CHUNGH 92
Chungh dah Chunghthwe
1 Yhensain eh, nvng lyis nhaiqshoqlang sang das zis kha iq gis!
Nyhang Thank Mangso eh, nvng lyis nyoqnho ngelang dyei cho chungh das.
2 Nvp yau nvp nah mathank magons jyetdap cho lhyi kyoh das,
nyens yau nyens nah wontang cho lhyi kyoh das.
3 Twih bos dah toenk khvlhank yahge
gyomes toenklo yah chungh gis.
4 Yhensain eh, nah yomzains muhzoh gas ngos lyis gaus nhang lha,
nvng kuot khoq goeus yvmvyah ngos gauslaus cho chungh.
5 Yhensain eh, nah muhzoh kha iq kuh joq!
Nvng nghamh cho svsoh noq.
6 Hauh cho ka koh soeu ma yoh seq,
ma yik soeu ma seqgyo.
7 Lhung bang mhanh teh tuot los das,
ma jus zis kuot bang ung los mvbeh
nghuot laus eq nyamoq gas dvnganh dyoqbis das.
8 Nghuot laus eq Yhensain eh, nvng gas vcaiq vto nyhang joq soeu nghuot.
9 Yhensain eh, nah jeswus jens shei das,
lhung bang dvnganh eq somh loh das zis ngamoq seq.
10 Nvng ngos lyis noeuphuk lu teh yombos nhang,
nvng ngos lyis pyo cho shvmanh dyei.
11 Ngos ngah jeswus somh loh zis nyvng,
lhung bang ngaus thwe eq xauhgyo.
12 Dan soeu ka dyoms zains teh yoh yuk las
Lebanon boms mas dah arit zains teh kuh nyhang los das.
13 Houka Yhensain dah yhen mha tsungh toh dah saiqzains teh nghuot,
houka Mangso dah yhenmuh mas yuk yungh joq.
14 Houka nyenhkyi kuh laus eq nyamoq vshih shih,
yangh zis yah vjangh nyaus joq.
15 Hauh zis gas Yhensain ka dan, ge chixoeuq.
Ngos lyis gos soeu, nyang mas shuot cho ma bos.