34
1 ဒီးနီၢ်လ့ၤအၤအဖိမုၣ်နီၢ်ဒံနၤ, လၢအဆံးစၢ်န့ၢ်လၢစီၤ ယၤကိာ်တဂၤန့ၣ်လဲၤအိၣ်သကိးပှၤကီၢ်ဖိအဖိမုၣ်လီၤ.
2 ဒီးပှၤဃံၤဝံၤဖိကီၢ်အပဒိၣ်စီၤဃမိၢ်အဖိခွါ စီၤၡက့ၣ် ထံၣ်အီၤ, ဒီးဟံးန့ၢ်အီၤ, ဒီးမံဃုာ်ဒီးအီၤ, ဒီးမၤဟးဂီၤ အီၤလီၤ.
3 ဒီးအသးစဲဘူးဒီးစီၤယၤကိာ်အဖိမုၣ်နီၢ်ဒံနၤ, ဒီးအဲၣ်ဖိသၣ်ပိာ်မုၣ်န့ၣ်, ဒီးကတိၤတၢ်ဒီးဖိသၣ်ပိာ်မုၣ် န့ၣ်ဘၣ်သူၣ်ဘၣ်သးလီၤ.
4 ဒီးစီၤၡက့ၣ်ကတိၤတၢ်ဒီး အပၢ်စီၤဃမိၢ်, ဒီးစံးဝဲဒၣ်, မၤန့ၢ်ယၤလၢပိာ်မုၣ်ဖိသၣ် တဂၤအံၤလၢယမါတက့ၢ်.
5 ဒီးစီၤယၤကိာ်နၢ်ဟူဝဲလၢ အမၤဘၣ်အၢအဖိမုၣ်နီၢ်ဒံ နၤလီၤ. ဒီးအဖိခွါတဖၣ်အိၣ်ဝဲဒီးဆၣ်ဖိကီၢ်ဖိအဒၢလၢ ပှၢ်လၢ်ကျါ, ဒီးစီၤယၤကိာ် အိၣ်ဘှီၣ်ဝဲတုၤအဟဲက့ၤ လီၤ.
6 ဒီးစီၤၡက့ၣ်အပၢ်စီၤဃမိၢ်ဟးထီၣ်ဝဲဆူစီၤယၤ ကိာ်အအိၣ်ဒ်သိးအကကတိၤတၢ်ဒီးအီၤလီၤ.
7 ဒီးတုၤစီၤယၤကိာ်အဖိခွါတဖၣ်နၢ်ဟူဝဲဒီး, ဟဲက့ၤ ထီၣ်ဝဲလၢပှၢ်လၢ်ကျါ, ဒီးအသးဆါဒီးအသးထီၣ်နးမး လီၤ. အဂ့ၢ်ဒ်အံၤ, မ့ၢ်အမံဃုာ်ဒီးစီၤယၤကိာ်အဖိမုၣ် ဒီးမၤပှၤဟးဂီၤဖိအတၢ်မၤလၢ အံၣ်စရ့လးအကျါလီၤ. ဒီးတဂ့ၤမၤဘၣ်ဒ်န့ၣ်ဘၣ်.
8 ဒီးစီၤဃမိၢ်ကတိၤတၢ်ဒီးအီၤ, ဒီးစံးဝဲဒၣ်, ယဖိခွါ စီၤၡက့ၣ်အသးစဲဘူးဒီးသုဖိမုၣ်လီၤ. ဟ့ၣ်လၢ်အီၤလၢ အမါတက့ၢ်.
9 ဒီးန့ၢ်မါန့ၢ်ဝၤဒီးပှၤတက့ၢ်. ဟ့ၣ်သုဖိ မုၣ်တဖၣ်လၢပှၤ, ဒီးဟံးန့ၢ်ပဖိမုၣ်လၢသုဂီၢ်တက့ၢ်.
10 ဒီးသုကအိၣ်ကဆိးဒီးပှၤ, ဒီးကီၢ်အံၤကအိၣ်လၢသုမဲာ် ညါလီၤ. အိၣ်သုဝဲဒီးကၤတၢ်လၢအပူၤ, ဒီးမၤန့ၢ်တၢ် ဟံးဃာ်လၢအပူၤတက့ၢ်.
11 ဒီးစီၤၡက့ၣ်စံးဘၣ်ပိာ်မုၣ်အပၢ် ဒီးအဒီပုၢ်ဝဲၢ်တဖၣ်, မ်ယဘၣ်ဘျုးဘၣ်ဖှိၣ်လၢသုမဲာ်ညါတက့ၢ်. ဒီးတၢ်လၢ သုစံးဘၣ်ယၤယကဟ့ၣ်လီၤ.
12 တၢ်ကလိးဒီးတၢ်ဟ့ၣ် န့ၣ်သုမ့ၢ်ဃ့လၢယၤအါအါကလဲာ်နာ်သက့ဒီး, ယက ဟ့ၣ်ဖဲဒၣ်သုစံးတၢ်လီၤ. ဒီးဟ့ၣ်ဖိသၣ်ပိာ်မုၣ်န့ၣ်လၢ ယမါတက့ၢ်.
13 ဒီးစီၤယၤကိာ်အဖိခွါတဖၣ်စံးဆၢစီၤၡက့ၣ်, ဒီးအ ပၢ်စီၤဃမိၢ်အိၣ်ဒီးလီတၢ်လီၤ. ဒီးစံးဝဲဒၣ်, မ့ၢ်အမၤ ဘၣ်အၢပဒီပုၢ်ဝဲၢ်မုၣ်အဂ့ၢ်လီၤ.
14 ဒီးစံးဘၣ်အီၤ, တၢ်တမံၤအံၤဟ့ၣ်ပဒီပုၢ်ဝဲၢ်မုၣ်လၢပှၤ လၢအတဒိးဘၣ်တၢ်ကူးတရံးန့ၣ်ပမၤတသ့ဘၣ်. အဂ့ၢ် ဒ်အံၤ, မ့ၢ်တၢ်ဒုၣ်ဒွဲၣ်ပှၤအလီၢ်လီၤ.
15 ဘၣ်ဆၣ်ဒီးပက အၢၣ်လီၤသုဒ်အံၤ, သုမ့ၢ်ကဲထီၣ်ဒ်ပှၤအသိး, ကယဲၢ် ပိာ်ခွါဒိးတၢ်ကူးတရံးကိးဂၤဒဲးန့ၣ်ဒီး,
16 ပကဟ့ၣ်ပဖိ မုၣ်လၢသု, ဒီးပကဟံးန့ၢ်သုဖိမုၣ်လၢပဂီၢ်, ဒီးပက အိၣ်ကဆိးဒီးသု, ဒီးပကကဲထီၣ်ပှၤတကလုာ်ဃီလီၤ.-
17 မ့မ့ၢ်သုမ့ၢ်တကနၣ်ဘၣ်ပကလုၢ်လၢ သုကဒိးတၢ်ကူး တရံးန့ၣ်ဘၣ်ဒီး, ပကဟံးန့ၢ်ကွံာ်ပဖိမုၣ်, ဒီးလဲၤတၢ် လီၤ.
18 ဒီးအတၢ်ကတိၤန့ၣ်ဂ့ၤဝဲလၢစီၤဃမိၢ်, ဒီးစီၤဃမိၢ်အ ဖိခွါစီၤၡက့ၣ်အမဲာ်ညါလီၤ.
19 ဒီးဖိၣ်သၣ်ခွါန့ၣ်ဒ်သိး အကမၤတၢ်တမံၤန့ၣ်ဒီး, တသုးနံၤသုးသီဘၣ်, မ့ၢ်အ ဘၣ်အသးလၢ စီၤယၤကိာ်အဖိမုၣ်အဂ့ၢ်လီၤ. ဒီးအဝဲ ဒၣ်န့ၣ်အလၤအကပီၤဒိၣ်န့ၢ် အပၢ်အပှၤဟံၣ်ဖိခဲလၢာ် တက့ၢ်လီၤ.
20 ဒီးစီၤဃမိၢ်, ဒီးအဖိခွါစီၤၡက့ၣ်လဲၤဝဲဆူအဝ့ၢ်အပဲတ ရီ, ဒီးကတိၤတၢ်ဒီးပှၤဝ့ၢ်ဖိဒီးစံးဝဲဒၣ်,
21 ပှၤတဖၣ်န့ၣ် အိၣ်ဃူအိၣ်ဖိးဒီးပှၤ, ဒီးမ်အအိၣ်အဆိးလၢကီၢ်ပူၤ, ဒီး ကၤတၢ်လၢအပူၤတက့ၢ်. ကွၢ်ကွၢ်, ကီၢ်အံၤလဲၢ်ဝဲလၢ အမဲာ်ညါလီၤ. မ်ပန့ၢ်မါလၢအဖိမုၣ်, ဒီးဟ့ၣ်အီၤလၢ ပဖိမုၣ်တက့ၢ်.
22 ဘၣ်ဆၣ်ဒီးပှၤတဖၣ်န့ၣ်ကအၢၣ်လီၤ ဒီးပှၤလၢအကအိၣ်ဒီးပှၤ ဒီးကဲထီၣ်ပှၤတကလုာ်ဃီဒီး ပှၤမ့ၢ်ထဲလၢကယဲၢ်ပှၤပိာ်ခွါလၢပကျါ ဘၣ်ဒိးတၢ်ကူး တရံး ဒ်အဝဲသ့ၣ်တဖၣ် ဒိးတၢ်ကူးတရံးအသိးဧိၤန့ၣ် လီၤ.
23 ဒီးအတၢ်ဖိတၢ်လံၤ, ဒီးအစုလီၢ်အခီၣ်ခိၣ်, ဒီး ကယဲၢ်အဆၣ်ဖိကီၢ်ဖိအဒၢခဲလၢာ်န့ၣ် ကကဲလၢပတၢ် တမ့ၢ်ဘၣ်ဧါ. ထဲပအၢၣ်လီၤဒီးအီၤန့ၣ်ဒီး, ကအိၣ်ဝဲ ဆိးဝဲဒီးပှၤလီၤ.
24 ဒီးကယဲၢ်ပှၤလၢအဟးထီၣ်လၢ အဝ့ၢ်ပဲတရီန့ၣ် က နၣ်စီၤဃမိၢ်, ဒီးစီၤၡက့ၣ်အကလုၢ်, ဒီးကယဲၢ်ပှၤပိာ် ခွါဒိးတၢ်ကူးတရံး, ပှၤလၢအဟးထီၣ်လၢအဝ့ၢ်ပဲတရီ ကိးဂၤဒဲးလီၤ.
25 ဒီးတုၤပှၤဆါထီၣ်ဖဲမုၢ်သၢနံၤတနံၤန့ၣ် တၢ်မၤအသး လၢစီၤယၤကိာ်အဖိခွါဒီပုၢ်ဝဲၢ်ဒီးနီၢ်ဒံနၤ, စီၤစူးမ့းအိၣ် ဒီးစီၤလ့ၤဝံခံဂၤန့ၣ်, ဟံးန့ၢ်နးတဂၤတဘ့ၣ် တဂၤတ ဘ့ၣ်, ဒီးလဲၤနုာ်ဝဲလၢဝ့ၢ်ပူၤအိၣ်ဒီးအသးခူတလ့ၢ်, ဒီး မၤသံပှၤပိာ်ခွါခဲလၢာ်လီၤ.
26 ဒီးမၤသံစီၤဃမိၢ်, ဒီးအ ဖိခွါစီၤၡက့ၣ်လၢနးအကနၣ်, ဒီးဟံးထီၣ်ကွံာ်နီၢ်ဒံနၤ လၢစီၤၡက့ၣ်အဟံၣ်ပူၤ, ဒီးဟးထီၣ်ကွံာ်ဝဲလီၤ.
27 ဒီးစီၤ ယၤကိာ်အဖိခွါတဖၣ်ဟဲလီၤဘၣ်လၢ ပှၤဘၣ်တၢ်မၤသံ အီၤအလိၤ, ဒီးဂုာ်န့ၢ်ဝ့ၢ်အတၢ်, လၢပှၤမၤဘၣ်အၢအ ဒီပုၢ်ဝဲၢ်မုၣ်အဃိလီၤ.
28 ဒီးဟံးန့ၢ်အသိ, ဒီးမဲာ်တဲးလဲး, ဒီးအဂီၤဖံး, ဒီးအကသ့ၣ်ယီၤ, ဒီးတၢ်အိၣ်လၢဝ့ၢ်ပူၤ, ဒီးတၢ်အိၣ်လၢပျီပူၤ,
29 ဒီးအတၢ်ဖိတၢ်လံၤခဲလၢာ်, ဒီး ကယဲၢ်အဖိဒံဖိသၣ်ဒီးဖီၣ်န့ၢ်အမါ, ဒီးဂုာ်န့ၢ်တၢ်အိၣ် လၢဟံၣ်ပူၤခဲလၢာ်လီၤ.
30 ဒီးစီၤယၤကိာ်စံးဘၣ်စီၤစူးမ့းအိၣ်, ဒီးစီၤလ့ၤဝံ, သုမၤ ကိၢ်မၤဂီၤယၤတုၤယကနၢအုၣ်လၢပှၤကီၢ်ဖိအကျါ, လၢ ပှၤကနၤဧၣ်ဖိ, ဒီးပှၤပရံးစၤဖိအကျါလီၤ. ဒီးယၤယမ့ၢ်ပှၤ စှၤဂၤ, ဒီးကအိၣ်ဖှိၣ်ရိဖှိၣ်ထီဒါယၤဒီးကျီသံယၤ, ဒီးယ ကတုၤလၢတၢ်ဟးဂူာ်ဟးဂီၤ, ယၤဒီးယပှၤဟံၣ်ဖိလီၤ.
31 ဒီးအဝဲသ့ၣ်စံးဝဲဒၣ်, ကမၤဘၣ်ပဒီပုၢ်ဝဲၢ်မုၣ်ဒ်ပှၤဃဲ သဲမုၣ်အသိးန့ၣ်ဧါ.