7
Yhensain Dang thang thyet
1 Dari hwankti zainsmuh doq dah nyei vzvn, Kislev ge gau vkhyvp, nyei vnyeih lyis Yhensain ngos lyis loeus dyei.
2 Bethel dius jens gas, Sharezer,note 7.2 Hebre mas Sherezer Regem-Melek yahge nyamoq dah dius jens lyis, Yhensain dah shvmanh lyis dung yoeus das xiklyis Maukhung Jesphung Yhensain dah Yhenmuh pheh nhang kat goeus.
3 Nyamoq gas, phudyei bang yahge lvpe jens lyis haih nyeidang nyei das xiklyis eq nghuot. Yhenmuh dyoqbis gvng mas ngamoq nyoshoq zvn kuot los goeus zis yah dvyhangteh, oeng vkhyvp lyis womkyi zis yah tsoq kuk ngaus chah das lah, ge.
4 Heika ngah jyank mas jweh los dah Yhensain loeus nghuot.
5 Nyang taiq, hauh mau mas dius jens yahge phudyei bang lyis taiq aq: Nyamoq hai nyhetci zvn gyo lyis lhamhmuh oeng vkhyvp yahge nyhet vkhyvp lyis womkyi lha ngaus lyis, houka ngos lyis nyoqnho ngelang dyei zis ma nghuot.
6 Nyamoq zo shuk lyis houka nyamoq nyang dah nhaiqtap cho dvtsain nghuot.
7 Heika Yerusalem wusmuh yahge hauh yvmlhaink mas joq dah wus jens mas nyeisgis yap lhoq las, dius jens yah dyingh joq uhlyis, gohlhain dah lvpe jens lyis yah Yhensain taiq toh zis nghuot. Hauh uhlyis wusmuh yahge hauh yvmlhaink mas kyingh dius dyingh zis ma nghuot, mautyi pheh janggyon yahge buiswvng pheh jing khyei jens mas eq dius nyoshoq nyeis shih.
Domsyos Ma gyo las
8 Yhensain haih loeus Zekharia lyis dyei.
9 Gohlhain ngos ngah dius lyis haih tyingdang tsain dyei: lyi jus khyvlyis kuot las dvyuk yah dvyuk jyet kang cho yahge nhaiqnyen cho chixoeuq goh chah.
10 Chauhmuh, chauhlo, namoq mas nyeis dah lvbaus, nyungs bang hank lyis eq vzaiq goh. Dvyuk yah dvyuk lyis nos nhang dah nghamh toeuq cho vkuot goh.
11 Nghuot laus eq ngah dius jens gas nhaiqlom than lha no thoeu. Nyamoq dah uhnuk khomh tsain nyheih toh.
12 Nyamoq dah nhaiqlom lyis eq luk teh than nhang toh. Khasoeh ge lyis nyamoq gas gohlhain nyeis khoq, Dyos yah nhang dah lvpe jens lyis yah, ngos dyei toh dah jyauh cho lhyi ma mes gyo. Housoeh ngos svsoh nhaiqyo.
13 Ngos taiq lyis nyamoq ma gyo yvmvyah nyamoq shvmanh dung lyis ngos ma toeuh dyei.
14 Ngos nyamoq lyis lvbaus mau mas nyeis das zis lyeis jyang teh shenh tyamp goeus. Hai gis dah mau gas dius hank ma nyeis, jyamhjyuklhyuk nyet joq, ge.