21
1 Yehoshaphat gas shei lha Dawi dah wus hwankti lop mas nyhop zis xauh. Nyah joqyos mas nyah lo Yehoram guon khoq.
Yuda Hwankti Yehoram
(2Hw 8:17-24)
2 Yehoshaphat loloeu jens ge, Yehoram dah vnoeuh moq gas, Azaria, Yehiel, Zekharia, Azainahu, Mikhael yahge Shephatia moq nghuot.
3 Nyamoq dah uwus gas nyamoq lyis nyoshoq dah ngwis xing, phauhdap vyhang, Yuda mau mas dah ciankci wus jens jyungshuk dyei. Nghuot laus eq Yehoram gas lomons nghuot yvmvyah nyang lyis gas munghdan dyei.
4 Gvshih Yehoram gas nyah uwus dah munghdan lyis doengs nhang lha nyang yombos los lyis, vnoeuh moq dvnganh, Israel hwankti lo jens dvyhamh lyis sham yah sat.
5 Yehoram nyenhkyi somhci aiq zvn lyis hwankti bweh los las Yerusalem mas xet zvn guon khoq.
6 Nyang gas Ahab dah lonyi lyis yoeus yvmvyah, Ahab yhenbang teh Israel hwankti jens dah cho chank las Yhensain dah nyoqlvtjvng mas ma gis zis kuot.
7 Nghuot laus eq Yhensain ka Dawi dah hwankti vkoq lyis ma mes mhont tyamp, khasoeh ge lyis Yhensain ka Dawi yah thanghchvp kuot toh. Dawi dah vnyau vshih gas tsoq las vjangh guon das ge dangthoengh toh.Ref 21.7: 1Hw 11.36
8 Yehoram zaih lyis Edom bang gas Yuda dah vmingh lyis gomloeus toq las nyah dius lyis hwankti toh.Ref 21.8: Vpm 27.40
9 Housoeh las Yehoram gas nyah zau jens, jeslhyingh jens yah houmha loh. Edom dius jens gas nyang yahge nyah jeslhyingh zau jens lyis lhaink toh, nghuot laus eq nyenh lyis soeng soeng noq mauchuot dwang mas nyamoq yoh phangh luiq loh tyamp.
10 Edom jens gas Yuda dah yomsoq lyis khvnyhik jweh shoq gomloeus toq. Hauh yoq lyis Libna eq nyang guon cho lhyi gomloeus toq. Khasoeh ge lyis Yehoroam gas Yhensain, nyah phauh thyeih moq dah Mangso, lhyi tyamp.
11 Hauh thoq lyis nyang gas Yuda boms jens mas eq ma jyoeng dah mangso jens lyis paiq joqyos kuot toh las Yuda mau yahge Yerusalem mas nyeis bang lyis Yhensain lhyi cu dah yaunos kuot cho pheh uhshe.
12 Yehoram lyis lvpe Eliya maussauh lhaih huon lha taiq kat zis gas, Yhensain, nah phauh thyeih Dawi dah Mangso heisoeh ge: Nvng nah uwus, Hwankti Yehoshaphat suh cho, nah vphauh, Hwankti Asa suh cho ma chank.
13 Hauh gungsthaiq nvng gas, Israel hwankti jens dah yikhyoh chank las Yuda mau yahge Yerusalem wus mas nyeis Yuda dius jens lyis, Ahab yahge nyah thang mha hwankti kuot bang, Israel jens lyis Yhensain lhyi lom ma luk das cho pheh shwih yhangteh, uhshe goeus. Nvng gas nah thoq lyis gis dah nah vnoeuh moq lyis sat.
14 Yoeuh aq, Yhensain ka nah dius jens, nah lo jens, nah yhensain nyhiq jens yahge nah zisyos dvnganh thoq mas gyukphoh chiqjyen cho yah yobos dyei das.
15 Nah oeu ka dvnyeih dvnyeih thuq shoq nah womdau mas noslom yoh das, ge.
16 Housoeh Yhensain ka Philisti dius dvyhamh yahge Ethiopia yah ni dah Arab jens lyis Yehoram yah jes loh zan goh das xiklyis jyuonh kat.
17 Housoeh nyamoq gas Yuda mas los zan las hwankti yhen mha nyvng zisyos dvnganh, nyah lo jens, nyah yhensain nyhiq jens dvnganh shwih jons loh. Nyah lo jens mas lothank Yehoahaznote 21.17 Yehoahaz: Hebre mas Ahazia dah nyings gohtoeu dvkoeuq 22:1 mas lai las dvyuk eq ma nyet lo.
18 Hauh thang lhyi Yhensain ka hwankti lhyi ma yoh yhoh dah noslom yah yobos dyei.
19 Hwankti ka nyangh shoq nos las aiq zvn dyingh lyis nos changh las oeu thuq. Housoeh nyang svsoh nos las shei. Nyah dius jens gas nyang shei lhyi nyah phauh thyeih moq lyis teh nyi khat pwe ma kuot dyei.
20 Nyang somhci aiq zvn bos lyis hwankti bweh los las Yerusalem mas xet zvn guon khoq thang lhyi hank eq ma yu shei loh. Nyang gas Dawi dah wus mas xauh nyhop laus eq hwankti lop mas ma nghuot.