29
Philisti Dawi lyis Peq
1 Gvshih Philisti jens gas nyamoq dah jesphung dvnganh Aphek mas tsainh toh. Israel jens eq Yezrel mas dah jeisthuq dwang nvm mas dvp thoeng toh,
2 Philisti hwankti oeng yuk gas dius dvxo dvp, dvkhyoengh dvp yah jens loh. Dawi yahge nyah dius jens gas thang mha Akhish yah dvgeh loh.
3 Philisti zau jens taiq zis gas, Haih Hebre jens heimha cha los kuot, ge. Akhish Philisti zau jens lyis toeuh zis gas, Nyang gas Israel hwankti Saulo dah zau, Dawi nghuot. Ngos yah nyangh shoq nyeis goeus. Nyang ngah jyank mas jweh masyah khvnyhik jweh shoq nyang mas yobos huon chank dvkoeuq eq ma bos, ge.
4 Philisti zau jens gas nyang lyis nhaiqyo las taiq zis gas, Haih soeu lhyi tauh loh nhang aq. Nvng nyang lyis toeuq toh dyei wus mas loh nyeis goeus jungh. Jeszan das zis nyang lyis ngamoq yah dvgeh vchank nhang. Jeszan yvmas, nyang yah jeswus shot dap das zis chiq chank bos. Nyang gas jeszan yvmas, yah shot masyah jeswus shot pheh phanh loh zis yah nyah yhensain yah nyang mehoq tamp das thoq lyis gohtoeu zes gis cho vbos lo lah?
5 Saulo sat zis khoengh soe, Dawi sat zis monssoe ge goh zoh lyis Israel vmesbih jens dvyuk dvphuk yhang goh zis gas haih soeu lhyi ma nghuot lhyeh, ge.Ref 29.5: 1Sa 18.7, 21.11
6 Akhish Dawi lyis khi lha taiq zis gas, Israel dah dwis nyeis Mangso mha ngos maukhi, nvng gas ngos nyvng ku gis thank dius jens mas soeu nghuot. Haih jeszan yvmas nvng lyis ngos yah dvgeh loh shwih zan mes. Nvng ngah jyank jweh los dvnyeih masyah gvshih jweh shoq ngos nvng mas yobos ma nyvng. Nghuot laus eq gohtoeu hwankti jens nvng lyis ma o.
7 Housoeh las nvng Philisti zau jens lyis nhaiq vyo nhang: nyenstap zis yah tauh loh aq, ge.
8 Dawi Akhish lyis taiq zis gas, Ngos ngah yhensain hwankti dah jeswus lyis ma loh zan shoq ngos cha cu? Nvng taiq zis yah dvyhangteh ngos nah jyank mas nyeis dvchank, khvnyhik jweh shoq ngos nah jyeidwis mas yobos cha ma nyvng lyis, ngos chamus nah jeswus lyis ma loh yoh zan das lah, ge.
9 Akhish Dawi lyis phuk taiq zis gas, Nvng gas ngah xikkhonh mas Mangso dah loeuswons soeu teh nghuot. Nghuot laus eq gohtoeu Philisti hwankti jens taiq lyis, Nvng ngamoq yah dvgeh jeszan yvmas ma yoh loh das, ge.
10 Housoeh las nvpyo noq yah toq las nvng yahge nah dius jens nyoq nyvng yah dvyih loh lo geh, ge.
11 Housoeh Dawi yahge nyah dius jens gas nvpsangh noq yah toq las Philisti mau pheh tauh loh. Philisti jens gas Yezrel pheh doq loh.