လံၬလၧစနံၫဟမဲအၫကွ့ၭဝ့ၫလီၫ.
1
1 စဟၭခလဲအၫအဖိၪခွၫစနံၫဟမဲအၫအဆၧချဲၩ့လ ဖၪလီၫ. တၭလၧနံၪ့ထၪ့အၥၫ့ နံၫဆံၫအဖၧၩ့နီၪ, လၩ ခံၭစလုၫအဖၧၩ့, ဆၧမၩအၥၭလၧယအီၪလၧနီးရှုၡၫ့
2 အဖၧၩ့နီၪ,- ယထၧၫ့ဖုဝဲလဂၩစဟၫနနဲၫ, ဂဲၫး အဝ့ၫဒၪ ဒဲၦယုဒၫဖိၪလနၩ့တၭ, ယအၪ့စၪ့အဝ့ၫၥံၪလၧဆၧဘၪ ဆဲၫ့ၦယုဒၫဖိၪဖီၩ့ဖျ့ၭဝ့ၫလဖၪ, လၧအအီၪလၩ့ထးထီး ၦဘၪဆၧဆိၬခွံၬဝ့ၫနီၪ, ဒဲယရုစလံၫ့အဂဲးအကၠီၪ့နီၪ
3 ဆ့လီၫ.- တၭအဝ့ၫၥံၪစံၭယၧၩ, ထီးၦဘၪဆၧဆိၬခွံၬ ဝ့ၫနီၪ,ၦလနၩ့လၧအအီၪလၩ့ထးဒံၭလၧခးဖၧၩ့, အီၪ လၧဆၧၡၪ့ဆၧနၭ ဒဲဆၧဒုၪဒွ့ၪဝ့ၫဖၭဒိၪ အဖၧၩ့တၭး ယရုစလံၫ့နီၪ အခိၪဒၧၩ့လၩ့ဎီးခွံၬဆ့ယူၭ, ဒဲအတရၫ့ ၥံၪမ့ၪအၪ့ခွံၬယူၭလီၫ.
4 ထီးယနါဂၧၫ့ဆၧချဲၩ့လဖၪနီၪ ဆၧမၩအၥၭလၧယ ဆၧၫ့နၩ့ဂၪ့ဝ့ၫတၭ, ယၥုၪ့အုၭၥၭအုၭမုနံၩလဖၪ, ဒဲဒုၪ ဆၧအၪ့ဆၧအီၩ, ဒဲဘၩဆိၪဖၪလၧမူၭခိၪအယွၩအမ့ၬ
5 ယၫတၭ,စံၭဝ့ၫ,- ယဟိဝၩမူၭခိၪအယွၩဧ့, ယအၪ့ ကံၩ့အၪ့ယၩနၧၩ, ယွၩဖၭဒိၪနီၪဆၧဘၪၥၭမဲၪဝ့ၫ, လၧ အထီးန့ဆၧအုၩ့လၩ့ဒဲဆၧယၫ့ၥၭ လၧၦလၧအအဲၪဝ့ၫ
6 ဒဲထီးန့အဆၧမၪလူၬလဖၪအဂး,- တၭဘိၩ့နဲၪ့ယီၩ, ဒိၭနနါဒဲစၪ့ထၪ့နမ့ၬၥၪၥံၪ, ဘဲၫၥိၭနမိခိၭနၪနခ့ၫနၡၩ အဆၧဘၩဆိၪဖၪ, လၧယအၪ့ကံၩ့အၪ့ယၫနၧၩဘိၩ့နဲၪ့ ယီၩ,မုဆၫဆၫမုနၩနၩ, လၧနခ့ၫနၡၩ အံၫစရ့လၭဖိၪ ၥံၪအဂး,ဒဲလီၩလၩ့အံၫစရ့လၭဖိၪၥံၪ အဆၧၥူၭဆၧမၪ လဖၪ,လၧပမၩမၪဆၧထၫ့ဒုၪဒၩနၧၩနီၪး ယဝ့ၫဒၪဒဲယ
7 ဖါအဂံၪ့ဖိၪၥံၪမၪဘၪယူၭနံၫခီၫလူၬလီၫ.- ပမၩအၧၩ့ ဆၧဖၭဒိၪထၫ့ဒုၪဒၩနၧၩ, ဒဲလထီးန့ဘၪနဆၧမၪလူၬ လဖၪမွဲဂ့ၩ, ဆၧၥနိၫလဖၪမွဲဂ့ၩ, ဆၧစ့ၩရၫ့လဖၪမွဲဂ့ၩ,
8 လၧနမၪလူၬနခ့ၫနၡၩစမိစ့ၭနီၪလီၫ.- ယအၪ့ကံၩ့အၪ့ ယၫနၧၩ,နၪ့ထၪ့ထဲၩ့ဆၧချဲၩ့လၧနမၪလူၬ နခ့ၫနၡၩစမိ စ့ၭ,စံၭဝ့ၫ, နၥံၪအ့ၪမၩမၪဘၪဆၧတၭ, ယမိမၩလၩ့
9 ပြံၩလၩ့ပၩနၥံၪလၧ ၦဆၨၩလဖၪအကျၩတၭး- အ့ၪမွဲ နၥံၪအ့ၪကၠၪထဲၩ့နၥံၪအၥၭလၧယအီၪ, ဒဲထီးန့ယဆၧ မၪလူၬလဖၪ, ဒဲမၩအဝ့ၫၥံၪဆ့း မွဲၦဘၪဆဲၫ့လၧနၥံၪဘၪ ဆၧနၫ့ထၪ့ခွံၬဝ့ၫလၧမူၭထံၭအထုၬလခီၫလါနၫ့နီၪ, ယ မိအၪ့ထုၫ့ကီၪ့ထဲၩ့ဒီၭအဝ့ၫၥံၪ လၧအလးနီၪတၭ, ယမိ ဂဲၫထဲၩ့ဆိၬအဝ့ၫၥံၪ ထီၩ့လၧအလးလၧယရွံန့ဘဲၫၥိၭ
10 ယမိအီၪက့ၪလၩ့ယမံၩ့ထီးနီၪလီၫ.- ဘိၩ့နဲၪ့ယီၩၦ လဖၪယီၩမွဲနခ့ၫနၡၩဒဲနၡၩခမျၧးၥံၪ, လၧနဎွ့ၩန့ထဲၩ့
11 ဝ့ၫ,လၧနစီၩ့ဒိၪနမၩ့ဒိၪ, ဒဲလၧနစူၪဆီၪ့နီၪလီၫ.- ယဟိ ဝၩဧ့, ယအၪ့ကံၩ့အၪ့ယၫနၧၩ, ဒိၭနနါဘိၩ့နဲၪ့ယီၩ, လၧနခ့ၫနၡၩလဂၩ အဆၧဘၩဆိၪဖၪ, ဒဲလၧနခ့ၫနၡၩ လဖၪ,ၦလၧအဆိၫ့ၥၭမဲၪ နမံၩ့အဆၧဘၩဆိၪဖၪဆံၭ. ယအၪ့ကံၩ့နၧၩ မၩဘီၪထၪ့ယီၫထၪ့လါနခ့ၫနၡၩ လၧ မုလနံၩယီၩ, ဒဲဖ့ၪလၫ့လါဆၧယၫ့ၥၭလၧၦလဂၩယီၩ အမ့ၬယၫဆံၭ. အဂဲးဘဲၫယီၩ ယမွဲၦလၧအဆိၬလိၫ့ လၧစဎွၩအဂးနီၪလီၫ.