9
1 ဒီးလၢ လါတဆံခံလါတလါ လၢအမ့ၢ်လါအးဒၢ်, လါထီၣ်တဆံသၢနံၤတနံၤန့ၣ် တုၤစီၤပၤအကလုၢ်ဒီးအ တၢ်မၤလိာ်သုးဘူးအသးလၢအကမၤအသးဒီး, မုၢ်တ နံၤလၢပှၤယူဒၤဖိအဒုၣ်အဒါ မုၢ်လၢ်ဝဲလၢအကပၢအီၤ န့ၣ်, (ဘၣ်ဆၣ်ဒီးတၢ်ဘိးကဒါတၢ်တုၤပှၤယူဒၤဖိပၢပှၤ လၢအသးဟ့အီၤတခီလီၤ),
2 ပှၤယူဒၤဖိ အိၣ်ဖှိၣ်ရိဖှိၣ် လၢဝ့ၢ်တဖၣ်အပူၤ, လၢစီၤပၤအဃၤၡဝ့ရိၣ်အထံအကီၢ် ကိးဘ့ၣ်ဒဲးအပူၤ, ဒ်သိးအကပာ်အစုလၢပှၤလၢအဃုမၤ အၢအီၤအလိၤ, ဒီးပှၤတဆၢထၢၣ်ဘၣ်လၢအမဲာ်ညါနီ တဂၤဘၣ်. အဂ့ၢ်ဒ်အံၤ, တၢ်ပျံၤအီၤန့ၣ်လီၤဘၣ်လၢပှၤ ဂီၢ်မုၢ်ခဲလၢာ်အလိၤလီၤ.
3 ဒီးကီၢ်အပဒိၣ်ဖးဒိၣ်, ဒီးပဒိၣ်ဖးဒိၣ်, ဒီးပဒိၣ်ဒီးပှၤ လၢအမၤစီၤပၤအတၢ်မၤခဲလၢာ်န့ၣ်မၤစၢၤပှၤယူဒၤဖိလီၤ. အဂ့ၢ်ဒ်အံၤ, တၢ်ပျံၤစီၤမၢ်ဒကဲၤန့ၣ် လီၤဘၣ်လၢအလိၤ လီၤ.
4 အဂ့ၢ်ဒ်အံၤ, စီၤမၢ်ဒကဲၤမ့ၢ်ပှၤအဒိၣ်လၢစီၤပၤအဟံၣ် ပူၤ, ဒီးအမံၤဟူထီသါလီၤလၢထံဧိၤကီၢ်ဧိၤ ကိးဘ့ၣ်ဒဲး အပူၤလီၤ. အဂ့ၢ်ဒ်အံၤ, စီၤမၢ်ဒကဲၤတဂၤအံၤဒံးယံာ်ဒံး ဒိၣ်ထီၣ်လီၤ.
5 ဒီးပှၤယူဒၤဖိကျီကွံာ်အဒုၣ်အဒါခဲလၢာ် လၢနးအကျီ တၢ်, ဒီးလၢတၢ်မၤသံ, ဒီးလၢတၢ်မၤဟးဂီၤ, ဒီးမၤပှၤ လၢအသးဟ့အီၤတဖၣ်န့ၣ်ဖဲအဘၣ်အသးလီၤ.
6 ဒီးလၢနူၢ်ရှူၡၣ်အပူၤန့ၣ်ပှၤယူဒၤဖိမၤသံ, ဒီးမၤဟးဂီၤ ပှၤယဲၢ်ကယၤ,
7 ဒီးစီၤပၡၤနဒၤသၤ, ဒီးစီၤဒၤလဖိၣ်, ဒီးစီၤ အၤစပၤသၤ,
8 ဒီးစီၤပိၤရသး, ဒီးစီၤအဒၤလယၤ, ဒီးစီၤအ ရံၤဒသၤ,
9 ဒီးစီၤပၢ်မၤၡတၤ, ဒီးစီၤအရံစဲၤ, ဒီးစီၤအရံဒဲၤ, ဒီးစီၤဝၤယစၤသၤ,
10 ပှၤယူဒၤဖိအဒုၣ်အဒါ စီၤဟးမဒၤ သၤအဖိခွါစီၤဟၤမၣ်အဖိခွါဆံဆဲၣ်ဂၤလီၤ. မ့မ့ၢ်အတၢ် ဖိတၢ်လံၤန့ၣ်တပာ်ဘၣ်အစုလၢအလိၤဘၣ်.
11 တၢ်လၢမုၢ်တနံၤန့ၣ် ပှၤဟဲစိာ်လၢ ပှၤဘၣ်တၢ်မၤသံ အီၤလၢ နူၢ်ရှူၡၣ်အပူၤတဖၣ်အတၢ်ဂံၢ် ဆူစီၤပၤအအိၣ် လီၤ.
12 ဒီးစီၤပၤစံးဘၣ် နီၢ်ပၤမုၣ်အ့ၤစတၢ်, ပှၤယူဒၤဖိမၤသံ, ဒီးမၤဟးဂီၤ ပှၤယဲၢ်ကယၤလၢဝ့ၢ်ရှူၡၣ်အပူၤ, ဒီးစီၤဟၤ မၣ်အဖိခွါဆံဆဲၣ်ဂၤလံ. လၢစီၤပၤအထံအကီၢ်လၢအ အိၣ်လီၤတဲာ်တဖၣ်အပူၤန့ၣ်မ့ၢ်အမၤလံမနုၤလဲၣ်. ခဲက နံၣ်အံၤနဃ့တၢ်မနုၤတမံၤလဲၣ်, ဒီးတၢ်ကဟ့ၣ်နၤလီၤ. ဒီးနဃ့ကညးဒံးမနုၤတမံၤလဲၣ်, ဒီးတၢ်ကမၤအီၤလီၤ.
13 ဒီးနီၢ်အ့ၤစတၢ်စံးဝဲဒၣ်, မ့ၢ်ဂ့ၤဒီးစီၤပၤဒီး, ပှၤယူဒၤဖိ လၢအအိၣ်ဝဲလၢရှူၡၣ်အပူၤန့ၣ်, မ်တၢ်ဟ့ၣ်အမၤဝဲခဲဂီၤ ကိာ်တနံၤဒ်လၢမုၢ်တနံၤအံၤအတၢ်မၤလိာ်အသိး, ဒီးမ် ပှၤဘျးထီၣ်စီၤဟၤမၣ်အဖိခွါဆံဆဲၣ်ဂၤလၢ သ့ၣ်အလိၤ တက့ၢ်.
14 ဒီးစီၤပၤစံးဝဲလၢပှၤဘၣ်မၤတၢ်ဒ်န့ၣ်, ဒီးတၢ်ဟ့ၣ်လီၤ တၢ်မၤလိာ်လၢရှူၡၣ်အပူၤ, ဒီးပှၤဘျးထီၣ်စီၤဟၤမၣ်အဖိ ခွါဆံဆဲၣ်ဂၤလီၤ.
15 ဒီးပှၤယူဒၤဖိ လၢအအိၣ်ဝဲလၢ ရှူၡၣ်အပူၤတဖၣ်န့ၣ် အိၣ်ဖှိၣ်ရိဖှိၣ်လၢလါအးဒၢ်, လါထီၣ်တဆံလွံၢ်နံၤတနံၤ စ့ၢ်ကီး, ဒီးမၤသံပှၤသၢကယၤလၢရှူၡၣ်အပူၤ, ဒီးတပာ် ဘၣ်အစုလၢတၢ်ဖိတၢ်လံၤအလိၤဘၣ်.
16 ဒီးပှၤယူဒၤဖိ လၢအအိၣ်လီၤတဲာ်လၢ စီၤပၤအထံအ ကီၢ်တဖၣ်အပူၤန့ၣ်အိၣ်ဖှိၣ်ရိဖှိၣ်, ဒီးဆၢထၢၣ်လၢအသး သမူအဂီၢ်, ဒီးအိၣ်ဘှံးဝဲ, တဘၣ်လၢၤတၢ်ကိၢ်တၢ်ဂီၤ လၢအဒုၣ်အဒါဘၣ်. ဒီးမၤသံအဒုၣ်အဒါနွံကလးယဲၢ် ကထိ, (ဒီးတပာ်ဘၣ်အစုလၢ တၢ်ဖိတၢ်လံၤ အလိၤ ဘၣ်),
17 လၢလါအးဒၢ်ပှဲၤထီၣ်တဆံသၢနံၤတနံၤလီၤ. ဒီး တဆံလွံၢ်နံၤတနံၤန့ၣ် အိၣ်ဘှံးဝဲ, ဒီးပာ်ဝဲလၢတၢ်အီၣ် တၢ်အီ, ဒီးတၢ်သူၣ်ခုသးခုအမုၢ်တနံၤလီၤ.
18 ဒီးပှၤယူဒၤဖိအိၣ်လၢရှူၡၣ်အပူၤတဖၣ်န့ၣ် အိၣ်ဖှိၣ်ရိ ဖှိၣ်လၢတဆံသၢနံၤတနံၤ, ဒီးလၢတဆံလွံၢ်နံၤတနံၤလီၤ. ဒီးလၢတဆံယဲၢ်နံၤတနံၤန့ၣ်အိၣ်ဘှံးဝဲ, ဒီးပာ်ဝဲလၢတၢ် အီၣ်တၢ်အီ, ဒီးတၢ်သူၣ်ခုသးခုအမုၢ်တနံၤလီၤ.
19 မၤသးဒ်န့ၣ်ဒီး ပှၤယူဒၤဖိလၢအအိၣ်လၢသဝီတဖၣ် အပူၤ လၢအအိၣ်ဝဲဆိးဝဲလၢ ဝ့ၢ်တအိၣ်ဘၣ်ဒီးအခိၣ်ဒူ တဖၣ်န့ၣ်ပာ်လါအးဒၢ်တဆံလွံၢ်နံၤတနံၤလၢတၢ်သူၣ်ခု သးခုဒီးတၢ်အီၣ်တၢ်အီ, ဒီးမုၢ်တနံၤအဂ့ၤ, ဒီးတၢ်ဟ့ၣ် ယုၢ်လိာ်အသးသကိးသကိး လၢတၢ်အဂီၢ်တဖၣ်အမုၢ် တနံၤလီၤ.
20 ဒီးစီၤမၢ်ဒကဲၤကွဲးတၢ်န့ၣ်တဖၣ်, ဒီးဟ့ၣ်ယုၢ်လံာ်လၢ ပှၤယူဒၤဖိခဲလၢာ်လၢအအိၣ်ဝဲလၢ စီၤပၤအဃၤၡဝ့ရိၣ် အထံအကီၢ်ခဲလၢာ်အပူၤ လၢအဘူးဒီးလၢအယံၤ,
21 ဒ် သိးအကဒုးအိၣ်ဂၢၢ်ဆိးကျၢၤတၢ်လၢအကျါ, လၢအက တိၢ်န့ၢ်လါအးဒၢ်တဆံလွံၢ်နံၤတနံၤ, ဒီးတဆံယဲၢ်နံၤတ နံၤကိးနံၣ်ဒဲးတနံၣ်ဘၣ်တနံၣ်,
22 မုၢ်နံၤတဖၣ်လၢပှၤယူ ဒၤဖိအိၣ်ဘှံးဝဲ, တဘၣ်လၢၤတၢ်ကိၢ်တၢ်ဂီၤလၢအဒုၣ်အ ဒါဘၣ်, ဒီးလါတလါလၢအလဲလိာ်တၢ်သူၣ်အုးသးအုး လၢတၢ်သူၣ်ခုသးခု, ဒီးလၢအလဲလိာ်ဟီၣ်တၢ်ယၢၤတၢ် လၢမုၢ်တနံၤအဂ့ၤန့ၣ်, ဒ်သိးအကပာ်အီၤလၢ တၢ်အီၣ် တၢ်အီ, ဒီးတၢ်သူၣ်ခုသးခု, ဒီးတၢ်ဟ့ၣ်ယုၢ်လိာ်အသး သကိးသကိးလၢတၢ်အဂီၢ်တဖၣ်, ဒီးတၢ်ဟ့ၣ်ပှၤဖှီၣ်ဖိ ယာ်ဖိအတၢ်အမုၢ်နံၤတဖၣ်လီၤ.
23 ဒီးပှၤယူဒၤဖိအၢၣ်လီၤအီလီၤ လၢအကမၤဝဲ ဒ်အမၤ သီအသိးန့ၣ်, ဒီးဒ်စီၤမၢ်ဒကဲၤကွဲးန့ၢ်အီၤအသိးန့ၣ်လီၤ.
24 အဂ့ၢ်ဒ်အံၤ, ပှၤယူဒၤဖိခဲလၢာ်အဒုၣ်အဒါ ပှၤအကၤကးဖိ စီၤဟးမဒၤသၤအဖိခွါစီၤဟၤမၣ် ကူၣ်ဝဲလၢအကမၤဟးဂီၤပှၤယူဒၤဖိ, ဒီးတ့ၢ်လီၤပူရး (ဒ်ပစံးတၢ်အသိးဖးတၢ်) ဒ်သိးအကမၤလၢာ်ကွံာ်အီၤ, ဒီးမၤဟးဂီၤအီၤ,-
25 ဘၣ်ဆၣ်ဒီး တုၤနီၢ်အ့ၤစတၢ်ဟဲဝဲဆူစီၤပၤအမဲာ်ညါဒီး, အဝဲဒၣ်မၤလိာ်ဝဲလၢလံာ်ပူၤ လၢအတၢ်ကူၣ်တၢ်အၢလၢ အကူၣ်ထီဒါပှၤယူဒၤဖိ, ကဟဲဘၣ်ကဒါက့ၤလၢအခိၣ် ဒၣ်ဝဲ, ဒီးအဝဲဒၣ်ဒီးအဖိခွါတဖၣ် ကဘၣ်တၢ်ဘျးထီၣ် အီၤလၢသ့ၣ်အလိၤလီၤ.
26 မၤသးဒ်န့ၣ်ဒီးပှၤကိးန့ၢ်မုၢ်နံၤတဖၣ် လၢပူရံၣ်ထွဲပူရး အမံၤအခံလီၤ. မၤသးဒ်န့ၣ်ဒီးလၢလံာ်အံၤအတၢ်ကတိၤ ခဲလၢာ်အဃိ, ဒီးလၢကယဲၢ်တၢ်လၢ အထံၣ်ဘၣ်ဝဲလၢ တၢ်တမံၤန့ၣ်အဂ့ၢ်အကျိၤ, ဒီးတၢ်လၢအဘၣ်အီၤအဃိ ဒီး,
27 ဒ်သိးအသုတမၤကပာ်တဂ့ၤ, ပှၤယူဒၤဖိစံၣ်ညီၣ်ဝဲ, ဒီးအၢၣ်လီၤအီလီၤလၢအဂီၢ်, ဒီးလၢအချံအသၣ်အဂီၢ်, ဒီးကယဲၢ်ပှၤလၢ အစဲဘူးအသးဒီးအီၤအဂီၢ်, လၢအက တိၢ်န့ၢ်မုၢ်ခံနံၤန့ၣ် ဒ်အကွဲးတၢ်အသိး, ဒီးဒ်အဆၢအက တီၢ်အသိးကိးနံၣ်ဒဲး,
28 ဒီးလၢတၢ်ကဒုးသ့ၣ်နီၣ်ထီၣ်က့ၤ မုၢ်နံၤတဖၣ်လၢ ပှၤအစိၤစိၤအဃၣ်ဃၣ်, လၢပှၤတဒူၣ် လၢ်လၢ်, ဒီးလၢကီၢ်တဘ့ၣ်လၢ်လၢ်, ဒီးလၢဝ့ၢ်တဖျၢၣ် လၢ်လၢ်အပူၤ, ဒီးလၢပူရံၣ်အမုၢ်နံၤတဖၣ်န့ၣ်တၢ်တမၤ ကပာ်ဘၣ်လၢ ပှၤယူဒၤဖိအကျါဘၣ်, ဒီးတၢ်ဒုးသ့ၣ် နီၣ်ထီၣ်က့ၤအီၤ တဆိတ့ၢ်ဘၣ်လၢအချံအသၣ်အကျါ ဘၣ်.
29 ဒီးစီၤအဘံဃယ့းလးအဖိမုၣ် နီၢ်ပၤမုၣ်အ့ၤစတၢ်, ဒီး ပှၤယူဒၤဖိစီၤမၢ်ဒကဲၤကွဲးဝဲလၢ တၢ်အစိအကမီၤခဲလၢာ် ဒ်သိးအကမၤဂၢၢ်မၤကျၢၤ လံာ်ပူရံၣ်ပှဲၤထီၣ် ခံဘ့ၣ်တ ဘ့ၣ်န့ၣ်လီၤ.
30 ဒီးဟ့ၣ်ယုၢ်လံာ် အိၣ်ဒီးတၢ်ကတိၤအမုာ် အဖိးအမ့ၢ် အတီဆူကယဲၢ်ပှၤယူဒၤဖိအိၣ်ဝဲလၢ ကီၢ်တကယၤနွံဆံ ဘ့ၣ်လၢစီၤအဃၤၡဝ့ရိၣ်အဘီမုၢ်အပူၤ,
31 ဒ်သိးအကမၤ ဂၢၢ်မၤကျၢၤပူရံၣ်အမုၢ်နံၤတဖၣ်လၢအဆၢအကတီၢ်, ဒ် ပှၤယူဒၤဖိစီၤမၢ်ဒကဲၤ, ဒီးနီၢ်ပၤမုၣ်အ့ၤစတၢ် စံၣ်ညီၣ်ဝဲ အသိး, ဒီးဒ်အစံၣ်ညီၣ်လၢအဂီၢ်ဒၣ်ဝဲဒီးလၢအချံအသၣ် အဂီၢ်အသိးန့ၣ်, တၢ်ဘၣ်ဃးဒီးအတၢ်ဒုၣ်တၢ်အီၣ်, ဒီး အတၢ်ကိးပသူထီၣ်န့ၣ်လီၤ.
32 ဒီးနီၢ်အ့ၤစတၢ်အတၢ်မၤလိာ် ဒုးအိၣ်ဂၢၢ်ဆိးကျၢၤတၢ် ဘၣ်ဃးဒီးပူရံၣ်, ဒီးကွဲးအသးလၢလံာ်ပူၤလီၤ.