3
Loyvm jens lyis Joeui dyei
1 Ngah lo eh, ngos jyauh cho lhyi vtohnyhik, ngos tyingtoh dang lyis nah nhaiqlom mas vjangh soh nyeis aq.
2 Khasoeh ge lyis ngos jyauh cho ka nvng lyis kang xing nhang zis yah nyeisgis yaplhoq nhang das.
3 Jyetdap sainhnos cho yahge lomluk cho lhyi nvng yah vgang loh nhang. Hauh zis nah lainzain mas wuot toh aq; nah nhaiqlom mas lhaih comh toh aq.
4 Housoeh lyis Mangso xikkhonh mas dius xikkhonh mas nvng nyoqnho yoh las nyings hoeuh das.Ref 3.4: Luk 2.52
5 Nah nhaiqlom gonh Yhensain lhyi loms aq; nvnyang dah seqgyo cho mha vnges.
6 Nvng kuot cho khanghmuh mas Yhensain lhyi soh aq. Nyang nvng lyis jus cho tuonhshet das.
7 Nvng nvnyang joeui bos oen vnghamhzo, Yhensain lhyi gyukwoms zis yah ma gis zis jhank aq.Ref 3.7: Rom 12.16
8 Nvng housoeh kuot lyis hauh zis gas nah gungs xiklyis mvcheih duot las yanghzan zis yah shohyau mas shohkhyang yah dyingh das.
9 Nvng yoh zisyos yahge nah maunyeis mas thuqh dah jyo, gis thank zis Yhensain lhyi dyei zis yah nyang lyis nyoqnho ngelang dyei aq.
10 Nvng housoeh kuot lyis nah jyi mha wom dyingh das, nah zvbiq tyikzwvng gas zvbiq saiq dyingh shon das.
11 Ngah lo eh, Yhensain jyauh mhoq lyis chaxwe ma nhang vkuot, nvng lyis kyink lyis gyo yoeus aq.Ref 3.11: Yob 5.17Ref 3.11-12: Heb 12.5-6
12 Uwus gas nyang nhaiqdoeus lo lyis jyauh mhoq teh, Yhensain nyang jyet soeu lhyi jyauh mhoq.Ref 3.12: Nyoq 3.19
13 Joeui xo nyvng soeu, seqgyo cho bos los soeu ka ngelhoq.
14 Joeui mhayah yoh dah vmyat gas ngwis masyah yoh dah vmyat thoq lyis zes gis. Joeui ka xing thoq lyis zes phauh.
15 Joeui ka phauhdap luk thoq lyis zes phauh las nvng omes zis cha yah eq ma yoh byi.
16 Joeui ka nvng lyis kang xing nhang, dis cho yahge nyoqnho ngelang dyei.
17 Nvng joeui bos khyvlyis kang dwis lyis nvng nyenstap cho, ngwis ngon dah kang dwis cho yoh das.
18 Joeui lhyi zwi toh bang gas ngelhoq; hauh zis nyamoq lyis kang dyei nhang.
19 Yhensain ka nyeisjvng lyis nyah joeui yah kuot toh.
Nyah dah seqgyo cho yah maukhung lhyi joq nhang.
20 Nyah seq cho ka jeislvng jens lyis yaus thuqh los nhang.
Jyommauh gas nyeisjvng lyis mauwus dyei.
21 Ngah lo eh, nah joeui yahge seq cho lhyi zwi zains toh aq. Hauh yvlyis khanhamp eq vkat khyoq.
22 Houka nvng lyis kang, ngwis ngon las pyo dah kang dwis cho tsain dyei das.
23 Nvng nah cho jesluiq shohluiq yoh loh las, khyeiuh yangh ma thungh das.
24 Nvng yhet loh lyis ma gyuk noh; nyens gonh vlhomuh yoh yhet das.
25 Lhung bang jyank mas dyoqbis zainsmuh gas lyeis jyang los teh nyetlos nyettant los lyis nvng hauh yvlyis ma gyuk noh.
26 Yhensain ka nvng lyis jesluiq shohluiq gomh das. Nyang nvng lyis lhyik mas ma nyih nhang das.
27 Chah nyeis bang lyis, khanhamp eq nvng gis zis yoh kuot nyhoq kuot dyei aq.
28 Nah yhenkyoh lyis gvshih yoh pangh yvlyis, khanhamp eq vsheq toh, nvpyo los aq ngos dyei das oen vsang.
29 Nvng lyis loms las nah vnvm mas nyeis dah nah yhenkyoh nos das khyvlyis ma gis cho cha eq vtoeuq.
30 Nvng lyis khanhamp eq cha ma nos nhang ku soeu yah soe ma bos yvmas vtaiq phyen-goh.
31 Lhuotzo bang lyis vnoh, nyamoq teh kuot das oen eq vnghamh thyet.
32 Khasoeh ge lyis Yhensain ka ma gis zis kuot bang lyis choqh laus eq dan bang lyis gas nyang dyenschangh kau kuot.
33 Lhung bang yhen lhyi Yhensain nhoengh, dan bang dah yhenbang lyis gas dvshvmanh dyei.
34 Nyang gas jwangh bang lyis jwangh laus eq ehnyet nyhen mha gyoh bang lyis nyoqnho yoh nhang.Ref 3.34: Yak 4.6; 1Pt 5.5
35 Joeui bos bang gas chungh phoh dah nyings hoeuh das, koh bang gas xoqphuh das.