9
Dawi yahge Mephiboshet
1 Dvnyeih Dawi gas Saulo yhenbang dvyuk yuk vgyoh nyeis lo lah, ge nyei. Khasoeh ge lyis hauh bang lyis nhaiqnyen shohgyo das ge Yonathan lyis nyang dangthoengh dyei goeus.Ref 9.1: 1Sa 20.15-17
2 Ziba ge Saulo yhenbang dah jyeidwis dvyuk nyeis. Nyang lyis Dawi yhen mha khi los las hwankti nyang lyis nyei zis gas, Nvng Ziba nghuot lhyeh, ge lyis nyang gas, Nghuot, ge.
3 Hwankti taiq, Ngos Mangso dah nhaiqnyen shohgyo cho yoh chixoeuq das zis Saulo dah yhenbang dvyuk yuk ma nyeis lo lhyeh, ge.Ref 9.3: 2Sa 4.4
Ziba hwankti lhyi taiq zis gas, Yonathan lo khyei ma yangh soeu dvyuk nyeis shih, ge.
4 Housoeh las hwankti ka nyang lyis, Nyang khalhye nyeis, ge. Ziba hwankti lhyi taiq zis gas, Lo Deba wus, Amiel lo Makhi yhen mha nyeis, ge.
5 Housoeh hwankti ka Lo Deba wus, Amiel lo Makhi yhen mha shwih nhang kat.
6 Saulo dah nyeilo, Yonathan lo Mephiboshet gas Dawi jyank mas jweh lyis nyang svsoh gyuk zis yah paiq gop las taiq zis gas, Nah jyeidwis heimha nyeis, ge.
7 Nghuot laus eq Dawi gas nyang lyis, Vgyuk, ngos nvng lyis heimha khi kat zis gas, nah uwus Yonathan yah toh dah ngah dangthoengh gvng mas ngos nvng lyis yoh nhaiqnyen das xiklyis nghuot. Nah vphauh Saulo sain ku dah yos dvnganh ngos nvng lyis dyei das. Nvng ngos yah dvgeh haih hwankti yhen mha xauh nyeis das, ge.
8 Mephiboshet paiq las taiq, Ngos teh dah khuih shei dvdoeu lyis hwankti nhaiqnyen cho dyei vvng lah, ge.
9 Housoeh hwankti ka Saulo dah jyeidwis Ziba lyis khi lha taiq, Saulo yahge nyah yhenbang sain vvng zis dvnganh nah yhensain dah lo lyis ngos dyei.
10 Housoeh las nvng yahge nah lo jens, nah jyeidwis jens gas nyah yhenbang wom yoh das xiklyis hauh yos nyah xiklyis zwi dyei geh. Nghuot laus eq Mephiboshet gas ngos yah dvgeh haih hwankti yhen mha nyeis das, ge. Ziba gas loloeu dvci oeng yuk, jyeidwis aiqci yuk yoh.
11 Ziba hwankti lhyi taiq zis gas, Ngah yhensain hwankti zaudang khyoq zis yah dvyhangteh nah jyeidwis kuot das, ge.
Hauh shishenh masyah Mephiboshet gas Dawi dah lo dvyuk teh, vjangh Dawi yah dvgeh wom zo.
12 Mephiboshet mas Mikha ge dah loloeu lo dvyuk bos. Hauh uhlyis yah Ziba yhen mha nyeis bang dvnganh gas Mephiboshet dah jyeidwis jens nghuot.
13 Housoeh aiq khyei gonh ma yangh dah Mephiboshet gas hwankti yhen mha nyeis das xiklyis Yerusalem pheh dyung los.