4
1 စီၤပၤနဘူၤကးန့စၢ် စံးဘၣ်ကယဲၢ်ပှၤဂီၢ်မုၢ်, ပှၤက လုာ်တဖၣ်, ဒီးပှၤကတိၤတၢ်အကျိၤအကလုာ်ကလုာ်ခဲ လၢာ်လၢအအိၣ်ဝဲဆိးဝဲလၢဟီၣ်ခိၣ်ဒီဘ့ၣ်ညါ, မ်တၢ်ဃူ တၢ်ဖိးအါထီၣ်ဒီးသုတက့ၢ်.
2 ဘၣ်ယသးလၢ အကဒုး နဲၣ်တၢ်အပနီၣ်လီၤလး, ဒီးတၢ်လီၤလိၢ်လီၤလးလၢအ ကစၢ်အထီကတၢၢ်တဂၤမၤယၤလီၤ.
3 အပနီၣ်လီၤလးန့ၣ် ဆံးဒိၣ်လဲၣ်, အလီၤလိၢ်လီၤလး န့ၣ်ဆံးအါဆံးဒိၣ်လဲၣ်, အဘီအမုၢ်န့ၣ်မ့ၢ်အဘီမုၢ်အထူ အယိာ်, ဒီးအပၢတၢ်အလီၢ်န့ၣ် အိၣ်ဝဲအစိၤစိၤအဃၣ် ဃၣ်လီၤ.
4 ယဲဒၣ်နဘူၤကးန့စၢ်အံၤ, ယအိၣ်ဘှံးလၢယဟံၣ်ပူၤ, ဒီးဘီၣ်ထီၣ်ညီထီၣ်လၢယနူၢ်ပူၤလီၤ.
5 ယထံၣ်တၢ်မံမီၢ် လၢအမၤပျံၤယၤ, ဒီးယဆိကမိၣ်တၢ်တဖၣ်လၢယလီၢ်မံ ပူၤ, ဒီးယထံၣ်တၢ်လၢညါခီတဖၣ်န့ၣ်မၤကိၢ်ယသးလီၤ.
6 ဒီးယကလုၢ်လီၤဒ်သိး ပှၤကဟဲစိာ်ဘၤဘူၤလိၣ်အပှၤ ကူၣ်တၢ်သ့ဆူ ယမဲာ်ညါဒ်သိး အကဘိးဘၣ်သ့ၣ်ညါ ယၤလၢတၢ်မံမီၢ်န့ၣ်အဒိၣ်အယိာ်လီၤ.
7 တုၤနုၤတစုပှၤကွဲးလံာ်, ပှၤသ့တၢ်အူတၢ်သမူ, ပှၤက့ၤ စ့းဖိ, ဒီးပှၤကွၢ်ဆၣ်ဧိၤဖီဧိၤသ့သ့ၣ်တဖၣ်ဟဲဝဲ, ဒီးယစံၣ် တဲၤတဲလီၤတၢ်မံမီၢ်န့ၣ်လၢအမဲာ်ညါလီၤ. ဘၣ်ဆၣ်ဒီး တဘိးဘၣ်သ့ၣ်ညါယၤလၢအဒိၣ်အယိာ်ဘၣ်.
8 ဒီးလၢခံ ကတၢၢ်န့ၣ် စီၤဒၤနံးယ့လးဟဲနုာ်လၢယမဲာ်ညါ (အမံၤ မ့ၢ်ဘ့ၤလးတၡါစၢ်ဒ်သိးဒီးယကစၢ်အမံၤ,) ဒီးကစၢ်စီဆှံ တဖၣ်အသးအိၣ်ဝဲလၢအပူၤ, ဒီးယစံၣ်တဲၤတဲလီၤတၢ်မံ မီၢ်န့ၣ်လၢအမဲာ်ညါလီၤ.
9 ပှၤကွဲးလံာ်အဒိၣ်အခိၣ် စီၤဘ့ၤလးတၡါစၢ်ဧၢ, မ့ၢ်ယ သ့ၣ်ညါလၢကစၢ်စီဆှံတဖၣ် အသးအိၣ်ဝဲလၢနပူၤ, ဒီး တၢ်အိၣ်ခူသူၣ်တကီဘၣ်လၢ နမဲာ်ညါနီတမံၤဘၣ်ဒီး, တၢ်လၢယထံၣ်ဘၣ်လၢညါခီန့ၣ် စံးဘၣ်ယၤလၢအဒိၣ် အယိာ်န့ၣ်တက့ၢ်.
10 တၢ်လၢယမဲာ်ထံၣ်တၢ်လၢညါခီ လၢယလီၢ်မံအပူၤ မ့ၢ်အအံၤ, ယကွၢ်တၢ်ဒီးကွၢ်ကွၢ်, သ့ၣ်တထံးအိၣ်ဝဲလၢ ဟီၣ်ခိၣ်အသးကံၢ်ပူၤ, ဒီးထီဝဲထီထီကလဲာ်လီၤ.
11 ဒီးသ့ၣ်န့ၣ်ဒိၣ်ထီၣ်ဝဲ, ဒီးဆူၣ်ထီၣ်ဝဲ, ဒီးအထီထီၣ်ဘး လၢမူခိၣ်, ဒီးအိၣ်ဖျါဝဲတုၤလၢဟီၣ်ခိၣ်ဒီဘ့ၣ်ညါအက တၢၢ်လီၤ.
12 အဒိးအလၣ်န့ၣ်အိၣ်ဒီးအဃံအလၤ, ဒီးအ တၤသၣ်အိၣ်အါအါကလဲာ်, ဒီးတၢ်အီၣ်လၢတၢ်ခဲလၢာ် အဂီၢ်အိၣ်ဝဲလၢအလိၤလီၤ. ဆၣ်ဖိကီၢ်ဖိလၢပှၢ်လၢ်ကျါ အိၣ်ကဒုလၢအဖီလာ်,ဒီးထိၣ်ဧိၤလံၣ်ဧိၤလၢမူကပိာ်လိၤ အိၣ်ဝဲဆိးဝဲလၢအဒ့အကျါ, ဒီးတၢ်ဒုးအီၣ်တၢ်သးခဲလၢာ် လၢအီၤလီၤ.
13 ယကွၢ်တၢ်လၢယခိၣ်အထံၣ်တၢ်လၢညါခီလၢယလီၢ် မံပူၤ, ဒီးကွၢ်ကွၢ်, ပှၤဆိးသီတၢ်ဖိ, ပှၤစီဆှံတဂၤဟဲလီၤ လၢမူခိၣ်လီၤ.
14 အဝဲဒၣ်ကိးပသူထီၣ်ဒီးစံးဝဲဒ်အံၤ, ကူာ်လီၤကွံာ်သ့ၣ် တထံးန့ၣ်, ဒီးပဲာ်တဲာ်ကွံာ်အဒ့ဧိၤဖီဧိၤ, တြုၤလီၤကွံာ် အဒိးအလၣ်, ဒီးမၤလီၤပြံလီၤပြါအတၤသၣ်တက့ၢ်. မ် ဆၣ်ဖိကီၢ်ဖိဟးထီၣ်ကွံာ်လၢအဖီလာ်, ဒီးထိၣ်ဧိၤလံၣ်ဧိၤ လၢအဒ့ကျါတက့ၢ်.
15 ဘၣ်ဆၣ်ဒီးဒုးအိၣ်လီၤတဲာ်အခိၣ် ဆၢၣ်လၢဟီၣ်ခိၣ်ပူၤ, အိၣ်ဝဲဒီးထးသွဲဒီးတိၢ်သွဲ, လၢပှၢ် လၢ်ကျါအနီၣ်ဧိၤမံၤဧိၤအကျါတက့ၢ်. ဒီးကဘၣ်စီၣ်လၢ မူခိၣ်အပစီၤထံ, ဒီးအဂီၢ်ကအိၣ်ဝဲဒီး ဆၣ်ဖိကီၢ်ဖိလၢ ဟီၣ်ခိၣ်အနီၣ်ဧိၤမံၤဧိၤအကျါလီၤ.
16 အသးတကဲလၢၤဘၣ်ပှၤကညီအသးဘၣ်, ဒီးတၢ်က ဟ့ၣ်လီၤအီၤလၢ ဆၣ်ဖိကီၢ်ဖိအသး, ဒီးတၢ်ကဆၢအ လီၢ်နွံဘျီလၢအဖီခိၣ်လီၤ.
17 တၢ်တမံၤအံၤ မ့ၢ်လၢပှၤဆိးသီတၢ်ဖိ စံၣ်ညီၣ်တၢ်ဒီး တၢ်စီဆှံတဖၣ်အတၢ်မၤလိာ်ဒ်သိး ပှၤမူဝဲတဖၣ်ကသ့ၣ် ညါလၢ တၢ်ထီကတၢၢ်တဂၤ ပၢတၢ်လၢပှၤကညီအဘီ မုၢ်, ဒီးဟ့ၣ်လီၤအီၤလၢဖဲအဘၣ်အသးတဂၤဂၤ, ဒီးပာ် ထီၣ်ပှၤဖှီၣ်ကတၢၢ်လၢအဖီခိၣ်လီၤ.
18 အန့ၣ်မ့ၢ်တၢ်မံမီၢ်လၢယၤ စီၤပၤနဘူၤကးန့စၢ် ထံၣ် ဘၣ်လီၤ. ဒီးနဲဒၣ်, စီၤဘ့ၤလးတၡါစၢ်ဧၢ, ဖးအဒိၣ်အ ယိာ်တက့ၢ်. အဂ့ၢ်ဒ်အံၤ, ပှၤကူၣ်တၢ်သ့လၢယဘီမုၢ်အ ပူၤခဲလၢာ်န့ၣ် ဘိးဘၣ်သ့ၣ်ညါယၤလၢအဒိၣ်အယိာ်တ သ့ဘၣ်နီတဂၤဘၣ်. မ့မ့ၢ်နဲဒၣ်အံၤနသ့လီၤ. အဂ့ၢ်ဒ်အံၤ, ကစၢ်စီဆှံတဖၣ်အသးအိၣ်လၢနပူၤလီၤ.
19 တုၤနုၤတစုစီၤဒၤနံးယ့လး လၢအမံၤမ့ၢ်စီၤဘ့ၤလးတ ၡါစၢ်အသးကတုၤတစိၢ်ဖိ, ဒီးအတၢ်ဆိကမိၣ်မၤကိၢ်မၤ ဂီၤအသးလီၤ. စီၤပၤကတိၤတၢ်ဒီးစံးဝဲဒၣ်, စီၤဘ့ၤလး တၡါစၢ်ဧၢ, မ်တၢ်မံမီၢ်န့ၣ်ဒီးအဒိၣ်အယိာ်န့ၣ် အသုတ မၤကိၢ်မၤဂီၤနသးတဂ့ၤ. စီၤဘ့ၤလးတၡါစၢ်စံးဆၢတၢ်ဒီး စံးဝဲဒၣ်, မ်နမံမီၢ်န့ၣ် ဘၣ်ပှၤလၢအသးဟ့နၤ, ဒီးအဒိၣ် အယိာ်ဘၣ်နဒုၣ်နဒါတက့ၢ်.
20 သ့ၣ်လၢနထံၣ်ဝဲတထံးလၢအဒိၣ်ထီၣ်, ဒီးဆူၣ်ထီၣ် ဒီးအထီထီၣ်ဘးလၢမူခိၣ်, ဒီးအိၣ်ဖျါဝဲလၢ ဟီၣ်ခိၣ်ဒီ ဘ့ၣ်ညါ,
21 ဒီးအဒိးအလၣ်န့ၣ်အိၣ်ဒီးအဃံအလၤ, ဒီး အတၤသၣ်အိၣ်ဝဲအါအါကလဲာ်, ဒီးတၢ်အီၣ်လၢတၢ်ခဲ လၢာ်အဂီၢ်အိၣ်ဝဲလၢအလိၤ, ဒီးဆၣ်ဖိကီၢ်ဖိလၢပှၢ်လၢ် ကျါအိၣ်ဝဲဆိးဝဲလၢအဖီလာ်, ဒီးထိၣ်ဧိၤလံၣ်ဧိၤလၢမူက ပိာ်လိၤအိၣ်ဒီးအအိၣ်အဆိးအလီၢ်လၢအဒ့ကျါန့ၣ်,
22 မ့ၢ် နၤစီၤပၤဧၢ, နဒိၣ်ထီၣ်, ဒီးနဆူၣ်ထီၣ်, ဒီးနဒိၣ်ထီၣ်န့ၣ် အါထီၣ်, ဒီးထီၣ်ဘးလၢမူခိၣ်, ဒီးနဘီနမုၢ်န့ၣ်ပၢၢ်လၢ ဟီၣ်ခိၣ်အကတၢၢ်လီၤ.
23 ဒီးဒ်စီၤပၤထံၣ်ပှၤဆိးသီတၢ်ဖိ, တၢ်စီဆှံတဂၤဟဲလီၤလၢမူခိၣ်လၢအစံးဝဲ, ကူာ်လီၤကွံာ်သ့ၣ်တထံးန့ၣ်ဒီးမၤဟးဂီၤအီၤတက့ၢ်, ဘၣ်ဆၣ်ဒီး ဒုးအိၣ်လီၤတဲာ်အခိၣ်ဆၢၣ်လၢဟီၣ်ခိၣ်, အိၣ်ဒီးထးသွဲ, ဒီးတိၢ်သွဲလၢပှၢ်လၢ်ကျါလၢနီၣ်ဧိၤမံၤဧိၤအကျါတက့ၢ်, ဒီးကဘၣ်စီၣ်လၢမူခိၣ်အပစီၤထံ, ဒီးအဂီၢ်ကအိၣ်ဝဲဒီး ဆၣ်ဖိကီၢ်ဖိလၢပှၢ်လၢ်ကျါတုၤတၢ်ကဆၢအလီၢ်နွံဘျီလၢအဖီခိၣ်အသိး,-
24 အအံၤမ့ၢ်အဒိၣ်အယိာ်, စီၤပၤဧၢ, ဒီးမ့ၢ်တၢ်ထီကတၢၢ် တဂၤအတၢ်စံၣ်ညီၣ်လၢအဘၣ်ယကစၢ်စီၤပၤလီၤ.
25 ဒီးတၢ်ကဟီထီၣ်ကွံာ်နၤလၢ ပှၤကညီအကျါ, ဒီးန အိၣ်နဆိးအလီၢ်ကအိၣ်ဒီး ဆၣ်ဖိကီၢ်ဖိလၢပှၢ်လၢ်ကျါ, ဒီးတၢ်ကဒုးအီၣ်နၤလၢနီၣ်ဧိၤမံၤဧိၤ, ဒ်ဂီၤဖံးအသိး, ဒီးန ကဘၣ်စီၣ်လၢမူခိၣ်အပစီၤထံအကျါ, ဒီးတၢ်ကဆၢအ လီၢ်နွံဘျီလၢနဖီခိၣ် တုၤနသ့ၣ်ညါလၢတၢ်ထီကတၢၢ်တ ဂၤပၢတၢ်လၢပှၤကညီအဘီမုၢ်အဖီခိၣ်, ဒီးဟ့ၣ်လီၤအီၤ လၢဖဲဒၣ်ပှၤလၢအဘၣ်အသးတဂၤဂၤလီၤ.
26 ဒီးမ့ၢ်တၢ်မၤလိာ်ဝဲ, ဒုးအိၣ်လီၤတဲာ်သ့ၣ်ခိၣ်ဆၢၣ်သ တးဒီး, ဖဲနသ့ၣ်ညါလၢမူခိၣ်ပၢတၢ်အလီၢ်ခံန့ၣ် နဘီ မုၢ်ကအိၣ်ဂၢၢ်ဆိးကျၢၤဒီးနၤလီၤ.
27 မၤသးဒ်န့ၣ်ဒီးစီၤပၤဧၢ, မ်ယဒုးကူၣ်ဘၣ်နၤန့ၣ်ဘၣ်န သးတက့ၢ်. မၤတၢ်တီတၢ်လိၤသတးဒီး, ဒီၣ်တဲာ်ကွံာ် နတၢ်ဒဲးဘး, ဒီးသးကညီၤပှၤဖှီၣ်ဖိယာ်ဖိသတးဒီး, ဒီၣ် တဲာ်ကွံာ်နတၢ်ကမၣ်တက့ၢ်. ဘၣ်တဘၣ်တၢ်ကဒုးယံာ် ထီၣ်နအိၣ်ဃူအိၣ်ဖိးလီၤ.တၢ်ခဲလၢာ်န့ၣ် ဘၣ်စီၤပၤနဘူၤကးန့စၢ်လီၤ.
28-29 တ ဆံခံလါအကတၢၢ်န့ၣ် စီၤပၤဟးယဲၤယီၤဝဲလၢဘၤဘူၤ လိၣ်အဘီမုၢ်အနူၢ်အစီၤအခိၣ်လီၤ.
30 စီၤပၤကတိၤတၢ် ဒီးစံးဝဲဒၣ်, အဝဲအံၤမ့ၢ်ဘၤဘူၤလိၣ်ဖးဒိၣ် လၢယတ့ယဲ လၢယစိဒိၣ်ယကမီၤထီ, ဒီးလၢယကဟုကညီၢ်အလၤ ကပီၤအဂီၢ်လၢဘီဧိၤမုၢ်ဧိၤအဟံၣ်အဂီၢ်တမ့ၢ်ဘၣ်ဧါ.
31 တၢ်ကတိၤန့ၣ်အိၣ်ဒံးလၢ စီၤပၤအထးခိၣ်အဖၢမုၢ်ဒီး, တၢ်အကလုၢ်သီၣ်လီၤလၢမူခိၣ်, စံးဝဲဒၣ်, စီၤပၤနဘူၤ ကးန့စၢ်ဧၢ, တၢ်စံးဘၣ်နၤ, ဘီဧိၤမုၢ်ဧိၤန့ၣ်ဟးထီၣ်ကွံာ် လၢနၤလီၤ.
32 ဒီးတၢ်ကဟီထီၣ်ကွံာ်နၤလၢ ပှၤကညီအ ကျါ, ဒီးနအိၣ်နဆိးအလီၢ်န့ၣ် ကအိၣ်ဝဲဒီးဆၣ်ဖိကီၢ်ဖိ လၢပှၢ်လၢ်ကျါလီၤ. တၢ်ကဒုးအီၣ်နၤလၢနီၣ်ဧိၤမံၤဧိၤဒ်ဂီၤ ဖံးအသိး, ဒီးတၢ်ကဆၢအလီၢ်နွံဘျီလၢနဖီခိၣ်တုၤနသ့ၣ် ညါလၢတၢ်ထီကတၢၢ် ပၢတၢ်လၢပှၤကညီအဘီအမုၢ် အဖီခိၣ်, ဒီးဟ့ၣ်လီၤအီၤဖဲဒၣ်ပှၤလၢအဘၣ်အသးတဂၤ ဂၤလီၤ.
33 တၢ်ကတိၤဘၣ်ဃးဒီး စီၤနဘူၤကးန့စၢ်န့ၣ် လၢထီၣ် ပှဲၤထီၣ်တကီၢ်ခါ, ဒီးတၢ်ဟီထီၣ်ကွံာ်အီၤလၢပှၤကညီအ ကျါ, ဒီးအီၣ်နီၣ်ဧိၤမံၤဧိၤဒ်ဂီၤဖံးအသိး, ဒီးဘၣ်စီၣ်လၢ မူခိၣ်အပစီၤထံတုၤအဆူၣ်ထီၣ်ဝဲ ဒ်လံာ်ဧိၤတြၤဧိၤအသိး, ဒီးအစုမ့ၣ်ထီၣ်ဝဲ ဒ်ထိၣ်ဧိၤလံၣ်ဧိၤ အခီၣ်မ့ၣ်အသိးန့ၣ် လီၤ.
34 တၢ်လၢမုၢ်နံၤတဖၣ်အကတၢၢ်န့ၣ် ယဲဒၣ်စီၤနဘူၤကး န့စၢ်, ယကျ့ထီၣ်ယမဲာ်ဆူမူခိၣ်, ဒီးယသးဟဲက့ၤကဒါ က့ၤလၢယပူၤ, ဒီးယဆိၣ်ဂ့ၤတၢ်ထီကတၢၢ်တဂၤ, ဒီး ယစံးထီၣ်ပတြၢၤ, ဒီးယမၤလၤကပီၤ ပှၤလၢအမူဝဲလီၤ ထူလီၤယိာ်တဂၤလီၤ. အဂ့ၢ်ဒ်အံၤ, အပၢဝဲအလီၢ်န့ၣ်အိၣ် ဝဲလီၤထူလီၤယိာ်, ဒီးအဘီအမုၢ်အိၣ်ဝဲအစိၤစိၤအဃၣ် ဃၣ်လီၤ.
35 ဒီးပာ်ကယဲၢ်ပှၤဟီၣ်ခိၣ်ဖိခဲလၢာ်န့ၣ်လၢတၢ် နီတမံၤဘၣ်, ဒီးမၤဝဲဖဲဒၣ်အသးလၢမူခိၣ်အသုးမုၢ်ဂီၢ်မုၢ် အကျါ, ဒီးလၢပှၤဟီၣ်ခိၣ်ဖိအကျါ, ဒီးပှၤတြီအစုမ့ၢ်ဂ့ၤ, ဒီးစံးဘၣ်အီၤ, နမၤဒ်လဲၣ်န့ၣ်မ့ၢ်ဂ့ၤ, တသ့ဘၣ်နီတဂၤ ဘၣ်လီၤ.
36 ယသးန့ၣ်ဟဲက့ၤကဒါက့ၤလၢယပူၤတကီၢ်ခါ, ဒီးယ ဘီမုၢ်အလၤကပီၤ, ဒီးယကဟုကညီၢ်, ဒီးယဃံယလၤ ဟဲက့ၤကဒါက့ၤဆူယအိၣ်, ဒီးယပှၤကူၣ်လိာ်အသး, ဒီး ယပဒိၣ်ဖးဒိၣ်တဖၣ်န့ၣ်ဃုက့ၤယၤ, ဒီးတၢ်ဒုးအိၣ်ထီၣ် ယၤလၢယဘီယမုၢ်အဖီခိၣ်, ဒီးတၢ်ပာ်အါထီၣ်ယကဟု ကညီၢ်လီၤ.
37 ခဲကနံၣ်အံၤ ယဲဒၣ်နဘူၤကးန့စၢ်အံၤ, ယစံးထီၣ်ပ တြၢၤ, ဒီးပာ်ဒိၣ်ပာ်ထီ, ဒီးမၤလၤကပီၤမူခိၣ်အစီၤပၤ လီၤ. အမၤတၢ်ခဲလၢာ်န့ၣ်မ့ၢ်တၢ်မ့ၢ်တၢ်တီ, ဒီးအကျဲ တဖၣ်န့ၣ်မ့ၢ်တၢ်စံၣ်ညီၣ်တီ, ဒီးပှၤလၢအပာ်အသးထီၣ် ထီတဖၣ်န့ၣ်ဆီၣ်လီၤအီၤသ့လီၤ.