CHUNGH 63
Mangso yah Ni Mes
1 Mangso eh, nvng ngah Mangso nghuot, ngos nvng lyis soh nyeis.
Ngah dyos nvng lyis o mes nyeis zis gas jeis ma joq las kyuk dah mhanhdyvp mas jeis shet teh nghuot.
2 Ngos nvng lyis gyingshang joqyos mas nyvng bas jungh.
Nvng kha iq yomzains bos zis yahge kha iq phunk bos yvlyis nyvng nhang aq.
3 Nah mathank magons jyetdap zis gas kang thoq lyis zes joq yvmvyah,
ngos nvng lyis chungh das.
4 Ngos dwis nyeis dvchank ngos nvng lyis nhaiqshoqlang chungh das.
Ngos ngah loq toeu lha shvmanh dung das.
5 Ngah dyos zo jo las nhaiqtap,
gausyis lvkhyank yah chunghthwe kat las ngos nvng lyis chungh das.
6 Houka ngos ngah yhetyos mas nvng lyis soh las
ngos nvng lyis dvnyens yah nghamh yoeuh nyeis.
7 Khasoeh ge lyis nvng ngos lyis vjangh pangh soeu nghuot yvmvyah
ngos nah dungs buisshen mha gauslaus chunghthwe kat das.
8 Ngah dyos nvng lyis lang toh las,
nah loqyos loq ngos lyis gomh dyei.
9 Ngah kang lhyi mhont das zis xo bang gas,
shei mau mas gyoh loh das.
10 Nyamoq sham mha gyoh das,
womkhuih dah shoh tsain duot das.
11 Hwankti ka Mangso mha gauslaus das;
Khasoeh ge lyis Mangso nyang lyis ung cho dyei.
Mangso dah nyings yoeus las dangthoengh toh soeu hank laus eq gauslaus das:
nghuot laus eq hwah bang dah nhuot lyis gas nyheih tyamp das.