CHUNGH 7
Lyi jus Cho Dung
1 Ngah Yhensain Mangso eh, ngos nvng lyis khau.
Ngos lyis chank khat bang dvnganh masyah lhuiq las khyuot yoeus aq.
2 Ma nghuot lyis gas, ngos lyis hank ma yoh kyoeu yvmas shwih loh las
khangkhyi teh ngat chingh tyamp das.
3 Ngah Yhensain Mangso eh, ngos dvyuk yuk lyis kuot shuot las,
4 Ngah dyenschangh lyis phanhlyen zis yah ngah jeswus lyis soe ma bos yvmas thyoq zo,
ngos haih zis dvja ja kuot nghuot lyis,
5 Jeswus gas ngos lyis chank khat duons las,
nyang ngos lyis sat bas jungh, nyeisjvng mas ngah mvng joq bas jungh. (Selah)
6 Yhensain eh, nhaiqyo zis yah toq aq;
ngah jeswus jens nhaiqyo yvlyis tauh dyei aq,
soh los las ngos lyis pangh aq;
lyi jyoeng cho ka nvng tying toh goeus.
7 Dius jens dvnganh lyis nah vwi vyvm mas shwih los las
nyhang mhayah hauh bang lyis guon aq.note 7.7 Guon aq ge zis Hebre mas, nyamoq thoq mas tauh dyei aq, ge.
8 Yhensain ka dius nyau dvnganh dah soetuon soeu nghuot.
Yhensain eh, ngos mas yobos ma bos zis nvng seq las ngah dan cho yah dvyhangteh ngos lyis soetuon aq.
9 Nvng gas dan dah Mangso nghuot lasRef 7.9: Nyoq 2.23
ngamoq dah nghamh cho yahge omes cho lhyi soetuon dyei.
Ma gis bang dah lhung cho lhyi tomp tyamp las, gis bang lyis phauh shangh dyei.
10 Ngah gos gas ehnyet zungh bang lyis khyuot yoeus dah
Nyhang thank Mangso nghuot;
11 Mangso ka dan dah soetuon soeu nghuot las,
lhung bang lyis vjangh yobos dyei.
12 Nyamoq dah cho ma thaiq lyis gas nyang moengsa swih las,
nyah lyei thung lha cicont kuot toh.
13 Nyang gas yoh shei nhang dah kyonhkhyi cvvq las;
nyi duk nyeis dah nyo yah yings toh.
14 Lhung soeu ka ma gis zis nghamh las
ung mha mhuih jyomh cho wons toh zis yah hwah cho lhyi khoeu kat.
15 Nyang dwang doeu toh las,
nyang doeu dwang mas nyang gyoms.
16 Nyamoq kuot dah ma gis cho ka nyamoq lyis joeng los.
Nyamoq lhuotzo cho eq nyamoq lyis zangh los.
17 Nyah dan cho gvng mas, ngos Yhensain lhyi nhaiqshoqlang oen das.
Nyhang thank Yhensain dah nyings lyis chunghthwe kat las chungh das.