32
1 ကနၣ်, မူခိၣ်ဧၢ, ဒီးယကကတိၤတၢ်,ဒိကနၣ်, ဟီၣ်ခိၣ်ဧၢ, ယထးခိၣ်အတၢ်ကတိၤ,
2 ယတၢ်သိၣ်တၢ်သီကဟဲလီၤဒ်တၢ်ဟဲစူၤအသိး,ယကလုၢ်ကလီၤဒ်ပစီၤထံအသိး,ဒ်တၢ်သဖှံာ်လၢတၢ်မဲထီၣ်သီအဖီခိၣ်အသိး,ဒီးဒ်ပစီၤထံအဖျၢၣ်လၢနီၣ်ဧိၤမံၤဧိၤအဖီခိၣ်အသိး,
3 အဂ့ၢ်ဒ်အံၤ, ယဒုးဟူထီၣ်ယွၤအမံၤန့ၣ်လီၤ.ပာ်တၢ်ဒိၣ်လၢပကစၢ်တက့ၢ်.
4 မ့ၢ်ဝဲလၢလၢၢ်တဖျၢၣ်, အတၢ်မၤလၢဝဲပှဲၤဝဲ,အဂ့ၢ်ဒ်အံၤ, အကျဲခဲလၢာ်မ့ၢ်တၢ်စံၣ်ညီၣ်လီၤ.မ့ၢ်တၢ်မ့ၢ်တၢ်တီအကစၢ်, ဒီးတၢ်အၢတအိၣ်လၢအီၤ,တၢ်တီဒီးတၢ်လိၤမ့ၢ်အဝဲဒၣ်လီၤ.
5 အဝဲသ့ၣ်အိၣ်ဒီးတၢ်သးဘၣ်အၢ, တမ့ၢ်ဘၣ်အဖိ,မ့ၢ်တၢ်အမဲၣ်,မ့ၢ်ပှၤတစိၤလၢအသးက့ၣ်ဒီးလီတၢ်လီၤ.
6 သုမၤက့ၤယွၤလၢတၢ်န့ၣ်ဧါ.ပှၤဟးဂီၤဖိ, ဒီးကူၣ်တၢ်တသ့ဘၣ်ပှၤဂီၢ်မုၢ်ဧၢ,မ့ၢ်နပၢ်, ပှၤလၢအပှ့ၤနၤ, တမ့ၢ်ဘၣ်ဧါ.အဝဲဒၣ်တ့နၤ, ဒီးဒုးအိၣ်ကျၢၤနၤ, တမ့ၢ်ဘၣ်ဧါ.
7 သ့ၣ်နီၣ်ထီၣ်က့ၤမုၢ်နံၤတဖၣ်လၢပျၢၤ,ဆိကမိၣ်အါစိၤအါဃၣ်အနံၣ်တဖၣ်တက့ၢ်.သံကွၢ်နပၢ်, ဒီးကဒုးနဲၣ်နၤ,နပှၤသူၣ်က့သးပှၢ်, ဒီးကစံးဘၣ်နၤ,
8 ဖဲတၢ်ထီကတၢၢ်နီၤဖးပှၤကလုာ်အတၢ်န့ၢ်သါအဆၢ,ဖဲအမၤလီၤမုၢ်လီၤဖးပှၤကညီဖိဒီး,ပာ်ပှၤဂီၢ်မုၢ်အဃၢၤတဖၣ်,ဒ်ပှၤအံၣ်စရ့လးဖိအတၢ်ဂံၢ်အသိးလီၤ.
9 အဂ့ၢ်ဒ်အံၤ, ယွၤအဂီၢ်န့ၣ်မ့ၢ်အပှၤဂီၢ်မုၢ်,ဒီးအန့ၢ်ဘၣ်သါအဂီၢ်န့ၣ်မ့ၢ်စီၤယၤကိာ်လီၤ.
10 ထံၣ်န့ၢ်အီၤလၢကီၢ်မုၢ်ကနၢတဘ့ၣ်အပူၤ,ဒီးလၢပှၢ်မုၢ်ကနၢအိၣ်သယုၢ်အိၣ်ဒီးတၢ်သီၣ်အပူၤ,ဆှၢဝ့ၤဝီၤအီၤ, သိၣ်က့ၤသီက့ၤအီၤ,ကွၢ်က့ၤအီၤ, ဒ်အမဲာ်ပှၤဖိအသိး,
11 ဒ်လံာ်ကြီကြာ်ထိၣ်ဂဲၤအသွံ, ဟုအဖိ,ယၤထီၣ်အဒံးဆ့, ဟံးန့ၢ်အီၤ,စိာ်ထီၣ်အီၤလၢအဒံးဆ့အဖီခိၣ်အသိး,
12 ယွၤဆှၢအီၤတဂၤဃီ,ဒီးတခီဘီမုၢ်ဖိအကစၢ်တအိၣ်ဘၣ်ဒီးအီၤဘၣ်.
13 ဒုးဒိးအီၤလၢဟီၣ်ခိၣ်အလီၢ်ထီၣ်ထီတဖၣ်,ဒ်သိးအကအီၣ်စံာ်ဧိၤပှဲၤဧိၤအတၢ်အါထီၣ်,ဒီးဒုးစူၢ်အီၤလၢကနဲစီလၢလၢၢ်ပူၤ,ဒီးသိလၢလၢၢ်မ့ၣ်ပူၤ,
14 ဂီၤဖံးအနုၢ်ထံလီၤသကၤ, ဒီးသိအနုၢ်ထံ,အိၣ်ဒီးသိဖိအသိ,ဒီးဘၤၡၣ်အသိဖါ, ဒီးမဲာ်တဲးလဲး,အိၣ်ဒီးဘုကၠူၣ်အကလ့ၢ်အသိ,ဒီးနအီစပံးသၣ်အသွံၣ်စပံးထံလီၤ.
15 ဒီးယရှူရိၣ်ဘီၣ်ထီၣ်, ဒီးတကျာ်ထီၣ်,နဘီၣ်ထီၣ်လံ, နဘီၣ်လုၤကုၤ, နဘီၣ်ဖျၢၣ်ကလာ်လၢသိဒီဂၤညါလံ.တုၤနုၤတစုလဲၤသဒၣ်ယွၤလၢအတ့အီၤ,ဒီးမၤတရီတပါအတၢ်အုၣ်က့ၤခီၣ်က့ၤအီၤအလၢၢ်တတဖျၢၣ်လီၤ.
16 အဝဲသ့ၣ်ဒုးက့ၣ်အသးလၢပှၤတခီဘီမုၢ်ဖိအတၢ်,မၤသးထီၣ်အီၤလၢတၢ်သးဘၣ်အၢ,
17 လုၢ်တၢ်လၢတၢ်ဂီၤ, တမ့ၢ်ဘၣ်ယွၤဘၣ်.ကစၢ်တဖၣ်လၢအတသ့ၣ်ညါဘၣ်,လၢအသီ, လၢအဟဲလၢတၢ်အဃၢၤ,လၢသုပၢ်တဖၣ်တပျံၤဘၣ်အီၤဘၣ်.
18 လၢၢ်လၢအထီၣ်ဖိနၤတဖျၢၣ်န့ၣ်နတပးကဲဘၣ်,ဒီးနသးပ့ၤနီၣ်လံယွၤလၢအတ့လီၤနၤလီၤ.
19 ဒီးယွၤထံၣ်ဝဲ, ဒီးသးထီၣ်ဝဲ,လၢအဖိမုၣ်ဒီးအဖိခွါမၤတံာ်တာ်အဃိ,
20 ဒီးစံးဝဲဒၣ်, ယကပာ်သဒၢယမဲာ်လၢအီၤ,ဒီးအကတၢၢ်ကမၤအသးဒ်လဲၣ်ဒ်လဲၣ်န့ၣ်ယကကွၢ်,အဂ့ၢ်ဒ်အံၤ, မ့ၢ်ပှၤတစိၤလၢအမၤက့ၣ်အသး,ဖိသၣ်လၢအတၢ်မ့ၢ်တၢ်တီတအိၣ်,
21 ဒုးက့ၣ်ယသးလၢတၢ်လၢအတမ့ၢ်ဘၣ်ကစၢ်,မၤသးထီၣ်ယၤလၢအတၢ်ကလီကလီလီၤ.ယကဒုးသးက့ၣ်အီၤလၢတၢ်အတမ့ၢ်ဘၣ်ပှၤကလုာ်,ယကမၤသးထီၣ်အီၤလၢပှၤဟးဂီၤဖိတကလုာ်,
22 အဂ့ၢ်ဒ်အံၤ, မ့ၣ်အူဆိၣ်ကဲၤထီၣ်အသးလၢယသးထီၣ်,လၢအကအီၣ်တၢ်ပၢၢ်လၢပျုၤပူၤအခံဒး,ဒီးကအီၣ်ကွံာ်ဟီၣ်ခိၣ်ဒီးအတၢ်အါထီၣ်,ဒီးကဆူးထီၣ်ကွံာ်ကစၢၢ်ကလိအခီၣ်ထံးတဖၣ်လီၤ.
23 ယကပာ်ဖှိၣ်တၢ်အၢတဖၣ်လၢအဖီခိၣ်,ယကမၤလၢာ်ယပျၢ်လၢအလိၤလီၤ.
24 ကလၢာ်ဝဲလၢတၢ်သၣ်ဝံၤလီၤဒိ,ဒီးလၢတၢ်သံသတြိာ်မ့ၣ်အူ,ဒီးတၢ်မၤဟးဂီၤနးနးကလဲာ်,ဒီးယကမၢလီၤဆၣ်ဖိကီၢ်ဖိအမဲဧိၤခီဧိၤဆူအအိၣ်,ဒီးတၢ်စွါလၢဟီၣ်ခိၣ်အကမူၣ်ကျါတဖၣ်အစုၣ်,
25 နးဧိၤဘီဧိၤလၢခိ, ဒီးတၢ်ပျံၤတၢ်ဖုးလၢဒၢးပူၤ,ကမၤဟးဂီၤပှၤဖိၣ်သၣ်ခွါ, ဒီးပှၤမုၣ်လိၣ်ဘိ,ဖိသၣ်အီနုၢ်, ဒီးပှၤခိၣ်ဝါ.
26 ယစံးယကအူပြံပြါအီၤ,ယကဒုးတုာ်တၢ်သ့ၣ်နီၣ်ထီၣ်က့ၤအီၤလၢပှၤကညီအကျါလီၤ.
27 မ့တမ့ၢ်ဘၣ်ယဘၣ်ယိၣ်တၢ်လၢတၢ်အဒုၣ်အဒါကပာ်အသးထီၣ်ထီဒီး, ယကမၤတ့ၢ်လီၤ.ပှၤထီဒါအီၤတဖၣ်ကမၤလီၤလးဘၣ်ဖုးအသး,ကစံးဘၣ်ဖုး, ပစုအိၣ်ထီၣ်ထီ,ဒီးယွၤတမၤဘၣ်တၢ်ခဲလၢာ်အံၤဘၣ်.
28 မ့ၢ်ပှၤတကလုာ်လၢတၢ်ကူၣ်လိာ်တအိၣ်,ဒီးတၢ်သူၣ်ဆးသးဆးတအိၣ်လၢအပူၤဘၣ်.
29 မ်အကူၣ်တၢ်သ့တက့ၢ်.မ်အနၢ်ကပၢၢ်တၢ်အံၤ,ဒီးဆိကမိၣ်တၢ်လၢအလီၢ်ခံန့ၣ်တက့ၢ်.
30 အလၢၢ်တဖျၢၣ်မ့ၢ်တဆါကွံာ်အီၤ,ဒီးယွၤမ့ၢ်တကးတံာ်ဃာ်အခံဘၣ်ဒီး,ပှၤတဂၤကလဲၤဟီထီၣ်ကွံာ်ပှၤတကထိ,ဒီးခံဂၤကဒုးဃ့ၢ်ထီၣ်ကွံာ်ပှၤတကလးဒ်လဲၣ်.
31 အဂ့ၢ်ဒ်အံၤ,ပဒုၣ်ပဒါအကစၢ်ဒၣ်ဝဲမ့ၢ်စံၣ်ညီၣ်တၢ်ဒီး,အလၢၢ်တဖျၢၣ်တဒ်သိးဘၣ်ဒီးပလၢၢ်ဘၣ်,
32 အဂ့ၢ်ဒ်အံၤ, အစပံးမုၢ်မ့ၢ်စဒိၣ်အစပံးမုၢ်,ဒီးလၢဂမိရၤအစပံးမုၢ်အလီၢ်လီၤ.အစပံးသၣ်မ့ၢ်စပံးသၣ်အစုၣ်,အကူၤတဖၣ်ခၣ်ဝဲလီၤ.
33 အစပံးထံမ့ၢ်ပယိၤအစုၣ်,ဒီးဂုၢ်သီအစုၣ်အၢလီၤ.တၢ်အံၤအိၣ်ပာ်ဖှိၣ်ဒီးယၤ,
34 ဘၣ်တၢ်စဲဃၣ်ပနီၣ်လၢ ယတၢ်လုၢ်ဒိၣ်ပှ့ၤဒိၣ်အပူၤ,တမ့ၢ်ဘၣ်ဧါ.
35 တၢ်မၤဆၢတၢ်အၢအိၣ်ဒီးယၤ, ဒီးတၢ်ကမၤဆၢတၢ်,လၢအကတီၢ်ဖဲအခီၣ်ကတလံာ်လီၤ.အဂ့ၢ်ဒ်အံၤ, အတၢ်နးတၢ်ဖှီၣ်အမုၢ်တနံၤဘူးထီၣ်လံ,ဒီးတၢ်လၢအကတဲာ်ကတီၤအသးလၢအဂီၢ်န့ၣ်ဟဲချ့,
36 ဘၣ်ဆၣ်ဒီးတုၤအထံၣ်လၢအစုတအိၣ်လၢၤဘၣ်ဒီး,ဒီးတၢ်အိၣ်ကးတံာ်ဃာ်အခံမ့ၢ်ဂ့ၤ, တၢ်အိၣ်လီၤတဲာ်သဘျ့မ့ၢ်ဂ့ၤတအိၣ်ဘၣ်ဒီး,ယွၤကစံၣ်ညီၣ်အပှၤဂီၢ်မုၢ်,ဒီးသ့ၣ်နီၣ်ပီၢ်ယၢ်လီၤက့ၤအသးလၢအခ့အပှၤအဃိ,-
37 ဒီးကစံး, အဝဲသ့ၣ်အကစၢ်တဖၣ်အိၣ်ဖဲလဲၣ်,လၢၢ်တဖျၢၣ်လၢအတန့ၤအသးလၢအီၤ,
38 လၢအအီၣ်အတၢ်လုၢ်အသိ,လၢအအီအတၢ်လုၢ်အီအစပံးထံန့ၣ်အိၣ်ဖဲလဲၣ်.ကဂဲၤဆၢထၢၣ်ဒၣ်ဝဲ, ဒီးမၤစၢၤသုတက့ၢ်.ကကဲထီၣ်ဒၣ်ဝဲလၢတၢ်ကွၢ်က့ၤသုတက့ၢ်.
39 ကွၢ်ခဲကနံၣ်အံၤ, ယဲ, မ့ၢ်ယၤလီၤ.ကစၢ်တအိၣ်ဘၣ်ဒီးယၤဘၣ်.ယမၤသံတၢ်ယဲ, ဒီးယမၤမူတၢ်ယဲ,ယမၤဆါတၢ်ယဲ, ဒီးယမၤဘျါတၢ်ယဲ,ဒီးတၢ်မၤပူၤဖျဲးလၢယစုပူၤတအိၣ်ဘၣ်.
40 အဂ့ၢ်ဒ်အံၤ, ယယူာ်ထီၣ်ယစုဆူမူခိၣ်,ဒီးယစံး, ယမူယဲလီၤထူလီၤယိာ်လီၤ.
41 ယမ့ၢ်ကျ့ထီၣ်ယနးကပြုၢ်ကပြီၤတဘ့ၣ်,ဒီးယစုဟံးဃာ်တၢ်စံၣ်ညီၣ်ဒီး,ယကဟ့ၣ်ကၣ်ယဒုၣ်ယဒါလၢတၢ်မၤဆၢတၢ်အၢ,ဒီးယကမၤဆၢတၢ်လၢပှၤလၢအသးဟ့ယၤ,
42 ယကဒုးအီမူၤယပျၢ်လၢတၢ်သွံၣ်,ဒီးယနးကအီၣ်တၢ်ညၣ်,လၢပှၤဘၣ်တၢ်မၤသံ, ဒီးပှၤဘၣ်တၢ်ဖီၣ်န့ၢ်အီၤအသွံၣ်,လၢတၢ်အဒုၣ်အဒါအပဒိၣ်တဖၣ်အခိၣ်လီၤ.
43 သူၣ်ဖှံသးညီ, ပှၤကလုာ်တဖၣ်အပှၤဂီၢ်မုၢ်ဧၢ,အဂ့ၢ်ဒ်အံၤ, ကမၤအၢဆၢလၢအခ့အပှၤအသွံၣ်အဃိ,ဒီးကဟ့ၣ်ကၣ်တၢ်မၤဆၢတၢ်အၢလၢပှၤလၢအထီဒါအီၤ, ဒီးကမၤပူၤဖျဲးတၢ်လၢအကီၢ်လၢအပှၤဂီၢ်မုၢ်အဂီၢ်လီၤ.
44 ဒီးစီၤမိၤရှ့ဟဲ, ဒီးကတိၤတၢ်သးဝံၣ်အံၤအတၢ်ကတိၤ ခဲလၢာ်လၢပှၤဂီၢ်မုၢ်အနၢ်ပူၤ, အဝဲဒၣ်, ဒီးစီၤနိၣ်အဖိခွါ စီၤယိၤရှူလီၤ.
45 ဒီးစီၤမိၤရှ့ကတိၤကယဲၢ်တၢ်ကတိၤအံၤ ဒီးအံၣ်စရ့လးခဲလၢာ်န့ၣ်လၢာ်ဝဲ,
46 ဒီးစံးဘၣ်အီၤ, ပာ် သုသးလၢကယဲၢ်တၢ်ကတိၤ လၢယအုၣ်ယသးလၢသု ကျါလၢမုၢ်မဆါတနံၤအံၤ, လၢသုကမၤလိာ်သုဖိသု လံၤလၢအကပလီၢ်အသး, ဒ်သိးအကတိၢ်န့ၢ်တၢ်သိၣ် တၢ်သီအံၤအတၢ်ကတိၤခဲလၢာ်န့ၣ်တက့ၢ်.
47 အဂ့ၢ်ဒ်အံၤ, တမ့ၢ်ဘၣ် တၢ်ကလီကလီလၢသုဂီၢ် ဘၣ်. မ့ၢ်သုတၢ်မူလီၤ, ဒီးသုကထုးထီထီၣ်သုနံၤသုသီ လၢကီၢ်ပူၤဖဲသုလဲၤခီဂာ်ယၢ်ဒ့ၣ် ဒ်သိးသုကမၤန့ၢ်အီၤ လၢတၢ်န့ၣ်အဃိလီၤ.
48 ဒီးယွၤကတိၤတၢ်ဒီးစီၤမိၤရှ့ လၢမုၢ်တနံၤဃီန့ၣ်ဒီးစံး ဝဲဒၣ်,
49 လဲၤထီၣ်ဘးကစၢၢ်ဧဘါရံၣ်အံၤ, ကစၢၢ်နဘိ, လၢအအိၣ်လၢမိၤအးအကီၢ်ပူၤသဃီၤဒီးယရံၤဃိ, ဒီး ကွၢ်ကီၢ်ကနၤဧၣ်လၢယဟ့ၣ်လီၤ ပှၤအံၣ်စရ့လးဖိလၢ တၢ်န့ၢ်သါအဂီၢ်န့ၣ်တက့ၢ်.
50 ဒီးသံလၢကစၢၢ်အလိၤ ဖဲနလဲၤထီၣ်န့ၣ်, ဒီးဘၣ်တၢ်ပာ်ဖှိၣ်နၤဒီးနပှၤဂီၢ်မုၢ်, ဒ်န ဒီပုၢ်ဝဲၢ်စီၤအၤဟရိၣ်သံဝဲလၢကစၢၢ်ဃိၢ်အလိၤ, ဒီးဘၣ် တၢ်ပာ်ဖှိၣ်အီၤဒီးအပှၤဂီၢ်မုၢ်အသိးန့ၣ်တက့ၢ်.
51 အဂ့ၢ်ဒ်အံၤ, သုမၤကမၣ်ယၤလၢပှၤအံၣ်စရ့လးဖိအ ကျါဖဲထံမရံၤဘါကၤဒ့ၣ်လၢပှၢ်မုၢ်ကနၢစံၣ်န့ၣ်လီၤ. အ ဂ့ၢ်ဒ်အံၤ, သုတပာ်စီဆှံယၤလၢပှၤအံၣ်စရ့လးဖိအကျါ ဘၣ်.
52 ဘၣ်ဆၣ်ဒီးနကထံၣ်ဘၣ် ထံဧိၤကီၢ်ဧိၤန့ၣ်လၢနမဲာ် ညါလီၤ. မ့ၢ်နာ်သက့ဒ်န့ၣ်ဒီးနတဘၣ်လဲၤနုာ်ဖဲန့ၣ်ဆူ ထံဧိၤကီၢ်ဧိၤလၢယဟ့ၣ်လီၤပှၤအံၣ်စရ့လးဖိဘၣ်.