26
1 Koh soeu lhyi chungh zis gas ma doeus. Houka gywes nyos lyis gyu gyoh las jyo yhomh nyos lyis mau wus teh nghuot.
2 Nhoengh dang gas ma zangh mon soeu lyis gas ma zangh. Houka khanhamp eq ma no lo dang yenh dah mau dang nghoq jens teh nghuot.
3 Nyang lyis lvxuk yah xuk chah, mauhlyihzoe lyis lungthungh kat chah, houyah dvyhangteh koh soeu lhyi lyuk chah.
4 Vjyuk ma bos dah nyeidang lyis nvng phuk taiq nghuot lyis nvng eq hau nyei soeu teh vjyuk ma bos soeu duot nyeis.
5 Vjyuk ma bos dah nyeidang lyis vjyuk ma bos khyvlyis phuk taiq aq. Hauh uhlyis nyei soeu ka nyang nghamh khyvlyis ma nghuot yvlyis nyang seq los das.
6 Nvng koh soeu lhyi yah dang tying kat zis gas, nah khyei lhyi thyet tyamp zis yah doeusgoh, nvng gas shanghsenh cho dung yoeus zis dvnghuot.
7 Khyei dyoq soeu cho ma yoh suh teh koh soeu eq sodang ma seq taiq.
8 Bang soeu dvyuk yuk lyis chungh zis gas panh mas lukgoq twih tap zis yah dvyhangteh nghuot.
9 Koh soeu joeui bos soeu dah sangkhyangh taiq zis gas, yhei yet soeu nyah loq mas zoeu phe soeu teh nghuot yvlyis soh nhang.
10 Koh soeu yahge yhei pauhzoe lyis mvgon uhkung lhung soeu ka hau muh yah sen bang dvnganh lyis nos nhang nyeis.note 26.10 Haih sonzoh ngis 10 Hebre mas ma bvng.
11 Lvkhuih gas nyang duk toh yvlyis doms zo teh koh soeu ka nyah dah koh muh lyis doms kuot nyeis.
12 Joeui ma bos nyeis laus eq, joeui bos ge nghamhzo soeu thoq lyis koh thank soeu ka gis shih.
13 Lan soeu ka yhen mhayah chamus ma thuq yenh? Nyang cha lhyi gyuk nyeis? Khangkhyi lhyi paq!
14 Khomh gas nyah khomhtank mas lhain nyeis teh, lan soeu ka nyah yhetyos mas phanh nyeis.
15 Dius dvyhamh sunk lan las nyamoq dah nhuot khau mha zonoms kat das zis yangh ma mes.
16 Lan soeu ka, nyamoq jus dah nghamh cho lhyi kanghjyoeng yah yoh taiq kyoh bang nyhet yuk thoq lyis joeui zes bos ge nghamhzo das.
17 Vsainnyang muh yah ma sen, dyoqgoh yvmas nhunk soeu ka, cho pheh thuq las lvkhuih no lyis lang dyei zis yah doeusgoh.
18-19 Dius dvyuk gas gohtoeu dvyuk lyis mhuih zo lho lha zeh zis dvnghuot ge soeu ka, yoh shei nhang dah kyonhkhyi yah lhoeu dah huonh soeu yah doeusgoh.
20 Thangh ma bos lyis nyi shei loh, khyangh ma taiq lyis dyoqgoh cho ma bos.
21 Xweh gas nyijyenh lyis duk los nhang lha, thangh yah nyi duk nyeis nhang teh soe lhoq thuq mes bang gas phyen-goh dang lyis tsoq taiq nhang nyeis.
22 Loeusmus dang gas wheikhuiq bos las, yang hauh zis lyis kha iq gyo mes nyeis lah!
23 Ma gis dah nghamh yvlyis nghop toh dah dang chau ka phauh ma dap dah tsoh auh mas ngwis nyop yah shauq toh zis yah doeusgoh.
24 Gis guons kuot dah ehnyet bos soeu ka jyoeuq mhuih dang dah nungsthank mas nyah dah hoeng ehnyet lyis nghop toh.
25 Hauh dang gas chau laus eq nyang lyis vjingh: khasoeh ge lyis nyah ehnyet mas hoeng zis yah dyingh muis joq.
26 Nyang nyah hoeng ehnyet lyis vguons kuot toh laus eq nyang kuot dah ma gis muh lyis yuk khanghmuh nyvng das.
27 Gohyuk xiklyis dwang doeu soeu ka nyang doeu dwang mas nyang gyoms das. Kvkhyot khyot das khyvlyis kuot xi soeu ka nyang hauh yvmas thungh thyi zis xauh das.
28 Hwah dang yah dvyuk yuk lyis nos nhang mes lyis, nvng gas nyang lyis hoeng nyeis goeus. Gis guons kuot dah dang gas dyoqbis tyamp masyah lai las gohtoeu cha ma yoh bweh nhang.