣ်, ဒီးလဲၤထီၣ်, အဝဲသ့ၣ်ဒီးအပှၤသုးမုၢ်ခဲ လၢာ်, ဒီးသူၣ်ဒဲလၢကံးဘိၣ်အမဲာ်ညါ, ဒီးဒုးတၢ်ဒီး အီၤလီၤ.
6 ဒီးကံးဘိၣ်အပှၤကညီ မၢလီၤတၢ်ဆူ စီၤယိၤရှူအ အိၣ်, ဖဲပှၤသူၣ်ဒဲအလီၢ်လၢကံးလကၤလး, ဒီးစံးဝဲဒၣ်, ပာ်စၢ်လီၤနစုလၢ နခ့နပှၤအဂီၢ်တဂ့ၤ, ဟဲထီၣ်ဆူပ အိၣ်ချ့ချ့, ဒီးအုၣ်က့ၤခီၣ်က့ၤပှၤဒီးမၤစၢၤပှၤတက့ၢ်.အ ဂ့ၢ်ဒ်အံၤ, ပှၤအမိၢ်ဖိအစီၤပၤခဲလၢာ်လၢ အအိၣ်အ ဆိးလၢ ကစၢၢ်ကလိန့ၣ်အိၣ်ဖှိၣ်ရိဖှိၣ်ထီဒါလံပှၤလံ.
7 ဒီးစီၤယိၤရှူလဲၤထီၣ်လၢကံးလကၤလး, အဝဲဒၣ်ဒီး, ပှၤသုးဖိခဲလၢာ်အိၣ်ဒီးအီၤ, ဒီးကယဲၢ်ပှၤအဆူၣ်ခဲလၢာ် လီၤ.
8 ဒီးယွၤစံးဘၣ် စီၤယိၤရှူ, ပျံၤအီၤတဂ့ၤ, အဂ့ၢ်ဒ်အံၤ ယဟ့ၣ်လီၤလံအီၤလၢနစုပူၤလံ. ပှၤအိၣ်လၢအကျါတ ဆၢထၢၣ်ဘၣ်လၢနမဲာ်ညါနီတဂၤဘၣ်.
9 ဒီးစီၤယိၤရှူ လဲၤဘၣ်အီၤသတူၢ်ကလာ် (လဲၤထီၣ် လၢကံးလကၤလးသီတနၤကျၢၤ)လီၤ.
10 ဒီးယွၤမၤဃၣ်အီၤလၢ အံၣ်စရ့လးအမဲာ်ညါ, ဒီးမၤ သံအီၤလၢတၢ်မၤသံဖးဒိၣ်ဖဲကံးဘိၣ်, ဒီးလူၤအီၤလၢ ကျဲလဲၤဆူဘ့ၤသဃိရိၣ်, ဒီးကျီကွံာ်အီၤ ပၢၢ်လၢဧစ့ ကၤဒီးပၢၢ်လၢမးက့ဒၤလီၤ.
11 ဒီးအဝဲသ့ၣ်ဃ့ၢ်လၢအံၣ် စရ့လးအမဲာ်ညါအဖၢမုၢ်ဒီး, လၢအလဲၤလီၤလၢဘ့ၤ သဃိရိၣ်န့ၣ်, တၢ်မၤအသးလၢ ယွၤတ့ၢ်လီၤကွံာ် လၢၢ်ဖးဒိၣ်တဖၣ်လၢမူခိၣ်လၢ အဖီခိၣ်ဆူဧစ့ကၤ,ဒီး သံဝဲတကူၢ်သ့ၣ်လီၤ. ပှၤသံလၢသူၣ်အလၢၢ်န့ၣ် အါ န့ၢ်ပှၤအံၣ်စရ့လးဖိမၤသံအီၤလၢနးတက့ၢ်လီၤ.
12 တုၤနုၤတစုမုၢ်တနံၤလၢ ယွၤဟ့ၣ်လီၤကွံာ် ပှၤအ မိၢ်ဖိလၢ ပှၤအံၣ်စရ့လးဖိအမဲာ်ညါန့ၣ် စီၤယိၤရှူက တိၤတၢ်ဒီးယွၤ, ဒီစံးဝဲဒၣ်, လၢအံၣ်စရ့လးအမဲာ်ညါ မုၢ်ဧၢ, အိၣ်ကတီၢ်လၢကံးဘိၣ်အလိၤ, ဒီးလါဧၢ, လၢ အးယၤလိၣ်အကစၢၢ်ကဆူးန့ၣ်တက့ၢ်.
13 ဒီးမုၢ်န့ၣ်အိၣ်ကတီၢ်, ဒီးလါန့ၣ်ဆၢထၢၣ်တုၤပှၤဂီၢ် မုၢ်မၤဆၢတၢ်အၢလၢ အဒုၣ်အဒါအလိၤလီၤ. အအံၤ ကွဲးအသးလၢ လံာ်ယၤၡၣ်အပူၤန့ၣ်တမ့ၢ်ဘၣ်ဧါ. ဒီး မုၢ်န့ၣ်အိၣ်ကတီၢ်လၢမူခိၣ်အသးကံၢ်ပူၤ, ဒီးတနံၤဒီနံၤ ညါဃၣ်ဃၣ်တလဲၤလီၤဘၣ်.
14 ဒီးဒ်သိးယွၤကကနၣ်ပှၤကညီအကလုၢ်ဒီး, လၢသီမ့ၢ်ဂ့ၤ, လၢခံမ့ၢ်ဂ့ၢ်, မုၢ်တနံၤ ဒ်န့ၣ်သိးတအိၣ်ဘၣ်.အ ဂ့ၢ်ဒ်အံၤ, ယွၤဒုးတၢ်လၢအံၣ်စရ့လးအဂီၢ်လီၤ.
15 ဒီးစီၤယိၤရှူက့ၤကဒါက့ၤဝဲ, ဒီးအံၣ်စရ့လးခဲလၢာ် အိၣ်ဒီးအီၤဆူ ပှၤသူၣ်ဒဲအလီၢ်လၢကံးလကၤလးအပူၤ န့ၣ်လီၤ.
16 မ့မ့ၢ်စီၤပၤယဲၢ်ဂၤန့ၣ်ဃ့ၢ်တၢ်, ဒီးပာ်ခူသူၣ်အသးလၢ ဟီၣ်ခိၣ်အအိပူၤလၢမးက့ဒၤအပူၤလီၤ.
17 ဒီးပှၤစံးဘၣ် တဲဘၣ် စီၤယိၤရှူဒီးစံးဝဲဒၣ်, ပှၤထံၣ်န့ၢ် စီၤပၤယဲၢ် ဂၤအိၣ်ခူသူၣ်လၢဟီၣ်ခိၣ်အအိပူၤလၢမးက့ဒၤအပူၤလီၤ
18 ဒီးစီၤယိၤရှူစံးဝဲဒၣ်, တလ့ၣ်လၢၢ်ဖးဒိၣ်တဖၣ်ဆူတၢ် အိပူၤအခိၣ်ထိး, ဒီးပာ်ပှၤကညီဒ်သိးအကခိးဝဲန့ၣ်တ က့ၢ်.
19 ဒီးအိၣ်ကတီၢ်သုဝဲတဂ့ၤ,လူၤသုဒုၣ်သုဒါ, ကျီ ကွံာ်ပှၤလၢ အအိၣ်လၢခံကတၢၢ်တဖၣ်န့ၣ်တက့ၢ်. ဒုး လဲၤနုာ်အီၤဆူ အဝ့ၢ်တဖၣ်အပူၤန့ၣ်တဂ့ၤ. အဂ့ၢ်ဒ်အံၤ ယွၤသုကစၢ်ဟ့ၣ်လီၤကွံာ်အီၤလၢသုစုပူၤလီၤ.
20 ဒီးတုၤစီၤယိၤရှူဒီး ပှၤအံၣ်စရ့လးဖိမၤသံအီၤလၢတၢ် မၤသံဖးဒိၣ် တုၤအလၢာ်ဝံၤဒီး, တၢ်မၤအသးလၢပှၤ အိၣ်လီၤတဲာ်တဖၣ်န့ၣ် လဲၤနုာ်လၢဝ့ၢ်အိၣ်ဒီးအခိၣ်ဒူတ ဖၣ်အပူၤလီၤ.
21 ဒီးပှၤဂီၢ်မုၢ်က့ၤကဒါက့ၤဆူ ပှၤသူၣ်ဒဲအလီၢ်ဆူ စီၤ ယိၤရှူအအိၣ်ဖဲမးက့ဒၤန့ၣ် မုာ်မုာ်လီၤ. ပှၤတဝးဘၣ် အပျ့ၤလၢပှၤအံၣ်စရ့လးဖိအလိၤနီတဂၤဘၣ်.
22 ဒီးစီၤယိၤရှူစံးဝဲဒၣ်, အိးထီၣ်တၢ်အိပူၤအခိၣ်ထိးဒီး ဟဲစိာ်စီၤပၤယဲၢ်ဂၤန့ၣ်လၢအပူၤဆူယအိၣ်တက့ၢ်.
23 ဒီးအဝဲသ့ၣ်မၤဒ်န့ၣ်, ဒီးဟဲစိာ် စီၤပၤယဲၢ်ဂၤန့ၣ်လၢ တၢ်အိပူၤဆူအအိၣ်, ယရူၤၡလ့ၣ်အစီၤပၤတဂၤ,ဃ့ဘြိၣ် အစီၤပၤတဂၤ, ယၢ်မူသးအစီၤပၤတဂၤ, လၤကံၣ်အ စီၤပၤတဂၤ, ဧ့းကလိၣ်အစီၤပၤတဂၤလီၤ.
24 ဒီးတုၤအဟဲစိာ်စီၤပၤတဖၣ်န့ၣ်ဆူ စီၤယိၤရှူအအိၣ်ဒီး တၢ်မၤအသးလၢစီၤယိၤရှူကိးန့ၢ် အံၣ်စရ့လးအပှၤပိာ် ခွါခဲလၢာ်, ဒီးစံးဘၣ် ပှၤသုးမုၢ်အခိၣ်တဖၣ်လၢ အ လဲၤတၢ်ဒီးအီၤ, ဟဲသုးဘူးသုသး, ပာ်သုခီၣ်လၢ စီၤ ပၤတဖၣ်အံၤအကိာ်ဖီခိၣ်န့ၣ်တက့ၢ်. ဒီးအဝဲသ့ၣ်သုး ဘူးအသး, ဒီးပာ်အခီၣ်လၢအကိာ်အဖီခိၣ်လီၤ.
25 ဒီးစီၤယိၤရှူစံးဘၣ်အီၤ, ပျံၤတၢ်တဂ့ၤ, ဒီးဘၣ်ယိၣ် တၢ်တဂ့ၤ,ဒီးပာ်ဆူၣ်သုသး, ဒီးတံးတဟီၣ်တက့ၢ်.အ ဂ့ၢ်ဒ်အံၤ, ယွၤကမၤသုဒုၣ်သုဒါလၢ သုဒုးသုးဒီးအီၤ ခဲလၢာ်န့ၣ်ဒ်န့ၣ်အသိးလီၤ.
26 လၢခံက့ၤ စီၤယိၤရှူကျီကွံာ်စီၤပၤတဖၣ်န့ၣ်, ဒီးမၤသံအီၤ,ဒီးဘျးထီၣ်အီၤလၢသ့ၣ်လိၤယဲၢ်ထံး,ဒီးလီၤစဲၤဝဲ လၢသ့ၣ်လိၤတုၤမုၢ်ဟါလီၤ-
27 ဒီးဖဲမုၢ်လီၤနုာ် အက တီၢ်န့ၣ် တၢ်မၤအသးလၢစီၤယိၤရှူမၤလိာ်တၢ်, ဒီးပှၤ ဟံးလီၤအီၤလၢသ့ၣ်လိၤ, ဒီးတ့ၢ်လီၤကွံာ်အီၤဆူဟီၣ် ခိၣ်အအိပူၤ, ဖဲအအိၣ်ခူသူၣ်တ့ၢ်လၢအပူၤ, ဒီးပာ် လၢၢ်ဖးဒိၣ်တဖၣ်လၢတၢ်အိပူၤအခိၣ်ထိးန့ၣ်လီၤ. အိၣ် တုၤမုၢ်မဆါတနံၤအံၤလီၤ.
28 ဒီးတၢ်လၢမုၢ်တနံၤန့ၣ် စီၤယိၤရှူမၤန့ၢ်မးက့ဒၤ, ဒီး ကျီကွံာ်အီၤလၢနးအကနၣ်, ဒီးမၤဟးဂီၤကွံာ်အစီၤပၤ, အဝဲဒၣ်ဒီးကယဲၢ်ပှၤအိၣ်လၢဝ့ၢ်ပူၤလီၤ. တပာ်လီၤတဲာ် ဘၣ်နီတဂၤဘၣ်. ဒီးမၤမးက့ဒၤအစီၤပၤဒ်အမၤယရံၤဃိ အစီၤပၤအသိးန့ၣ်လီၤ.
29 ဒီးစီၤယိၤရှူ ဟးထီၣ်လၢမးက့ဒၤ, ဒီးအံၣ်စရ့လးခဲ လၢာ်အိၣ်ဒီးအီၤဆူ လံးဘနၤ, ဒီးဒုးတၢ်ဒီးလံးဘနၤ န့ၣ်လီၤ.
30 ဒီးယွၤဟ့ၣ်လီၤကွံာ်စ့ၢ်ကီးအီၤ, ဒီးအစီၤပၤ လၢအစုပူၤ, ဒီးကျီကွံာ်ဝဲလၢနးအကနၣ်, ဒီးကယဲၢ်ပှၤ အိၣ်လၢအပူၤလီၤ. တပာ်လီၤတဲာ်ဘၣ်လၢအပူၤနီတ ဂၤဘၣ်. ဒီးမၤအစီၤပၤဒ်အမၤ ယရံၤဃိအစီၤပၤအသိး န့ၣ်လီၤ.
31 ဒီးစီၤယိၤရှူ ဟးထီၣ်ကွံာ်လၢလံးဘနၤ, ဒီးအံၣ်စရ့ လးခဲလၢာ်အိၣ်ဒီးအီၤဆူလၤကံၣ်, ဒီးသူၣ်ဒဲထီဒါအီၤ, ဒီးဒုးတၢ်ဒီးအီၤလီၤ.
32 ဒီးယွၤဟ့ၣ်လီၤကွံာ် လၤကံၣ်လၢအံၣ်စရ့လးအစုပူၤ လၢအမၤန့ၢ်အီၤလၢခံနံၤတနံၤ, ဒီးကျီကွံာ်အီၤလၢနးအ ကနၣ်,ဒီးကယဲၢ်ပှၤအိၣ်လၢအပူၤ, ဒ်ကယဲၢ်တၢ်လၢအ မၤတ့ၢ်လံးဘနၤအသိးန့ၣ်လီၤ.
33 တုၤနုၤတစု က့စ့ၢ်အစီၤပၤဟိရၣ် ဟဲဝဲဒ်သိးအက မၤစၢၤလၤကံၣ်, ဒီးစီၤယိၤရှူကျီကွံာ်အီၤ, ဒီးအပှၤဂီၢ်မုၢ် ဒီးတပာ်လီၤတဲာ်ဘၣ်နီတဂၤဘၣ်.
34 ဒီးစီၤယိၤရှူဟးထီၣ်ကွံာ်လၢ လၤကံၣ်ဆူဧ့းကလိၣ်ဒီး အံၣ်စရ့လးခဲလၢာ်အိၣ်ဒီးအီၤ, ဒီးသူၣ်ဒဲထီဒါအီၤ, ဒီး ဒုးတၢ်ဒီးအီၤ,
35 ဒီးမၤန့ၢ်အီၤလၢမုၢ်တနံၤန့ၣ်, ဒီးကျီ ကွံာ်အီၤလၢနးအကနၣ်, ဒီးကယဲၢ်ပှၤအိၣ်လၢအပူၤခဲ လၢာ်န့ၣ်မၤဟးဂူာ်ဟးဂီၤကွံာ်ဝဲလၢမုၢ်တနံၤန့ၣ် ဒ်က ယဲၢ်တၢ်လၢအမၤတ့ၢ်လၤကံၣ်အသိးန့ၣ်လီၤ.
36 ဒီးစီၤယိၤရှူဟးထီၣ်ကွံာ်လၢ ဧ့းကလိၣ်ဆူဃ့ဘြိၣ်ဒီး အံၣ်စရ့လးခဲလၢာ်အိၣ်ဒီးအီၤ, ဒီးဒုးတၢ်ဒီးအီၤ,
37 ဒီးမၤ န့ၢ်အီၤ, ဒီးကျီကွံာ်အီၤလၢနးအကနၣ်, ဒီးအစီၤပၤ, ဒီး အဝ့ၢ်တဖၣ်, ဒီးကယဲၢ်ပှၤအိၣ်လၢအပူၤခဲလၢာ်, ဒီးတ ပာ်လီၤတဲာ်ဘၣ်နီတဂၤဘၣ်, (ဒ်ကယဲၢ်တၢ်လၢအမၤ တ့ၢ်ဧ့းကလိၣ်အသိးန့ၣ်), ဒီးမၤဟးဂူာ်ဟးဂီၤကွံာ်ဝဲ, ဒီးကယဲၢ်ပှၤအိၣ်လၢအပူၤခဲလၢာ်လီၤ.
38 ဒီးစီၤယိၤရှူက့ၤက့ၤ, ဒီးအံၣ်စရ့လးခဲလၢာ်အိၣ်ဒီး အီၤ,ဆူဒဘံၢ်,ဒီးဒုးတၢ်ဒီးအီၤ,
39 ဒီးမၤန့ၢ်အီၤ, ဒီးအစီၤ ပၤ, ဒီးအဝ့ၢ်ခဲလၢာ်တဖၣ်, ဒီးကျီကွံာ်အီၤလၢနးအက နၣ်, ဒီးမၤဟးဂူာ်ဟးဂီၤကွံာ်ကယဲၢ်ပှၤအိၣ် လၢအပူၤခဲ လၢာ်လီၤ. တပာ်လီၤတဲာ်ဘၣ်နီတဂၤဘၣ်, ဒ်အမၤ တ့ၢ်ဃ့ဘြိၣ်အသိးန့ၣ် မၤဒဘံၢ်ဒီးအစီၤပၤဒ်န့ၣ်အသိး, ဒ်အမၤတ့ၢ်စ့ၢ်ကီးလံးဘနၤဒီးအစီၤပၤအသိးန့ၣ်လီၤ.
40 ဒီးစီၤယိၤရှူကျီကွံာ်ကစၢၢ်ကလိအကီၢ်ဒီကီၢ်ညါ, ဒီး ကလံၤထံးအကီၢ်, ဒီးတၢ်ပၢၤခိၣ်အကီၢ်ဒီး တၢ်စိခိၣ်အ ကီၢ်,ဒီးအစီၤပၤခဲလၢာ်လီၤ. တပာ်လီၤတဲာ်ဘၣ်နီတဂၤ ဘၣ်. မၤဟးဂူာ်ဟးဂီၤကယဲၢ်တၢ်လၢအသါဝဲ, ဒ်ယွၤ အံၣ်စရ့လးအကစၢ်မၤလိာ်ဝဲအသိးန့ၣ်လီၤ.
41 ဒီးစီၤယိၤရှူကျီကွံာ်တၢ်လၢ ကၤဒ့ၣ်ဘၢ်န့ပၢၢ်လၢဂါ စၤ,ဒီးကိၡၣ်အကီၢ်ဒီဘ့ၣ်ညါပၢၢ်လၢကံးဘိၣ်လီၤ.
42 ဒီးစီၤပၤခဲလၢာ်န့ၣ် ဒီးအထံဧိၤကီၢ်ဧိၤန့ၣ် စီၤယိၤရှူ မၤန့ၢ်အီၤတပူၤဃီလီၤ. အဂ့ၢ်ဒ်အံၤ, ယွၤအံၣ်စရ့လး အကစၢ်ဒုးတၢ်လၢအံၣ်စရ့လးအဂီၢ်လီၤ.
43 ဒီးစီၤယိၤရှူ က့ၤကဒါက့ၤ, ဒီးအံၣ်စရ့လးခဲလၢာ် အိၣ်ဒီးအီၤဆူပှၤသူၣ်ဒဲအလီၢ်လၢ ကံးလကၤလးအပူၤ န့ၣ်လီၤ.