5
Nyi Lvng Shuot Cho Zaih aq
1 Ngah lo eh, ngah joeui cho lhyi kamp gyo aq. Ngah seq gyo cho lhyi gyo yoeus aq.
2 Housoeh lyis nvng zaih zis yah nyeis las nvng taiq dang gas nvng seq cho bos yvlyis chixoeuq das.
3 Wotwu dyoq dah vmesbih nhuotkuk gas dyoyhei yaus las, nyah nhuot gas coeu thoq lyis jyuot laus eq,
4 nyah vthang ka nyonoq teh khoh las, aiq shot zuk moengsa teh thoq.
5 Nyah khyei ka shei mau mas gyoh loh, nyah beszoh gas lopdungs pheh loh.
6 Nyang gas kang dwis cho pheh loh dah cho mha ma nyeis, nyah cho ka vtyi vkamh nghuot nyeis laus eq nyang hauh yvlyis ma seq.
7 Housoeh las gvshih ngah lo jens eh, ngah dang gyo yoeus geh; Ngah nhuot mas dah dang yah vgang loh.
8 Houteh vmesbih yah we we jhank aq. Nyah yhen khomhdwang mas vni loh.
9 Housoeh ma nghuot lyis nvng gas nah nyoqnho ngelang gohyuk lyis dyei las, nah kang lhyi lhoeng bang jyank mas kyauh das.
10 Lvbaus gas nah zisyos dvnganh yoeus loh las, nvng yomkat toh zis lvbaus yhen mha jweh das.
11 Nah gungs, nah shoh yom loh lyis nvng thang thank lyis kuk das.
12 Nvng taiq das zis gas, Ngos gas jyauh cho lhyi hoeng goeus nyvng! Taiq kyingh cho lhyi ngah nhaiq mas chaxwe ma nhang kuot goeus nyvng!
13 Ngah svra jens dah thwe lhyi domsyos ma gyo, ngos lyis jyauh mhoq bang dah dang lyis ma kamp gyo kuot goeus nyvng!
14 Ngos gas huom dah dius phung gungs mas thyoqpi cho vluk thank shoq kuot goeus nyvng, ge.
15 Nvnyang dah jeisbung mas dah jeis, nvnyang dah jeisdwang masyah thuq nyeis dah jeis lyis shuk aq.
16 Nah jeisthuq dwang wus cho mha dyingh shuon loh gis lah? Nah jeislvng moeng mas yaus loh gis lah?
17 Hauh zis lvbaus lyis vdyei, nah xiklyis kyingh nghuot bas jungh.
18 Nah dah jeisthuq dwang gas ngelhoq bas jungh, nah loyvm yoq dah yhensain nyhiq yah pyo aq.
19 Nyang gas jyet phoh cvt yahge yungh dah lvlyo teh, nyah sainhkhonh gas nvng lyis vjangh shvpyo nyeis bas jungh. Nyah jyetdap zis gas nvng lyis vjangh twih toh bas jungh.
20 Ngah lo eh, nvng chamus wotwu dyoq dah vmesbih yah neh nyeis lah? Soeu nyi dah sainhkhonh mas po toh lhyeh?
21 Nvng kuot cho ka Yhensain xikkhonh mas nghuot las, nyang gas nvng kuot cho dvnganh lyis nghamh suon yoeuh nyeis.
22 Lhung soeu ka nyah lyi ma chi cho lhyik mas nyih las, nyah yaunos twih mas nyih.
23 Nyang gas nyang gungs nyang ma joeu las shei das. Nyang lyis nyah dah koh cho yah twih toh las chowhang loh das.