3
1 မီၪစဟဘၭကၧၭအဆၧဘၩဆိၪဖၪ လၧဆၧၥံၫကျံၩ ဆီၪ့အဂဲး,
2 ယဟိဝၩဧ့, ယနါဂၧၫ့နပရၧၫ့တၭ,ယၥၭမဲၪဆၧ, ယဟိဝၩဧ့, လၧနံၪ့ၥံၪလၩၥံၪအကျၩယီၩ,မၩမၧၫ့ထၪ့ ထၪ့ထဲၩ့နမၩဆၧဆံၭး လၧနံၪ့ၥံၪလၩၥံၪအဖၧၩ့ယီၩနဲၪဖျီၪထၪ့ဆၧတၭ, လၧဆၧၥၭထၪ့အဖၧၩ့နီၪ,နၪ့ထၪ့ထဲၩ့ဆၧယၫ့ၥၭဆံၭ.
3 ယွၩဂဲၫဝ့ၫလၧတံမၫ့, ဒဲဆၧဆံၫ့ဎံၪလဂၩလၧခိၪလီၩ့ပၫရၫ့း (စ့လၫ.)
အလၩအဖၩ့ချႃၬဘံၭမူၭခိၪ.
တၭဂၪ့ခိၪဎွ့ၩဝ့ၫလၧအဆၧစံၭထၪ့အၪ့အူၭလီၫ.
4 အဆၧယုၩ့ယဲမၩအၥၭဘဲၫမုအဆၧဖၩ့အၥိၭ, ဆၧ အဂိးလဖၪ စဲၪ့ထၪ့လၧအစူၪ, အစီၩ့အမၩ့လဖၪအီၪ ၥူၪထီးနီၪလီၫ.
5 ဆၧၥံၫချဲၫ့လ့ၩဝ့ၫလၧအမ့ၬယၫ, ဒဲဆၧၥံၫချဲၫ့မ့ၪခဲၩလီၩ့ဖိၬအခဲၫ့လီၫ.
6 အဝ့ၫဒၪအီၪထီဝ့ၫတၭ, ဂၪ့ခိၪဝၭဝ့ၫ, ယိဝ့ၫတၭ,ဒုၭဝၭထိၬဝၭတ့ၭၦဆၨၩလဖၪ.
ခိၪလီၩ့ထိၩ့ချိၬအဆိၩအကၠၪထ့ဖၭလၩ့အၥၭ,
ဆၧစီၩ့ခိၪအဆိၩအကၠၪကူၭလၩ့အၥၭတၭး
မွဲအဖၧၩ့ၥုၪ့ဖၧၩ့ၥၭခီၫလၧဖျိၩ့လီၫ.
7 ယဒၪဘၪကုၡၫ့အတဲၩၥံၪဘၪဆၧခိဆၧဝီၩ, မံဒအၫ့အခးအကလကၫဝၭဝ့ၫလီၫ.
8 ယဟိဝၩဧ့,နၥၭခဲၩထၪ့ဘၪထံၫမိၡါလဖၪဧၪ. နၥၭထၪ့ဘၪထံၫမိၡါလဖၪဧၪ,
နၥၭခဲၩထၪ့ဘၪမၫဆမံၭတၭ, နထူၬကၥ့ၪလဖၪ,ဒဲနဆၧထိးထဲၩ့တၩ့ထဲၩ့အလဲၪ့ၥုၭ နီၪဆ့ဧၪ.
9 နချံၪအီၪဘိၪ့ဆၧအီၪလၧအလီၩ့အ့ၬ, ဖျါၥံၪအၪယူၭ,မွဲဆၧအလူး (စ့လၫ.)
နမၩထ့ဖၭဂၪ့ခိၪကဲၪထၪ့ထံၫမိၡါလဖၪလီၫ.
10 ခိၪလီၩ့ထိၩ့ချိၬဒၪဘၪနၧၩတၭ, ဝၭဝ့ၫ, ထံၫလုၬဘံၭဆၧနီၪ လုၬဘံၭဆၧထံၫယိၬဖၧၩ့ ဒုၭၥီၫ ထၪ့အလူး
ယူၬထၪ့အစူၪထၪ့ထီၫလီၫ.
11 မုဒဲလၩအီၪထီဝ့ၫ လၧအအီၪအလးဖၧၩ့း လၧနဖျါၥံၪ လၧအယူၩဝ့ၫအဆၧဖၩ့အကၠီၩ့, လၧနဖၩ့ၥံၪနၭၥံၪအယုၩ့ယဲအကၠီၩ့လီၫ.
နလ့ၩခၫ့ဂၬဂၪ့ခိၪလၧနၥၭထၪ့,
12 နယဲးၦဆၨၩလဖၪလၧနၥၭခဲၩထၪ့,
13 နလ့ၩထၪ့လၧနမိထိးထဲၩ့တၩ့ထဲၩ့ နၡၩခမျၧးအဂး, လၧနၡၩဒိၭဂုၪအၥၭ အဆၧထိးထဲၩ့တၩ့ထဲၩ့ အဂး, နမၩလၩ့ဘျ့ၭဂံၪ့အၡၩအၧၩ့အခိၪဎွံၪ, နမၩဖျီၪထၪ့အခၪ့ထံၭထီၩ့လၧၦအခိၬလီၫ. (စ့လၫ.)
14 နဆ့ၭအၥုၭဖိၪအခိၪအဒိၪလဂၩလၧအဖၩ့ဒၪဝ့ၫ, ၦလၧအစဲၪ့ၡိၫ, ဘဲၫၥိၭအမိမၩပြံၩပၩယၧၩ,
ၦလၧအမိအၪ့ခွံၬၦၡၪ့ဖိၪယၬဖိၪ လၧဆၧအီၪၥူၪတၭ, ၥၭထိၬဝ့ၫလီၫ.
15 နလ့ၩခၫ့ဂၬမၫဆမံၭလၧနကၥ့ၪလဖၪ, လၧထံၫအလပီၩဒိၪလီၫ.
16 ယနါဂၧၫ့ဆၧတၭ, ယဝၭထိၬလၧယၥၭခံဖၧၩ့, ယနိၭဖျံၩဝၭလၧဆၧၥီၫအကၠီၩ့,
ဆၧအုၪဂဲၫနုၬလၧယဎွံၪဖၧၩ့,
ယဝၭထိၬလၧ ယလးဖၧၩ့,
လါနၫ့တၭ, ယမိန့ဆၧအီၪပွံၭ လၧဆၧခိဆၧဝီၩအမု နံၩအဖၧၩ့,
ထီးအထီ လၧၦခမျၧးလၧအမိဒုၭၥုၭလၧပၧၩယီၩ ဂဲၫ ထီၩ့ဝ့ၫလီၫ.
17 ချိၪ့ဒိၩ့အ့ၪလဖီၫထၪ့ဘၪလါနၫ့, ဆၧၥၪအ့ၪလအီၪဘၪ လၧစဘံၭမုအလီၩ့လါနၫ့, ၥံၪ့အလဲအိၫ့အၥၪအ့ၪလၩ့ဘၩ့လါနၫ့,
ဆၧအၪ့ဆၧအီၩ အ့ၪလအီၪဘၪ လၧမံၩ့လၬကျၩလါ နၫ့,
ၥိၪဒဲဘ့ၪအ့ၪလူၬဝ့ၫ လၧဖီၩ့ဖၧၩ့လါနၫ့,
ချီၥံၪအ့ၪလအီၪဘၪလၧတၩ့ခူၭဖၧၩ့လါနၫ့တၭ,
18 ယၥုၪ့မိထိၬယၥၭမိထိၬ လၧယဟိဝၩအဖၧၩ့, ယမိၥုၪ့ဎွံၫၥၭယီၫ လၧဆၧထိးထဲၩ့တၩ့ထဲၩ့ယၧၩ အယွၩအဖၧၩ့လီၫ.
19 ယဟိဝၩယကဆါမွဲယဂဲးယဘၭလီၫ. မၩယခၪ့ဘဲၫခံၫဘၩ့မိအခၪ့အၥိၭ,
ဒုၭလ့ၩယၧၩလၧယလးထၪ့ထီၫအဖၫ့ခိၪလီၫ.
လၧဆၧအခိၪအဂးအီၪလၧယနါဒံၩ့လီၫ.