3
1 အဂ့ၢ်ဒ်အံၤ, ကွၢ်ကွၢ်, ကစၢ်, တၢ်သုးမုၢ်ဂီၢ်မုၢ်အယွၤ န့ၣ်ဒုးဟးထီၣ်ကွံာ်,လၢယရူၤၡလ့ၣ်,ဒီးယူဒၤအပူၤ,တၢ် သန့ၤအသးအလီၢ်, ဒီးတၢ်လၢပှၤသန့ၤအသးလၢအီၤ လီၤ. ကိၣ်သန့ၤအသးအလီၢ်ခဲလၢာ်,ဒီးထံသန့ၤအသး အလီၢ်ခဲလၢာ်,
2 ပှၤအဆူၣ်ဒီးပှၤဒုးသုးဖိ, ဒီးပှၤစံၣ်ညီၣ် ကွီၢ်ဒီးဝံဧိၤမီၣ်ဧိၤ, ပှၤဖးတၢ်ဖိဒီးပှၤသူၣ်က့သးပှၢ်,
3 ပှၤ ယဲၢ်ဆံအခိၣ်ဒီးပှၤဘၣ်တၢ်အမဲာ်, ပှၤကူၣ်လိာ်အသးဒီး ပှၤမၤတၢ်သ့,ဒီးပှၤမၤကဒါပမဲာ်လီၤ.
4 ဒီးယကပာ်ဖိဒံဖိ သၣ်လၢအပဒိၣ်ဖးဒိၣ်,ဒီးဖိသၣ်အီၣ်နုၢ်ကပၢအီၤလီၤ.
5 ဒီးပှၤဂီၢ်မုၢ်ကမၤအၢလိာ်အသး သကိးသကိးဒီးတ ဂၤဒီးတဂၤလီၤ. ပှၤဖိၣ်သၣ်ခွါကမၤတရီတပါပှၤသူၣ် က့သးပှၢ်, ဒီးပှၤလၢအလၤကပီၤတအိၣ်ဘၣ်န့ၣ်ကမၤ တရီတပါပှၤလၢအလၤအကပီၤအိၣ်လီၤ.
6 တုၤနုၤတစုပှၤတဂၤ ကဟံးဃာ်အဒီပုၢ်ဝဲၢ်လၢအပၢ် အပှၤဟံၣ်ဖိအကျါ, ဒီးစံး, နအိၣ်ဒီးတၢ်ကူတၢ်သိး, မ်န ကဲထီၣ်ပဒိၣ်, ဒီးတၢ်လီၤပှီၢ်အံၤကအိၣ်လၢနစုအဖီလာ် တက့ၢ်.
7 တၢ်လၢမုၢ်တနံၤန့ၣ်ကထုထီၣ်အကလုၢ်ဒီးစံး, ယတ ကဲဘၣ်ပှၤမၤဘျါက့ၤတၢ်ဘၣ်, အဂ့ၢ်ဒ်အံၤ, ကိၣ်မ့ၢ်ဂ့ၤ တၢ်အကူအသိးမ့ၢ်ဂ့ၤ, တအိၣ်ဘၣ်လၢယဟံၣ်ပူၤဘၣ်. ပာ်ယၤလၢပှၤပၢပှၤဂီၢ်မုၢ်တဂ့ၤ.
8 အဂ့ၢ်ဒ်အံၤ, ယရူၤၡလ့ၣ်ဟူးဝးဝဲ, ဒီးယူဒၤလီၤဃံၤဝဲ လီၤ. အဂ့ၢ်ဒ်အံၤ, အပျ့ၤဒီးအမၤတၢ်န့ၣ်ထီဒါယွၤဒ်သိး အကမၤဆါအတၢ်လၤကပီၤအမဲာ်လီၤ.
9 အမဲာ်ဖျါထီၣ်န့ၣ်အုၣ်အသးထီဒါအီၤလီၤ. ဒီးဒုးနဲၣ် အတၢ်ဒဲးဘးဒ်စဒိၣ်အသိးန့ၣ်, တပာ်ခူသူၣ်ဘၣ်အသး န့ၣ်ဘၣ်အဖှီၣ်လီၤ. အဂ့ၢ်ဒ်အံၤ, မၤအၢလီၤအသးလီၤ.
10 စံးလၢပှၤတီပှၤလိၤအဂ့ၢ်န့ၣ် လၢတၢ်ကဂ့ၤလၢအဂီၢ် န့ၣ်တက့ၢ်. အဂ့ၢ်ဒ်အံၤ, ကအီၣ်အမၤတၢ်အတၤသၣ် လီၤ.
11 ပှၤအၢဖိန့ၣ်ဘၣ်အဖှီၣ်လီၤ. အဂ့ၢ်ဒ်အံၤ, တၢ်ကမၤ ဘၣ်အီၤဒ်အစုမၤဝဲအသိးန့ၣ်လီၤ.
12 ယပှၤဂီၢ်မုၢ်အံၤ, အပှၤမၤအၢအီၤန့ၣ် မ့ၢ်ဖိဒံဖိသၣ်ဒီး ပိာ်မုၣ်ပိာ်မၢၤပၢအီၤလီၤ. ယပှၤဂီၢ်မုၢ်ဧၢ, ပှၤလၢအဆှၢ နၤတဖၣ်န့ၣ်ဒုးဟးဖျိးနၤ, ဒီးယူၢ်လီၤကွံာ်နလဲၤတၢ်အ ကျဲလီၤ.
13 ယွၤဆၢထၢၣ်ဝဲဒ်သိးအကကတိၤလိာ်ကွီၢ်, ဒီးဂဲၤဆၢ ထၢၣ်ဝဲဒ်သိးအကစံၣ်ညီၣ်ပှၤကလုာ်တဖၣ်လီၤ.
14 ယွၤကလဲၤနုာ်လၢတၢ်စံၣ်ညီၣ်အပူၤ ဒီးအပှၤဂီၢ်မုၢ်အ သူၣ်က့သးပှၢ်, ဒီးအပဒိၣ်ဖးဒိၣ်တဖၣ်လီၤ.မ့ၢ်သုဝဲသ့ၣ် လၢအအီၣ်ကွံာ်လံစပံးမုၢ်အလီၢ်လံ. တၢ်ဂုာ်န့ၢ်လၢပှၤ ဖှီၣ်ဖိယာ်ဖိန့ၣ်အိၣ်ဝဲလၢသုဟံၣ်ပူၤလီၤ.
15 သုတီၢ်လီၤကလဲ ယပှၤဂီၢ်မုၢ်, ဒီးသုဂုာ်ကျ့ပှၤဖှီၣ်ဖိ ယာ်ဖိအမဲာ်ဘၣ်မနုၤလဲၣ်, ကစၢ်, တၢ်သုးမုၢ်ဂီၢ်မုၢ်အ ယွၤစံးဝဲဒၣ်.
16 ဒီးယွၤစံးဝဲဒၣ်, မ့ၢ်လၢစံယိၣ်အဖိမုၣ်အသးထီၣ်ထီ, ဒီးလဲၤဒီးအကိာ်ယူာ်ထီၣ်အသး, ဒီးလွဲတၢ်လၢအမဲာ်, ဒီးထွဲတၢ်ဒုးလၢအလဲၤတၢ်, ဒီးမၤသီၣ်ပှ့ၤသၣ်လၢအခီၣ် ဒီး,
17 ယွၤကမၤကျၤစံယိၣ်အဖိမုၣ်အခိၣ်ဒီ, ဒီးယွၤက လီၣ်ဖျါထီၣ်အတၢ်ဘ့ၣ်ဆ့လီၤ.
18 တၢ်လၢမုၢ်တနံၤန့ၣ်ယွၤကဟံးထီၣ်ကွံာ်အကယၢကယဲပှ့ၤဘၣ်,ဒီးအခိၣ်ဖျီၣ်,ဒီးတၢ်ကဝီၤဒ်လါအသိးန့ၣ်,-
19 တၢ်လီၤစဲၤ. ဒီးထံဖှံၣ်တိၢ်ပီၤ. ဒီးတၢ်မၤဘၢမဲာ်ခိၣ်ကျီၤ,
20 ဒီးခီၣ်အသွဲ,ဒီးနီၣ်ဘိၣ်,ဒီးတၢ်နၢမူအကိဧိၤ ဂီၢ်ဧိၤ,ဒီးအပစၢ်ပစီၢ်
21 ပသံး, ဒီးနါဒ့အကွီၢ်,
22 -တၢ်အကူအသိး လၢအလုၢ်ဒိၣ်ပှ့ၤဒိၣ် ဒီးဆ့ဖးထီ, ဒီးယၣ်ဖးလဲၢ်, ဒီးစ့ အထၢၣ်,
23 ဒီးမဲာ်ထံကလၤ ဒီးဆ့ဖှီခီမၤ ဒီးခိၣ်ဖၢၣ်, ဒီးတၢ်မၤဘၢမဲာ်လီၤ.
24 ဒီးတၢ်ကမၤအသးလၢနၢမူအလီၢ်န့ၣ်နၢအုၣ်ကအိၣ်, ဒီးလၢယီၢ်တကိးအလီၢ်န့ၣ်ပျံၤတဘိ, ဒီးလၢခိၣ်သူသံၣ် အလီၢ်န့ၣ်ကျၤခိၣ်, ဒီးလၢတၢ်အကူအသိးဖးလဲၢ်အလီၢ် န့ၣ်ယီၢ်တကိးထၢၣ်တၢ်ကံးညာ်လီၤ. ကိၢ်ဃိာ်အလီၢ် ကအိၣ်လၢတၢ်အဃံအလၤအလီၢ်လီၤ.
25 နဖိခွါကလီၤဃံၤလၢနး, နပှၤအဆူၣ်န့ၣ်လၢဒုးသုးအ ပူၤလီၤ.
26 အပဲတရီကဟီၣ်ဒီးယၢၤလီၤ. ဒီးအိၣ်ကလီဝဲ, ဒီးကဆ့ၣ်နီၤလၢဟီၣ်ခိၣ်လိၤလီၤ.