CHUNGH 37
Dan bang Vso Vlho, Lhung bang Yonh cho
1 Nvng ma gis zis kuot bang gvng mas vchiqh,
lyi ma chi muh kuot bang lyis vnoh.
2 Nyamoq gas kyuk goeus dah mhanh teh lvnyap dyuk tyamp das,
nyhauh loh dah vzains teh shei loh das.
3 Yhensain lhyi loms las gis gis kuot aq.
Hauh mau mas nyeis las jesluiq bas jungh.
4 Nah gaus cho lhyi Yhensain mha xo aq,
housoeh lyis nyang nah ehnyet mas omes zis lyis dyei das.
5 Nah cho Yhensain lhyi kyauh aq:
nyang lyis eq loms aq, nyang nvng lyis pangh das.
6 Nyang gas nah dan cho lhyi nyeihgungs dah buis teh bvng nhang das.
7 Yhensain jyank mas ehnyet xing xing langh aq;
lhung khyvlyis kuot las yoh bweh los zis yahge,
ma gis cho khaujeini las ung los bang gvng mas ehnyet vnyo.
8 Nhaiq vyo, chiqh eq vchiqh.
Hauh zis gas, yau cho pheh dvshwih loh.
9 Lhung bang khat tyamp zis xauh das.
Yhensain lhyi loms nyeis bang gas nyeisjvng lyis xauh sain das.
10 Ma nyangh lyis lhung soeu dyuk loh das.
Nvng, nyang lyis xo laus eq ma nyvng das.
11 Ehnyet nyens bang nyeisjvng lyis xauh sain lha,Ref 37.11: Mat 5.5
nyeisgis yaplhoq las nyenstap das.
12 Lhung soeu ka dan soeu lhyi ma gis khyvlyis lhaink las
hoeng zis yah nyoqtyi yoeuh nyeis.
13 Nghuot laus eq Yhensain ka nyamoq monh lo bah ge zis nyvng yvmvyah,
14 Lhung bang gas shohjyen bang yahge
nyungs bang lyis sat das ge, nyamoq dah sham she.
Jus zis kuot bang lyis sat das ge, lyei tsain thung.
15 Nghuot laus eq nyamoq nyang sham yah nyamoq shei bas jungh,
nyamoq lyei eq gyau tyamp das.
16 Dan soeu dvtsiq yoh zis gas
Lhung soeu magons magoh yoh thoq lyis zes phauhdap.
17 Khasoeh ge lyis, lhung bang dah yomsoq lyis thyuk dyei zis xauh das,
dan bang lyis gas Yhensain gos toh dyei.
18 Yhensain ka nyah domsyos gyo bang lyis gomh toh dyei.
Nyamoq dah mau vso vcaiq vto joq.
19 Yau shishenh lyis nyamoq ma shanghsenh das,
phanghkhauq lyis tham shoq yoh das.
20 Lhung bang gas shei das;
Yhensain dah jeswus gas, mhanhdyvp mas dah banbuh teh dyoq dyuk das.
Nyamoq nyikhauh teh bi dyuk das.
21 Lhung soeu ka jyeih las ma doms cap;
dan soeu ka dyei zis yah nhaiqnyen cho chixoeuq.
22 Nyah shvmanh yoh bang gas nyeisjvng lyis xauh sain das.
Nyang nhoengh zis xauh bang gas thyet tyamp zis xauh das.
23 Yhensain ka dius lyis nyang loh vvng dah cho chank shwih loh.
Nyang lyis nhaiqdoeus bang lyis gos toh dyei.
24 Yhensain ka nyamoq lyis pangh yvmvyah,
nyamoq lains laus eq jyah lains joq das zis ma nghuot.
25 Ngos kang dwis zis nyangh las gvshih gas mang goeus;
nghuot laus eq dius gis lyis Yhensain yah doeuh tyamp toh zis ma nyvng,
nyah lo jens dungzo zis eq ma nyvng ku.
26 Nyang vjangh nhaiqnyen las jyeih dyei:
Nyah lo jens gas shvmanh zis xauh.
27 Ma gis yvlyis jhank aq,
gis zis kuot lyis nah vnyau vshih houmha vcaiq vto nyeis.
28 Yhensain ka lyi jus yvlyis ngwis las,
nyah lomluk bang lyis ma she tyamp toh. Nyamoq lyis vjangh gomh toh.
Nghuot laus eq lhung bang dah vshih gas thyet tyamp zis xauh das.
29 Dan bang gas maunyeis lyis xauh sain lha,
houmha vcaiq vto xauh nyeis das.
30 Dan soeu dah nhuot gas joeui dang taiq,
nyah lhyo lyi jus zis taiq nyeis.
31 Nyah Mangso dah lyi gas nyah nhaiqlom mas bos;
nyang hauh zis yah khanhamp eq ma gang loh.
32 Lhung soeu ka dan soeu lhyi
sat das zis xo lha zungh yoeuh nyeis.
33 Yhensain ka nyang lyis nyah loq mas ma toh dyei khoq,
lhung soeu soetuon zis xauh lyis nyang gas dang thang thyet zis xauh bas jungh.
34 Yhensain lhyi loms toh las nyah tyingtoh dang chank aq;
hauh munghdan nvng lyis dyei zis yah nvng lyis chungh das:
nvng hauh lhung bang lyis thyet tyamp zis nyvng das.
35 Lhung soeu ka yoh zau las,
nyang gas yuk khanghmuh thoq mas zau las Lebanon mas yuk dah arit zains teh nghuot.
36 Nyang lai loh goeus las, yoeuh aq, nyang ma nyvng lo.
Ngos nyang lyis xo laus eq ma nyvng.
37 Dius gis lyis comh toh aq, ehnyet zungh soeu lhyi yoeuh toh aq:
Nyenstap soeu ka vnyau vshih bos.
38 Nghuot laus eq, cu bang dvnganh gas dvlhain dvm lyis dyoqbis tyamp das;
nyamoq vnyau vshih jens eq thyuk zis xauh das.
39 Yhensain ka dan bang lyis khyuot yoeus las,
chiqjyen shishenh lyis nyamoq lyis gos toh dyei.
40 Yhensain ka nyamoq lyis pangh las khyuot yoeus:
Nyamoq gas nyang lyis loms nyeis yvmvyah,
nyang nyamoq lyis lhung bang masyah khyuot yoeus.