31
Saulo, Nyah Lo jens Shei
(1Ss 10:1-12)
1 Gilboa boms mas Philisti jens gas Israel jens lyis jeszan. Israel jens nyoshoq gas hauh boms mas sat zis xauh las hwankti Saulo yahge nyah lo somh yuk eq bos dah nyet bang gas phang loh.
2 Nghuot laus eq Philisti jens gas nyamoq lyis chank khat duons las Saulo dah lo jens mas somh yuk, Yonathan, Abinadab, Malkhishua moq lyis sat.
3 Hau jeszan cho ka Saulo xiklyis svsoh xungh los. Nyang lyis lyei baiq bang yah baiq las nyang dvm gvgis dap goeus.
4 Saulo nyah sham lham wons soeu lhyi taiq zis gas, Hai vthyoh ma tyomh bang ngos lyis los thauh shoeuhshih cho ma kuot bas jungh nah sham she lha ngos lyis thauh sat aq, ge. Nghuot laus eq nyah sham lham wons soeu ka svsoh gyuk las ma kuot. Housoeh las Saulo nyang sham yoeus las hauh thoq mas lains shei.
5 Nyah sham lham wons soeu Saulo shei zis nyvng lyis nyang eq nyah sham thung lha thauh shei zo.
6 Housoeh Saulo, nyah lo jens somh yuk, nyah sham lham wons soeu, nyah dius jens dvnganh gas dvnyeih dvm lyis dvgeh shei.
7 Israel jesphung phang cho yahge Saulo eq, nyah lo jens eq dye shei goeus cho Yezrel langhkhau thyitvp, Yodan lvng buisthuq tvp pheh nyeis dah Israel jens xauhgyo lyis nyamoq dah wus jens tyamp las tsain phang loh. Housoeh Philisti jens gas houmha los tsain nyeis.
8 Nungsnvp Philisti jens mvng lhuot das ge los lyis Saulo yahge nyah lo somh yuk dah mvng lyis Gilboa boms mas loh nyvng.
9 Nyamoq gas Saulo dah uhloms lyis thyet yoeus, nyah sham lham gos lyis khyuot las, phvra yhen yahge nyamoq dah dius jens jyank mas loeus hoeuh das xiklyis Philisti dvmau gonh mas loeuskyoh bang lyis nhang kat.
10 Nyah jes kyonhkhyi lyis gywes nyih Ashtarot yhenmuh mas toh: nyah gungs lyis gas, Betshan wusciank mas tap toh.
11 Philisti jens Saulo lyis housoeh kuot cho Gilead mas nyeis Yabesh dius jens xauhgyo lyis,
12 thoeuqzoe jens nyenh lyis toq las Saulo yahge nyah lo jens mvng lyis Betshan wusciank masyah yoeus las Yabesh mas ngheq tyamp.
13 Nyamoq dah shohyau lyis Yabesh wus tamarisk saiqzains khyei mha yoeus nyhop las nyhet nyeih womkyi.