56
1 ယွၤစံးဒ်အံၤ,တိၢ်န့ၢ်တၢ်စံၣ်ညီၣ်တီ, ဒီးမၤတၢ်တီတၢ် လိၤတက့ၢ်. အဂ့ၢ်ဒ်အံၤ, ယတၢ်အုၣ်က့ၤခီၣ်က့ၤအိၣ် ဘူးတ့ၢ်လံ, ဒီးယတၢ်တီတၢ်လိၤလၢအကအိၣ်ဖျါထီၣ် လီၤ.
2 ပှၤလၢအမၤတၢ်အံၤ, ဒီးပှၤကညီဖိလၢ အဟံးဃာ် အီၤ,လၢအတိၢ်န့ၢ်မုၢ်အိၣ်ဘှံးနံၤ, ဒ်သိးအသုတမၤဘၣ် အၢအီၤတဂ့ၤ,ဒီးကွၢ်အစုဒ်သိးအသုတမၤတၢ်အၢတဂ့ၤ န့ၣ်ဘၣ်ဆိၣ်ဂ့ၤဝဲလီၤ.
3 ဒီးပှၤတခီဘီမုၢ်ဖိလၢ အစဲဘူးအသးဒီးယွၤန့ၣ်မ်အ သုတစံး, ယွၤကမၤလီၤဖးကွံာ်ယၤသပှၢ်တၢၢ်ဒီးအပှၤ ဂီၢ်မုၢ်န့ၣ်တဂ့ၤ.
4 ဒီးပှၤဒ့ဒံၣ်ဖိ မ်အသုတစံး,ယမ့ၢ်သ့ၣ် ဃ့တထူၣ်န့ၣ်တဂ့ၤ. အဂ့ၢ်ဒ်အံၤ,ယွၤစံး,ပှၤဒ့ဒံၣ်ဖိလၢ အတိၢ်န့ၢ်ယမုၢ်အိၣ်ဘှံးနံၤတဖၣ်, ဒီးဃုထၢတၢ်လၢအ ဘၣ်ယသး,ဒီးဟံးဃာ်ယတၢ်အၢၣ်လီၤအီလီၤန့ၣ်,
5 ယ ကဟ့ၣ်လီၤအီၤလၢ အလီၢ်ဒီးအမံၤဂ့ၤန့ၢ်ဖိခွါ,ဒီးဖိမုၣ် တက့ၢ်လၢယဟံၣ်ပူၤ, ဒီးလၢယခိၣ်ဒူအပူၤလီၤ. ယက ဟ့ၣ်လီၤအီၤလၢ အမံၤအထူအယိာ် လၢအတဘၣ်တၢ် ဒီၣ်တဲာ်ကွံာ်ဘၣ်လီၤ.
6 ဒီးပှၤတခီဘီမုၢ်ဖိလၢအစဲဘူးအသးဒီးယွၤ, ဒ်သိးအ ကမၤအတၢ်, ဒီးဒ်သိးအကအဲၣ်ယွၤအမံၤ,ဒ်သိးအက ကဲထီၣ်အခ့အပှၤ, ကယဲၢ်ပှၤလၢအတိၢ်န့ၢ်မုၢ်အိၣ်ဘှံး နံၤ,ဒီးတမၤဘၣ်အၢအီၤ, ဒီးဟံးဃာ်ယတၢ်အၢၣ်လီၤအီ လီၤခဲလၢာ်န့ၣ်,
7 ယကဒုးဟဲထီၣ်အဝဲသ့ၣ်ဒၣ်လဲာ်ဆူ ယကစၢၢ်စီဆှံ, ဒီးယကဒုးသးခုအီၤလၢယတၢ်ဘါထု ကဖၣ်အဟံၣ်ပူၤလီၤ. အတၢ်လုၢ်မ့ၣ်အူဒီးအတၢ်လုၢ် တဖၣ်န့ၣ်ကဘၣ်တၢ်အသး လၢယတၢ်လုၢ်လီၢ်အဖီခိၣ် လီၤ. အဂ့ၢ်ဒ်အံၤ, ယဟံၣ်ကဘၣ်တၢ်ကိးအီၤလၢတၢ် ဘါထုကဖၣ်အဟံၣ်လၢပှၤကိးကလုာ်ဒဲးအဂီၢ်လီၤ.
8 ကစၢ်ယွၤလၢအဒုးအိၣ်ဖှိၣ်အံၣ်စရ့လးအပှၤဘၣ်တၢ် ဟီထီၣ်ကွံာ်အီၤတဖၣ်န့ၣ်စံးဒ်အံၤ, ပှၤလၢအအိၣ်ဖှိၣ် တ့ၢ်ဆူအအိၣ်အမဲာ်ညါန့ၣ် ယကဒုးအိၣ်ဖှိၣ်ပှၤဂၤဆူအ အိၣ်လီၤ.
9 ကယဲၢ်ဆၣ်ဖိကီၢ်ဖိလၢတၢ်ပျီပူၤသ့ၣ်ဧၢ, ဟဲအီၣ်တၢ်တက့ၢ်,ဆၣ်ဖိကီၢ်ဖိလၢ ပှၢ်လၢ်ကျါခဲလၢာ်သ့ၣ်ဧၢ.-
10 အပှၤခိးတၢ်ဖိမ့ၢ် ပှၤမဲာ်ဘျီၣ်ခဲလၢာ်, တသ့ၣ်ညါဘၣ် တၢ်ဘၣ်,မ့ၢ်ထွံၣ်တအုၣ်ခဲလၢာ်လီၤ. မီၤတၢ်တသ့ဘၣ်, မ့ၢ်အမံမီၢ်တၢ်,မံခ့ဝဲ,အဲၣ်ဒိးမံသပ့ၤ,
11 ဒီးထွံၣ်န့ၣ်သးကွံ တၢ်အီၣ်,ဒီးတသ့ၣ်ညါဘၣ်တၢ်ဘျဲးအီၣ်ဘၣ်, ဒီးပှၤကွၢ် သိအကစၢ်ဒၣ်ဝဲန့ၣ်အနၢ်တပၢၢ်ဘၣ်တၢ်ဘၣ်. ဃၣ်အ သးတဂၤဆူအကျဲဒၣ်ဝဲတဂၤဆူအကျဲဒၣ်ဝဲ, တဂၤဆူအ သးကွံတၢ်အပူၤတဂၤဆူအသးကွံတၢ်အပူၤစုာ်စုာ်လီၤ.
12 ဟဲသကိး, စံးဝဲ,ယကမၤန့ၢ်စပံးထံ,ဒီးပကဘျဲးအီလၢ သံး, ဒီးခဲဂီၤတနံၤကမၤအသးဒ်မုၢ်မဆါတနံၤအံၤအသိး န့ၣ်,ဒိၣ်န့ၢ်,အါန့ၢ်,နးန့ၢ်တက့ၢ်လီၤ.