10
1 အဆၢအကတီၢ်ဖဲန့ၣ်ယွၤစံးဘၣ်ယၤ, စိးပျၤန့ၢ်လၢၢ် ဘ့ၣ်ဘၣ်ခံဘ့ၣ်လၢနဂီၢ်လီၤဂာ်အခီၣ်ထံးတဖၣ်, ဒီးဟဲ ထီၣ်ဆူယအိၣ်လၢကစၢၢ်အလိၤ, ဒီးတ့တလါသ့ၣ်တ ဖျၢၣ်လၢနဂီၢ်တက့ၢ်.
2 ဒီးယကကွဲးတၢ်ကတိၤလၢတၢ် ဘ့ၣ်ဘၣ်အလိၤ, လၢအအိၣ်ဝဲလၢတၢ်ဘ့ၣ်ဘၣ်အခီၣ် ထံးအလိၤန့ၣ်လၢနမၤကၢ်အီၤ, ဒီးနဘၣ်ဒၢနုာ်အီၤလၢ တလါပူၤန့ၣ်လီၤ.
3 ဒီးယတ့တလါတဖျၢၣ်လၢသ့ၣ်ဖှ့ၡံးတၤ, ဒီးယစိးပျၤ လၢၢ်ဘ့ၣ်ဘၣ်ခံဘ့ၣ်, ဒ်တၢ်အိၣ်လၢအခီၣ်ထံးအသိး န့ၣ်, ဒီးယလဲၤထီၣ်ဆူကစၢၢ်အလိၤ အိၣ်ဒီးလၢၢ်ဘ့ၣ် ဘၣ်ခံဘ့ၣ်လၢယစုပူၤလီၤ.
4 ဒီးကွဲးဝဲလၢတၢ်ဘ့ၣ်ဘၣ် အလိၤ, ဒ်အကွဲးတၢ်လၢအခီၣ်ထံးအသိး, တၢ်မၤလိာ် အဘီတဆံ, လၢယွၤကတိၤတၢ်ဒီးသုလၢကစၢၢ်အလိၤ လၢမ့ၣ်အူကျါ, လၢတၢ်အိၣ်ဖှိၣ်အမုၢ်တနံၤအတီၢ်ပူၤန့ၣ် ဝံၤဒီး, ယွၤဟ့ၣ်အီၤလၢယၤလီၤ.
5 ဒီးယဃၣ်ယသး, ဒီးဟဲလီၤလၢကစၢၢ်အလိၤ, ဒီးဒၢ နုာ်တၢ်ဘ့ၣ်ဘၣ်လၢတလါလၢ ယတ့အီၤန့ၣ်အပူၤ, ဒီး အိၣ်ဖဲန့ၣ်, ဒ်ယွၤမၤလိာ်ယၤအသိးန့ၣ်လီၤ.
6 ဒီးပှၤအံၣ်စရ့လးဖိဟးထီၣ်ဝဲလၢ ဘအ့ရိးဘၣ်ဃးဒီး ပှၤယၤကၣ်အဖိဆူမိၤစ့ရၤ, ဖဲစီၤအၤဟရိၣ်သံဝဲ, ဒီး ဘၣ်တၢ်ခူၣ်လီၤကွံာ်အီၤဖဲန့ၣ်, ဒီးအဖိခွါစီၤအလၤဧစၢ် မၤပှၤလုၢ်တၢ်အဒိၣ်အတၢ်လၢအလီၢ်လီၤ.
7 ဟးဝဲဖဲန့ၣ်ဆူကူးဒကိဒၤ, ဒီးလၢကူးဒကိဒၤန့ၣ်ဆူ ယးတဘၤသၤ, ကီၢ်တဘ့ၣ်အိၣ်ဒီးထံကျိတဖၣ်လီၤ.
8 အဆၢအကတီၢ်ဖဲန့ၣ် ယွၤနီၤဖးပှၤလ့ၤဝံဖိတကလုာ် ဒ်သိးအကစိာ်ယွၤအတၢ်အၢၣ်လီၤအီလီၤအတလါ, ဒ် သိးအဆၢထၢၣ်လၢယွၤအမဲာ်ညါ, ဒ်သိးအကမၤအခ့ အပှၤအတၢ်မၤ, ဒီးဒ်သိးအကဆိၣ်ဂ့ၤတၢ်လၢအမံၤ, တုၤ မုၢ်မဆါတနံၤအံၤလီၤ.
9 မၤသးဒ်န့ၣ်ဒီး စီၤလ့ၤဝံတအိၣ်ဘၣ်ဒီးအဂီၢ်, ဒီးအ တၢ်န့ၢ်သါလၢအဒီပုၢ်ဝဲၢ်အကျါဘၣ်. ယွၤန့ၣ်မ့ၢ်အတၢ် န့ၢ်သါ, ဒ်ယွၤနကစၢ်ကတိၤတၢ်ဒီးအီၤအသိးန့ၣ်လီၤ.
10 ဒီးယအိၣ်လၢကစၢၢ်အလိၤ, မၤသးဒ်လၢအခီၣ်ထံး တဘျီအသိးန့ၣ်, အနံၤလွံၢ်ဆံဒီးအနၤလွံၢ်ဆံ, ဒီးယွၤ ကနၣ်ယကလုၢ်အဆၢအကတီၢ်ဖဲန့ၣ်စ့ၢ်ကီးလီၤ. ယွၤ မၤဟးဂီၤနၤအသးတအိၣ်ဘၣ်.
11 ဒီးယွၤစံးဘၣ်ယၤ, ဂဲၤဆၢထၢၣ်,လဲၤတၢ်လၢပှၤဂီၢ်မုၢ် အမဲာ်ညါ ဒ်သိးအကလဲၤနုာ်မၤန့ၢ်ကီၢ်တဘ့ၣ်လၢယ ဆိၣ်တၢ်ဒီးအပၢ်တဖၣ်လၢယကဟ့ၣ်လီၤအီၤန့ၣ်တက့ၢ်.
12 ဒီးခဲကနံၣ်အံၤ, အံၣ်စရ့လးဧၢ, မ့တမ့ၢ်ဘၣ်လၢန ကပျံၤယွၤနကစၢ်, လၢနကပိာ်အကျဲခဲလၢာ်, ဒီးအဲၣ် အီၤ, ဒီးမၤယွၤနကစၢ်အတၢ်လၢနသူၣ်ကံၢ်သးလဲ, ဒီး နသးဒီဖျၢၣ်ညါ,
13 ဒ်သိးနကတိၢ်န့ၢ်ယွၤအတၢ်မၤလိာ်, ဒီးအတၢ်သိၣ်တၢ်သီလၢ ယမၤလိာ်နၤလၢနတၢ်ဂ့ၤအဂီၢ် လၢမုၢ်မဆါတနံၤအံၤဘၣ်ဒီး, ယွၤနကစၢ်ဃ့တၢ်လၢ နၤလၢမနုၤတမံၤလဲၣ်.
14 ကွၢ်ကွၢ်, မူခိၣ်ဒီးမူခိၣ်အမူခိၣ်န့ၣ် မ့ၢ်ယွၤနကစၢ်အ တၢ်, ဟီၣ်ခိၣ်ဒီးကယဲၢ်တၢ်အိၣ်လၢအချၢလီၤ.
15 ထဲတၢ် ဘၣ်ယွၤအသးလၢအကအဲၣ်နပၢ်တဖၣ်, ဒီးဃုထၢအ ချံအသၣ်လၢအလီၢ်ခံ, သုဝဲဒၣ်လၢပှၤဂီၢ်မုၢ်ခဲလၢာ်အဖီ ခိၣ်, ဒ်လၢမုၢ်မဆါတနံၤအံၤအသိးန့ၣ်လီၤ.
16 ဒီးကူးတရံးသုသးအဖံးန့ၣ်တက့ၢ်, အိၣ်လၢၤဒီးသု ကိာ်ဆူၣ်တဂ့ၤ.
17 အဂ့ၢ်ဒ်အံၤ, ယွၤသုကစၢ်န့ၣ်မ့ၢ်ယွၤ တဖၣ်အယွၤ, ဒီးကစၢ်တဖၣ်အကစၢ်, ကစၢ်ဖးဒိၣ်, လၢအအိၣ်ဒီးအစိအကမီၤ, ဒီးတၢ်ပျံၤအလီၢ်, လၢအတ ကွၢ်မဲာ်ဘၣ်ပှၤကညီ, ဒီးတဟံးန့ၢ်ဘၣ်ခိၣ်ဖးဘၣ်.
18 မၤ ဝဲလၢတၢ်စံၣ်ညီၣ်ပှၤဖိၣ်ဃဲ, ဒီးပှၤမုၣ်ကမဲ, ဒီးအဲၣ်ပှၤ တခီဘီမုၢ်ဖိ, ဒီးဟ့ၣ်လီၤအီၤလၢတၢ်အီၣ်တၢ်အီ, ဒီး အကူအသိးလီၤ.
19 မၤသးဒ်န့ၣ်ဒီးအဲၣ်သုဝဲပှၤတခီဘီမုၢ် ဖိတက့ၢ်, အဂ့ၢ်ဒ်အံၤ, သုမ့ၢ်တ့ၢ်ပှၤတခီဘီမုၢ်ဖိလၢ ကီၢ်အဲၤကူပတူးအပူၤလီၤ.
20 နဘၣ်ပျံၤယွၤနကစၢ်, နဘၣ်မၤအတၢ်, ဒီးနဘၣ်စဲ ဘူးဒီးအီၤ, ဒီးဆိၣ်တၢ်လၢအမံၤလီၤ.
21 အဝဲဒၣ်န့ၣ်မ့ၢ်နတၢ်စံးထီၣ်ပတြၢၤအလီၢ်, ဒီးအဝဲဒၣ် န့ၣ်မ့ၢ်နကစၢ်လၢအမၤတၢ်အဒိၣ်အထီ, ဒီးတၢ်ပျံၤအ လီၢ်တဖၣ်လၢနဂီၢ်လၢနထံၣ်ဘၣ်လံလၢနမဲာ်န့ၣ်လီၤ.
22 နပၢ်တဖၣ်လဲၤလီၤဆူအဲၤကူပတူး, ပှၤနွံဆံလီၤ, ဒီး ခဲကနံၣ်အံၤယွၤနကစၢ်မၤလံနၤလၢ အအါဒ်ဆၣ်ဧိၤဖီ ဧိၤလၢမူခိၣ်အသိးန့ၣ်လီၤ.