20
Yonathan Dawi lyis Pangh
1 Dawi gas Rama wuxom Naiot masyah phang lha Yonathan xikkhonh mas jweh loh. Ngos cha kuot goeus? Ngah yobos cha? Nah uwus ngah kang lhyi xo das zis gas, ngos nyah xikkhonh mas cha cu, ge Dawi nyei.
2 Yonathan nyang lyis taiq zis gas, Hauh cho ka ma nghuot goeus jungh, nvng ma shei, yoeuh aq ngah uwus gas ngos lyis ma taiq taiq soelo soezains cha eq ma kuot. Haih cho jyoeng lhyi ka ngos ma seq shoq chamus zauh toh das lah? Hauh zis ma nghuot, ge.
3 Dawi maukhi lha taiqnotemaukhi lha taiq, ge zis gas Hebre mas, Dawi doms nyhen, ge zis gas, Nvng ngos lyis nhaiqdoeus cho nah uwus top seq las, nvng nhaiqkuk das zis chiq yvmvyah, Haih cho nyang lyis vseq nhang goh, ge toh. Yhensain nyang nyeis, nvng eq dwis nyeis zis yah dvyhangteh, ngos yahge shei cho jo mas dvbes dvnghuot lo, ge.
4 Yonathan Dawi lyis taiq zis gas, Nvng cha o cha ngos kuot dyei das, ge.
5 Dawi Yonathan lhyi taiq zis gas, Yoeuh aq, nvpyo gas lhamhmuh canh nyeih nghuot las hwankti yah wom zo das xiklyis ngos jus mas ma tsung ma gis zis nghuot. Nghuot laus eq ngos pa mha somh nyeih tamh joq shih bah.Ref 20.5: Gyu 28.11
6 Nah uwus ngos ma bos zis soh lyis, Dawi dah yhenbang xiklyis zvn yau zvn dah phudyei buisnyeis jweh los las nyah wugungs Betlehem mas jenh loh bah ge tungh sang oen aq.
7 Hauh uhlyis nah uwus gas, Gis, ge lyis gas ngos jesluiq goeus. Nghuot laus eq nyang nhaiqyo lyis gas, nyang ngos lyis sat das zis cvvq nyeis oen soh aq.
8 Ngah maukhi toh dyenschangh eh, ngos lyis nhaiqnyen aq: yah aiq yuk Yhensain xikkhonh mas thanghchvp dvgeh toh goeus. Nah uwus lyis tyi lha ngos cu lhyi ka nvnyang loq yah ngos lyis sat aq. Ngos lyis nah uwus jyank mas chamus shwih loh das lah, ge.
9 Yonathan ka, Housoeh khanhamp eq ma nghuot. Ngah uwus nvng lyis sat das zis ngos jyoengh seq nghuot lyis gas, nvng lyis ma taiq zis bos das lah, ge.
10 Dawi Yonathan lyis taiq zis gas, Nah uwus nhaiqyo ma yo zis lyis ngos khasoeh yoh seq das lah, ge.
11 Yonathan Dawi lyis taiq zis gas, Los aq, pa mha loh goh, ge aiq yuk yah pa pheh e loh.
12 Yonathan Dawi lyis taiq zis gas, Yhensain, Israel dah Mangso kanghjyoeng duot bas jungh. Phvnaq nyeihyo, sangphoq nyeihyo haih shishenh lyis ngos ngah uwus nhaiqlom lap yoeuh lyis, nyang nvng lyis nyah nhaiqdoeus ge taiq nghuot lyis gas, ngos nvng lyis dang kyoh kat das.
13 Nghuot laus eq, ngah uwus nvng lyis nhaiqyo, sat mes cho ngos nvng lyis ma taiq kyoh, nvng nyenstap zis yah yoh loh shoq ngos ma kuot lyis, Yhensain ka ngos lyis sat bas jungh. Yhensain ka ngah uwus yah nghuot ku teh nvng yah eq nghuot bas jungh.
14 Ngos kang dwis nyeis dvchank Yhensain dah lomluk jyetdap cho yah ngos lyis nvng kuot aq. Ngos shei lhyi ka,noteSeptuagint Ngos shei lhyi ka, Hebre Ngos ma shei lyis ka
15 Yhensain nah jeswus dvnganh lyis mhont tyamp thang lhyi eq, ngah yhenbang lyis haih lomluk dah jyetdap zis yah kuot aq.Ref 20.15: 2Sa 9.1
16 Yah zomh dah dangthoengh gas goeng toenk joq bas jungh. Nvng dangthoengh ma jyoeng lhyi ka, Yhensain nvng lyis joeng bas jungh, ge.noteSonzoh ngis 15, 16 Hebre bvng bvng ma mus
17 Housoeh Yonathan ka Dawi lyis nyah gungs yah dvyhangteh jyetdap yvmvyah, nyang Dawi lyis jyetdap das ge dangthoengh doms tsank toh.
18 Tsai Yonathan Dawi lyis taiq zis gas, phvnaq nyeihyo gas lhamhmuh canh pwe nghuot, nah tank ngo joq das yvmvyah nvng ma nyeis zis seq das.
19 Nukphoq nyeihyo nyenhthang pheh nvng gyangh tamh joqyos mas loh las Ezel luknoteGis bweh maussauh luk boms: Hebre Ezel luk nvm mas langh nyeis aq.
20 Ngos toeuqkhom lhyi baiq teh nyo somh khvt hauh luk nvm mas baiq kat das.
21 Yoeuh aq, ngos ngah jyeidwis dvyuk lyis, Nyo e xo los aq oen nhang das. Ngos hauh jyeidwis lyis, Nyo nah vyvm mas nghuot, kui los aq oen lhyi ka nvng los aq: Yhensain dwis nyeis zis yah dvyhangteh nvng mas nyenstap goeus.
22 Nghuot ya, hauh nyo nvng lyis lai khoq goeus oen lhyi ka, nvng loh lo aq, Yhensain nvng lyis nhang kat goeus.
23 Yah zomh dvyuk yah dvyuk thoengh dah dangthoengh yah zomh jo mas vcaiq vto goengtoenk joq das xiklyis Yhensain zungh bas jungh, ge.
24 Housoeh las Dawi gas pa mas tamh joq. Lhamhmuh canh pwe mha hwankti ka wom zo das zis tsung toh.
25 Xikpheh teh hwankti ka tyoyvm nvm mas tsung. Abna gas Saulo vyvm mas tsung. Yonathan ka Saulo yah twi twi mha tsungnoteSeptuagint twi twi mha tsung: Hebre yap lha Dawi joqyos gas ngo joq.
26 Nghuot laus eq Saulo hauh nyeih lyis cha ma taiq. Dawi dvja ja chah hah das: nyang ma shang, pwe yah sen lha ma shang ge nghamh.
27 Nungs nyeih canh aiq vnyeih lyis Dawi dah joqyos ngo joq las Saulo nyah lo Yonathan lhyi taiq zis gas, Yese dah lo nyinaq eq khvnyhik eq wom ma los zo zis gas chamus lah, ge.
28 Yonathan Saulo lyis phuk taiq zis gas, Dawi Betlehem pheh loh das ge ngos lyis tungh sang.
29 Ngos lyis jenh loh nhang aq. Ngah yhenbang wus mas phudyei pwe kuot: ngah vmang ngos lyis houmha bos chah ge tying kat. Ngos nah xikkhonh mas nyoqnho yoh lyis gas, ngos ngah boekyis yah loh jenh xauhgoh bah ge sang. Housoeh las hwankti zo jus mas nyang ma los, ge.
30 Saulo ka Yonathan lhyi nhaiqyo las taiq zis gas, Nhaiqlom guih, gomloeus nyhiq dah lo eh, nvnyang eq, nvng lyis khoeu kat nah ungwes lyis eq xoqphuh nhang shoq nvng Yese lo shot dap nyeis zis ngos ma seq teh mus lhyeh?
31 Dawi kang dwis nyeis dvchank gas nvng haih munghdan dah hwankti ma yoh bweh. Gvshih dius nhang lha nyang lyis shwih los aq, nyang shei chah, ge.
32 Yonathan nyah uwus Saulo lyis phuk taiq zis gas, Nyang chamus shei chah? Nyang cha cu goeus, ge.
33 Saulo ka Yonathan lhyi lham yah guons. Housoeh las nyah uwus gas Dawi lyis sat das ge nghamh thyet toh cho Yonathan seq los.
34 Housoeh yvmvyah Yonathan nhaiq gis yo las, hau lohcanh aiq vnyeih womjus mas wom ma zo, toq loh. Nyah uwus nyang lyis xoq lhoeu phuh yvmvyah, nyang Dawi xiklyis nhaiqkuk.
35 Nungsnvp Dawi yah doengs goh toh shishenh lyis Yonathan ka loshang lo dvyuk shwih las pa pheh e loh.
36 Nyang nyah loshang lhyi, Wuih aq, ngos baiq kat nyo xo los aq, ge. Loshang lo wuih loh nyeis lyis nyang lyis lai shoq nyo dvkhvt baiq.
37 Yonathan baiq dah nyo gyoh yvmas loshang jweh lyis Yonathan chank kaiq zis gas, Nyo dvkhvt nvng lyis lai goeus ma nghuot lhyeh?
38 Lvnyap wuih aq vno nyeis, ge. Loshang eq nyo tsain kui lha nyah yhensain jyank mas los.
39 Nghuot laus eq loshang ka hauh cho cha eq ma seq: Yonathan yahge Dawi kyingh dvseq.
40 Yonathan ka nyah lyei yah nyo loshang lhyi dyei las, Wus vkhau mas chi wvng loh aq, ge.
41 Loshang loh khoq yah dvyih Dawi gas mautyinoteGis bweh maussauh luk boms: Hebre mautyi pheh yah toq thuq los zis yah nyeisjvng mas phvluk zomhgyuis las somh lhain dupaiq. Yonathan yahge Dawi gas dvyuk yah dvyuk bvlot tanh las ngaus. Dawi dah nhaiqngis nyoqyaus zis gas Yonathan thoq lyis zes.
42 Yonathan Dawi lyis taiq zis gas, Mangso ka nvng yah dvgeh nghuot bas jungh. Yhensain ka nvng yahge ngah jo mas eq, nah vnyau vshih yahge ngah vnyau vshih jo mas eq vjangh nyeis bas jungh, oen yah aiq yuk dangthoengh toh goeus, ge. Hauh thang lhyi Dawi loh lo. Yonathan ka wus vkhau mha wvng loh.