57
1 ယၫ့ၥုၪ့ယၫ့ၥၭယၧၩယွၩဧ့, ယၫ့ၥုၪ့ယၫ့ၥၭယၧၩ ဆံၭ.အဂဲးဘဲၫယီၩ ယၥၭဒိၭနဲၩ့အၥၭ လၧနၧၩလီၫ. တၭယစဲၪ့ဖလ့ၬ ယၥၭလၧနဒံၭအလၩၡုၪဖၧၩ့ထီးဆၧ
2 ၡၪ့ဆၧနၭလဖၪယီၩ လ့ၩဖီၩ့ခွံၬယၧၩလီၫ.- ယမိကိၭ ထၪ့ယွၩ ဆၧထၪ့ထီၫထုၬလဂၩ, ယွၩလၧအမၩဆၧ
3 လၧၫ့ထၪ့ဎွ့ၩထၪ့လၧယဂးလီၫ.- တၭအဝ့ၫဒၪမိအၪ့ မၧၫ့လၩ့ လၧမူၭခိၪတၭ, မၩဖီၩ့မၩဖျ့ၭယၧၩ လၧၦ လၧအလီၩ့ဆီးယၧၩ အဆၧဒုၪဒွ့ၪ အစူၪဖၧၩ့နီၪလီၫ. (စ့လၫ.)ယွၩမိအၪ့မၧၫ့လၩ့ အဆၧယၫ့ၥၭ ဒဲအဆၧမွဲ
4 ဆၧတီၩလီၫ.- ယၥၭအီၪလၧဆၬလၥၧၫ့အကျၩတၭ, ယမံၫနၩ့လၧၦၡၩ လၧအၥၪထၪ့ မ့ၪလၪလဖၪအကျၩ တၭ, ၦၡၩအဖိၪခွၫၥံၪ လၧအၥွၫမွဲဖၩ့ ဒဲဖျါၥံၪတၭ,အ ဖျ့ၩမွဲနၭလၧအနါအဲၪ့ဝ့ၫလီၫ.
5 မွဲနဘၪဆၧအီၪက့ၪထၪ့ထီၫနၧၩ လၧမူၭခိၪအဖၫ့ခိၪ နီၪ, ယွၩဧ့, မွဲနဆၧလၩဆၧဖၩ့အီၪ လၧဂၪ့ခိၪထၧၫ့ဖျိၪ့
6 ယၫအဖၫ့ခိၪဆံၭ.- အဝ့ၫၥံၪမၩဝဲၩဖျံၩခွၩ့ လၧယခၪ့ အဂးလီၫ. တၭယၥၭကူၭလၩ့အၥၭလီၫ. အဝ့ၫၥံၪခုၪ့ လၩ့ဆၧဖၧၩ့ လၧယမ့ၬယၫတၭ, အဝ့ၫၥံၪအနၫ့ဆါဒၪ
7 ဝ့ၫလၩ့ထ့ၬလၧအဖၧၩ့နီၪလီၫ.(စ့လၫ.)- ယၥၭအီၪ ဂုးအီၪခၧၫ့, ယွၩဧ့, ယၥၭအီၪဂုးအီၪခၧၫ့လီၫ. ယမိၥံၫ
8 ကျံၩထၪ့ဆၧတၭ, ယမိစံၭထၪ့အၪ့အူၭဆၧလီၫ.- နၪ့ ထၪ့,ယလၩဖၩ့ဧ့, နၪ့ထၪ့ဆံၭ.ၥၫ့ထီးဒဲနါဒံၩ့ၥံၪဧ့, ယ
9 မိထိၪဂဲၩမုဆဲၪ့ဘွၩနီၪလီၫ.- ယမိစံၭထၪ့အၪ့အူၭနၧၩ လၧၦခမျၧးအကျၩ, ကဆါဧ့, ယမိၥံၫကျံၩထၪ့နၧၩလၧ
10 ၦဆၨၩၥံၪအကျၩလီၫ.- အဂဲးဘဲၫယီၩ နဆၧယၫ့ၥုၪ့ ယၫ့ၥၭဒိၪဝ့ၫဖိးလၧမူၭခိၪတၭ, နဆၧမွဲဆၧတီၩဖိးလၧ ဆၧအုၪ့လဖၪလီၫ.
11 မွဲနဘၪဆၧအီၪက့ၪထၪ့ထီၫနၧၩ လၧမူၭခိၪအဖၫ့ခိၪ, ယွၩဧ့, မွဲနဆၧလၩဆၧဖၩ့အီၪ လၧဂၪ့ခိၪထၧၫ့ဖျိၪ့ယၫ အဖၫ့ခိၪနီၪဆံၭ.