CHUNGH 89
Yaukyenh lyis, ChunghthweRef 89 Dangjyung: 1Hw 4.31
1 Yhensain eh, ngos nah mathank magons jyetdap cho lhyi vjangh chunghthwe kat das.
Ngos nah wontang cho lhyi vcaiq caiq taiq hoeuh das.
2 Nah jyetdap cho ka vjangh goeng joq das zis ngos seq,
nah wontang cho ka maukhung joq teh joq.
3 Nvng taiq, Ngos khyen toh soeu yah ngos thanghchvp chvp las,
ngah jyeidwis Dawi lyis dangthoengh toh.
4 Nah vshih gas vjangh hwankti nghuot das;Ref 89.4: 2Sa 7.12-16; 1Ss 17.11-14; Chd 132.11; Lgy 2.30
ngos nah hwankti nyau lyis vcaiq caiq gomh toh das, ge. (Selah)
5 Yhensain eh, maukhung ka nvng kuot toh dah mauhphoh cho lhyi chunghthwe kat;
gyingshang bang gas nah wontang cho lhyi chunghthwe tsain kat.
6 Maukhung mha Yhensain teh zis hank ma bos;
maukhung mha nyeis bang nvng yah hank ma yoh byi.
7 Gyingshang bang dah huom ka nvng lyis gyukwoms.
Nyamoq dvnganhmoq nvng lyis gyukwoms zis yah toq yap.
8 Maukhung Jesphung Yhensain Mangso eh, nvng teh yom hank ma bos.
Yhensain eh, nvng gas dvnganh yvmas wontang.
9 Yomsoq bos dah thomh lyis nvng guon nyeis.
Hauh jeisphauq toq lyis nyang tam nhang.
10 Nvng dam Rahab lyis thungh thyi lha sat.
Nvng nah yomzains yom yah nah jeswus jens lyis ung tyamp.
11 Maukhung yahge nyeisjvng gas nah zis nghuot.
Nvng mungkvn yahge houmha dah vyhang dvnganh yvlyis kuot toh.
12 Nvng mautsung, mautyi lhyi gvnkhanh toh.
Tabor yahge Hermon boms gas gaus zis yah nvng lyis chunghthwe kat nyeis.
13 Nvng gas kha iq yomsoq bos lah!
Nah yom kha iq kuhxing lah!
14 Nah munghdan gas dan cho yahge lyi jus yvmas vpom kuot toh.
Nvng kuot cho dvnganh mas jyetdap cho yahge wontang cho chixoeuq nyeis.
15 Nah nhaiqnyen cho dah bvng yvmas nyeis bang,
nvng lyis chunghthwe kat las paiq dah dius jens kha iq pyo lah!
16 Nah gvng mas nyamoq dvnyeih gonh gauslaus nyeis.
Nyamoq nah dah gis cho gvng mas nvng lyis chungh nyeis.
17 Nvng nyamoq lyis ung cho zainsmuh dyei.
Nah jyetdap yvmas ngamoq lyis ung nhang.
18 Yhensain eh, nvng ngamoq lyis gos das soeu khyen dyei.
Israel dah gyingshang Mangso, nvng ngamoq lyis hwankti dyei.
Mangso Dangthoengh Toh
19 Gohlhain nvng nah lomluk jyeidwis jens lyis nyoqnyvng masyah taiq zis gas,
Ngos nyings hoeuh dah jeslo dvyuk lyis pangh goeus.
Dius jens masyah ngos khyen yoeus toh soeu lhyi hwankti tank dyei goeus.
20 Ngos ngah jyeidwis Dawi lyis Ref 89.20: 1Sa 13.14; Lgy 13.22; 1Sa 16.12
gyingshang coeu juot dyei zis yah hwankti kuot.
21 Ngah yom gas vjangh nyang yah nghuot das,
ngah yomsoq gas nyang lyis yombos nhang das.
22 Nyah jeswus nyang lyis khanhamp eq ma yoh ung das.
Lhung bang nyang lyis ma ung das.
23 Ngos nyah jeswus lyis thungh thyi das,
nyang lyis hoeng bang dvnganh lyis sat das.
24 Ngos nyang lyis jyet das, dang jings das.
Ngos nyang lyis vjangh ung nhang das.
25 Ngos nyah munghdan lyis Mediteranean Thomh masyah
Uphrat Lvng jweh shoq jyeq kat dyei das.
26 Dawi gas Mangso lhyi, Nvng ngah uwus, ngah Mangso nghuot;
ngos lyis gos dyei soeu yahge
ngah khyuot yoeus soeu nghuot, ge.
27 Mangso taiq zis gas, Ngos nyang lyis ngah yukgis loxeih kuot das,Ref 89.27: Nyoq 1.5
hwankti jens dvnganh mas kuh thank Soeu kuot das.
28 Ngos nyang lyis dyei toh dangthoengh vjangh tyink.
Nyang yah chap toh thanghchvp vcaiq vto joq das.
29 Nyah hwankti vnyau maukhung joq teh doengs das;
nyah diusjangh caiq gas vjangh hwankti nghuot das.
30 Nghuot laus eq nyah diusjangh caiq ngah lyi lyis domsyos ma gyo,
ngos tying toh khyvlyis kang ma dwis lyis gas,
31 Ngos shet toh khyvlyis ma kuot,
ngah tyingtoh dang lyis ma chank lyis gas,
32 Ngos nyamoq dah yaunos xiklyis joeng das.
Nyamoq kuot cho gvng mas shanghsenh nhang das.
33 Nghuot laus eq ngos Dawi lyis jyet cho ma doms,
nyang yah toh dah dangthoengh ma katkhyoq das.
34 Ngos gas nyang yah toh dah thanghchvp ma thyoq das,
ngos nyang yah toh goeus dah dangthoengh dvkoeuq eq ma thyoq das.
35 Ngah gyingshang nyings yoeus las dvlhain dangthoengh toh goeus zis gas,
ngos Dawi lyis khanhamp eq ma hwah das.
36 Nyah diusjangh caiq vjangh joq das,
buis tso nyeis dvchank ngos nyah munghdan lyis yoeuh gomh dyei das.
37 Houka maukhung mha wontang kanghjyoeng lhamhmuh teh,
goeng joq das, ge. (Selah)
Hwankti Somh Loh las Kuk
38 Nghuot laus eq nvng khyen toh hwankti lhyi nhaiqyo.
Nvng nyang lyis peq tyamp toh.
39 Nvng nah thanghchvp thyoq las,
nah jyeidwis dah buismuk lyis phvlhau boms mas khyoq toh.
40 Nvng nyah wusciank lyis thyoq khyoq las,
nyah thoenkgus jesdvp dyoq gyoh joq.
41 Houmha suh lai bang dvnganh nyang yah sen zis khauh loh.
Nyah yhenkyoh bang dvnganh nyang lyis yis dyei.
42 Nvng nyah jeswus jens lyis ung nhang.
Nvng nyamoq dvnganhmoq lyis pyo nhang.
43 Nvng nyah kyonhkhyi lhyi yhung pvjus mus nhang lha
jeszan yvmas nyang lyis somh nhang.
44 Nvng nyah zau lhamloq yoeus tyamp dyei las
nyah hwankti tank lyis nyhen mha khyoq tyamp dyei.
45 Nvng nyang lyis shishenh ma jweh shih lyis mang nhang lha
nyang lyis xoqphuh nhang. (Selah)
Khyuot kat aq Ge Dung
46 Yhensain eh, nvng vcaiq vto tamh joq lo das lah?
Nah nhaiqyo cho nyi soeh khanhamp jweh shoq ngeh nyeis das lah?
47 Ngah kang kha iq lyung zis lyis soh dyei aq:
Nvng ngamoq dvnganhmoq lyis seq shei khyvlyis gvnkhanh toh yvlyis soh dyei aq.
48 Ma shei shei hank yoh nyeis?
Dius gas nyang lop mas ma gyoh shoq hank yoh kuot lah? (Selah)
49 Yhensain eh, gohlhain nah jyetdap cho cangxeih kyink cho khalhye loh goeus?
Nvng Dawi lyis dangthoengh toh zis khapheh loh goeus?
50 Ngos nah jyeidwis laihwangh cho khasoeh xauh yvlyis eq,
Lvbaus yah ngos lyis nhoengh zis khasoeh xauh kham yvlyis eq vtohnyhik dyei.
51 Yhensain eh, nah jeswus jens nvng khyen toh hwankti lhyi laihwangh.
Nyang khalhye loh khalhye laihwangh.
52 Chungh cho ka Yhensain jyank mas vcaiq vto joq bas jungh.