2
1 ယဟိဝၩလုၬဘံၭဇံအိၫ့အဖိၪမုၪ လၧဆၧအုၪ့လၧ အၥၭထၪ့အကၠီၩ့ ဘဲၫၥ့ၪလဲၪၬ ဒဲခွံၬလၩ့အံၫစရ့လၭ အဎံၫအလၩလၧမူၭခိၪထီၩ့လၩ့ လၧဂၪ့ခိၪချိၫ့တၭ,လၧ အၥၭထၪ့အမုလနံၩနီၪ နၪ့ထၪ့ထဲၩ့အခၪ့ယဲးလၩ့အ လးအ့ၬ.
2 ယဟိဝၩမၩဂၭဂီၩ့ခွံၬ စယၫကူၭအအီၪအလးလဖၪ ထီးအလူၬတၭ,လီၫ့ကီၩ့ဝ့ၫအ့ၬ. မၩလၩ့ဎီးခွံၬယုဒၫ အဖိၪမုၪအထိၬလဖၪ လၧအၥၭခဲၩထၪ့ အဖၧၩ့လီၫ. မၩလၩ့ဒၩဝ့ၫလၧဂၪ့ခိၪအလီၩ့ အီၪက့ၪဘၩ့မုးဒဲအၦ ဒိၪဖၭဒိၪလဖၪလၧဆၧလဆံၫ့ဘၪလီၫ.
3 ဒၪ့ထ့ၬခွံၬအံၫစရ့လၭအနိၩ့ ကိၭဘီၩ့ဒ့ၭ လၧအၥၭ ခဲၩထၪ့အဖၧၩ့, ထုၭထဲၩ့အစူၪထွ့ၪလၧဆၧအဒုၪအဒၩ အမ့ၬယၫတၭ, အၪ့ခွံၬဆၧလၧစယၫကူၭအဖၧၩ့ဘဲၫ မ့ၪလၪလၧအအၪ့ခွံၬဆၧဝၬဖီၩ့ဝ့ၫအၥိၭလီၫ.
4 ဆၪ့ထၪ့အချံၪ ဘဲၫဆၧအဒုၪအဒၩအၥိၭနီၪ,ယၩ့ ထၪ့အစူၪထွ့ၪဘဲၫၦထၫ့ဒၩဆၧအၥိၭနီၪတၭ,မၩၥံၫက ယဲဆၧလၧအဂ့ၩ လၧၦမ့ၬၥၪလၧဇံအိၫ့အဖိၪမုၪအ တဲၩဆံၫ့ဎံၪအဖၧၩ့လီၫ. ဂါလၩ့အၥၭခဲၩထၪ့ဘဲၫမ့ၪ အၥိၭနီၪလီၫ.
5 ယဟိဝၩမွဲယူၭဝ့ၫ ဘဲၫဆၧအဒုၪအဒၩ အၥုၭလီၫ. အၪ့ယုလၩ့ခွံၬအံၫစရ့လၭနီၪ, အၪ့ယုလၩ့ခွံၬအနီးၥံၪ ထီးအလူၬး မၩဂၭဂီၩ့အထိၬလဖၪ, ဒဲမၩအၪထၪ့ဆၧ မီၪ့ဆၧမၭ, ဒဲဂၪ့ဆၧယၧၩ့ဆၧဘၪလၧယုဒၫအဖိၪမုၪ အဖၧၩ့လီၫ.
6 အဝ့ၫမၩလၩ့ဎီးခွံၬအထိၬ ဘဲၫကျိၭအၥိၭနီၪတၭး မၩဂၭဂီၩ့ခွံၬအဆၧမၩဘိၪ့အလးလဖၪလီၫ. ယဟိဝၩ ဒုၭၥၭနၪ့ဆၧမၩဘိၪ့အနံၩ, ဒဲမးၥံၫအနံၩလဖၪ လၧဇံ အိၫ့အဖၧၩ့တၭ,ခွံၬၡိၭခွံၬစဎွၩ ဒဲၦလုဆၧလၧအၥၭခဲၩ ထၪ့အဖၧၩ့လီၫ.
7 ယဟိဝၩခွံၬၡိၭခွံၬအဆၧလုလး, ၥၭလိၪအလးဆံၫ့ ဎံၪဖ့ၪလၫ့ခွံၬအနီးလဖၪ အဒီၪ့ၥံၪလၧဆၧအဒုၪအဒၩ အစူၪဖၧၩ့လီၫ. အဝ့ၫၥံၪမၩၥီၫထၪ့လၧယဟိဝၩအဂံၪ့ ဖၧၩ့,ဘဲၫလၧမၩဘိၪ့အနံၩအၥိၭလီၫ.
8 ယဟိဝၩကိၪ့ထၪ့ဝဲၩဝ့ၫလၧအမိမၩဂၭဂီၩ့ ဇံအိၫ့အ ဖိၪမုၪအခိၪဒၧၩ့လီၫ. ဆုၪ့ထၪ့အဖျံၩ, လထုၭထဲၩ့ဘၪ အစူၪလၧအမၩဂၭဂီၩ့ဆၧ, ဒဲဒုၭဂၪ့ဆၧပဒၩ့လၧခီၫ့, ဒဲခိၪဒၧၩ့လဖၪဂၪ့ဆၧယၧၩ့ဆၧလစီၪ့ဎးလီၫ.
9 အတရၫ့ၥံၪလၩ့ဘၧၩ့လၧဂၪ့ခိၪဖၧၩ့, အဝ့ၫမၩဂၭဂီၩ့ ဒဲမၩခါအနိၪဘီၩ့လီၫ. အစဎွၩဒဲအၦဒိၪဖၭဒိၪလဖၪ အီၪဝ့ၫလၧၦဆၨၩလဖၪအကျၩလီၫ. ဆၧၥီၪ့ဆၧၥၫ့ အီၪလၧၩ့အ့ၬ. အမီၪလဖၪ ဒၪလၧၩ့ဆၧလၧယဟိဝၩ အအီၪနီၪဆ့အ့ၬ.
10 ဇံအိၫ့အဖိၪမုၪအၡၩ ၥုၪ့က့ၭၥၭၡါလဖၪဆၧၫ့နၩ့ဝ့ၫ လၧဂၪ့ခိၪအလီၩ့အီၪလၩ့မါပံၭတၭး ဎွံၪထၪ့ဂၪ့ခိၪအ မုၬလၧအခိၪဎွံၪအလီၩ့နီၪး ခဲးထူၬအယးဒံၩ့ လၧရၧၬ အဆၧယၬလီၫ. ယရုစလံၫ့အၡၩမုၪနၩ့ၥံၪ ၡီၫ့လၩ့အ ခိၪထီၩ့လၩ့လၧဂၪ့ခိၪလီၫ.
11 ယမ့ၬၥၪၥံၪလူၬခွံၬလၧယမ့ၬထံၫလၩ့, ယၥုၪ့ခိယၥၭ ဝီၩ,ယၥုၪ့ဂါလၩ့အၥၭလၧဂၪ့ခိၪအဖၫ့ခိၪ, လၧယၡၩ ခမျၧးအဖိၪမုၪ ဘၪဆၧမၩဂၭဂီၩ့ဝ့ၫအကၠီၩ့, လၧၦအ ဆံၭဒဲဖိၪၥၪအၪ့နူလဖၪ အၥၭလၩ့ဘဲၩလၧလၧဒိၩ့အဖၧၩ့ ၥၭၥံၪအဖၧၩ့နီၪလီၫ.
12 ထီးအၥၭလၩ့ဘဲၩ ဘဲၫၦဘၪဆၧဆ့ၭဝ့ၫလၧဒိၩ့အ ဖၧၩ့ၥၭအၥိၭနီၪ, ထီးအၥၭမၧၫ့ဂါလၩ့အၥၭ လၧအမိ အၥၭနၫၡါအဘိၩ့ဘၭနီၪ, စံၭအမိလဖၪ, ဘုၪၥံၪဂူၫၥံၪ ဒဲစဘံၭထံၫမွဲအအီၪခီၫခီၫလဲၪ.
13 ယရုစလံၫ့အဖိၪမုၪဧ့, ယမိမၩန့ဆၧထိးအၥၭလၧ နဂးမွဲဆၧနီၪလမံၩ့လဲၪ. ယမိဒီၩ့လၩ့နၧၩ လၧဆၧနီၪ လမံၩ့လဲၪ. ဘဲၫၥိၭယမိမၩမုၬထၪ့ထဲၩ့နၧၩတၭ, ယမိ ထိၪန့ၫဎီၩ့နၧၩ လၧဆၧနီၪလမံၩ့လဲၪ. ဇံအိၫ့အဖိၪမုၪ နၩ့လဂၩဧ့, အဂဲးဘဲၫယီၩနဆၧဘုၪ့ဖိးနီၪ မွဲအဒိၪဘဲၫ မၫဆမံၭအၥိၭနီၪလီၫ. မွဲပလၫမၩဘျၪထဲၩ့နၧၩၥ့ၪလ ဂၩလဲၪ.
14 နမီၪလဖၪဒၪဆၧပျီၩပျီၩ, ဒဲၦဂၭဂီၩ့ဖိၪအဆၧဒၪဆၧ လၧနဂးတၭ, ဒုၭနဲၪနဆၧဒဲၩဘၭ ဘဲၫၥိၭအမိဒုၭဂဲၫ ထဲၩ့ထဲၩ့နၧၩလၧနလ့ၩကဲၪဎီးနီၪအ့ၬး တၭဒၪဘၪဆၧ အွံၪဆၧယိၭ ဒဲဆၧဒုၭနၪ့ထၪ့ခွံၬအဘျံၭအဘျၪလၧနဂး လီၫ.
15 ကယဲၦလၧအလ့ၩလဲးလီၩ့ လၧဖၧၩ့ၥၭထီးအလူၬဒဲၩ အစူၪလၧနအီၪဒုၪဒွ့ၪဝ့ၫတၭ, ဖျၭလၩ့အခိၪလၧယရု စလံၫ့အဖိၪမုၪအလီၩ့တၭ,စံၭဝ့ၫ, ဒိၩ့လၧၦကိၭဝ့ၫလၧ ဆၧအဎံၫအလၩအဒိၪထုၬ, ဂၪ့ခိၪထီးအလူၬ အဆၧ ၥၭထိၬနီၪ,မွဲဒိၩ့အယီၩဧၪ.
16 နဒုၪနဒၩထီးအလူၬအၩ့ထၪ့အနိၭလၧနလီၩ့,ဒုၪဒွ့ၪ ဝ့ၫတၭ,အဲၪ့ဎံၬအမဲၪတၭ, စံၭဝ့ၫ,ပယုလၩ့ခွံၬယူၭအ ဝ့ၫယူၭ.မွဲတၡါအယီၩ မွဲမုလနံၩလၧပယိလါအဖၧၩ့ ၥၭပဒၪန့ယူၭပဒၪဘၪယူၭ.
17 ယဟိဝၩမၩဆၧလၧအကိၪ့ဝဲၩဝ့ၫ, မၩလၧၫ့ထၪ့ဎွ့ၩ ထၪ့အဆၧချဲၩ့လၧအမၩတီၩဝ့ၫလၧမုနံၩလဖၪ လၧဖျိၩ့ လီၫ. မၩလၩ့ဎီးဆၧတၭ, ယၫ့ၥၭဆၧအ့ၬ. ဒုၭၥၭထိၬ နဒုၪနဒၩလၧနလီၩ့, အီၪက့ၪထၪ့ထီၫၦထၫ့ဒၩနၧၩအ နိၩ့လီၫ.
18 အဝ့ၫၥံၪအၥၭကိၭထၪ့ကဆါ, ဇံအိၫ့အဖိၪမုၪအခိၪ ဒၧၩ့ၥံၪဧ့, ဒုၭယွၩလၩ့မ့ၬထံၫ လၧမုဆၫဆၫမုနၩနၩ ဘဲၫထံၫချိၬအၥိၭနီၪဆံၭ. ဒုၭအီၪပွံၭနၥၭလဂ့ၩ, ဒုၭ ပထုၬနမ့ၬၡၩလဂ့ၩ,
19 ဂဲထုၪ့, ကိၭၡၭထၪ့လၧမုနၩလခီၫလၧၦခိၭဆၧအခၪ့ ထံၭလဆၫ့အထးဖၧၩ့, ဂါလၩ့ခွံၬနၥၭဘဲၫထံၫအၥိၭ နီၪလၧယဟိဝၩအမ့ၬယၫ, ယူၬထၪ့နစူၪလၧနဖိၪဆံၭ လဖၪအဂး, လၧအၥၭလၩ့ဘဲၩ လၧဆၧၥၭဝံအၥၭအ ကၠီၩ့လၧဖၧၩ့ၥၭကိၭဘီၩ့ဒ့ၭအခၪ့ထံၭနီၪဆံၭ.
20 ယဟိဝၩဧ့,နမၩဆၧယီၩလၧၦလၫလဂၩလဲၪ. မွဲ လၧပလၫလဂၩလဲၪနီၪ,ယိဆီၫ့မီၪ့ဆံၭ. ယိခွါ,ၦမုၪၥံၪ အၪ့အၥၪ, ဒဲဖိၪၥၪလၧအဂၩ့ထီၫလထၫနီၪဆ့ဧၪ. ယိ ခွါ,ၦလုဆၧလဖၪ,ဒဲမီၪလဖၪ, ဘၪဆၧမၩၥံၫဝ့ၫလၧ ကဆါအလးဆံၫ့ဎံၪအဖၧၩ့နီၪ, မွဲဆ့ဧၪ.
21 ၦဖိၪၥၪခွၫဒဲၦၥုၪ့က့ၭၥၭၡါလဖၪနီၪ မံၫနၩ့လၧဂၪ့ခိၪ အလီၩ့လၧဖၧၩ့ၥၭဖၧၩ့, ယၡၩမုၪနၩ့ၥံၪဒဲယၡၩဖိၪၥၪ ခွၫလၩ့ထံၩဖါဝ့ၫ လၧနၭၥံၪဖၩ့ၥံၪလီၫ. လၧနဆၧၥၭ ထၪ့အမုနံၩနီၪနမၩၥံၫဆၧတၭ,နလီၫ့ကီၩ့ဆၧအ့ၬ.
22 ဘဲၫလၧဆၧမၩဘိၪ့အမုနံၩအၥိၭနီၪ, နကိၭကီၪ့ဆၧ မၩၥၭမဲၪဝၬဖီၩ့ယၧၩတၭ, လၧယဟိဝၩၥၭထၪ့အမု လနံၩနီၪ,ၦၡၩဖီၩ့ဖျ့ၭတၭ, အီၪလၩ့ထးနးဂၩဆ့အ့ၬ. ၦလၧယလုအၪ့လုအီၩဒဲယိထဲၩ့ခွါထဲၩ့ဝ့ၫနီၪ ဆၧအဒုၪ အဒၩမၩလူၬခွံၬဝ့ၫလီၫ.