7
Yhenmuh Kyauh
(1Hw 8:62-66)
1 Solomon shvmanh dye dung lyis maukhung mha dah nyi gyoh las ngheq phudyei yahge lomhxangh ngeh tyamp. Yhensain dah duk bvng phunk gas Yhenmuh mas dyingh joq.Ref 7.1: Lewi 9.23-24
2 Yhenmuh mas Yhensain dah duk bvng phunk yah dyingh joq yvmvyah phudyei bang houmha ma yoh wvng loh.
3 Hauh nyi maukhung mhayah gyoh los cho yahge Yhensain dah duk bvng phunk Yhenmuh mas dyingh joq zis Israel dius jens nyvng lyis, nyamoq hau luk nyhoeuh toh mas dupaiq las Yhensain lhyi chungh zis gas,
Nyang gas gis.
Nyah lomluk jyetdap cho vcaiq vto goeng joq, ge.Ref 7.3: 1Ss 16.34; 2Ss 5.13; Ezr 3.11; Chd 100.5, 106.1, 107.1, 118.1, 136.1; Yer 33.11
4 Hauh thang lhyi Solomon yahge dius jens dvnganh gas Yhensain xikkhonh mas lomhxangh tsain lainh.
5 Solomon gas noeulu 22,000, yvng 120,000 lomhxangh lainh. Housoeh hwankti yahge dius jens dvnganh gas Mangso dah yhenmuh wvng.
6 Phudyei bang gas nyamoq xiklyis toeuq toh dah joqyos mas yap joq. Lewi jens eq Yhensain dah lomluk jyetdap cho vcaiq vto goeng joq yvmvyah Yhensain lhyi chungh das nyhenshang hwankti Dawi kuot toh, toenk turiya bat zis yah Dawi dah Chungh Dang yhang. Phudyei bang gas Lewi jens dah twi twi dvshot mas lvbuh muot kat. Hauh uhlyis Israel dvnganh toq yap joq.
7 Hauh thoq lyis Solomon gas Yhenmuh xikkhonh, khyam gungs lyis Mangso lhyi kyauh las nyang houmha ngheq jyungshuk, yahge nyenstap jyungshuk, coeu tsain ngheq phudyei: khasoeh ge lyis nyang kuot toh dah thunk phon mha, hau ngheq jyungshuk zonoms shukphoh yahge coeu ma dye kih.
8 Solomon yahge Israel dius jens gas hauh thang lhyi nyhet nyeih tsoq las Israel vkoq dvnganh masyah los dah moqphung zainsmuh yah phunk pwe kuot. Nyamoq gas mautsung pheh Hamat langhwuq masyah, mautyi pheh Egutu lvng jweh shoq joqyos khanghmuh masyah jweh los bang tsain nghuot.
9 Nyhet nyeih top phon kyauh pwe kuot thang lhyi, tsai nyhet nyeih top phunk pwe doms kuot. Thang thank vnyeih lyis nyamoq gyingshang zophuom kuot.
10 Nungs nyeih, nyhet vkhyvp, aiqci somh vnyeih lyis Solomon gas dius jens dvnganh lyis nyamoq nyang yhen pheh pont kat. Yhensain ka Dawi, Solomon yahge nyah dius Israel jens mas kuot dyei dah jyehjuh gvng mas nyamoq gausyis.
Mangso Doms Nyvng Xoeuq
(1Hw 9:1-9)
11 Solomon gas Yhenmuh yahge hwankti yhen lhyi loq thang sau. Yhenmuh yahge nyah yhen kuot das ge nghamh toeuq toh zis dvnganh vlhomuh yoh dye kuot nyhuk.
12 Nyenh lyis Yhensain ka Solomon jyank mas thuq xoeuq las taiq zis gas, Nvng shvmanh dung dang ngos xauhgyo goeus. Ngos lyis lomhxangh lainh das joqyos khyvlyis ngos haih Yhenmuh lyis khyen yoeus goeus.
13 Ngos maukhung lhyi nyheih tyamp las mau ma wus nhang, nghuot ya hauh mau mas jyo lhyi mhont das xiklyis janghgyik lyis nhang, nghuot ya ngah dius jens mas yomh khyoq lyis,
14 ngah nyings yah lui toh dah ngah dius jens gas ehnyet nyhen mha gyoh zis yah ngah nyoqnho lhyi xo lha, shvmanh dung las, lhung cho lhyi jhank lyis, ngos maukhung mhayah gyo dyei das. Nyamoq dah yobos khyuot dyei las nyamoq maunyeis lyis yhoh dyei das.
15 Gvshih ngah nyoq phank las, haih joqyos mas shvmanh dung dang lyis ngah no kamp gyo das.
16 Khasoeh ge lyis ngos haih Yhenmuh lyis khyen lha gyingshang nhang goeus. Ngos vjangh haih joqyos lyis zungh das, gomh das.
17 Nvng ngos taiq toh zis dvnganh chank kuot las ngah lyi chank las nah uwus Dawi teh ngah xikkhonh mas lomluk nyeis lyis,
18 Israel vnyau mas nah vshih mas dvyuk tsoq tsoq guon nyeis das oen, ngos nah uwus Dawi lyis thanghchvp toh zis yah dvyhangteh ngos nah munghdan hwankti tank lyis doengs nhang das.Ref 7.18: 1Hw 2.4
19 Nghuot laus eq namoq gas chowhang lha, ngos namoq xikkhonh mas toh dyei dah ngah lyi, ngah tyingtoh dang lyis tyamp las gohtoeu phvra lyis paiq phuqsoe loh lyis gas,
20 Ngos dyei toh mau masyah, ngos nyamoq lyis vnyet masyah khuot tyamp das. Ngah nyings xiklyis ngos cheihshang toh dah haih Yhenmuh lhyi eq ngah nyoqlvtjvng masyah yoeus tyamp das. Gohnyau bang mas taiq yos sang khyangh, jwangh gus kuot das.
21 Gvshih haih Yhenmuh gas svsoh chungh chank bos, nghuot laus eq haih thang lhain, cho mha lai bang dvnganh gas mauh zis yah, Yhensain ka haih mau yahge haih Yhenmuh lhyi chamus heisoeh kuot au, ge lyis,
22 Egutu masyah nyamoq lyis shwih thuq los, Yhensain, nyamoq phauh thyeih moq dah Mangso lhyi tyamp zis yah, gohtoeu phvra thang chank las paiq phuqsoe loh yvmvyah, nyamoq thoq mas haih yaukyenh cho thuq los nhang ge phuk taiq das, ge.