29
1 Taiq kyingh zis xauh khanghmuh ehnyet zes than nyeis shih lyis gas, dvnyeih gas nvng khanhamp eq ma yoh toq lo shoq thungh thyi zis xauh das.
2 Ngos lyis dan dah guon soeu chixoeuq aq, housoeh lyis ngos nvng lyis pyo dah dius jens chixoeuq das. Ngos lyis lhung dah guon soeu chixoeuq aq, housoeh lyis ngos nvng lyis vshoh vjyen bang chixoeuq das.
3 Nvng joeui lhyi phauhtap toh lyis nah gvng mas nah uwus yoh gaus das. Nghe nyhiq cho mha ngwis yhung mhont zis gas koh cho nghuot.
4 Hwankti ka lyi jus mas yap lyis munghdan yombos los laus eq, ngwis yoh das yvlyis kyingh vgungs toh lyis gas nyah munghdan lyis thyoqpi tyamp.
5 Nvng nah dyenschangh jens lyis mhuih chungh lyis gas nah xiklyis lhyik thung zo nyeis.
6 Ma gis bang gas nyamoq dah yaunos twih mas nyih zis xauh nyeis uhlyis ehnyet zungh bang gas gausyis zis yah luiq cho tsain yoh.
7 Dius gis gas shohjyen bang dah toeuh lyis seq dyei laus eq, lhung bang gas houteh muh lyis ma tsain seqgyo.
8 Gohyuk lyis chaxwe ma nhang bang gas wus gonh lyis yoh hoeu nhang. Joeui bos bang gas wus lyis yoh nyenstap gausyis nhang.
9 Yik soeu yah koh soeu lyis los kauq goh lyis, koh soeu ka yis kyingh yis las kaiq nhoengh nyeis.
10 Suih shet bang gas ehnyet zungh soeu hank lyis eq hoeng. Dan soeu ka houteh soeu dah kang lhyi gomh dyei das.
11 Bang soeu ka nyah nhaiqlom gywes cho lhyi dede chixoeuq nyeis laus eq dolhain bang gas jhen zis yah joeu nyeis.
12 Guon soeu ka ma jus dah loeus gyo yoeus lyis nyah xamchangh jens dvnganh eq hwah bang duot das.
13 Shohjyen soeu yahge nyang lyis zaiq soeu aiq yuk lyis yah nyoq tap dyei soeu ka Yhensain dvyuk kyingh nghuot. Haih cho nyah aiq yuk mas doeusgoh.
14 Hwankti ka shohjyen soeu dah toeuh lyis gos dyei soeu nghuot lyis gas, nyang gas nyangh shoq guon nyeis das.
15 Soq dyei cho yahge toh dyei dah chank nhang cho ka loshang jens xiklyis gis. Loshang jens nyamoq o khyvlyis toh lyis nyamoq gas nyamoq ungwes moq lyis xoqphuh nhang bang bweh das.
16 Ma gis bang hwankti tank mas tsung lhyi dius sat muh je los. Nghuot laus eq dan bang gas housoeh teh bang dah lains somh yvlyis yoh nyvng das.
17 Nah lo lyis toh dyei dah chank chah cho jyauh aq, housoeh lyis nvng nyah gvng mas yoh hwank das. Nyang nvng lyis khanhamp eq xoqphuh nhang das zis ma nghuot.
18 Mangso choshwih zis ma bos dah dius nyau gas vshung vgvn ma bos dius nyau nghuot. Mangso dah lyi chank soeu ka ngelhoq.
19 Nvng nah jyeidwis lyis dang taiq zis yah kyingh yoh soq dyei das zis ma nghuot. Nyang gas nvng taiq zis seqgyo laus eq dang gyo das zis ma nghuot.
20 Ma nghamh yoeuh dang chilhaiq kat soeu thoq lyis koh soeu xiklyis nghamhloms chank zes bos shih.
21 Nvng nah jyeidwis lyis ngis shih lyis yah nyang cha o cha dyei man toh lyis gas, dvnyeih gas nvng sain zis dvnganh nyang sain yoeus loh das.
22 Nhaiq lvnyap yo bang gas dyoqgoh cho yahge yau cho nyoshoq bweh nhang nyeis.
23 Lhoq lhoq teh kuot cho ka nvng lyis somh nhang laus eq, nvng ehnyet nyhen mha gyoh lyis gas nvng phauh nyang cho xauh kham yoeus das.
24 Khauh soeu dah dyenschangh duot soeu ka nyah gungs dah ma gis thank jeswus nghuot. Nyang gas soetuon jang mas jus dah kanghjyoeng kat lyis joeng zis xauh das, ma jus zis taiq lyis eq Mangso yah nyang lyis nhoengh das.
25 Gohyhamh bang nvng lyis khasoeh tsain nghamh nyeis cho nvng chiq lyis gas gyukphoh nghuot laus eq nvng Yhensain lhyi loms las zwi zains toh lyis gas jesluiq.
26 Yuk khanghmuh gas guon soeu dah ehnyet gis yvlyis omes nyeis laus eq lyi jus cho ka Yhensain mhayah kyingh dvxauh kham yoeus.
27 Dan bang gas lhung bang lyis hoeng; lhung bang eq dan bang lyis hoeng.