20
Sheba gomloeus Toq
1 Benyamin vkoq Bikhri dah lo Sheba ge, soe lhoeuthuq soeu ka lvbuh muot las kaiq zis gas, Yamoq gas Dawi yah cheq ma sen. Yamoq gas haih Yese dah thang ma mes chank. Los geh, Israel dius jens eh, dvnganhmoq yhen pheh loh lo goh, ge.Ref 20.1: 1Hw 12.16; 2Ss 10.16
2 Housoeh las Israel jens gas Dawi lyis toh tyamp las Bikhri lo Sheba thang mha chank loh. Nghuot laus eq Yuda jens gas nyamoq dah hwankti yah dvgeh nyeis las Yodan lvng masyah Yerusalem jweh shoq nyang lyis pangh.
3 Hwankti Yerusalem wus hwankti yhen mha jweh lyis, nyah yhen zungh das xiklyis toh khoq dah nyah nyinhungh jens dvci yuk lyis zungh das bang eq toeuq toh las tsingtsam yvmas nyamoq lyis kyingh toh tyamp aq ge taiq shet. Nyamoq chah zis lyis yoeuh dyei aq, nghuot laus eq ngos nyamoq yah ma yhet lo, ge. Housoeh nyamoq yuk khanghmuh gas shei buisnyeis jweh shoq chauhmuh teh nyeis.Ref 20.3: 2Sa 16.22
4 Hauh thang lhyi hwankti ka Amasa lhyi taiq shet zis gas, Somh nyeih gyo lyis Yuda jesdvp lyis huom nhang lha hauh gyo lyis doms taiq los aq, ge.
5 Housoeh las Amasa ka jesphung lhyi loh khi huom laus eq nyang yoh dah buisnyeis 3 nyeih thoq lyis nyangh tyamp.
6 Housoeh Dawi Abishai lhyi taiq zis gas, Gvshih soe lhoeuthuq soeu Bikhri lo Sheba gas Absalom thoq lyis yau zes dyei das. Nyap mus aq. Nyang gas yang ma yoh nyhik dah wus goeng dvwus wus mas ma wvng loh shih lyis nvng ngah jesphung lhyi shwih las nyang lyis chank khat aq, ge.
7 Housoeh Abishai yahge Yoab gas Bikhri lo Sheba thang mha Yoab dah jesdvp masyah khyen toh bang yahge hwankti dah gungszungh jes jens yah dvgeh chank khat loh.
8 Nyamoq Gibeon mas dah lukmuh lom mas jweh lyis nyamoq jyank pheh uhxoeu lha los nyeis dah Amasa yah loh xauhgoh. Yoab gas nyah dyichih mas shamchonh dyvng eq chih tap toh dah jesgungs shuk chi. Nyang Amasa lhyi jeshuh das ge bes cheh lyis nyang tsoek yah shamchonh lyis nyah dyvng masyah she yoeus.
9 Yoab gas Amasa lhyi, Ngah vnoeuh eh, dvyangh lah, ge bvlot tanh das teh kuot las nyah loqyos loq yah Amasa dah nhuotmi lyis lang.
10 Amasa ka nyah loqpaih mas chi toh shamchonh lyis ma soh yoeuh lyis Yoab gas nyah womdau lyis hauh shamchonh yah thauh phuk, housoeh las nyah oeu dvnganh nyeisjvng mas gyoh loh.
Yoab ma tsank thauh lo noh, Amasa ka dvxa lhyi shei goeus. Yoab yahge wik Abishai ka nyang lains joq zis lyis toh khoq las Bikhri lo Sheba lyis tsoq las chank khat loh.
11 Yoab dah loyvm zau jens mas dvyuk ka Amasa dah jesphung lhyi, Namoq Yoab yahge Dawi shot nyeis bang nghuot lyis gas Yoab thang chank los geh, ge kaiq.
12 Nghuot laus eq Amasa ka chogungs nyah suih thomh mas lhain toh las, moqphung ka nyang lyis yoeuh das ge tsain huom toh zis lyis Yoab dah jeszau nyvng. Housoeh las nyang gas cho mhayah pa pheh nyang lyis she loh las nyah thoq mas thoq dyinoteCloak ge zis lainzain mas twih toh las kvtoq masyah lywas lywas wuot, dyiloq ma dap thoq dyi dvdung doeuh phomh toh dyei.
13 Amasa dah mvng, cho mha ma joq lo las, yuk khanghmuh gas Bikhri lo Sheba lyis nyhik das xiklyis Yoab yah dvgeh loh.
14 Hauh uhlyis Sheba gas Abel Bet Makha wus mas nyah vhuh BikhrinoteBikhri ge yvlyis Hebre mas gas Beri, ge bos. jens lyis tsainh das xiklyis Israel mau dvkhau yah chwang goeus.
15 Yoab dah jesphung jweh loh lyis, nyamoq gas Abel Bet Makha lyis zan las wusciank nghe pheh tsoh nhangh las hauh wusciank lains bas jungh ge vkhyei mha yah doeu xi loh.
16 Nghuot laus eq hauh wus mas dah joeui bos vmesbih dvyuk gas wus masyah Yoab lyis kaiq zis gas, Yoab! Gyo aq! Heimha los aq, housoeh lyis ngos nvng yah xauh jis goh das, ge.
17 Nyang hau vmesbih nvm mas jweh los lyis hauh vmesbih nyei zis gas, Nvng Yoab nghuot lhyeh, ge.
Nyang toeuh zis gas, Ngos nghuot, ge. \p Hauh uhlyis nyang taiq zis gas, Nah jyeidwis nyhiq dah dangkhonh lyis vlhomuh gyo dyei aq, ge.
Nyang eq, Ngos gyo nyeis, ge.
18 Housoeh nyang tsoq taiq zis gas, Gohlhain bang gyangh taiq lyis, nvng phyen-goh cho lhyi tamp mes lyis Abel wus mas joeui nyei aq, ge.
19 Ngos gas Israel mas nyenstap cho lhyi ngwis soeu yahge lomluk soeu dvyuk nghuot. Nghuot laus eq nvng gas Israel mas ungwes nghuot dah wus lyis mhont tyamp das ge cvvq nyeis. Yhensain yah sen zis lyis nvng chamus thyoq tyamp mes lah, ge.
20 Yoab gas, Ngos lyis jingh aq. Ngos nah wus lyis ma mhont.
21 Ngos o zis gas hwankti Dawi lyis gomloeus toq soeu, Ephraim boms mau mas dah Bikhri lo Sheba ge soeu lhyi dvnghuot. Nvng nyang lyis ngamoq lyis kyauh lyis gas ngamoq haih wus lyis nyenstap zis yah toh khoq das, ge.
Vmesbih phuk zis gas, Gis goeus. Ngamoq nyah uhloms lyis wusciank masyah nvng lyis doeuh khyoq dyei das, ge.
22 Hauh thang lhyi hauh vmesbih gas nyah joeui yah dvyhangteh dius jens jyank mas loh las nyamoq gas Bikhri dah lo Sheba dah uhloms thyet lholha Yoab jyank mas doeuh khyoq dyei. Housoeh las nyang lvbuh muot zis yah nyah jesphung lyis zan masyah khi tauh las, nyamoq dvnganh nyamoq dah yhen pheh tauh loh. Yoab eq Yerusalem, hwankti jyank pheh tauh loh.
Dawi Dah Zauguon jens
23 Yoab gas Israel jesphung dah zau zainsmuh nghuot. Yehoiada dah lo Benaia gas hwankti dah gungszungh zauzains nghuot.
24 Adoram gas jons jens lyis muh shwih zwi dah lvgungh zainsmuh nghuot. Ahilud dah lo Yehoshaphat gas mvnyei comh soeu nghuot.
25 Shewa gas hwankti yhen mha dah maussauh lhaih soeu nghuot. Zadok yahge Abiatha ka phudyei vzomh nghuot.
26 Yair wus mas dah Ira gas Dawi nyang dah phudyei soeu nghuot.