21
Dawi Nyings Kui
(2Sa 24:1-25)
1 Satan ka Israel jens lyis yaukyenh cho xauh nhang mes las Dawi lyis Israel dius nyings kui das xiklyis jyonh.
2 Dawi Yoab yahge gohtoeu zau jens lyis taiq zis gas, Israel dvmau gonh dvthang mhayah dvthang jweh shoq loh las dius suon geh. Israel mau mas dius khanyhoq nghuot zis ngos seq mes, ge.
3 Yoab phuk taiq zis gas, Yhensain ka nyah vnyau lyis gvshih thoq lyis dvxo huon je los nhang bas jungh. Nghuot laus eq ngah yhensain hwankti eh, nyamoq dvnganh gas nah jyeidwis jens nghuot. Ngah yhensain haih cho chamus o? Israel jens lyis chamus cu nhang das lah, ge.
4 Nghuot laus eq hwankti dang gas Yoab dang lyis ung tyamp. Housoeh las Yoab Israel mau goms shoq loh las Yerusalem mas jweh los.
5 Yoab gas Hwankti Dawi lyis jesmuh yoh wons dah vbusbih jens Israel jens mas dvci dvsens, Yuda vkoq mas nyeisens nyhetmons bos cho loeus los dyei.
6 Yoab gas hwankti dang lyis ma xihhonh yvmvyah Lewi yahge Benyamin vkoq lyis ma bos suon kat.
7 Dawi kuot yvlyis Mangso nhaiq ma doeus las Israel jens lyis yaudyei.
8 Dawi Mangso lhyi taiq, Ngos haih cho kuot zis svsoh cu goeus. Ngos lyis yobos jenh khyuot dyei aq. Ngos svsoh koh dah muh kuot goeus, ge.
9 Lholhyi Yhensain Dawi dah lvpe Gad lyis taiq zis gas,
10 Ngos Dawi khyen yoeus das xiklyis somh ja nyang lyis dyei das oen loh taiq aq. Nyang khyen zis ngos kuot das, ge.
11 Gad Dawi jyank loh las Yhensain taiq cho loh taiq kyoh las nyang lyis nyei, Khah zis gah?
12 Somh zvn phanghkhauq gyoh dah yomh lah. Lhamhmuh somh khyvp nvng lyis nah jeswus dah jesphung yah chank khat cho lah. Nah Israel mau gonh mas Yhensain dah sham ge, Yhensain dah loeuswons soeu yah somh nyeih langyomh khyoq las mhont das cho lah? Ngos Yhensain lhyi khasoeh toeuh das lah, ge.
13 Dawi Gad lyis taiq zis gas, Ngos ehnyet svsoh nyo. Yhensain dah nhaiqnyen cho ka kuh las ngos lyis nyah loq khau mha gyoh nhang bas jungh. Ngos lyis cangsoeu dius dah loq mas ma jweh nhang bas jungh, ge.
14 Housoeh Yhensain ka Israel thoq mas langyomh khyoq las nyamoq mas nyhetmons shei tyamp.
15 Mangso ka Yerusalem wus lyis mhont das zis loeuswons soeu lhyi nhang, nghuot laus eq nyang nhaiqlom thaiq las loeuswons soeu lhyi, Geh goeus, nah loq yop aq, ge. Loeuswons soeu eq Yebusi dius Arauna dah thanjang nvm mas yap joq.
16 Dawi yoeuh kat lyis, Yhensain dah loeuswons soeu ka Yerusalem thoq mas sham yings zis yah maulvt mas yap joq yvlyis nyvng. Housoeh las Dawi yahge logis jens gas, yanghthung dyi wuot las nyeisjvng mas tsain paiq gop joq.
17 Dawi vkyuh dung zis gas, Dius suon dah vmingh dyei zis ngos dvnghuot. Lhung dah muhzains kuot shuot soeu ka ngos nyang nghuot. Hai shohjyen bang cha cu goeus lah? Yhensain lhyi Mangso eh, nah loq gas ngos yahge ngah yhenbang lyis tyi aq, nah dius jens lyis vjenh joeng, ge.
18 Yebusi dius Arauna dah thanjang mas Yhensain xiklyis phon ci das zis Dawis lyis taiq das cho loeuswons soeu ka Gad lyis taiq.
19 Dawi gas Gad taiq zis yah dvyhangteh Yhensain dah domsyos gyo.
20 Arauna yahge nyah loloeu nyei yuk gas thangjang mas sunghso bat nyeis. Nyamoq hauh loeuswons soeu lhyi nyvng lyis loloeu jens gas loh phang tamh joq.
21 Hwankti Dawi los nyeis yvlyis Arauna nyvng lyis nyang gas thanjang masyah loh las Dawi lyis dupaiq.
22 Dawi Arauna lyis taiq zis gas, Nah thanjang ngos lyis jenh ungh dyei aq. Hauh langyomh yoh shang tyamp das xiklyis ngos houmha Yhensain xiklyis phon ci das. Ngos nvng lyis hauh xiklyis mon yih dah phauh dyei das, ge.
23 Arauna Dawi lyis taiq, Ngah yhensain hwankti o khyvlyis kuot bas jungh: yoeuh aq, ngheq dyei jyungshuk xiklyis noeulu jens eq, thangh kuot das zis gukbat kyahsoe eq, zonoms jyungshuk xiklyis sunghso eq dvnganh dyei, ge.
24 Hwankti Arauna lyis taiq zis gas, Ma nghuot, phauh gyoh nyhoq ngos wis das. Yhensain lhyi phudyei das xiklyis ngos nah vyhang ma yoeus das. Phauh ma gyoh dah ngheq dyei jyungshuk eq ma phudyei das, ge.
25 Housoeh Dawi gas Arauna lyis xing kyvp khyukxo laiq dyei las hauh joqyos wis.
26 Dawi gas houmha Yhensain xiklyis phon ci lha, ngheq dyei jyungshuk, nyenstap jyungshuk phudyei. Nyang shvmanh dung las Yhensain ka phon thoq mas dah phudyei ngeh das xiklyis maukhung mhayah nyi khyoq kat zis yah Dawi lyis toeuh.
27 Yhensain ka loeuswons soeu lhyi, Sham lhyi dyvng mas cank aq, ge lyis nyang domsyos gyo.
28 Yhensain ka Yebusi dius Arauna dah thanjang mas nyang lyis toeuh dyei zis lyis hauh uhlyis Dawi nyvng lyis, nyang hauh joqyos mas phudyei.
29 Paiq joqyos nghuot dah mhanhdyvp mas Moshe kuot, Yhensain nyeis dah zvng yahge phudyei phon ka hauh shishenh lyis Gibeon dah jing thoq mas joq.
30 Nghuot laus eq Dawi gas, Gibeon mas Mangso lhyi ma womh loh paiq, khasoeh ge lyis nyang Yhensain dah loeuswons soeu sham lhyi gyuk.