36
Yuda Hwankti Yoahaz
(2Hw 23:30-35)
1 Hauh thang lhyi Yuda dius jens gas Yosia dah loloeu Yoahaz lyis khyen yoeus las hwankti duot das xiklyis Yerusalem mas coeu juot dyei.
2 Yoahaz nyenhkyi aiqci somh zvn bos lyis Yuda hwankti bweh los. Nghuot laus eq nyang lhamhmuh somh khyvp kyingh dvguon.
3 Hauh thang lhyi nyang lyis Egutu Hwankti Neko ka hwankti masyah khyoq tyamp. Neko ka Yuda jens lyis khoengh ngwis 7,500 paung yahge xing 75 paung sang.
4 Egutu hwankti Neko ka Yoahaz dah vmang Eliakim lyis Yuda yahge Yerusalem dah hwankti kuot las Yehoiakim ge nyings thaiq nyhink. Hauh thang lhyi Neko ka Yoahaz lyis Egutu pheh shwih loh.Ref 36.4: Yer 22.11-12
Yuda Hwankti Yehoiakim
(2Hw 23:36-24:7)
5 Yehoakim ka nyang hwankti bweh los uhlyis aiqci oeng zvn nghuot. Nyang Yerusalem mas dvci dvzvn guon khoq. Nyang gas Yhensain nyah Mangso dah nyoqlvtjvng mas ma gis zis kuot.Ref 36.5: Yer 22.18-19, 26.1-6, 35.1-19
6 Babilon hwankti Nebukhaneza gas Yuda mau mas nyhenh wvng los. Nyang Yehoiakim lyis nyhik las Babilon mau pheh Shamjvng yah she loh.Ref 36.6: Yer 25.1-38, 36.1-32, 45.1-5; Dan 1.1-2
7 Nebukhaneza gas Yhensain dah Yhenmuh mas joq dah zisyos dvkhamh lyis eq Babilon mau pheh yoeus loh las nyah hwankti yhen mha toh.
8 Yehoiakim guon yoq lyis bweh cho, nyah ma gis cho, nyang lyis tyi cho nyet shih goeu dvnganh lyis Israel yahge Yuda Hwankti jens dah Buk mas lhaih toh. Hauh thang lhyi nyah joqyos mas nyah loloeu Yehoiakhin guon khoq.
Yuda Hwankti Yehoiakhin
(2Hw 24:8-17)
9 Yehoiakhin ka nyang hwankti bweh los uhlyis dvci xet zvn nghuot. Nyang Yerusalem mas lhamhmuh somh khyvp dvci nyeih guon khoq. Yehoiakhin gas Yhensain nyah Mangso dah nyoqlvtjvng mas ma gis zis kuot.
10 Nungs zvn, zvn wvng zoh lyis Yehoiakhin lhyi hwankti Nebukhaneza yah Babilon pheh khi kat zis xauh. Hauh uhlyis Yhenmuh mas dah zisyos nyoshoq lyis eq Babilon mau pheh yoeus loh. Housoeh las Nebukhaneza gas Yehoiakhin dah phvlvt Zedekia lyis Yuda yahge Yerusalem mas guon das xiklyis hwankti toh.Ref 36.10: Yer 22.24-30, 24.1-10, 29.1-2, 37.1; Ezk 17.12, 13
Yuda Hwankti Zedekia
(2Hw 24:18-20; Yer 52:1-3)
11 Zedekia gas nyang guon xi uhlyis aiqci dvzvn nghuot. Nyang Yerusalem mas dvci dvzvn guon.Ref 36.11: Yer 27.1-22, 28.1-17
12 Nyang gas Yhensain nyah Mangso dah nyoqlvtjvng mas ma gis zis kuot. Yhensain nhuot masyah taiq soeu Lvpe Yeremia xikkhonh mas nyah nhaiqlom ma khyoq.
Yerusalem Gyoh cho
(2Hw 25:1-21; Yer 52:3-11)
13 Zedekia gas lomluk das ge Mangso dah nyings yah yangh, kyamptang (dangthoengh dyei) toh dah Nebukhaneza lyis eq tyi lha gomloeus toq. Nyang gas Yhensain, Israel Mangso jyank tauh loh das xiklyis he dah yau las nhaiqlom than vbusbih dvyuk nghuot.Ref 36.13: Ezk 17.15
14 Phudyei bang yahge dius jens dah uhshe bang dvnganh gas zes zes lomluk cho ma bos bweh los. Nyamoq gas vyvm vwi dius nyau jens dah ma jyoeng mangso lhyi paiq cho chank las Yerusalem mas joq Yhensain dah Yhenmuh gyingshang joqyos lyis ma phauh ma nyang kuot.
15 Nyah dius yahge nyah Yhenmuh lyis nhaiqnyen, ma dyoqbis nhang mes gvng mas Yhensain, nyamoq dah phauh thyeih moq dah Mangso ka nyah loeuskyoh bang lyis nhang lha nyamoq lyis vlhain lhain, puk las puk las zaih nhang goeus.
16 Nghuot laus eq dius jens gas Mangso dah loeuskyoh bang lyis jwangh, Mangso dah dang lyis neheqgoq kuot. Mangso nyah nhaiqlom dyis cho ma yoh zain toh lo shoq nyamoq gas lvpe jens lyis jwangh nyhap gvng mas phang tamh joqyos ma bos lo dah dyoqbis zainsmuh nyamoq jyank jweh los.
17 Housoeh Yhensain ka Babilon hwankti lhyi shwih kat las nyamoq lyis tyi. Babilonnote 36.17 Babilon ge zis Khade dius jens jens gas Yuda wotyamh jens lyis sat, Yhenmuh khau mha yangh chank khat. Nyamoq gas dius jens lyis nhaiqnyen cho ma bos, wotyamh yahge manglo, vbusbih yahge vmesbih, yanghzan bang yahge nos bang dvnganh lyis sat. Mangso ka nyamoq dvnganh lyis Nebukhaneza loq mas kyauh.Ref 36.17: Yer 21.1-10, 34.1-5
18 Hwankti ka Mangso dah Yhenmuh mas joq kyahsoe ngis, kuh dvnganh, Yhensain dah Yhenmuh yahge hwankti yhen mha joq phauhdap zisyos dvnganh lyis eq Babilon nyah yhen pheh yoeus loh. Hwankti loloeu jens dvnganh lyis eq nyang yah dvgeh shwih loh.
19 Nyang gas Mangso dah Yhenmuh lyis ngheq, Yerusalem wusciank lyis khyop, hwankti yhen dvnganh lyis ngheq las phauhdap zisyosnote 36.19 Phauhdap zisyos nghuot ya Yhenmuh phauhdap zisyos dvnganh lyis mhont tyamp dvnganh lyis tyeihsop mhont tyamp.
20 Dvyhamh nyet nyeis shih bang lyis eq Babilon mau pheh shwih loh las nyamoq gas Persia munghdan yombos los shoq Babilon hwankti yahge nyah loloeu jens dah jyeidwis bweh loh.
21 Housoeh las Yeremia lyis yah taiq dah Yhensain loeus dang nyuk los. Lvpe taiq toh zis yah dvyhangteh, thang thank lyis Yuda mau gas nyah Yuda No Buisnyeis lyis pyo nyeis, nyhetci zvn tsingtsam nghuot joq.Ref 36.21: Yer 25.11, 29.10
Kuru Yuda lyis Loh Nhang
(Ezr 1:1-4)
22 Persia Hwankti Kuru guon yoq cangxeih vzvnnote 36.22 Kuru dah cangxeih guon zvn gas B. C. 538 nghuot lyis, Yhensain ka Kuru dah ehnyet lyis haih taiq hoeuh cho lhaih las nyah munghdan gonh tyo kat das xiklyis nhauh kat las Yeremia dah lvpe dang nyuk nhang.
23 Haih zis gas Persia Hwankti Kuru taiq zis nghuot: Yhensain Maukhung dah Mangso ka nyeisjvng thoq mas dah munghdan dvnganh ngos lyis dyei goeus. Nyang gas Yuda mau Yerusalem mas nyah xiklyis Yhenmuh tsuk das zis ngos lyis toeuq toh goeus. Haih muh xiklyis Yhensain dah dius dvnganh gas Israel mau pheh tauh loh geh. Yhensain, namoq dah Mangso ka namoq yah dvgeh nghuot bas jungh, ge.Ref 36.23: Esa 44.28