2
Dawi Yuda Hwankti Coeu Juot
1 Hauh thang lhyi Dawi Yhensain lhyi nyei yoeuh zis gas, Ngos Yuda wus dvwus wus mas vgis loh das lah, ge.
Yhensain nyang lyis taiq zis gas, Loh aq, ge.
Dawi gas, Khah wus mas loh das, ge nyei.
Yhensain ka, Hebron mas loh aq, ge.
2 Housoeh las Dawi gas houmha nyah yhensain nyhiq Yezrel lonyi Ahinoam yahge Khamel mas Naba dah chauhmuh Abigai nhaiqtang lhyi shwih las thuot loh.Ref 2.2: 1Sa 25.42-43
3 Nyang yah nyeis bang lyis eq nyamoq yhenbang yah dvgeh shwih thuot loh las Hebron wus nvm mas tsain nyeis.
4 Yuda jens gas Dawi lyis coeu juot las nyamoq dah hwankti toqh.Ref 2.4: 1Sa 31.11-13 Nyamoq Dawi lyis taiq zis gas, Yabesh Gilead bang gas Saulo lyis nyhop, ge.
5 Hauh uhlyis Dawi gas Yabesh Gilead mas loeuskyoh bang nhang lha taiq zis gas, Namoq gas namoq dah hwankti Saulo lyis hai nhaiqnyen cho chixoeuq las nyah mvng lyis nyhop dyei yvmvyah Yhensain dyei dah jyehjuh xauh kham yoeus bas jungh.
6 Yhensain ka namoq lyis nhaiqnyen cho yahge koptoq cho chixoeuq bas jungh. Namoq heisoeh kuot goeus las ngos eq namoq lyis jyehjuh tauh das.
7 Housoeh las gvshih namoq yomhuont las womh womh kuot geh. Namoq dah hwankti Saulo shei goeus. Yuda yhenbang eq ngos lyis nyamoq dah hwankti kuot das zis coeu juot dyei goeus.
Ishboshet Hwankti Bweh
8 Hauh gyo lyis Saulo dah jeszau, Ner dah lo Abna gas Saulo lo Ishboshet lyis Mahanaim mas shwih loh.
9 Nyang lyis Gilead, Yezrel, Ephraim, Benyamin, Asher maunoteAshermau lyis Hebre mas gas Asiria ge. mas tsain nyeis bang yahge Israel jens dvnganh dah hwankti kuot nhang.
10 Saulo lo Ishboshet gas nyang Israel lyis guon xi uhlyis nyeici zvn bos las, aiq zvn guon. Yuda yhenbang gas Dawi thang dvchank.
11 Dawi gas Hebron wus mas nyeis las Yuda jens lyis guon zis nyhet zvn lhamhmuh khyuk khyvp nghuot.
Israel yahge Yuda Vjo Jeszan
12 Housoeh Ner dah lo Abna yahge Saulo lo Ishboshet dah dius jens gas Mahanaim masyah Gibeon wus pheh loh.
13 Yoab dah ungwes gas Zeruia nghuot. Yoab eq Dawi dah dius jens yah loh las Gibeon thomhlo nvm mas nyamoq yah xauhgoh. Hauh thomh thyitvp haqtvp mas tsain tsung toh.
14 Hauh uhlyis Abna Yoab lyis taiq zis gas, Gvshih loyvm jens toq las yah xikkhonh mas zan khyank goh bas jungh, ge.
Yoab eq, Gis, ge.
15 Housoeh Saulo lo Ishboshet dah dius Benyamin vnyau dvci aiq yuk yahge Dawi dah dius jens dvci aiq yuk zan khyank goh das xiklyis los.
16 Nyamoq gas dvyuk yah dvyuk vsainnyang zan-goh soeu dah uhloms lyis tsop, moengsa yah nvmjaus mas thauh goh yvmas, dvlhain dvm lyis dvnganh dvgeh gyoh goeus. Housoeh las hauh Gibeon mas dah joqyos lyis Helkat HazurimnoteHelkat Hazurim gas Moengsa yosdvm ge. ge nyhink.
17 Hauh nyeih lyis zan-goh zis xungh las Abna yahge Israel jens gas Dawi dah dius jens xikkhonh mas shoeuh loh.
18 Houmha Zeruia dah lo somh yuk ge, Yoab, Abishai, Asahel moq tsain bos. Asahel dah khyei ka cvt teh nyap.
19 Asahel gas Abna lyis loqwi loqyos ma i chank khat.
20 Abna nungs pheh yoeuh las nyang lyis taiq zis gas, Nvng Asahel nghuot lhyeh, ge nyeis.
Nyang gas, Nghuot, ge.
21 Abna nyang lyis taiq zis gas, Nvng nah loqwi loqyos dvshot shot lhaiq las loyvm dvyuk yuk nyhik zis yah nyah dah kyonhkhyi yoeus aq, ge. Nghuot laus eq Asahel gas ma yoeuh, nyang lyis dvchank khat.
22 Abna Asahel lyis doms taiq, Ngos lyis vchank khat, tauh loh aq, ngos nvng lyis nyeisjvng mas chamus khyoq das. Ngos nah vmang Yoab dah nyoqnho lhyi khasoeh yoeuh das, ge.
23 Nghuot laus eq nyang ma tauh loh. Housoeh las Abna eq nyah lham yah lhain thauh lyis womdau mas lham thyoh wvng las nunghkhung pheh bangh thuq loh las Asahel houmha lains shei. Asahel lains shei yvthaq jweh bang dvnganh houmha yap joq.
24 Yoab yahge Abishai gas Abna lyis chank khat las Gibeon mhanhdyvp choyvm mas dah Gia joqyos mas dah Ama jing jweh lyis buis wvng goeus.
25 Benyamin dius jens gas Abna thang mha zain huom lha dvphung kyingh kuot las jing mas yap joq.
26 Abna gas Yoab lyis kaiq las taiq zis gas, Yang vjangh tsoq las zan-goh chah das lhyeh? Thang thank lyis kyik kyik dvkhoh das zis ma seq lhyeh? Ngamoq gas nah boekyis nghuot. Nah dius jens ngamoq lyis chank khat masyah tauh loh das xiklyis ma taiq khanyhank jweh shoq nyeis das lah, ge.
27 Yoab taiq zis gas, Mangso dwis nyeis zis yah dvyhangteh, nvng ma taiq lyis, dius jens gas nvpyo jweh lyis nyamoq vmang vnoeuh lyis khat yvmas yah dvno das, ge.
28 Housoeh las Yoab gas lvbuh muot kat. Dius jens eq tsain yap joq las Israel jens lyis ma chank khat lo, jes eq ma zan lo.
29 Abna yahge nyah dius jens gas dvnyens gonh pa mha suh las Yodan lvng goeu zis yah Bithron mau lai thang lhyi MahanaimnoteHebre mas dede ma nghuot. wus mas jweh loh.
30 Yoab eq Abna lyis chank khat mhayah tauh los. Nyang dius jens dvnganh lyis tsainh lyis Dawi dah dius dvci gau yuk yahge Asahel ma bos.
31 Dawi dah dius jens gas Benyamin jens yahge Abna dah dius jens somhxo khyukci lyis sat las shei goeus.
32 Yoab yahge nyah dius jens gas Asahel lyis Betlehem mas yoeus loh las nyah uwus dah lopkhyung mha nyhop. Hauh thang lhyi nyamoq dvnyens gonh suh las nyoq nyvng lyis Hebron mas jweh loh.