29
Yhenmuh Tsuk Jyungshuk
1 Hwankti Dawi moqphung gonh lyis taiq zis gas, Mangso khyen yoeus dah ngah lo Solomon gas ngis shih, thungh phuh cho nain. Nyang kuot chah muh gas svsoh kuh joq. Khasoeh ge lyis nyang tsuk das zis gas dius nyeis das hwankti yhen ma nghuot, Yhensain Mangso xiklyis Yhenmuh dvnghuot.Ref 29.1-2: 1Ss 22.5
2 Housoeh las Yhenmuh tsuk yvmas yhung das ngwis, xing, thunk, thyeq, saiq, phauhdap luk, ban thwang tap das xiklyis bvng dah luk vja ja yahge goli lyis ngos ngah yom dvnganh yah vbomsdom tsainh toh.
3 Hauh thoq lyis ngos Mangso dah Yhenmuh lyis nhaiq twih las ngvnyang dah zisyos masyah ngwis xing lhyi dyei goeus.
4-5 Ngos gas Yhenmuh tyoyvm mas tap das xiklyis yahge loqmuh dap bang kuot thuq das zisyos dvnganh xiklyis xing gyingh dvxo metrik tan yahge ngwis gyingh aiqxo nyeici metrik tan thoq lyis vlu dyei goeus. Gvshih ngah yikhyoh hank chank das lah? Khvnyhik mes dah ehnyet yah Yhensain lhyi vlu hank dyei das lah, ge.
6 Houlho lhyi uwus moq yhenbang dah uhjyung jens, Israel nyang koq nyang mas dah uhjyung jens, thoenkgus jesdvp mas dvkhyoengh thoq mas zau jens yahge dvxo thoq mas zau jens, hwankti dah muh mas yoeuh bang dvnganh gas mes dah ehnyet yah vlu dyei.
7 Hauh vlu gas Yhenmuh tsuk das xiklyis xing metrik tan 170 thoq pheh, ngwis metrik tan 340 thoq pheh, thunk jangh metrik tan 620 ko yahge 3,400 metrik tan thoq lyis nyo dah thyeq nghuot.
8 Phauhdap luk yoh bang hank eq Gershon vhuh Lewi dius, ziszom Yehiel loq cho yah Yhenmuh ziskwi mha kat toh.
9 Housoeh nyamoq yuk khanghmuh gas mes ehnyet, wontang ehnyet yah Yhensain lhyi jyungshuk xauh dyei yvmvyah gaus nyeis. Hwankti Dawi eq svsoh gaus nyeis.
Dawi Mangso lhyi Chungh
10 Housoeh las moqphung gonh xikkhonh mas Dawi Yhensain lhyi chungh zis gas, Ngamoq dah phauh thyeih, Yakop dah Mangso Yhensain eh, nvng gas vcaiq vto chungh cho xauh bas jungh.
11 Yhensain eh, kuhxing cho, yomsoq, phunk, ung cho yahge zauguon cho ka nah zis. Maukhung yahge nyeisjvng mas joq zis dvnganh nah zis. Yhensain eh, hauh munghdan nah zis. Khasoeh ge lyis, nvng dvnganh thoq mas zes soeu nghuot las ngamoq gvgis phauh nyang.Ref 29.11: Mat 6.13
12 Dis cho yahge nyoqnho ngelang nah jyank masyah los las nvng dvnganh lyis guon nyeis. Yomsoq yahge duot cho nah loq mas bos las dvnganh lyis yoh chunghtoq, yom yoh bos nhang.
13 Gvshih ngamoq dah Mangso eh, ngamoq nhaiqshoqlang oen, nah phunk bos nyings lyis chungh.
14 Nghuot laus eq ngah dius jens yahge ngos gas jyoengh nvng lyis chaeq ma yoh dyei, khasoeh ge lyis dvnganh gas nvng ngamoq lyis dyei dah jyungshuk dvnghuot. Hauh zis lyis ngamoq nvng lyis doms dyei zis dvnghuot.
15 Yhensain eh, nvng seq ngamoq dah caiq lyis phauh thyeih moq teh dyung thuq cho yahge boengh duot cho xauh. Nyeisjvng thoq mas ngamoq dah buisnyeis gas lai loh dah siyet teh dvnghuot las shei cho lhyi ma yoh phang.
16 Yhensain, ngamoq dah Mangso eh, nah gyingshang nyings lyis chungh das xiklyis yhenmuh tsuk das zis haih vyhang dvnganh ngamoq sont toh. Nghuot laus eq hauh zis gas nah jyank masyah los dah nah zis dvnghuot.
17 Ngah Mangso eh, nvng gas ungkhau lhyi shiyoeuh las dan yvlyis nhaiqdoeus zis ngos seq. Ngah ehnyet dan yvmas mes zis yah haih vyhang dvnganh dyei. Nah dius jens eq nyamoq dah jyungshuk lyis dyei mes zis yah gaus gaus yis yis dyei yvlyis ngos nyvng.
18 Ngamoq phauh thyeih Abraham, Isak, Yakop dah Mangso Yhensain eh, nah dius jens lyis nah domsyos vjangh gyo mes nhang aq. Nyamoq lyis nah wotwons dius vjangh duot nhang aq.
19 Ngah lo Solomon lyis nah tyingtoh dang dvnganh lyis domsyos gyo das xiklyis yahge hai ngos sont cho nghuot, Yhenmuh tsuk das xiklyis wontang nhaiqlom dyei aq, ge.
20 Hauh thang lhyi Dawi moqphung lhyi vmingh dyei, Namoq dah Mangso Yhensain lhyi chungh geh, ge. Housoeh las moqphung gonh gas Yhensain nyamoq phauh thyeih moq dah Mangso lhyi chungh, nyamoq gas Yhensain yahge hwankti lhyi dupaiq.
21 Nungs nyeih lyis Yhensain lhyi nyamoq ngheq phudyei xiklyis noeulu dvkhyoengh, yvnglus dvkhyoengh, yvngluslo dvkhyoengh she los. Nyamoq gas shukphoh jyungshuk yah eq, Israel dvnyau gonh xiklyis Mangso lhyi gohtoeu phudyei cho vbomsdom phudyei.
22 Hauh nyeih lyis nyamoq Yhensain dah xikkhonh mas gaus gaus yis yis zo shuk.
Housoeh nyamoq Dawi lo Solomon lyis aiq vlhain hwankti toq las, nyamoq dah uhshe soeu nghuot das xiklyis Yhensain xikkhonh mas coeu juot dyei. Zadok lyis gas phudyei muh mas toh.
23 Housoeh Solomon gas nyah uwus Dawi gungsthaiq hwankti bweh zis yah Yhensain dah hwankti tank mas tsung lha kuhxing los. Israel jens dvnganh gas nyah domsyos gyo.Ref 29.23: 1Hw 2.12
24 Uhshe bang yahge jeszau jens dvnganh, Hwankti Dawi dah loloeu jens dvnganh eq Hwankti Solomon o mha gyoh nyeis.
25 Yhensain ka Solomon lyis Israel dvnyau gonh dah xikkhonh mas khoek khoek chunghtoq las, xik lyis dah Israel hwankti khayuk lyis eq ma dyei ku dah nyeisgis yaplhoq cho yahge zauguon yomsoq dyei.
Dawi Guon cho Xom Toh
26 Housoeh Yese lo Dawi gas Israel dvnganh lyis guon khoq.
27 Nyang Hebron mas nyhet zvn, Yerusalem mas somhci somh zvn mulas nyang Israel thoq mas guon zis nyeici zvn nghuot.Ref 29.27: 2Sa 5.4-5; 1Ss 3.4
28 Dawi gas nyeisgis yaplhoq, zauguon yomsoq, nyoqnho ngelang bos zis yah mang las shei. Nyah joqyos mas nyah lo Solomon guon khoq.
29 Hwankti Dawi guon cho, vpom vthyoh dvnganh lvpe Samuel maussauh, lvpe Nathan maussauh, lvpe Gad maussauh mas lhaih toh.
30 Houmha nyang guon cho, duot cho, nyang mas, Israel mas, vyvm vwi munghdan mas bweh cho dvnganh bos.