7
Nathan Dawi lyis Loeus dyei
(1Ss 17:1-15)
1 Yhensain ka hwankti Dawi lhyi nyah yvmlhaink mas dah jes dvnganh masyah no toh nhang lha, nyang nyah yhen mha nyeis uhlyis,
2 hwankti lvpe Nathan lhyi taiq zis gas, Yoeuh aq, gvshih ngos gas arit thyeh yhen yungh mas xauh lungh nyeis, nghuot laus eq Mangso dah Kwi ka zvng gosseh khau mha dvnyeis, ge.
3 Nathan hwankti lhyi taiq zis gas, Nah nhaiqlom mas bos zis dvnganh kuot aq, Yhensain ka nvng yah nyeis, ge.
4 Hauh nyenh lyis Yhensain dah dang Nathan jyank mas jweh taiq zis gas,
5 Ngah jyeidwis Dawi lyis Yhensain heisoeh ge oen taiq aq. Nvng ngos nyeis das Yhenmuh tsuk das soeu ma nghuot das.
6 Israel jens lyis Egutu masyah shwih los masyah khvnyhik jweh shoq ngos yhenmuh mas ma lungh, zvng masyah dvcheh yenh.
7 Ngos Israel jens yah suh yenh dah joqyos dvnganh mas ngah dius Israel jens lyis shwih dah uhshe soeunoteUhshe soeu ge yvmas Hebre mas vkoq, ge bos. kha yuk lyis, Nvng ngah xiklyis arit thyeh yhenmuh chamus ma tsuk oen sang ku lah?
8 Housoeh las gvshih nvng ngah jyeidwis Dawi lyis heisoeh taiq aq. Maukhung Jesphung Yhensain taiq, Ngos nvng lyis nvng katjang mas nah yvng yoeuh nyeis yvng zungs loshang yoq lyis yah ngah dius Israel lyis guon das xiklyis khyen toh goeus.
9 Nvng khalhye loh khalhye ngos nvng yah loh las, nah jeswus dvnganh lyis nah xikkhonh masyah shang tyamp. Housoeh nyeisjvng thoq mas kuhxing thank uhshe bang teh ngos nvng lyis nyings hoeuh nhang das.
10-11 Ngos ngah dius Israel vjangh nyeis das mau sont toh dyei. Hauh mau mas nyamoq gas jesluiq las ma lop ma loeh xauh nyeis das. Hauh mau gas nyamoq dah mau sain nghuot das las xikpheh ngos ngah dius jens Israel lyis soetuon bang yah guon nhang uhlyis teh lhung dah gohnyau bang yah nyamoq lyis ma yoh zaiq lo das. Nvng lyis eq jeswus dvnganh dah loq masyah no nhang das. Nyang nah yhennotehwankti vkoq lhyi kuot toh das ge Yhensain nvng lyis taiq.
12 Nvng shei lhyi nah phauh thyeih moq yah nyhop das las, nah gungs mas yaus dah vnyau vshih dvyuk lyis hwankti toeuq toh zis yah nyah munghdan doengs nhang das.Ref 7.12: Chd 89.3-4, 132.11; Yoh 7.42; Lgy 2.30
13 Nyang gas ngah nyings xiklyis yhenmuh tsuk das. Nyah munghdan dah hwankti tank lyis vcaiq vto goeng nhang das.
14 Ngos gas nyah uwus duot las nyang gas ngah lo duot das. Nyang yobos kuot lyis ngos nyang lyis gohnyau lyis yah joeng nhang das.Ref 7.14: Chd 89.26-27; 2Kr 6.18; Heb 1.5
15 Nghuot laus eq ngos nah xikkhonh masyah xwih tyamp soeu Saulo masyah ngah nhaiqnyen cho yoeus tyamp teh nah lo masyah ma gang loh das.
16 Nah yhen yahge nah munghdan ngah xikkhonh mas vcaiq vto goeng joq das. Nah hwankti tank vcaiq vto goeng joq das.Ref 7.16: Chd 89.36-37
17 Nathan ka Dawi jyank doms loh las Yhensain taiq zis dvnganh Dawi lyis taiq kyoh.
Dawi Nhaiqshoqlang Sang
(1Ss 17:16-27)
18 Hwankti Dawi gas Yhensain xikkhonh mas wvng tsung lha vkyuh dung zis gas, Yhensain Mangso eh, ngos hank nghuot lah? Nvng ngos lyis heihweq shwih los zis gas ngah yhenbang ka cha nghuot lah?
19 Housoeh las gvshih Yomzains Yhensain eh, dvnganh thoq mas senhtyau nvng ngos lyis vcaiq vto hwankti vkoq dyei das ge taiq! Yomzains Yhensain eh, nvng yuk khanghmuh lyis heisoeh kuot lah? noteHebre mas ma bvng.
20 Ngos cha yoh taiq lo das lah? Nvng gas, nah jyeidwis nghuot dah, ngos lyis seq.
21 Nah dangthoengh gvng mas nvng o khyvlyis nah jyeidwis yoh seq das xiklyis heinyhoq dah kuhxing cho lhyi kuot dyei.
22 Housoeh yvmvyah Yomzains Yhensain eh, nvng gas kuhxing. Ngamoq no yah xauhgyo zis yah dvyhangteh nvng yah doeus dah Mangso, nvng mas lai las gohtoeu ma bos lo.
23 Nyeisjvng thoq mas Israel mau yah doeus dah mau kha mau lah? Mangso eh, nvng kha dius nyau lyis nvnyang dah dius nyau kuot das xiklyis jons duot masyah khyuot yoeus goeus lah? Nvng nah dius jens lyis Egutu mau masyah kyoeu kat zis yah nvng nah nyings kuhxing nhang. Nvng mauhphoh dah mauh loqmuh kuot las nyamoq loh cho mha pahkai dah dius nyau jens, mangso jens lyis khat tyamp dyei.Ref 7.23: Lyi 4.34
24 Nvng Israel lyis vcaiq vto nah dius kuot las Yhensain eh, nvng nyamoq dah Mangso duot goeus.
25 Gvshih, Yhensain Mangso eh, nah jyeidwis yah sen lha eq, nah jyeidwis dah yhen yah sen lha eq dangthoengh toh zis yah dvyhangteh kuot aq. Hauh zis gas vcaiq vto joq das dangthoengh nghuot zis yah dvyhangteh goeng toenk nhang aq.
26 Maukhung Jesphung Yhensain ka Israel thoq mas guon dah Mangso nghuot ge nyeisjvng gonh taiq das xiklyis nah nyings gas vcaiq vto chungh zis xauh bas jungh. Nah jyeidwis Dawi dah hwankti vkoq gas nah xikkhonh mas goeng joq bas jungh.
27 Israel dah Mangso, Yomzains Yhensain nvng gas, Ngos nah yhen - vcaiq vto hwankti vkoq - lyis tsuk das, ge nah jyeidwis lyis chixoeuq yvmvyah nah jyeidwis gas nah xikkhonh mas haih shvmanh womh dung.
28 Yhensain Mangso eh, nvng gas Mangso nghuot, nah dang eq jyoeng, hai gis dah cho nvng nah jyeidwis ngos lyis dangthoengh toh goeus.
29 Gvshih ngos yahge ngah yhen lyis nvng shvmanh das xiklyis nhaiqdoeus bas jungh. Housoeh lyis ngamoq dah hwankti vkoq gas nah xikkhonh mas vcaiq vto goeng joq das. Khasoeh ge lyis Yomzains Yhensain eh, nvng nah jyeidwis lyis shvmanh lyis, hauh zis gas vcaiq vto dah shvmanh nghuot.