CHUNGH 31
Mangso lhyi Loms, Dung Dang
1 Yhensain eh, nvng ngos lyis gomh dyei das nyhenshang, ngos nah jyank mas los;
ngos lyis khanhamp eq vsomh loh nhang;
Nvng gas dan dah Mangso nghuot las ngos lyis jenh khyuot yoeus aq, oen dung.
2 Ngos dung dang gyo dyei las ngos lyis gvshih jenh khyuot yoeus aq.
Ngah khaugus duot las ngos lyis gos toh dyei aq.
Ngah Jesdvp duot las ngos lyis khyuot yoeus aq.
3 Nvng gas ngah khaugus yahge thoenkgus jesdvp nghuot.
Nvng ngos lyis dangthoengh toh zis yah dvyhangteh ngos lyis cho shwih she dyei aq.
4 Nvng gas ngah khaugus nghuot.
Ngos lyis nyamoq thung dah lhyik masyah lhuiq kat aq.
5 Ngos gas nvng gomh toh yvmas nyeis;Ref 31.5: Luk 23.46
Yhensain eh, nvng gas wontang dah Mangso nghuot las,
ngos lyis khyuot yoeus das.
6 Nvng gas ma jus mangso jens lyis paiq bang lyis hoeng.
Ngos gas Yhensain lhyi dvloms.
7 Nah mathank magons jyetdap cho gvng mas ngos gaus das, gauslaus das.
Ngos khamzo cho lhyi nvng nyvng; ngos yau cho lhyi nvng seq.
8 Nvng ngah jeswus ngos lyis ma nyhik nhang.
Nvng ngos lyis loh mes yvmas loh nhang.
9 Yhensain eh, ngos yau nyeis yvmvyah ngos lyis nhaiqnyen aq;
ngos nyo ngaus las ngah nyoqjeih nyung goeus; ngos nyungdaus nyeis.
10 Ngos kuk zis yah nyungdaus nyeis, ngaus cho ka ngah kang lhyi lyung loh nhang.
Ngos yau cho bos gvng mas yomnhuk loh.
Ngah shohyau yangh yom loh.
11 Ngos gas ngah jeswus jens, zes las ngah yhenkyoh jens dah nyhap joqyos duot las,
ngos yah seqgoh bang ngos lyis gyuk:
nghe pheh nyamoq ngos lyis nyvng lyis tsain phang loh.
12 Ngos gas shei soeu lhyi teh, tohnyhik zis xauh,
ngos gas gwi dah yamjvp teh nghuot.
13 Nyoshoqmoq loeusmus zis lyis ngos xauhgyo las, gyukphoh zis gas yvmlhaink yah nghuot joq:
nyamoq ngah cho xamgoh las ngah kang yoeus tyamp das zis joeui da.
14 Nghuot laus eq Yhensain eh, ngos gas nvng lyis loms:
Nvng ngah Mangso nghuot.
15 Ngos gas vjangh yah nvng gomh toh yvmas nyeis.
Ngah jeswus jens yahge ngos lyis shoeuhshih bang dah loq masyah khyuot kat aq.
16 Nah jyeidwis thoq mas nah nyoqnho bvng joq bas jungh,
nah mathank magons jyetdap cho mha khyuot yoeus toh aq.
17 Yhensain eh, ngos nvng lyis lui; ngos lyis xoq vphuh nhang.
Lhung bang lyis xoqphuh nhang aq; nyamoq lyis shei mau mas samlo gyoh loh nhang aq.
18 Khwank las lhoq lhoq teh, dan bang lyis dius ngis khyoq las
hwah bang gas samlo nyeis bas jungh.
19 Nvng lyis phauh nyang bang xiklyis nvng gomh toh dyei dah vyhang gis gas kha iq mauhphoh nghuot lah!
Yuk khanghmuh nvng kha iq gis zis seq. Nvng lyis loms bang lyis kha iq gau shoq gos toh dyei!
20 Nvng nyamoq lyis dius jens dah khaujeini masyah, nah xikkhonh gau joqyos mas shung toh;
nvng nyamoq lyis nyamoq dah jeswus ma phauh gis kuot masyah nah dah gau joqyos mas shung toh.
21 Ngos lyis lhaink las zan zis xauh uhlyis nyang ngos lyis kha iq mauhphoh jyetdap cho chixoeuq!
Yhensain ka ngelhoq bas jungh:
22 Ngos gas, nyang ngos lyis nyah xikkhonh masyah khat tyamp goeus oen nghamh gyuk nyeis.
Nghuot laus eq ngos nyang lyis pangh cho dung lyis nyang ngos dung dang gyo yoeus dyei.
23 Yhensain dah lomluk bang eh, nyang lyis jyetdap geh:
Yhensain ka lomluk bang lyis gomh nyeis:
khwank soeu lhyi ka mon yih nyhoq yobos dyei.
24 Yhensain lhyi nghamhloms nyeis bang dvnganhmoq eh,
yombos geh, womh womh kuot geh.