CHUNGH 77
Yomgyau lyis Nhaiqtaink
1 Ngos Mangso lhyi kaiq ngaus,
ngos kaiq ngaus lyis nyang xauhgyo dyei.
2 Ngos chiqjyen shishenh lyis ngos Yhensain lhyi dung;
dvnyens yah ngah loq toeu lha shvmanh dung laus eq ngos nhaiqtaink cho ma yoh.
3 Ngos Mangso lhyi nghamh lyis ngos soqmuh nyhank;
nghamh suon yoeuh nyeis lyis yomgyau zis soh. (Selah)
4 Nyang ngos lyis dvnyens gonh gying nyeis nhang;
ngos svsoh chiq las dang ma yoh taiq.
5 Ngos lai loh goeus buisnyeis yahge
gohlhain dah zvn lyis nghamh yoeuh nyeis.
6 Ngos noq noq nghamh yoeuh zis yah nyenh ku;
ngos nghamh suon yoeuh las ngvnyang nyeizo zis gas,
7 Yhensain ngamoq lyis vjangh phe toh das lah?
Ngamoq lyis khanhamp eq nhaiq ma doms doeus lo das lah?
8 Nyang ngamoq lyis jyet cho no toh goeus lah?
Nyah dangthoengh ma doengs joq lo lah?
9 Mangso ka nhaiq ma soh nyen lo lhyeh.
Nyang nhaiqyo zis yah nyah nhaiqnyen cho nyheih tyamp lo das lah. (Selah)
10 Housoeh ngos gas, ngos lyis nos nhang thank zis gas haih zis nghuot,
Mangso ka cha ma kuot dyei lah, oen.
11 Yhensain eh, ngos nah kuhxing muhzoh lyis soh das.
Gohlhain nah mauh loqmuh lyis ngos doms soh das.
12 Ngos nah muhzoh dvnganh yvlyis suon yoeuh das;
ngos nah yomzains muhzoh dvnganh lyis suon yoeuh das.
13 Mangso eh, nvng kuot cho dvnganh gas gyingshang.
Ngamoq Mangso teh kuhxing dah mangso ma bos.
14 Nvng gas yomsoq muh kuot dah Mangso nghuot.
Nvng dius nyau jens mas nah yomzains chixoeuq.
15 Nvng nah yomsoq yah nah dius jens lyis khyuot yoeus;
Houka Yakop yahge Yosep dah dius jangh caiq nghuot. (Selah)
16 Mangso eh, jeis gas nvng lyis nyvng lyis tsain gyuk:
jeisnyaus thomh eq tsain nvn nyeis.
17 Jyommauh gas mau huot khyoq,
maukhung mhayah maujau jau las,
maunyoq eq shot khanghmuh nyik loh.
18 Nah maujau thwe ka buk thuq los las,
maunyoq nyhik zis eq mungkvn lyis pank dyei;
nyeisjvng eq nvn las dwis nyeis.
19 Nvng jeisphauq chank suh los las noq dah thomh lyis goeu thyet,
nghuot laus eq nah khyeiyos ma yoh nyvng.
20 Nvng nah dius jens lyis Moshe yahge Aron lyis yah
yvng phung lhyi teh shwih los.