CHUNGH 116
Shei masyah Luiq las Chungh
1 Yhensain ka ngah shvmanh dung dang xauhgyo;
nyang ngos shvmanh dung lyis gyo yoeus dyei yvmvyah ngos nyang lyis jyet.
2 Dvcaiq gonh ngos dung khanghmuh
nyang gyo yoeus dyei.
3 Shei cho dah jeswus gas ngos lyis tsain lhaink toh,
gyukphoh lop gas ngos lyis nyheih lhunk toh;
ngah jyank mas chiqjyen cho yahge gyuk cho yah dyingh joq.
4 Housoeh ngos Yhensain lhyi lui las,
Yhensain eh, ngos lyis jenh khyuot yoeus aq, oen.
5 Yhensain ka nhaiq seq nyen las gis soeu nghuot.
Yah Mangso ka nhaiqnyen shoh seqgyo soeu nghuot.
6 Yhensain ka pangh soeu ma bos bang lyis gos dyei;
ngos yaukyenh lyis ngos lyis khyuot yoeus.
7 Yhensain ka ngah xiklyis gis yvmvyah,
ngah dyos eh, nghamhnywe aq.
8 Yhensain ka ngos lyis shei cho mhayah khyuot yoeus.
Nyang ngah nyoqdyeis doms nhang,
ngos somh loh das cho mhayah gomh dyei.
9 Housoeh las kang dwis dah mungkvn mas
ngos Yhensain xikkhonh mas suh e das.
10 Ngos thungh thyi zis xauh nyeis oen sang laus eq,Ref 116.10: 2Kr 4.13
ngos lomsjingh nyeis shih.
11 Ngos gyuk dvn zoh lyis,
Dius dvnganh gas hwah bang nghuot, oen goeus.
12 Yhensain ngos lyis dyei dah gis cho lhyi
ngos khasoeh thoq cap das lah?
13 Yhensain ngos lyis khyuot yoeus gvng mas ngos nyang lyis
nhaiqshoqlang oen zvbiq jyungshuk chi los dyei das.
14 Ngos Yhensain lhyi dangthoengh toh zis,
nyah dius jens dvnganh dah huom mas dyei das.
15 Yhensain dah dius jens dvyuk yuk shei loh zis gas
nyang lyis kha iq nos nhang!
16 Yhensain eh ngos nah jyeidwis nghuot;
Nah jyeidwis yahge nah jyeidwis nyhiq dah lo nghuot.
Nvng gas ngos lyis shei mhayah khyuot yoeus goeus.
17 Ngos nvng lyis nhaiqshoqlang jyungshuk phudyei las,
nvng lyis shvmanh dung das.
18 Ngos Yhensain lhyi nyhen toh zis
nyah dius jens dvnganh dah xikkhonh mas tyink dyei das.
19 Houka Yerusalem mas joq, nah gyingshang Yhenmuh mas nghuot.
Yhensain lhyi chungh!