CHUNGH 18
Dawi Ung Los Chunghthwe
1 Ngah yom nghuot dah Yhensain eh,
2 Yhensain ka ngah luk-uk, ngah thoenkgus jesdvp, ngos lyis lhuiq kat soeu nghuot;
ngah Mangso ka ngah luk-uk,
nyang lyis ngos khau nges toh.
Nyang gas ngos lyis gos yhangteh gomh toh,
ngos lyis luiq shoq gos las gomh toh.
3 Chungh mon dah Yhensain lhyi ngos lui las, ngos lyis ngah jeswus loq masyah khyuot yoeus.
4 Shei cho dah gudwvng zis gas ngos lyis lhaink toh las,
dyoqbis cho ka jeisphauq teh ngos lyis nghop toh.
5 Shei cho dah gudwvng zis gas ngos lyis lhaink toh,
ngah xikkhonh mas shei dah lhyik thung toh.
6 Chiqjyen yvmas ngos Yhensain lhyi lui las ngos lyis pangh das xiklyis ngah Mangso lhyi kaiq sang.
Nyang ngah thwe lhyi nyah yhenmuh masyah xauhgyo las,
ngos kaiq sang dang nyah no mas wvng goeus.
7 Hauh uhlyis maunyeis dwis las nvn nyeis.
Boms dah vpom vyang eq nonh nyeis:
Nyang nhaiqyo yvmvyah hauh zis nvn nyeis.
8 Nyah nho mhayah nyikhauh thuq las,
nyah nhuot masyah ngeh jom nyilhyam yahge nyigywe ngeh nyeis.
9 Hauh uhlyis nyang gas maukhung phank las gyoh los;
jyommauh noq gas nyah khyei o mha tsain joq.
10 Nyang Kherubim mas ji las dang, lyeis yah dang.
11 Nyang lyis chuot zis yah gos nhang toh.
Jeis noq yahge maukhung mha dah jyommauh puk gas nyang lyis zvng teh yvmlhaink toh.
12 Nyah xik mas bvng zis yahge nyah jyommauh puk masyah
gyutomp eq nyijyenh eq zvn nyeis.
13 Hauh uhlyis Yhensain ka maukhung mhayah maujau jau kat.
Nyhang Thank Soeu ka nyah thwe nyhink kat.
14 Nyang jeswus lyis nyo baiq zis yah khat sanh;
Maunyoq nyoshoq nyik kat zis yah nyamoq lyis phang nhang.
15 Yhensain eh, nvng nhant dang yahge
nah nho mhayah she dah soq gas jeismuh khyoh nyvng los,
nyeisjvng vpom vyang eq thuq los.
16 Nyang nyhang masyah ngos lyis duons zwi toh;
ngos lyis jeisnyaus thomh masyah siq yoeus.
17 Yombos dah ngah jeswus yahge ngah xiklyis yom sunk bos las
ngos lyis hoeng bang dvnganh masyah nyang ngos lyis lhuiq kat:
18 Shanghsenh buisnyeis lyis nyamoq ngos lyis zan los laus eq
Yhensain ka ngos lyis thuk soeu nghuot.
19 Nyang ngos lyis chiqjyen masyah pangh thuq kat,
nyang ngos lyis nhaiqdoeus nyeis yvmvyah ngos lyis khyuot yoeus.
20 Yhensain ka ngos dan khyvlyis kuot las nyang ngos lyis phauh shangh.
Ngos yobos ma bos yvmvyah nyang ngos lyis shvmanh dyei.
21 Ngos Yhensain dah cho chank kuot,
ngah Mangso jyank mhayah tauh las ma gis zis ma kuot.
22 Nyah lyi dvnganh ngah xikkhonh mas joq las,
ngos nyah lyi thungh lyis ma tyamp.
23 Ngos nyah xikkhonh mas yobos huon chank ma bos,
yaunos lyis jhank nyeis.
24 Yhensain ka ngos dan zis yah dvyhangteh ngos lyis phauh shangh,
nyah nyoqlvtjvng mas ngah loq lhoqshang.
25 Lomluk soeu lhyi nvng lomluk cho chixoeuq.
Yobos huon chank ma bos soeu lhyi nvng yobos ma bos cho chixoeuq.
26 Gyingshang soeu lhyi gyingshang ehnyet,
nhaiqlom guih soeu lhyi tyi dah ehnyet chixoeuq.
27 Nvng ehnyet nyhen mha gyoh bang lyis khyuot yoeus las
khwank bang lyis khyoq tyamp.
28 Yhensain eh, nvng ngah nyibung lyis tuonh toh dyei.
Ngah Mangso ka ngah mauchuotdwang lyis pank dyei.
29 Nvng pangh zis yah ngos ngah jeswus phung lhyi yoh ung,
ngos ngah Mangso yomsoq gvng mas gos toh cho lhyi yoh lhyweq.
30 Mangso kuot khyvlyis nyah cho ka dyinghjet.
Yhensain dah dangthoengh kyink lyis jus.
Nyang gas nyang lyis khau nges bang dvnganh dah gos nghuot.
31 Yhensain mha lai las Mangso hank bos lah?
Yah Mangso mha lai las khaugus Luk-uk hank nghuot lah?
32 Nyang gas ngos lyis yom bos nhang dah Mangso nghuot las
ngah cho lhyi dyinghjet nhang.
33 Nyang ngah khyei lyis cvt khyei teh kuot las,Ref 18.33: Hab 3.19
ngos lyis nyhang joqyos mas yap nhang.
34 Nyang ngah loq lyis jes muh xik dyei las,
ngah loqyom thunk lyei yoh thung.
35 Nvng ngos lyis gomh zis yah khyuot yoeus.
Nah loqyos loq ngos lyis thukxank las,
ngos kuhxing los shoq pangh kat.
36 Nvng ngos loh cho lhyi jyeq kat dyei las
ngah khyei ma jyot loh.
37 Ngos jeswus lyis chank khat las duons.
Nyamoq ma dyoqbis dvchank ngos ma tauh los.
38 Ngos nyamoq lyis zan khyoq las nyamoq ma yoh toq lo.
Nyamoq ngah khyei o mha lains loh.
39 Nvng ngos lyis moengzan das zis yombos nhang lha,
ngos lyis tyixo toq los bang lyis, ngah khyeiyang mas gyoh nhang.
40 Nvng ngah jeswus lyis nungs phuk phang nhang lha,
ngos lyis hoeng bang lyis mhont tyamp.
41 Nyamoq lyis pangh das xiklyis kaiq laus eq nyamoq lyis khyuot yoeus soeu hank ma bos,
Yhensain lhyi lui laus eq nyang nyamoq lyis ma toeuh dyei.
42 Ngos nyamoq lyis lyeis yah muot tangh dah phvlhau teh mhont las,
talhoeu mha thomhbop teh nang nheh toh.
43 Dius jens zan goh yvmvyah nvng ngos lyis lhuiq las,
dius nyau jens dah uhloms duot nhang.
Ngos ma seq dah dius jens ngos lyis phuqsoe los.
44 Nyamoq ngah cho xauhgyo yah dvyih ngah domsyos gyo las
gohnyau bang ngah xikkhonh mas dupaiq.
45 Gohmau bang nhaiqlom thank las,
nyamoq tamh joqyos masyah gyuk nvn thuq los.
46 Yhensain nyang nyeis! Ngah Luk-uk ngelhoq bas jungh.
Ngah khyuot yoeus Mangso chunghtoq zis xauh bas jungh.
47 Nyang gas ngah xiklyis lvto phuk dyei las dius nyau jens lyis
ngah o mha khyoq dah Mangso nghuot.
48 Nyang ngos lyis ngah jeswus masyah khyuot las,
ngos lyis tyi lha toq los bang thoq mas chunghtoq toh.
Lhuotzo bang masyah lhuiq kat.
49 Housoeh las Yhensain eh,
dius nyau jens mas ngos nvng lyis nhaiqshoqlang oen,Ref 18.49: Rom 15.9
nah nyings lyis chungh dah chunghthwe kat das.
50 Nyang nyah hwankti lhyi ung cho zainsmuh dyei.
Nyah coeu juot xauh soeu ge
Dawi yahge nyah vyau vshih lyis nhaiqnyen cho vcaiq vto chixoeuq.