13
Philisti jens yah Jeszan goh
1 noteSaulo dah nyenhkyi yahge guon dah zvn jens lyis Hebre yahge Greek Jyomp maussauh mas ma bos.Saulo ka nyah nyenhkyi 30 zvn mas Israel hwankti duot las nyang Israel thoq mas nyeici aiq zvn guon.
2 Saulo ka Israel yukgis somh khyoengh khyen yoeus. Hou mhayah aiq khyoengh gas Mikmash yahge Bethel boms mas Saulo yah nghuot. Dvkhyoengh gas Benyamin dah Gibea mas Yonathan yah nghuot. Nyet bang lyis gas nyang yuk nyang toeu yhen pheh nhang kat.
3 Yonathan ka Geba mas Philisti jeszau lyis sat. Hauh loeus Philisti jens dvnganh xauhgyo. Hauh thang lhyi Saulo eq Hebre bang jyank loeuskyoh bang lyis nhang lha jeszan das xiklyis dvmau gonh lvbuh muot las khi.
4 Housoeh Saulo ka Philisti dvp lyis zan cho yahge Philisti bang gas Israel jens lyis hoeng cho, Israel jens dvnganhmoq xauhgyo. Housoeh las dius jens gas Giga mas Saulo jyank mas huom.
5 Philisti jens eq Israel jens lyis jeszan das ge lhyingh somhmons, nyang ji bang khyuk khyoengh, jeslo jens gas jyankyvm mas dah sihsho nyhoq nyo shoq huom lha Bet-awen buisthuq pheh Mikmash mas dvp thoeng toh.
6 Hauh thang lhyi nyamoq gas Israel jens lyis yomkat zan las Israel dius jens gas svsoh shohjyen zis xauh las yaukyenh los. Israel jens dvyhamh gas luk-uk, lukkhyung, yoszanh khyam, dwang mas tamh.
7 Hebre jens dvyhamh gas Yodan lvng thyitvp Gad yahge Gilead mau pheh loh.
Saulo ka Giga mas nyeis shih. Nyah thang chank bang dvnganh gas gyuk nvn.
8 Nyang Samuel lyis Samuel doengs toh vgus nyhet nyeih langh, nghuot laus Samuel Giga mas ma jweh los shih. Dius jens eq Saulo lhyi kyingh toh khoq las dyos sanh loh tyamp bah ge goeus.Ref 13.8: 1Sa 10.8
9 Housoeh las Saulo nyamoq lyis taiq zis gas, Ngah jyank mas ngheq dyei jyungshuk yahge nyenstap jyungshuk chi los geh, ge. Housoeh nyang ngheq jyungshuk phudyei.
10 Housoeh nyang ngheq phudyei cho dye loh nyeis lyis, Samuel jweh los. Saulo ka nyang lyis jeshuh das ge loh xauhgoh.
11 Nghuot laus eq, Samuel taiq zis gas, Nvng cha kuot goeus, ge.
Saulo toeuh zis gas, Dius jens ngos lyis kyingh toh khoq las dyos sanh loh bah ge goeus, nvng eq doengs toh shishenh lyis ma jweh los, hauh thoq lyis ma goh, Philisti jens eq Mikmash mas thoeng nyeis.
12 Housoeh las Philisti jens gas ngos nyeis dah Giga mas jes los zan das oen ngos nghamh las, ngos Yhensain lhyi ma shangphu shih oen nghamh las ngheq jyungshuk ngvnyang phudyei goeus, ge.
13 Samuel phuk zis gas, Nvng vkoh vpaq kuot goeus: nvng Yhensain, nah Mangso nvng lyis taiq toh dah tyingtoh dang lyis ma chank. Nvng chank ya, nyang gas nvng yahge nah vnyau vshih lyis Israel lyis vcaiq vto guon nhang das.
14 Nghuot laus eq gvshih gas nah guon cho ma tsoq loh lo das. Khasoeh ge lyis nvng gas Yhensain tying toh khyvlyis ma chank, Yhensain ka nyang o soeu lhyi xo lha nyah dius nyau lyis guon soeu kuot nhang das, ge.Ref 13.14: Lgy 13.22
15 Samuel gas Giga masyah toq las nyah gyung cho pheh loh. Nyet bang gas Saulo nyah jeslo jens jyank loh cho pheh chank loh. Nyamoq gas Giga masyah Benyamin mau mas dah Gibea wus pheh loh. Saulo nyah dius jens lyis suon lhyi khyukxo ko nghuot.
16 Saulo phvtang nyah lo Yonathan yahge nyamoq yah nghuot bang dvnganh gas Benyamin mau Gibea wus mas nyeis. Philisti jens gas Mikmash mas dvp thoeng toh.
17 Philisti dvp masyah thyoq zo bang somh phung thuq los las, dvphung ka Shua mau Ophra cho loh.
18 Dvphung ka Bet Horon cho loh; gohtoeu dvphung ka Zeboim langhkhau maukyo bangh loh dah mhanhdyvp cho loh.
19 Philisti jens gas, Hebre jens lyis sham lham vkuot nhang ge tung yvmvyah, Israel mau gonh mas sham bat soeu dvyuk eq xo ma nyvng.
20 Israel jens gas nyamoq dah khont-suh, khopmuh, wuzung, banlyenhnoteSeptuagint banlyenh; Hebre khont-suh swih chah lyis Philisti jens jyank mas e chah.
21 Wuzung swih phauh yahge tyanghchon soq phauh ngwis dvkyvp,noteMaussauh dvkhamh wuzung swih phauh ... dvkyvp: Hebre dede ma nghuot. khont-suh, khopmuh, swih phauh ngwis aiq kyvp nghuot.
22 Housoeh las jeszan buisnyeis lyis Saulo yahge nyah lo Yonathan mas lai las jeslo khayuk eq sham lham ma yoh.
23 Philisti jens gas jeslo dvphung lhyi Mikmash langhwuq mas zan das xiklyis dih toh.