2
Keq Twih Nyoqnyvng
1 Ngos gohtoeu nyoqnyvng mas, loq mas keq twih chi toh dah dius dvyuk lyis nyvng.
2 Ngos nyang lyis, Nvng khapheh loh, oen nyei lyis
nyang gas, Yerusalem wus khaxink xing, kha iq lywas zis seq shoq keq das zis los, ge.
3 Hauh thang lhyi ngos yah jisgoh dah loeuswons soeu xik pheh thuq los zis nyvng. gohtoeu loeuswons dvyuk nyang yah los xauhgoh.
4 Cangxeih vyuk gas hau gohtoeu dvyuk lyis, hau loyvm lyis loh wuih taiq aq: Yerusalem mas dius yahge gaunyhauq nyoshoq nyeis das las, hauh wus gas wus ciank kat das zis sunk kuh das, ge.
5 Yhensain ka hauh wus lyis gos das zis nyang wus yvmlhaink yah nyiciank duot las nyah phunk yah nyang houmha nyeis das, ge dangthoengh toh goeus.
Jonsdoeus bang Tauh los
6-7 Yhensain nyah dius jens lyis taiq. Ngos shot khanghmuh namoq lyis sanh tyamp. Nghuot laus eq namoq jonsdoeus loh bang eh, gvshih Babilon masyah phang luiq las Yerusalem mas tauh los geh.
8 Hank laus eq namoq lyis zan soeu ka ngos phauhtap toh yvlyis zan soeu nghuot. Housoeh las Maukhung Jesphung Yhensain ka nyah dius jens lyis thyoq loh goeus dah dius nyau jens jyank mas ngos lyis haih loeus yah dvgeh nhang.
9 Yhensain nyang namoq lyis tyi lha zan das. Namoq gas xikpheh namoq dah jyeidwis jens yah thyoq sanh zis xauh das. Haih zis bweh los lyis, Maukhung Jesphung Yhensain ngos lyis nhang kat zis yuk khanghmuh seq das.note 2.9 Hebre mas vjyuk ma bvng.
10 Yhensain taiq, Yerusalem dius jens eh, gauslaus chunghthwe kat geh! Ngos namoq mas nyeis das zis los nyeis.
11 Hauh shishenh lyis dius nyau jens nyoshoq Yhensain jyank mas los las nyah dius tsain duot das. Nyang namoq mas nyeis das las ngos lyis namoq jyank mas nhang zis namoq seq das.
12 Yuda mau gas gyingshang mau mas Yhensain dah lhyenwhei sain dah vso doms nghuot das. Yerusalem gas nyang jyet thank dah wus nghuot das.
13 Yhensain xikkhonh mas yuk khanghmuh samlo nyeis geh: khasoeh ge lyis nyang gas nyang nyeis gyingshang joqyos masyah los nyeis.